قانائەتمۇ، قاباھەتمۇ ؟

قايتماس

	قانائەتمۇ «قاباھەتمۇ»   قايتماس تىلەمچى ئالدىغا چۈشكەن پارچە پۇللارغا قانائەتلىنىپ قالغاچقا «تىلەمچى» پېتى قېلىۋەردى. گىلەمچى گىلەم توقۇشتىن باشقىنى بىلمىگەچكە يامان كۈنلەردە ئىشى ئاقساپ قالدى. توختام سۇ كۆلچەكتە تۇرىۋەرگەچكە ئاخىرى بېرىپ سېسىپ، قۇرتلاپ كەتتى. تۈتۈن چىققان مورا ۋاقتىدا تازىلانمىغاچقا پۈتۈپ، دۇتلاپ كەتتى. كاككۇك مەڭگۈ بىر خىلدا سايرىغاچقا ئۇنى كىشىلەر ھېچقاچان «بۇلبۇل» دەپ ئاتاپ باقمىدى. ئىشەكنىڭ يول يۈرۈشى تۈگمەن تېشىدەك ئاستا بولغاچقا «دۇلدۇل» دەرىجىسىگە يېتەلمىدى. سۆزلىسەك بۇنداق مىساللار تالاي. لېكىن بىزگە مۇشۇنىڭ ئۆزىلا كۇپايە. ئەقىللىق ئوقۇرمەنلەر بۇ مىساللار ئارقىلىق نېمە دېيىلمەكچى بولغىنىنى بىر قاراپلا بىلىۋالالايدۇ. ئەگەر بىلەلمەيدىغانلار بولسا تۆۋەندىكى قۇرلارغا نەزەر تاشلىغاي. دەۋر ئۆزگىرىپ بۈگۈنگە كەلگەندە ياشىماق قىيىنلاشتى. ھەممىمىزنىڭ كاللىسىدا بىرلا غەم: «قانداق قىلساق ياخشى ياشىغىلى بولىدۇ». ئەقلىنىڭ نورمال ئىشلەيدىغانلىقىغا ھۆكۈم قىلالايدىغان ئادەم ھەرگىزمۇ ئاسماندىن پوشكال چۈشۈشىگە ئىشەنمەيدۇ. چۈنكى تارىختىن بېرى قۇچقاچ تۇخۇمدىن چىقىپلا ئۇچقان ئەمەس، ھېچبىر كىشى جاپا تارتماي شان-شەرەپ قۇچقان ئەمەس. شۇڭا ياخشى ياشاش ئۈچۈن كاللىمىزنى ئىشقا سېلىپ، تىرىشمىساق بولمايدۇ. بۇنىڭ ئۈچۈن ئۆزىمىزدىن ھالقىش كېرەك. ئۇنداقتا ئۆزىمىزدىن قانداق ھالقىيمىز؟ 1. بۇرۇنقى كونا ئۇدۇملارنى بۇزۇپ تاشلاپ، ھازىرقى دەۋرگە ماسلىشىشىمىز كېرەك. بۇنداق دېگەنلىك ھەرگىزمۇ قارا-قۇيۇق ھالدا ھەممە نەرسە، ھەممە ئىشقا ماسلىشىڭ دېگەنلىك ئەمەس. كاللىسى نورمال ئىشلەيدىغان ئادەم ھەرگىزمۇ سۈزۈك سۇنى قويۇپ لاي سۇنى ئىچمەيدۇ. بۇ يەردە كۆزدە تۇتۇلغىنى پەقەت تەرەققىيات قەدىمى، ئىسلاھات ئۆزگىرىشلىرىگە دىققەت قىلىپ، ئۆزىمىزنى شۇنىڭغا ماس ھالدا يۈكسەلدۈرۈش. 2. ئۆزىمىزدىكى ئارتۇقچىلىقنى تېپىپ چىقىپ، ھاياتىمىزدا يېڭى بۇرۇلۇش ھاسىل قىلىشىمىز لازىم. بۇنىڭ ئۈچۈن ئالدى بىلەن تەپەككۇر دېڭىزىغا چوڭقۇر چۆكۈپ، روھىيىتىمىزنى قايتىدىن ئوپراتسىيە قىلىشىمىز كېرەك. ئەگەر تەپەككۇر قىلىشتا قىينىلىپ قالساق ئەقىل موللىلىرىنىڭ يول كۆرسىتىشىگە تايانساقمۇ بولىدۇ. چۈنكى پىچاق ئىشلەتمىگەنسېرى داتلىشىپ قالىدۇ. كىيىم بىر-نەچچە كۈن يۇيۇلماي قالسا كىرلىشىپ، سەتلىشىپ قالىدۇ. شۇنىڭغا ئوخشاش ئەقىلمۇ ئىشلەتمىگەنسېرى تەپەككۇر قىلىشتا ئاجىزلىشىپ، ئانچە چوڭقۇر مۇلاھىزە قىلالمايدىغان، ئاددىي ئىشلارغىمۇ دەرھال يەكۈن چىقىرالمايدىغان بىنىمجان ھالەتكە كېلىپ قالىدۇ. بۇنداق ھالەتتە باشقىلارغا تايانماي ئامال يوق. 3. ئېرىشكەن نەتىجە قانچىلىك بولىشىدىن قەتئىنەزەر ھەرگىزمۇ قانائەتلىنىپ قالماسلىقىمىز، ئۆزىمىزدىكى ئاجىزلىقنى تېپىپ چىقىپ، كۆڭۈلگە پۈككەن ئارمانلارنى ئەمەلگە ئاشۇرۇشقا تىرىشىشىمىز لازىم. چاۋشىيەن خەلقىنىڭ مۇنداق بىر تەمسىلى بار:«تور توقۇمىغان ئۆمۈچۈك قۇرت تۇتالماس». بۇ ھەقىقەتەن ياخشى تەمسىل. دېمەك، ئەگەر سىز ئۆز ھالىتىڭىزدىن قانائەتلىنىپ، مەقسەتكە يېتىشتە «تور» توقۇمىغان كىشى بولسىڭىز، ھېچقانداق ئىشنى ۋۇجۇدقا چىقىرالمايسىز. ئادەمدە بىر ئىشنى باشقا ئېلىپ چىقىش ئۈچۈن سەزگۈر كاللا بىلەن يەنە جاسارەت بولمىسا بولمايدۇ. كىمىكى رىزىق ئىزدەش يولىدا بوشاڭلىق قىلىدىكەن ئۇ ئۆز رىزقىنى باشقىلارغا تارتتۇرۇپ قويۇش بىلەن بىرگە يەنە سائىتى كەلسە ئۆزىنىمۇ ھالەك قىلىدۇ. چۈنكى دانىشمەنلەر بىزگە مەنىلىك قىلىپ:«ئۇخلاۋاتقان قۇشقا ئاسان ئوق تېگەر» دەپ ئەسكەرتىدۇ. كونىلاردىن بىزگە: «قانائەتنىڭ تېگى ئالتۇن»، «قانائەت قىلساڭ خار بولمايسەن»، «قانائەت تۈگۈمەس بايلىق»، «قانائەتچان كىشىنىڭ قارنى توق» دېگەندەك تەمسىللەر مىراس بولۇپ قاپتىكەن. مېنىڭ كىمنىڭ ئېغىزىدىن چىققىنى نامەلۇم ئەمما ئۇزاق يىللاردىن بىرى تارقىلىپ بىزلەرگىچە داۋام قىلىپ كەلگەن بۇ تەۋەررۈك سۆزلەردىن قۇسۇر تېپىپ يۈرگۈم يوق. لېكىن شۇنداقتىمۇ بىر نەچچە ئېغىز سۆزلۈگۈم كېلىپ قالدى. كونىلار ھەرگىزمۇ خاتا گەپ قىلمايدۇ. ئەگەر خاتا گەپ قىلغان بولسا بۇ سۆزلەر ھازىرغىچە بىزگە يېتىپ كېلەلمەيتتى. بەلكىم بۇ قىممەتلىك ئىبارىلەر ئاشۇ يىراق ئۆتمۈشلەردە ئۆز نېسىۋىسىگە قانائەت قىلماي ھەددىدىن ئارتۇق قانائەتسىزلىشىپ كەتكەن كىشىلەرنىڭ سەۋەبى يۈزىسىدىن مەيدانغا كەلگەن بولۇشى مۇمكىن. چۈنكى ھەرقانداق بىر نەرسە، ھەرقانداق بىر ئىشنىڭ كېلىپ چىقىش سەۋەبى بولىدۇ، ئەمەسمۇ! ئۆز ۋاقىتىدا بۇ ھېكمەتلەر باشقىلارنى ئاگاھلاندۇرۇش رولىنى ئويناپ كەلگەن بولسا ھازىرمۇ تېخى بۇ ھېكمەتلەرنىڭ نوپۇزى چۈشۈپ قالغىنى يوق. لېكىن زامان چاقى چۆرگۈلەپ بۈگۈنگە كەلگەندە كۆپ نەرسىلەرنىڭ شەكلى ئۆزگىرىپ كەتتى. نۇرغۇن نەرسىلەر ئۆز ماھىيىتىدىن چەتنەپ، ئەسلىدىن يىراقلىشىپ كەتتى. تۇغۇلۇشتىن تارتىپ ئۆلگۈچە، يىغلاشتىن كۈلگۈچە بولغان ئارىلىقتىكى بارلىق مەئىشەتلەرنىڭ ھېچقايسىسى بۇرۇنقىغا ئوخشىمايدۇ. ياشاش ئۇسۇلىمىز، يېمەك-ئىچمەك ئادەتلىرىمىز، ئەدەب-قائىدە، مىزانلىرىمىز، ھەر خىل مۇناسىۋەت، ئۇدۇملىرىمىز تەرەققىي قىلىۋېرىپ، تېخى يېقىندىلا ئۆلۈپ كەتكەن كىشى تىرىلىپ كەلسىمۇ ھېچنەرسىنى ئىلغا قىلالمايدىغان دەرىجىگە بېرىپ يەتتى. مۇشۇنداق ئەھۋالدا يۇقارقى تەۋەررۈك ئىبارىلەرنىڭ كۇرسى بىر خىل ئۆلچەمدە تۇرىۋېرىشى مۇمكىنمۇ؟ كەچكۈز كەلسە ھەممە نەرسە سارغىيىدىكەن. شۇنىڭغا ئوخشاش بۇ ھېكمەتلەرگىمۇ كەچكۈز يېتىپ ئاز-تولا سارغىيىشقا باشلىدى. بۈگۈنكى ھايات ئىلگىرىكىگە قەتئىي ئوخشىمايدۇ. ئىلگىرى جاڭگالدا بىر-نەچچە ئوۋچى بولغان بولسا ھازىر ساناپ تۈگىتەلمەيسىز. ھەممە كىشىنىڭ قولىدا «ئوۋ» ئوۋلايدىغان قورال بار. ئەگەر سىزنىڭ قولىڭىزدا «ئوۋ» ئوۋلايدىغان قۇرال بولمىسا ياكى  ھۇشيار تۇرمىسىڭىز باشقىلار سىزنى «ئوۋ» دەپ چۈشىنىپ قېلىپ، تۇيۇقسىزلا ئوۋلاپ قويۇشى مۇمكىن. شۇڭا سىز ھە دېسىلا كونىلارنىڭ يۇقارقى سۆزىگە ئېسىلىۋېلىپ :«قانائەتتە سائادەت» دەپ بېشىڭىزنى ئىچىڭىزگە تىقىپ، تىرەجەپ تۇرىۋالماي ئۆز ھاياتىڭىزنى قۇتقۇزۇش، ۋە يېڭى پەللىگە ئىگە قىلىش ئۈچۈن ھازىرقى ھالىتىڭىزنى بۇزۇپ تاشلاپ، كۈرەش قىلىشىڭىز كېرەك.  مەنبە: ئۆز يازمام

ziba1

	ياخشى تىما يوللاپسىز ، بۇنىڭدىن كىيىنمۇ داۋاملىق ياخشى ئەسەرلەرنى روياپقا چىقىرىشىڭىزغا تىلەكداشمەن .................. [s:166]  [s:166]  [s:166]  [s:166]  [s:166]

zumrettash

	سىزنىڭ ئېسىل يازمىلىرىڭىزنى كۆرۈشكە نىسىپ بولالماي تۇرغان،ئىشلىرىڭىز بەك ئالدىراشمۇ ئاپپاي،بۇ سۆزلىرىڭىز خۇددى ماڭىلا دىيىلىۋاتقاندەك تۇيۇلدى،مەن ھەرگىز ئوۋچىنىڭ ئولجىسى بولۇپ قېلىشنى خالىمايمەن،تىرىشىپ ئۆز ئارمىنىمغا يىتىمەن! [s:173]

روھزاد

	天上不会掉馅饼  نېمانداق تەرجىمە قىلغانغا ئوخشاپ كېتىدۇ بۇ ئۇسلۇب؟! ئۇيغۇرچىغا خاس بولمىغان تۈزلا تەرجىمە قىلىنغانغا ئوخشاپ كېتىدىغان ماقالدىن بىرى تۇرىدۇ.

arkin.jan

	ياخشى تىمايوللاپسىز مەنىسى چۇڭقۇر جەلىپ قىلىش كۇچى كۇشلۇك چۇشنۇش ئاسان بوپتۇ داۋاملىق يوللاپتۇرغايسىز.