ئۇيغۇر بېزەكلىرى (غەزەل)

tohtamux

	ئۇيغۇر بېزەكلىرى (غەزەل) ئاپتور:تۇرغۇن ئوبۇلقاسىم يىلتىز    ئەيا ئەھلى جاھان، تاپقىن خەۋەر بىزنىڭ بېزەكلەردىن، ھاياتىم كۆركى، ئەجداد روھى، سۇلماس گۈل-چېچەكلەردىن. نېمە بۇندا بېزەكسىزدۇر، ئاشۇ ئەلگە كېرەكسىزدۇر، تەۋەللۇتكى بېزەك ئۆزلۈك، تېرەن، ئالىي تىلەكلەردىن. بېزەكلەردە ئاقار دەريا، چاراقلار ئاي، قۇياش، يۇلتۇز، ساداسى مەۋجۇداد ھالقىپ چۈشەر ئاسمان-پەلەكلەردىن. قەدىم ئۆرنەكلىرى مىڭئۆي، بېزەكلىك، تاشكېمىر رەڭدار، جاۋاھىر تارىخى شاھىد چېۋەر، ئىشچان بىلەكلەردىن. نەقىشتۇر ئۆي-ئىمارەت تام، تورۇس، پەگاھلىرى ھەتتا، ئېچىلغان خىلمۇخىل گۈل تاش، سېغىز، گەچ، سىر، كېسەكلەردىن. بېساتى-بارلىقى ھەركىم ھۈنەر-سەنئەتتە مەڭگۈلۈك، جۇلا ئەيلەر سەرەمجانلار ئىشىك، تۈڭلۈك، روجەكلەردىن. تۆمۈرچى سوقسا سايماننى، قىلىپ لال پەرى-شەيتاننى، ياغاچچى راسلىغاي سىپتا-نەپىس جابدۇق كۆتەكلەردىن. گىلەم، كىگىز، يىپەك، ئەتلەس يۈزىگە باغ-ئېرەم يەتمەس، زىيا ئۆچمەيدۇ زەي، زۇننار ئېسىل كىيىم-كېچەكلەردىن... ئويۇلغان قاشتېشىدىن ئۇز زىبۇزىننەت كۆزۈڭگە ئوت، كۈلەر تۇرمۇش ئۈزۈك، ھالقا، بىلەيزۈك، كېپىنەكلەردىن. مۇھەببەتتىن كۈلەر ئالتۇن بەلەن زەرگەر قولى ئۈزرە، يانار يالقۇن بېزەنگەن خۇش، ئوماق قىز-سېكىلەكلەردىن. گېزىت-ژۇرنال، كىتابلار ھەم بېزەكلەر ئىلكىدە جەلىپكار، يەنە ھەيكەلتاراش، رەسسامۇ-خەتتات قوشكېزەكلەردىن. بېزەشلەردە شەھەر، سەھرا، بىنا، يول... ھەممىسى كۆركەم، كۆرەرسەن يېڭىلىق پەرداز ئېتىز، قىر، تاپ-چۆنەكلەردىن... «ھۈنەر-قىلساڭ ئۈنەر»، بۇ ئەنئەنەمنى چاغلىما ئاددىي، گۈزەللىك جەۋھىرى تامغاي پىچاق، قايچا، ئېكەكلەردىن. جىمى ساھە، كەسىپ سىدام چىقارماس مەھسۇلات زىنھار، بۇيۇملارغا كۆچەر ئەينەن ئۇدۇم، ئوتلۇق يۈرەكلەردىن. بېزەكلەر قۇرۇماس يىلتىز، ھاياتىي كۈچى زور-چەكسىز، تاماشا ئەيلە ئۇيغۇر قوينىدىن-كاتتا كۆرەكلەردىن... ! 2002-يىل دېكابىر، بېيجىڭ 2003-يىل -3سانىدىن ئېلىندى (مەنبە: «جۇڭگو مىللەتلىرى» ژۇرنىلى )

tohtamux

	ھازىر قەشقەردىن باشقا جايلاردا ئۇيغۇر بىزەكلىرى بىلەن شۇغۇنلىدىغانلار ۋەياكى بىزەيدىغانلار يوق دىيەرلىك بوپ كەتتى! پۇل بولسا تاس قالىدۇ دوللار بىلەن ئوي بىزىگىلى.... ئىسىت~~~~~~~~!