دېھقان بىلەن يەرنىڭ مۇنازىرىسى

kixlak

	دېھقان بىلەن يەرنىڭ مۇنازىرىسى                                                    قىشلاق ئاتا مىراس كەتمەن، نەچچە ئەۋلاد تىركچىلىكنىڭ مەنبەسى بولغان يەرنىڭ باغىرىغا زەرداب بىلەن تەگمەكتە. يەر يەنىلا بورۇنقىغا ئوخشاش بىر خىللا تۇرماقتا. ھالسىزلىنىپ كەتكەن دېھقان ئۆزىگە قاراپ تۇرغان يەرگە پەرىشانلىق ئىلكىدە باقماقتا. دېھقاننىڭ مۇڭغا پاتقان كۆزلىرىدىن خۇددى ئۇزاقتىن بۇيان دېيەلمەي كېلىۋاتقان گەپلىرى باردەكلا قىلاتتى. مىسكىنللىك ۋە غېرىبلىق ئىلكىدە تولغىنىپ ياتقان يەرنىڭمۇ ئۇزاقتىن بۇيان بايان قىلىشنى ئويلىغان لىكىن، ئېغىزىدىن قاچان، قانداق ئوسۇلدا چىقىرىشنى بىلمەي، شۇنداق بىر كۈنلەرنىڭ كېلدىغانلىقىغا ئىشەنگەندەك چىدام، غەيرەتتە تۇراتتى.   دېھقان قوللىرى تىتىرەپ تاماكىسىنى شۇنچە تەسلىكتە ئوراپ، بىر نەچچىنى قاتتىق شورىغاندىن كىيىن، دەردىنى يەرگە تۆكمەكچى، شۇ ئارقىلىق ئازابىنى يەڭگللەتمەكچى بولۇپ، يەرگە قاراپ: -ھەي يەر ،سەن نەچچە يىللاردىن بۇيان مىنى شۇنداق قىيناپ كەلدىڭ. تاڭ يۇرىماستا سىنى يوقلاپ تاكى قاراڭغۇ چۈشكىچە بەزى ۋاقىتلاردا كېچىچە ھەمراھ بولدۇم. سەن ئۈچۈن قانچىلىك جاپا تارتساممۇ، سەن ئۈچۈن قانچىلىك بەدەل تۆلىسەممۇ، ئۆزەم ئاز يەپ، ساڭا كۆپ يىگۈزسەممۇ، ئۆزەم ئاز كىيىپ ساڭا كۆپ كەيدۈرسەممۇ، ساق ۋاقتىمدىمۇ، ساقسىز بولۇپ قالغان ۋاقتىمدىمۇ، سەن ئۈچۈن ئىشلىسەممۇ، نىمە ئۈچۈن قىلغان ئەجىرىمگە لايىق جاۋابقا ئېرىشەلمەيمەن؟ سەندىن زور ئۈمىدلەرنى كۈتسەممۇ، نىمىشقا ئۈمىدىمنى يەردە قويىسەن؟ ساڭا شۇنچە ئىشەنچ باغلاپ، پۈتۈن مېھرىمنى بەرسەممۇ، يەنە نىمىشقا ئىشەنچىمگە لايىق ئىش قىلمايسەن؟ ساڭا شۇنچە ۋاپادارلىق كۆرسەتسەممۇ، نىمىشقا ۋاپاغا جاپا قىلىسەن؟ ئېيتىقىنا، ساڭا يەنە قانداق قىلسام، سەندىن كۈتكىنىمگە ئېرىشەلەيمەن؟- دېھقاننىڭ يەنە نىمىلەرنىدۇر دېگۈسى بار ئىدى لىكىن، بوغۇزىغا كەپلەشكەن ئەلەملىك گەپلىرىنى يۈتىۋەتتى.دېھقان گەپلىرىنى ئۈن – تىنسىز ، ئېغىر – بېسىقلىق بىلەن ئاڭلاپ تۇرغان يەر غەيرەتكە كىلىپ، ئېغىز ئېچىپ تەمكىنىلك بىلەن ،-ھەي، جاپاكەش دېھقان تارتقان جاپالىرىڭنى بىلىمەن. سىنىڭ، مەن ئۈچۈن سىڭدۈرگەن ئەجىرىڭگە كۆزۈمنى يۇمۋالغان يىرىم يوق. مانا، ئۆزەڭ كۆرۈپ تۇرۇپسەن، مەن ھەر ۋاقىت ئالدىڭدا يۇۋاش – رايىشلىق بىلەن قول باغلاپ تۇرۋاتىمەنغۇ؟      يەردىن ئاخىرى زۇۋان كەلدى.   -ھالا بۈگۈنكى كۈنگە كەلگەندە مەندىن بۇنداق نارازى بولدىغانلىقىڭنى ئويلاپ باقمىغان ئىدىم. ئەسلى سەن بۇنداق دىيىشتىن بۇرۇن، قىلغانلىرىڭ ئۈستىدە ئوبدان بىر  ئويلاپ بېقىشىڭ كېرەك ئىدى.ماڭا قىلغان ئەجىرىڭگە مىننەت قىلدىڭمۇ ياكى مەندىن تېخمۇ كۆپ نەرسىلەرگە ئېرىشمەكچى بولدۇڭمۇ، بۇنىسى ماڭا قاراڭغۇ. بۇرۇن يۈرەك باغرىمنى كەتمەن بىلەن تىلغىغان بولساڭ ، ھازىر كەتمەندىن نەچچە ھەسسە يوغان ، ئىتتىك ھەم رەھىمسىز بولغان سوقا بىلەن تىلغايسەن. يۈرىكمنى ئوڭ- تەتۈر ماتىلايسەن. بۇرۇن ياغاچتىن تۇقۇلغان يۇپۇرغا بىلەن جاراھىتىمگە تۇز سەپكەن بولساڭ، ھازىر ياغاچتىن نەچچە ھەسسە قاتتىق بولغان تۆمۈر ئاتلىق يۇپۇرغا بىلەن جاراھىتىمنىڭ قات- قاتلىرىغا تۇز سىپىسەن. نەيزىدىنمۇ ئۇچلۇق ھەم كۈچلۈك بولغان قۇزۇقلارنى جاراھەتتىن ساقايمىغان باغرىمغا قاقىسەن. قەيەردىندۇر تېپىپ ئەكەلگەن ئورۇقلارنى يۇمشاق ۋە ئىزىلگەن باغرىمغا چاچىسەن. بۇنىسى ئاز كەلگەندەك، ھەر خىل ماركىدىكى يالتىراق بىلەن يۈز- كۆزلىرىمنى چىڭ پۈركەيسەن. نەپسىم يىتىشمەي، سەندىن يۇشۇرۇن ساپ ھاۋادىن نەپسلىنىش ئۈچۈن شۇنچە جاپادا ئاچقان تۈشۈكلەرگە توپا تاشلايسەن. بورۇقتۇملۇق ئىچىدە بىھۇش بولۇپ ياتىمەن. بۇرۇن يەرلىك،تەبئى ئوغۇتلار بىلەن مىنىڭ كەم ماغدۇرلىق كېسىلىمنى داۋالايتىڭ. ھازىرچۇ، شىنجاڭنىڭ ھەتتا سەن چۈشىڭدىمۇ كۆرۈپ باقمىغان ئىچكىرى ئۆلكىلەرنىڭ ۋە چەتئەلنىڭ تۈرلۈك خېمىيىۋى ئوغۇتلىرى بىلەن ماغدۇرسىزلىقمنى تۈگەتمەكچى بولىسەن لىكىن، بۇنىڭ تېخىمۇ بەك ماغدۇرسىزلىق پەيدا قىلدىغانلىقىنى ئويلاپمۇ باقمايسەن. بىردەم ئۇ يەرنىڭ بىر دەم بۇ يەرنىڭ دەپ، خېمىيىۋى ئوغۇت بەرگىنىڭ ئاز كىلىپ قالغاندەك، زەھەرلىك دورىلارغا تەنلىرىمنى چىلايسەن. ئوغۇت ۋە دورىلارنى بېرىپ بولغاندىن كىيىن، ئۈستىمدىن ئاز- تولا سۇ يۈگۈرتۈپ قويىسەن. شۇنچىلىك سۇغا مەن قانامدىم. ئېغىر ھالسىزلىق ۋە زەھەرلىنىشتىن نىمجان بولغان تىنىم زور غەيرەتكە كىلىپ، سۇ، سۇ، ماڭا سۇ بەر دەپ قىلغان ئاجىز نىدايىمغا قولاق سېلىپمۇ قويمايسەن. بۇنى ئاز دەپ، مېنىڭ مەۋجۇتلىقىمنى ساقلاپ كىلۋاتقان يېپىنچا ئۆسۈملىكلەرنى يۇلۇپ يوقاتساڭ. مېنى قوغداۋاتقان قارۋۇللارنى رەھىمسىزلەرچە قەتلى قىلساڭ. شۇ سەۋەبلىك يۈزۈمدىكى يۇمران قەۋەتلەر بۇزغۇنچىلىققا ئۇچىراۋاتسا. كۈندىن – كۈنگە ماغدۇرسىزلىنىپ ، ھالىم خارابلىشىپ، ئاچچىق ۋە قىسمەتلىك ياشلىرىم مەڭزىمنى بويلاپ، باغرىمغا قۇيۇلۋاتسىمۇ مەن بىلەن كارىڭ بولمىدى. مەن تا ھازىرغىچىلىك قىلغانلىرىڭدىن ۋايساپمۇ باقمىدىم، سەندىن نارازى بولۇپمۇ باقمىدىم. ۋاپاغا جاپا قىلغىنىممۇ يوق. ئەكسىچە، ئۆزەمگە ئۆزەم تەسەللى بىرىپ، ئەڭ يۇقۇرى چەكتە تىرىشچانلىق كۆرسىتىپ، غەيرەت ۋە چىدامنى ھەر ۋاقىت يار قىلىپ قوينۇمدىن چىققان نىممەتلەر بىلەن سىنى بېىقىپ كەلدىم. بىلسەڭ، مەن ئۈچۈن قىلغانلىرىڭدىنمۇ بەكەرەك ، ھۇسۇل برىشىنى مەنمۇ بىلىمەن. سەن، مېنىڭ تەبئىلىكىمنى قايتۇرۇپ بەر. ھالىمغا يەت. ئۆزەڭنىلا ئويلىماي، مېنىمۇ ئويلاپ قوي. ‹‹ قونجۇڭدىن تۆكۈلسە، قوينۇڭغا ››، ‹‹ قول قولنى يۇيسا، قول قۇپۇپ يۈزنى يۇيدۇ›› دېگەننى ئونۇتما››. يەر گېپىنى تۆگىتىپ، كۆز ياشلىرىنى سۈرتۈپ، دېھقانغا كۈلۈمسىرەپ قارىدى. دېھقان ، خىجلچىلىقتىن بېشىنى كۆتۈرەلمەي، نۇمۇستىن يەرگە كىرىپ كىتىۋاتاتتى. يەر، دېھقاننىڭ بۇ ھالىنى كۈرۈپ :    -پۇشايمان قىلغاننىڭ پايدىسى يوق، ئەمدى ئارتۇقچە ئازابلىنىپ كەتمە. نۇمۇس قىلغان بولساڭ، خاتالىقىڭنى تۇنۇپ، بۇندىن كىيىن بۇنداق خاتالىقلارنىڭ يۈز بىرىشىدىن ساقلانساڭ. مەن،سەن ئۈچۈن مەڭگۈ جان پىدالىق بىلەن خىزمەت قىلىمەن،-دېدى. دېھقاننىڭ كۆزلىرىدىن تۆكۈلگەن ئازاب ياشلىرىنىڭ ئورنىدا، ئەمدى خوشاللىق يېشى تۆكۈلمەكتە. دېھقان بىلەن يەرنىڭ چىھرىىدە كۈلكە. مەنبە: قىشلاق قەلىمى.

xukurialla

	مەنىسى بەك چوڭقۇر ئەھمىيەتلىك تىما بوپتۇ قولىڭىزغا دەرت كەلمىسۇن

gardan

	ھازىرقى ۋەزىيەت ھەقىقەتەن ياخشى تەسۋىرلىنىپتۇ.راس تېمىڭىزدىكى<<يۇپۇرغا>>نىڭ مەنىسىنى بىر ئىزاھلاپ قويامسىز؟

hakekat

	چۇڭقۇر مەنىلىك كەن  [s:166]  [s:166]  [s:166]  [s:166]  [s:173]  [s:173]

cahra

	شۇنچىلىك سۇينۇپ كەتىم  ھەم يەر بىلەن مەنمۇ سۇزلەشكەندەك تۇيغۇغا كەپ قالدىم  ھەراس يۇپۇرغا دىگەنىڭ مەنىسى نىمۇ

ubul0998

	مەنسى چۇڭقۇر چۈشۈنۈشلىك چىقىپتۇ. بىچارە دىھقان بىچارە يەرنىڭ ھال مۇڭلىرى ئادەمنى ئويلاندۇردىكەن.

Tiwip

	ناھايىتى مەنىلىك يېزىلىپتۇ!! يوپۇرغا:  يەرنى ئاغدۇرۇپ بولغاندىن كېيىن يەرنى تۈزلەش(تەكشىلەش)ئۈچۈن ئىشلىتىلىدىغان ياغاچتىن ياسالغان سايمان `!

xiren0997

	راستىنلا مەنىسى چوڭقۇر تېمىكەن،تېمىڭىزغا رەھمەت.

tilayman

	" سۇ يەرنىڭ قېنى ،  يەر دېھقاننىڭ جېنى " دەپ بىكارغا ئېيتمىغاندە ؟!

kixlak

	كىم دېھقاننىڭ ھالال- مېھنەت بىلەن ئاققان تەرلىردىن يۇغۇرۇلغان نىممەتلەردىن ئۆزىنى تارتىپ باققان؟  قارىغاندا، تەبئىلىك بۇنچە ئاسان قولغا كەلمەيدىغاندەك؟! يالتىراق ۋە خېمىيىۋىلىك ماددىلار بىلەن ئوزۇقلىنۋاتقان بۈگۈنىمزىدە يامراۋاتقان سۈنئىلىككە جەڭ ئېلان قىلغىدەك ماغدۇرىمىز راستىنلا قالمىدىمۇ؟ ھەي،ھەي [s:121] دېھقانلىرىمىز بولمىغان بولسا بىز نەدە؟ شۇ تەبئىلىكىنى يوقاتمىغان يەرلەر بولمىغان بولسا شۇنچە قۇۋۋەتلىك نىممەتلەر نەدە؟ بوۋاي، مومايلار مۇنداق دەيدۇ: ھازىرقى گۆشنىڭ چامغۇرچىلىكمۇ قۇۋۋىتى ۋە كۈچى يوق. بۇ ھەرگىزمۇ ئاشۇرۋەتكەنلىك ئەمەس. دېھقاننى ئاسىراپ، يەرنىڭ تەبئىلىكىنى ساقلاپ قالايلى، قېرىنداشلار !

aryurak

	ھەقىقەتەن ئەھمىيەتلىك تىېما ئىكەن بۇ.ھازىرقى دېھقانچىلىق يەربىلەن دېھقانىڭ مۇنازىرىسى ئارقىلىق ئەپچىللىك بىلەن تەسۋىرلىنىپتۇ.  دېھقانلارغىمۇ ئامال يوق .ئۇغۇت دورىلارنى چاچمىسا ھوسۇل چىىقمىسا ، ئۇغۇت دورىلارنى چاچسا چىققان مەھسۇلاتنىڭ قالدۇق زەھەر دىن ئىستىمال قىلغانلار ئۆزى بىلمىگەن ھالدا ئاستا-ئاستا زەھەرلىنىپ بۇرۇن ئاڭلاپمۇ باقمىغان كېسەللەرگەگىرىپتار بولىۋاتسا ............

JAZBIDAR0997

	ياخشى تېما يىزىپسىز ئاللاتالا قۇلىڭىزغا دەت بەمىسۇن