بىز يوقىتىۋاتقان تەبىئىيلىكلەر ۋە قۇربانل

SUKUT520

	ئەمدىلا ئىككى يېرىم ياشقا كىرگەن بىر بالىنىڭ چاچ بوياش مەلھىمى قاچىلانغان قۇتىنى كۆتۈرۈۋېلىپ مەلھەمنى چېچىغا سۈركەپ قويۇشنى ئۆتۈنۈشى، لەۋ سۇرۇخىنى سۈرۈپ قوي دەپ غەلۋە قىلىشى، قورساقنى كىچىكلىتىپ كۆرسىتىدىغان كالتە ئىشتاننى دادىسىنىڭ ئەمەس، ئانىسىنىڭ كىيىدىغانلىقىنى ئېيتىپ بېرەلىشى. . . . . . . كىشىلەرنىڭ ھازىر كىچىك بالا قالمىدى دېگەن گېپىنىڭ راستلىقىنى ئىسپاتلىماقتا. بالىلارنىڭ كىچىك تۇرۇپلا گىرىم بۇيۇملىرىنىڭ قايسىنىڭ قەيەرگە ئىشلىتىلىدىغانلىقىنى ئېنىق دەپ بېرەلىشى، ئەر-ئاياللارنىڭ تاشقى كىيىمىدىن تارتىپ ئىچ كىيىمىگىچە پەرق ئېتەلىشى، قارىماققا ئۇلارنىڭ ئەقىللىقلىقىنىڭ ئىپادىسىدەك كۆرۈنىدۇ، نۇرغۇن كىشىلەرنىڭ بالىلارنىڭ بۇ خىل ئىقتىدارىدىن سۆيۈنۈپ، ھازىرقى بالىلار نېمىدېگەن ئەقىللىق دەپ ماختاپ كېتىشىدۇ. ئەمەلىيەتتە، ئۇلارنىڭ زەھەرلەنگەنلىكىنى، تەبئىي نەرسىلەرگە قارىغاندا سۈنئىي نەرسىلەرگە بەكرەك ئىنتىلىدىغان بولۇپ قالغانلىقىنى ھېس قىلىپ يەتمەيدۇ.     ئويلاپ باقساق، نۆۋەتتە مەيلى جىسمىمىزدا بولسۇن، مەيلى روھىمىزدا بولسۇن تەبىئىيلىك دېگەن تولىمۇ ئاز قاپتۇ، ھەتتا بەزىلىرىمىزدە تەبئىيلىكنىڭ ئاسارىتىنىمۇ تاپقىلى بولمايدۇ. قىز-ئاياللارنىڭ پەرداز بۇيۇملىرى ئارقىلىق چىرايلىق بولۇشقا بېرىلىپ، گىرىمسىز تالا-تۈزگە چىقالماسلىقى، سومكىلىرىدىن گىرىم بۇيۇملىرىنى ئايرىماسلىقى، ئاق ئارلاشقا باشلىغان چاچلىرىنى قىزغۇچ، ساغۇچ ۋە قارا بوياقلاردا بويىشى، تورت-پېچىنە، شاكىلاتلارغا ئامراق بولۇشى، ئەرلەرنىڭ غەم-قايغۇدىن قۇتۇلۇش، ھارغىنلىقنى چىقىرىش ئۈچۈن تاماكا، ھاراق ئارقىلىق ئۆزىنى زەئىپلەشتۈرۈشى، ئەر-ئاياللارنىڭ مېھىر-مۇھەببەتنىمۇ تەبئىي يوسۇندا ئەمەس، باشقىچە شەكىلدە ئىپادىلىشى، ئەر-ئاياللارنىڭ بىر-بىرىنىڭ قىلمىشلىرىنى بىلدۈرمەسلىك ئۈچۈن بالىلارنى قالقان قىلىپ، گۇۋاھچىلىققا قويۇپ ئۆز-ئارا ئالداشلىرى، ئەر-ئايالنىڭ تالا-تۈزدىكى، ئىدارىدىكى كىشىلەرگە تاقابىل تۇرۇش ئۈچۈن ھىيلە-مىكىر ئويلاپ شان-شەرەپ، ماختاشقا، نەتىجىگە ئېرىشىش يولىنى تاللىشى، ئۇلارنىڭ بالىلاردا كۆرۈلۋاتقان مەسىلىلەرنى غەيرىي يول ئارقىلىق ھەل قىلىشقا تىرىشىشىنىڭ ھەممىسى سۈنئىيلىك، ساختىلىقتۇر، بۇ خىل مۇھىت ئەلۋەتتە بالىلارغا تەسىر قىلىدۇ.     پورەكلەپ ئېچىلغان ھەقىقىي گۈل بىلەن ھەل بېرىلگەن سۇلياۋ گۈلنى بىر يەرگە قويۇپ بىرىنى تاللا دېسە، كۆپىنچە ھەقىقىي گۈلنى تاللايدۇ، سۇلياۋ گۈلنى تاللايدىغانلارمۇ كۆرۈلۈشى مۇمكىن. ئەمما، ھەقىقىي گۈلنىڭ كۆڭۈلنى كۆتۈرىدىغان خۇش پۇرىقى بولىدۇ. سۇلياۋ گۈلنىڭ نە پۇرىقى بولسۇن؟     تەبئىي نەرسىلەردە تەبىئەتنىڭ ھىدى بولىدۇ، تەبىئەتنىڭ گۈزەللىكى مۇجەسسەملەنگەن بولىدۇ. تەبىئىي ئىشلارغا ئىنسانىي پەزىلەت سىڭگەن، ئۇنىڭدا سەمىمىيلىك، چىنلىق ناخشىسى ياڭرىغان بولىدۇ.     يېيىش، ئىچىش، گۈزەل ئارزۇ-ئارمانلار ئىشقىدا ئوت بولۇپ يېنىپ تىرىكچىلىك ۋە خىزمەت قىلىش -ئىنسانلارنىڭ تەبىئىتىدە بار خۇلقلاردۇر.     دانالار «ئەخلاق ئادەم زىننىتى» دەيدۇ. ئادەمنىڭ تەبىئىيلىكى گۈزەللىككە، تەربىيۋىلىككە، قايىل قىلارلىققا، سۆيۈملۈكلۈككە ئىگە بولغاندىلا، ئۇ ئادەم ئۈچۈن زىننەت بولىدۇ. بولمىسا نىجاسەتكە ئايلىنىدۇ. ئادەم بۇ دۇنياغا پاكلىق ئىچىدە ۋۇجۇدقا كېلىدۇ. پاكلىق-ئادەمنىڭ گۈزەللىكى، سۈيۈملۈكلۈكى، تەبئىيلىكلىكىدۇر. يېشى چوڭ بولغانسېرى بۇ تەبئىيلىكنىڭ ئۇنىڭ ۋۇجۇدىدىن يوقاش-يوقىماسلىقى ئۇنىڭ ئەتراپىدىكىلەردىن قوبۇل قىلغان نەرسىلىرىگە، ئۆزىنىڭ كىملىكىنى تونۇش دەرىجىسىگە، ئاق-قارىنى پەرق ئېتىش ئېڭىغا باغلىق.     مىسال:ئانىلارنىڭ پەرداز قىلىپ گۈزەل بولۇشقا ئىنتىلىشى يامان ئىش ئەمەس، ئەمما بالىلارنىڭ ئالدىدا تەپ تارتماستىن يۈز-كۆزلىرىگە بوياقلارنى سۈركەپ، باشقىچە كۆرۈنۈشتە بولۇشى، بالىلارنى خاملىيۇنلارچە ئادەم بولۇشقا باشلىماي قالمايدۇ.     دادىلارنىڭ پۇرقىرتىپ تاماكا چېكىشى، قاڭسىق ھاراقلارنى ئىچىپ، مەسىت -ئەلەس سۆزلىشى بالىلارنى پۇراقلىق ئىچىملىكلەرگە ئىنتىلدۈرمەي قالمايدۇ.     ئەر-ئاياللارنىڭ قاراپ تۇرۇپلا بىر-بىرنى ئالداش قىلمىشلىرى بالىلارنى ئۆزىدىن ئۆتكەن سەۋەنلىكلەرگە ئىگە بولماسلىقتەك مەسئۇليەتسىزلەرچە ئىش تۇتۇشقا ئۈندىمەي قالمايدۇ.     ئىشقىلىپ، چوڭلاردا كۆرۈلۋاتقان ھەربىر غەيرىيلىك بالىلار ئۈچۈن بىر جەلىپكار چېكىملىكتۇر.     بىزدە «ئالا ئىنەكنىڭ بالىسى چالا قۇيرۇق» دەيدىغان گەپ بار، ئاتا-ئانىلاردىكى، ئۇرۇق-تۇغقانلاردىكى ئاتالمىش ئىلمىيلىشىشلار، زامانىۋىلىشسىش، ئۆزگىچىلىشىش. . . . . بالىلارنىڭ ۋۇجۇدىغا ئۆزلۈكسىز، ئۈنسىز رەۋىشتە سىڭىپ، ئىش-ھەركىتىدە ئەكىس ئېتىدۇ. بالىلار كەلگۈسىنىڭ سۈزۈك ئاسمىنى. ئەگەر چوڭلار يېقىلغۇ قۇرۇلمىسىغا دىققەت قىلماي، ئوچاقنىڭ قەيىرىدىن چاتاق چىقىۋاتقانلىقىغا كۆڭۈل بۆلمەي ئىسسىنىشقىلا ئەھمىيەت بەرسە، بۇ ئاسمان ئىس-تۈتەكلەر دەستىدىن كۆرگىلى بولمايدىغان بولۇپ كېتىدۇ.     بىز شۇنداق قارايمىز:سۈنئىي نەرسىلەرنى يەپ، سۈنئىي ئىشلار بىلەن شوغۇللانغۇچىلار چىن ھېسىياتتىن، گۈزەل پەزىلەتتىن، ھەقىقىي بەختتىن ئايرىلىپ قالغۇچى بىچارىلەردۇر ھەمدە ئەۋلادلارنىڭ دۈشمىنىدۇر.     ماشىنىنىڭ پۈتۈنلەي كاردىن چىققىنىغا قارىغاندا، مەلۇم بىر زاپچىسىدىن چىققان چاتاقنى ئوڭلاش ئاسان بولغىنىدەك، بىز تەبئىيلىكىمىزنى پۈتۈنلەي يوقىتىپ سۇلياۋ ئادەملەرگە ئايلىنىپ كېتىشتىن بۇرۇنراق ئەسلىمىزنى تېپىۋالساق ياخشى بولاتتى!     بىز ھېلىمۇ تەبىئەتكە قايتىساق، تەبىئەتنى سۆيسەك، تەبئىي ئىشلار بىلەن مەشغۇل بولساق، ھېسىياتىمىز ساختىلاشمايدۇ. روھىمىز بۇلغانمايدۇ، ئېتىقادىمىز يىگىلىمەيدۇ. بەلكى، ئارزۇ-ئارمانلىرىمىز چېچەكلەيدۇ. ئەۋلادىلىرىمىز چىن تۆمۈر باتۇرغا، سادىر پالۋانغا، نۇزۇگۇمغا، ئاماننىساخانغا ئايلىنالايدۇ. قىسقىسى، پەرزەنتلەر تەرەققىياتىنىڭ بىھۇدە قۇربانلىقىغا ئايلىنىش ھالاكىتىدىن قۇتۇلالايدۇ! مەنبە: جۇڭگو مىللەتلىرى (2007-يىللىق4-سانى) دىن ئېلىندى.

ئەركەم624

	ھەركىم بۇ دۇنيادا ئۆزىنىڭ قىلغان ئەمەللىرى بىلەن قىيامەتتە جاۋابىنى بىرىدۇ،

YuzarSif

	كۈنىمىزدە ئۆزىمىزىنىڭ مىللى خاسلىقىنى، مەدەنىيىتىمىزنى  باللىرىمىزغا سىڭدۇرۈش ئۈچۈن قوللانغان ئۇسۇل چارىلىرىمىز  ئاتالىمىش ئەركىنلىك، دىمكۇراتىيە شۇئارچىلىرى تەرپىدىن قارا قۇيۇق خوراپاتلىق، مەتولۇق ھىساپلىنىدىغان، بۇ خىل ئۇسۇللار ئەكسىنچە باللارنىڭ ئەركىن بۇلۇشىغا ، تەپەككۇر ئىقتىدارىغا چوڭ توسالغۇ بۇلۇپ،  كىين يارىماس، دۆت ئادەم بۇپ قېلىشىنىڭ سەۋەپچىسى قىلىپ كۆرستىلۋاتىدۇ. دۇنيا رەزىل دەيمىز، ئەمىلىيەتتە دۇنيا رەزىل ئەمەس دۇنيادا ياشاۋاتقان بىز رەزىل

TOGRAKPADIXASI

	تىلۋىزۇر چىققاندىن بىرى باللىرىمىز كۈندىن كۈنگە «ئەقىللىق»لىشىپ كىتىۋاتقان مۇشۇنداق بىر ۋاقىتتا تۇغۇلغان باللارنىڭ كىچىككىنە تۇرۇپ مۇھاببەتلىششىلىرىگە، جىنسى ئاڭنىڭ قۇرامىغا يەتمەي تۇرۇپ يىتىلىشىگە قاراپ ئادەمنىڭ كىيىنكى ئەۋلاتلارغا نىسبەتەن ھىچقانداق ئۈمۈت قالمىدى دىسەك ئاشۇرۋەتكەنلىك بولماس. بىراق ئۆز خاسلىقىمىزنى ۋە مىللى ئۆرىپ ئادەتلىرىمىزنى خۇراپاتلىق دەپ قاراۋاتقان ئەشۇ ئىنسانلارنىڭ بىركۈنى يىغلاپ قالىدىغانلىقى ھەقىقەت.

nurjula

	نىمە دىگەن توغرا گەپلەر! مەنمۇ ھەر كۈنى سەھەر تۇرۇپ ئىشقا بېرىشتىن ئاۋال گىرىم قىلىشنى ئويلىسام شۇنداق بېشىم ئاغىرىيدىغان بولۇپ قالدى! يۈزىمىزنى پاكىز يۇيۇپلا ئىشقا ماڭساق نىمە دىگەن ياخشى -ھە! ۋاقىتمۇ تىجىلىدۇ، بىچارە يۈزلىرىمىزمۇ ئارام تېپىپ قالاتتى! ئاپىلىرىمىزنىڭ يۈزىدە قورۇق يوق، بىزنىڭ يۈزىمىزگە پەيدا بولغىلىۋاتىدۇ! بۇلارنىڭ ھەممىسى سۇنئىلىكنى قوغلاشقاننىڭ كاساپىتى! ھەيييييييي!

pakdil

	اللە رەھمەت قىلسۇن قېرىندىشىم،بۇ ھەقىقەتەن بىر ياخشى گەپ بۇلۇپتۇ...!!!

lazzat

	مەنمۇ سىزدەك ھىسىياتتا قېرىندىشىم.

quxtikiakku

	بىزدىكى تەبىئلىكتىن سۆز ئىچىش تولىمۇ تەس.

orkixi

	شىنجاڭ مەدەنىيتى ژورنىلىنىڭ ئەسكەرتىشى بۇيىچە ،ئۇ ژورنالنىڭ ماقالىسىنى تورغا چىقىرىشقا بولمايىتتى ...

QIQAK0903

	ئاتا ئانا بالىنىڭ تۇنجى ئوقۇتقۇچىسى . ئاتا ئانىنىڭ  بۇلۇپمۇ ئانىنىڭ بالىغا بىرىدىغان تەسىرى چوڭ . بىز ئانىلار كىچىك ئىشلاردىمۇ بالىمىزغا ئۈلگە بۇلىشىمىز كىرەك .

izdinish

	چـەتئـەللىك بىر پىرىنسىپى بار، سـەن نېمـە دېسـەڭ دەۋەرگىن، ئەمما مـەن ئانچـە قوشۇلۇپ كـەتمـەسلىكىم مۇمكىن. دەيدىغان!  دېمـەكچىمـەنكى ؛ خـەق بالىلىرىمىزنى نېمـە دېسـە دېسۇن، ئائىلىدە ئۆزىمىز ھـەقىقىي يوسۇندا تـەربىيلىۋالايلى!