«غۇلجا» دېگەن يەر نامى توغرىسىدا

xopur

	سۇلتان مامۇت ئىبراھىم غۇلجا — شىمالىي شىنجاڭدىكى ھەممىمىزگە تونۇشلۇق بىر شەھەرنىڭ نامى. شۇنداقلا يەنە بۇرۇنقى جېلىليۈزىمۇ ھازىر غۇلجا ناھىيەسى دەپ ئاتىلىدۇ. ئۆتكەن ئەسىرنىڭ 80-يىللىرىدىن تارتىپ، «غۇلجا» دېگەن يەر نامى توغرىسىدا ھەر خىل قاراشلار ئوتتۇرىغا قويۇلۇپ كەلدى. مەسىلەن، شىنجاڭ ئۇنىۋېرسىتېتى نەشرىياتى تەرىپىدىن 2001-يىلى 1-ئايدا نەشر قىلىنغان قۇربانجان ئابلىمىت نورۇزى بىلەن پالتاخۇن ئەۋلاخۇن ئاپتورلۇقىدىكى «شىنجاڭ يەر ناملىرىنىڭ ئېتىمولوگىيەسى» (1) دېگەن كىتابنىڭ 121-، 122-بەتلىرىدە ئاپتورلار «غۇلجا» دېگەن يەر نامى «ئەسلىي 12 غول (ئېقىن) نىڭ نامى» دەپ ئوتتۇرىغا قويغان. بۇ قاراشتىن «غۇلجا» دېگەن يەر نامىنىڭ ئەسلىي تەلەپپۇزى «غۇلجا» ئەمەس، بەلكى «غولجا» دېگەن مەنا چىقىدۇ. ئاندىن باشقىلار تەرىپىدىن مەتبۇئاتلاردا ئېلان قىلىنغان تۆۋەندىكىدەك قاراشلار كۆرسىتىپ ئۆتۈلگەن: بىرىنچى، «غۇلجا» دېگەن يەر نامى موڭغۇللارنىڭ 18-ئەسىرنىڭ ئالدىنقى يېرىمىدىكى پائالىيەتلىرى ھەم «ئالتۇن سۈمە» (ئالتۇن قۇببىلىق ئىبادەتخانا) نىڭ موڭغۇلچە ئاتىلىشى بىلەن مۇناسىۋەتلىك، دېگەن قاراش. ئىككىنچى، «غۇلجا» دېگەن يەر نامى «تاغ قوشقىرى» دېگەنلىك بولىدۇ، دېگەن قاراش. ئۈچىنچى، غۇلجا ئەتراپىدا بۆلۈكەي، جىرغىلاڭ، پىلىچى قاتارلىق 12 غول بولغانلىقى ئۈچۈن «غولجاي» دەپ ئاتالغان، كېيىن بۇ نام «غۇلجا» غا ئۆزگەرگەن، دېگەن قاراش. تۆتىنچى، «جىرغىلاڭ غول» ئىلگىرى «غۇلجا»، «پىلىچى» بولسا «بولجا» دەپ ئاتالغان. بۇ ناملار دەريا-غول ئىسىملىرىدىن ئېلىنغان بولۇشى مۇمكىن، دېگەن قاراش. بۇ يەر نامىنى قەدىمكى ئۇيغۇر تىلىدىكى «ئېقىن» مەنىسىنى بىلدۈرىدىغان «غول» غا مۇناسىۋەتلىك دېگەن قاراشنى ئويلىنىپ بېقىشقا بولىدۇ. دەرۋەقە، بەزى پاكىتلارمۇ «غۇلجا» دېگەن بۇ يەر نامىنىڭ «ئەسلىي تەلەپپۇزىنىڭ «غولجا» ئىكەنلىكىنى ئىسپاتلاپ تۇرماقتا. «غۇلجا» دېگەن بۇ يەر نامى «غول» بىلەن «جا» دىن ئىبارەت ئىككى سۆزدىن تەركىب تاپقان. مىللەتلەر نەشرىياتى تەرىپىدىن 1986-يىلى 1-ئايدا نەشر قىلىنغان غوپۇر غۇلام ئاپتورلۇقىدىكى «ئۇيغۇر شىۋىلىرى سۆزلۈكى» دېگەن كىتابنىڭ 182-بېتىدە «غول» دېگەن سۆزنىڭ بىر قانچە مەنىسى كۆرسىتىلگەن بولۇپ، ئالدى بىلەن ئۇنىڭ «دەريا، ئۆستەڭ، ئېقىن» دېگەن مەنىنى بېرىدىغانلىقى، شۇڭا، خەلق ئىچىدە «ئۇلۇغ-ئۇلۇغ سۇنى كەشتىم، يەنە بارمۇ غول» دېگەندەك قوشاق پارچىلىرى ساقلانغانلىقى ئوتتۇرىغا قويۇلغان. مانا بۇ قوشاق پارچىسىنىڭمۇ ئەجدادلىرىمىزنىڭ «غول» دېگەن سۆزنى دەريا، ئۆستەڭ، ئېقىن دېگەن مەنىدە ئىشلەتكەنلىكىنى ئوچۇق كۆرسىتىپ تۇرىدۇ. شۇنداقلا مىللەتلەر نەشرىياتى تەرىپىدىن 1992-يىل 12-ئايدا نەشر قىلىنغان «ئۇيغۇر تىلىنىڭ ئىزاھلىق لۇغىتى» دېگەن كىتابنىڭ 3-قىسىم 900-بېتىدىمۇ «غول» دېگەن سۆزنىڭ بىر قانچە مەنىسى بېرىلگەن بولۇپ، شۇ قاتاردا ئۇنىڭ «سۇ يولى» دېگەن مەنىنى بىلدۈرىدىغانلىقى كۆرسىتىلگەن. ئەمدى «غۇلجا» (غولجا) سۆزىدىكى «جا» دېگەن سۆزنىڭ مەنىسى بولسا، مىللەتلەر نەشرىياتى تەرىپىدىن 1991-يىلى 11-ئايدا نەشر قىلىنغان «ئۇيغۇر تىلىنىڭ ئىزاھلىق لۇغىتى» دېگەن كىتابنىڭ 2-قىسىم 504-بېتىدە «ئورۇن، جاي، ماكان» دەپ ئىزاھلىغان. دېمەك، «غولجا» دىكى «غول»، «جا» دېگەن سۆزلەرنىڭ يۇقىرىقىدەك مەنىسىدىن قارىغاندا، ھازىر «غۇلجا» دەپ تەلەپپۇز قىلىنىۋاتقان بۇ يەر نامىنىڭ ئەسلىي تەلەپپۇزىنىڭ «غولجا» ئىكەنلىكىنى، ئۇنىڭ مەنىسىنىڭ «ئېقىن — سۇ يولى ئورنى» ياكى «ئېقىن — سۇ يولى ماكانى» دېگەنلىك بولىدىغانلىقىنى بىلگىلى بولىدۇ. دېمىسىمۇ، بۇ جايدا يۇقىرىدا كۆرسىتىپ ئۆتۈلگەندەك «جىرغىلاڭ»، «پىلىچى» قاتارلىق 10 دىن ئارتۇق غول-ئېقىننىڭ بارلىقى، ئۇنىڭ ئۈستىگە ئىلى دەرياسىنىڭمۇ بۇ شەھەرنىڭ جەنۇب تەرىپىدىن ئېقىپ ئۆتىدىغانلىقى قاتارلىق جۇغراپىيەلىك مۇھىتلارمۇ «غۇلجا» (غولجا) دېگەن يەر نامىنىڭ يۇقىرىقىدەك مەنىسىنى قايىل قىلارلىق ھالدا ئىسپاتلاپ بېرىدۇ. شۇڭا، ئەجدادلىرىمىز بۇ جايغا ماكانلاشقاندا، بۇ جاينىڭ ئەينى دەۋردىكى ئەنە شۇنداق جۇغراپىيەلىك ئالاھىدىلىككە ئاساسەن ئۇنىڭغا «غۇلجا» دەپ نام بەرگەن. مەنبە: جۇڭگۇ ئۇيغۇر رادىئوسى تورى http://www.uycnr.com/wh/kg/201107/t20110722_129687_1.html

mellitim

	مىنىڭچە «غولجا» دىگەن سۆزنىڭ ئاساسى باردەك قىلىدۇبىزنىڭ ئەجدادلىرىمىز ئەينى ۋاقىتتىكى يەر تۈزۈلۈش ئالاھىدىلىكىگە قاراپ  يۇرتلارغا ئىسىم قويغان ئىشلار كۆپ ئۇچرايدۇ مەسلەن - ئاتۇش دىگەن ناممۇ ئارتۈچ دەرىخىنىڭ نامىدىن كەلگەن كېيىنچە ئارتۇچ سۆزى ئاتۇش دىگەن سۆز بويىچە تەلەپپۇز قىلىنغان يەنە  ئاقسۇ ، توقسۇ ،ئۇچتۇرپان ، بالاساغۇن قاتارلىق نۇرغۇنلىغان ناملار بار

1670154432

	مەن غولجىدا ياشاپ تۇرۇپمۇ ،غۇلجا دىگەن بۇ ئىسىمنىڭ ئەسلىدە غولجا ئىكەنلىگىنى ئەمدى ئاڭلاۋاتىمەن . سىز يازمىغان بولسىڭىز مەڭگۇ بىلمەي ئۇتىدىغان ئوخشايدىكەنمەن .رەخمەت جۇمۇ سىزگە،غولجىنىڭ تارىخى ئىسمىنى توغرا تەللەپپۇز قىلىشنى شەرھىلەپ بەرگىنىڭىزگە.

ayziba

	ئەمما ئىسىل شەھەر ،،،،،،،،،،

OTYAK

	‹غۇلجا›نىڭ كېلىپ-چىقىش مەنبەسىنى تولۇق چۇشۇنىۋالدىم. ئىلى دەرياسى_ غۇلجا ئوخشاش ئىكەن. ئەجرىڭىزگە رەھمەت !

sumaya0999

	غۇلجا تەسەۋۇرىڭىزدىكىدەك تاغ ۋە باغلار بىلەن پۈركەنگەن يىشىللىققا تۇلغان بىر جاي ............. بىر قىتىم كىلىپ كۆرۈ پ كىتىشىڭىزگە راستىنلا بەك ئەرزىيدۇ .. غۇلجىغا كىلىشىڭىزنى قارشى ئالىمىز..........

kankil

	بۇسۈزنىڭ خىلى ئاساسى بار ئىكەن دىمەك غۇلجا ساپ ئۇيغۇرچە سۈز بۇلۇپ ئىكىكىلا مەنىسى ساپ ئۇيغۇرچە يەنى ياۋا قۇچقار دىگەن مەنىسىمۇ بار، ئەمدى  يەنى بىر خىل مەنىسىگە قارايدىغان بۇلساق غۇل، جا دىگەن سۈزلەرھازىرىقى تۇرپان  شىۋىسىدە ناھايتى كۈپ قۇلىنلدۇ. غۇل سۇ  ئىقىن ئىقىپ ئۈتكەن مەھەللەنى غۇل دەيدۇ مەسىلەن، مۇرتۇق غۇل، يار غۇل چىچان غۇل بۇلارنىڭ دەمىسىدە سۇ ئىقىن بار، ئەمدى جا دىگەن سۈزنى تۇرپاندا سۇ ئىقىن ئۈتكەن جاينى مەلۇم تۇساق بىلەن تۇساپ سۇ يۇلىنى ئۈزگەرتكەن جاينى جا دەيدۇ يەنى بالىلار جاغا چىقىپ سۇ چۇمىمىز دەيدۇ.

@TEMTAS

	دوسلارنىڭ غۇلجىغا كىلىپ بىر ساياھەت قىلىپ كېتىشىنى قارشى ئالىمىز... غۇلجا راستىنلا بەك گۈزەل جاي...!