ئانا تىلىم

oznur

	ئانا تىلىم                                                          ئاپتورى  ( ئەخمەت ئىمىن )        ئەي ئانا تىلىم _ ئانامنىڭ تىلى !        ئانا تىلىم !   ئانام بەرگەن تىل !       مەن سېنى ئانامدەك ئەزىزلەيمەن !   سېنى ئاڭلىسام ، ئانامنىڭ ئوتلۇق يۈرەك خىتابىنى ئاڭلىغاندەك بولىمەن ؛ سېنى سۆزلىسەم ، شۇ خىتاپقا جاۋاپ سادايىمنى ياڭراتقاندەك بولىمەن . ئانام ماڭا تۇنجى قېتىم « بالام - باغرىم » دېگىنىدە سەن بىلەن _ دەل مۇشۇ ئۇيغۇر تىلىدا سۆزلىگەن . مەنمۇ تۇنجى قېتىم « ئانا _ ئانام » دېگىنىمدە سەن بىلەن مۇشۇ تەۋەرۈك تىل  بىلەن سۆزلىگەن .   ئانا تىلىم سېنىڭ ھەر بىر تاۋۇشۇڭدا ئانامنىڭ يېقىملىق تىنىقلىرى بار ؛ سېنىڭ ھەر بىر ئۇرغۇڭدا ئانامنىڭ نەپىس ھىسياتىنىڭ ئۇرغۇشلىرى بار ؛ سېنىڭ ھەر بىر ياڭرىشىڭدا ئانامنىڭ غۇرۇرى بار ، ئىپتىخارى بار .   مەن سەن ئارقىلىق ئانامنىڭ كەچمىشلىرىنى ئۇققان ؛ سەن ئارقىلىقلا ئەجداتلارنىڭ كىملىكىنى ئۇققان ؛ سەن ئارقىلىقلا ئانا ۋەتەننىڭ نىمىلىكىنى ئۇققان    شۇنداق سەن ئارقىلىق مېنىڭ ئۇققان - بىلگەنلىرىم جىق ، ناھايىتى جىق : سەن ئارقىلىق ئورخۇن ۋادىسىدىكى مەڭگۈ تاشلارنىڭ سىرىنى ئۇقتۇم ، ئەجداتلىرىمنىڭ گۈللىنىش ۋە خارابلىشىش تارىخى كۆز ئالدىمدا ئايان بولدى . ئۇنىڭدىكى غالىپلىققا بولغان مەدھىيە كۆڭلۈمنى يايراتتى ، مەغلۇبىيەتكە ئۇقۇلغان مەرسىيە يۈرىكىمنى قاقشاتتى .    سەن ئارقىلىق « ئوغۇزنامە » نى   _  مەشھۇر قەھرىمانلىق داستانلىرىنى ئوقۇدۇم . ئوغۇز خاقاننىڭ «ئاتلان » دەپ نەرە تارتىشلىرى يۈرىكىمنى لەرزىگە سالدى ، جەڭ تۇلپارلىرىنىڭ تاشقا تەگكەن تۇياقلىرىدىن چاچرىغان ئۇچقۇن كۆزۈمنى چاقناتتى .    سەن ئارقىلىق « ئالتۇن يارۇق » نىڭ نېمىلىكىنى ئۇقتۇم .بېشبالىقلىق  تىلشۇناس .لىرىنىڭ تاۋغاچ تىلىدىن ئۆرۈگەن بۇددا ھىكايىلىرى مېنى گۈزەل بىر ئەپسانا دۇنياسىغا باشلاپ باردى . بۈگۈنكى ئىدىقۇت خارابىسىگە قاراپ ئۆتمۈشتىكى ئاجايىپ بىر سەلتەنەتنى  كۆز ئالدىمغا كەلتۈردۈم .    سەن ئارقىلىق « ئىككى تىگىننىڭ ھىكايە » سىمۇ ،« چاستانى ئىلىگ بەگنىڭ ھىكايە » سىمۇ قەلىپ سەھىپەمگە نەقىشلەندى . مەن ئۇلارنى ئانام ئېيتىپ بەرگەن چۆچەكلەردەك زوق - ئىشتىياق بىلەن ئاڭلىدىم .    سەن ئارقىلىق « مايترى سىمىت » تىن قەدىمكى بىر درامىنى كۆرۈش بەختىگە مۇيەسسەر بولدۇم ؛ مايترتتىن مەسھكىچە ، مەسھتىن ئىمام مەھدى ئاخىر زامانغىچە بولغان باغلىنىش مىنى چوڭقۇر ئويغا سالدى .    سەن ئارقىلىق « تۈركى تىللار دىۋانى » نى ئوقۇدۇم . « قۇتادغۇ بىلىك » نى ئوقۇدۇم . « ئەتەبەتۇل ھەقايىق » نى ئوقۇدۇم ، قەدىمكى شېئىر - داستانلارنى ئوقۇدۇم ، نۇرغۇن - نۇرغۇن بىباھا ئىلمى ھەقىقەتلەرنى ئوقۇدۇم .     سەن ئارقىلىق « ئون ئىككى مۇقام » نى ئاڭلىدىم ، سەن ئارقىلىق « ئون ئىككى مۇقام » نى توۋلىدىم ، كۈي مۇقام دېڭىزىدىكى ھېكمەت گۆھەرلىرى سەن ئارقىلىق ، پەقەت سەن ئارقىلىقلا ئۆز قىممىتىنى ، كارامىتىنى  نامايەن قىلدى .     شۇنداق ! ئانا تىلىم _ پاراسەتلىك ، باتۇر ، ئەمگەكچان مىللىتىمنىڭ  تىلى ! سەن ماڭا نۇرغۇن نەرسىلەرنى بىلدۈردۈڭ ، سەن ماڭا نۇرغۇن ھىكمەتلەرنى سىڭدۈردۈڭ . سەنسىز مەن مەۋجۇدىيتىمنى تەسەۋۋۇر قىلالمايمەن.     ئەي ئانا تىلىم _ ئانىلىرىم سۆزلىگەن تىل ، ئاتىلىرىم سۆزلىگەن تىل ، سەن ئاكىلىرىم سۆزلىگەن تىل ، ئاچىلىرىم سۆزلىگەن تىل ؛ سەن ئىنىلىرىم سۆزلىگەن تىل ، سىڭىللىرىم سۆزلىگەن تىل ؛ سەن باللىرىمنىڭ تىلى ؛ سەن ھەممىمىزنىڭ تىلى ! ھەممىمىزنىڭ تىلى سەن بىلەن ، پەقەت سەن بىلەن چىققان .    ئاتامنىڭ  « قارا ، بالام » دېگەنلىرىدىن مەن خۇددى تەرەپنى پەرق  قىلىدىغان كومپاسقا ئېرىشىمەن .      ئانامنىڭ « ئويلا ،بالام  » دېگەنلىرىدىن مەن خۇددى قاراڭغۇلۇقنى يورۇتىدىغان مەشئەلگە ئېرىشىمەن .    جانانىمنىڭ  « بېقىڭ ، جېنىم » دېيىشلىرىدىن  مەن گويا چاڭقىغان يۈرەكنى سۇغۇرىدىغان بۇلاققا ئېرىشىمەن .    بالامنىڭ « مانا ، دادا » دېيىشلىرىدىن  مەن گويا مېنى كۆككە ئۆرلىتىدىغان قاناتقا ئېرىشىمەن .    ھەر جۈملەڭدە بىر ھېكمەت ، ھەر جۈملەڭدە زور قىممەت . ھەر جۈملەڭكى بىر سەنئەت ، ھەر جۈملەڭكى زور رىغبەت .  شۇنداق سەن مەن ئۈچۈن قۇدرەت .    سەن مەن ئۈچۈن سۆلەت ، سەن مەن ئۈچۈن دۆلەت !   ئۇيغۇرۇمنىڭ ئۆزگىچىلىكى دۇنيادا سەن بىلەن نامايەن  بۇلۇپ تۇرىدۇ . سەن گويا ئىنسانىيەت تىل دېڭىزىغا قۇيۇلۇپ تۇرغان بىر دەريا. ئىنسانىيەت دېڭىزىنىڭ شاۋقۇنلىرىدا سېنىڭ پىچىرلاشلىرىڭ بار ، ئانا تىلىم !    جاھان گۈلىستانىدا تۈمەن مىڭ قۇش ناۋا قىلىدۇ ، سەنمۇ ئۇنىڭدا ئۆزگىچە سايراۋاتقان بىر قۇش . سېنىڭ سايرىشىڭدىن باشقىلارمۇ زوق ۋە بەھىر ئالىدۇ .    ئىنسانىيەت سىمفونىيسى پۈتكۈل ئىنساننىڭ ئىشتىراك  قىلىشى  بىلەن مۇكەممەللىككە ئېرىشكەن ، ئۇنىڭدا سېنىڭمۇ ئۆزگىچە ياڭرايدىغان كۈيۈڭ بار .    ئانا تىلىم ، سەن بىر  گۈل ، ھەر خىل تىلنى ھەر خىل گۈلگە ئوخشاتقانغا ئوخشاش ، مەنمۇ سېنى بىر گۈلگە ئوخشىتىمەن . گۈلزار بىر خىل گۈل بىلەنلا رەڭدارلىققا ئىگە بۇلالمايدۇ . جاھان گۈلزارىنىڭ رەڭدارلىقىدا سېنىڭمۇ بىر ئۈلۈش جىلۋەڭ  بار .    ئانا تىلىم _ ئانام بەرگەن تىل ! مەن سېنى ئانام قەدىرلىگەندەك قەدىرلەيمەن . ئانامنى قەدىرلىگەندەك قەدىرلەيمەن . ئانامنى قەدىرلىگىنىم ئانىلارنى قەدىرلىگىنىم !  ئاشۇ ئانىلارنى ئۇلۇغلاۋاتقىنىمۇ  مېنىڭ تىلىم ، مېنىڭ مۇشۇ ئانا تىلىم !     ( بۇ ئەسەر يازغۇچى ئەخمەت ئىمىننىڭ « جۇلدۇر كېپەن خۇتۇننىڭ ساداسى » ناملىق نەسىرلەر توپلىمىدىن ئېلىندى ،)

Xaparang

	ئانا تىلسىز ماڭا دۇنيا يالغاندەك، تىلىمنى بىرسى يۇلۇپ ئالغاندەك. تۇيۇلىمەن ئۆزۈمگەبىر ھايۋاندەك، ياق!ئۆلىمەن ئانا تىلىمدىن ئايرىلسام.

XERHAN

	ماۋۇ تىمىنىڭ چۆلدەرەپ قالغىننى كۆرەي ...

karwan21

	ئانا-تىل ئانىمىز بەرگەن تىل،كۆپ تىل بىلىش شەرەپ،ئانا تىلنى بىلمەسلىك جىنايەت،ئانا تىلغا قىلىنغا ھاقارەت،ئانا تىلنى ئۆگىنىش پەقەت ساۋاد چىقىرىش بىلەنلا چەكلەنمەيدۇ،ئانا تىل ئارقىلىق شۇ مىللەتتىكى ئۆرپ-ئادەت،دىننىي-ئېتىقاد،پەلسەپە،دۇنيا قاراش،مىللەت ئېدىلوگىيىسى،قانلىق تارىخ-كەچمىشلىرىنى ئۆگىنىش،ئۆز مىللىتىگە خاس ئوبراز ياراتغاندا،ئاندىن ئانا تىغا يۈز كېلىدۇ،ئانا تىلنى ئۇقۇپلا،باشقا مۇھىم ئىشلاردىن خەۋەردار بولمىغان ئۇيغۇر پۇشتى 21-ئەسىر تىلىدا كىلۇن ئادىمىدىن باشقا نەرسە ئەمەس.

qartekin

	ئەخمەت ئىمىننىڭ نەسىرلىرى ھەقىقەتەن بەك ياخشى جۇمۇ!~ http://www.izbasar.com/1724

avam0507

	ئانا تىلىم زەر تىلىم.. پەخىرلىنىمەن.

kahrizat

	ئانا تىلىمىزنى مەڭگۈ قەدىرلەيلى ، باشقا تىللار ئالدىدا دائىم قەد كۆتۈرۈپ تۇرسۇن

gulmehri

	ئانا تىلىم ئانامنىڭ ئاق سۇتى بىلەن، چوڭقۇر سىڭگەن دىلىمغا دىلىمغا مېنىڭ. ئىگىز چوققا ئارمانلارغا يەتكۈزەر تىلىم، يول كۆرسىتەر ئۇ يورۇق مەشئىلىم مېنىڭ.

mehriban

	تىل دېگەن بايلىق.

oznur

	ئاپتور جاۋابىنى بويلاپ 2قەۋەت  XERHAN كە 2011-08-24 10:56 PMئەۋەتىلدى  : ماۋۇ تىمىنىڭ چۆلدەرەپ قالغىننى كۆرەي ...         بۇ تېما نىمىشقا چۆلدەرەپ قاپتۇ ؟ بۇ نىمە دېگىنىڭىز . تېخى ئاخشام يوللىغان تېما تۇرسا بۇ . مەن  يوللىغان تىمامنىڭ شۇنچە تىزلا تەستىقلانغىنىغا    خۇشال بولىۋاتسام . سىز نىمانداق گەپ قىلىسىز . ئادەمنىڭ كەيپىنى ئۇچۇرۇپ .