ئاپا! مېنى بىر ئېمىتىۋىتىڭ!

YuqunAdam

	ئاپا! مېنى بىر ئېمىتىۋىتىڭ! (ئىلتىجا) يوچۇن ئادەم بۇ تۇرمۇش كارتىنىسى ئەمىلىيەتتە بولغان ئىش بولسىمۇ، قانداق يېزىش مەسىلىسىدە تولىمۇ ئويلاندىم. بىر نەچچە كۈن ئويلىنىش ۋە رەتلەش ئارقىلىق، بىر جەمىيىتىمىزدىكى سەلبى ۋەقەلىكنى ئارلاشتۇرۇش ئارقىلىق بوۋاق تىلىدا يېزىشنى تايىن تاپتىم. ئوقۇرمەنلەرنىڭ بىر بوۋاق قانداقسىگە بۇنداق تاتلىق گەپ قىلالايدىغاندۇ دەپ قامچىلاپ كەتمەسلىكى ئۈچۈن، بۇ ئەسكەرتىشنىمۇ قوشۇشنى لايىق تاپتىم. كەچۈرۈڭلار! [align=justify]-ئاپا! بۈگۈن قانداق كۈن؟ سەن نەگە، نېمىگە بارىدىغانسەن؟! ماڭا بىر قارىغىنا، مەن ساڭا قاراۋاتىمەن. سەن ھەدەپ ئۆزۈڭگە تولىمۇ نىختا كىلىدىغان، يېلىڭ، سىغىنچاق كىيىملىرىڭنى كىيىۋاتىسەن. سېنىڭ ئادەتتە ئۇزۇن-ئۇزۇن كىيىملىرىڭ تولىمۇ كۆپقۇ؟ ماڭا پەرۋا قىلماي يەنىلا ئۆز ئىشىڭنى قىلىۋاتىسەن. قارىمامسەن مېنىڭ ئوماقلىغىمغا؟ مانا ئۈچ ئايلىق بولدۇم. كۆزۈممۇ كۆرىدۇ. شۇڭا مەن ساڭا يېنىشلاپ-يېنىشلاپ قارىغۇم كىلىپ ئۇخلىمايمەن. سەن نېمە دىگەن ئۇلۇق ھەم گۈزەلسەن ئاپا سەن! ئۆزىچىلا ھۆر-پەرىلەرگە ئوخشاتقۇم كىلىپ قانماي قاراپ  كىتىمەن ساڭا ، جېنىم ئاپا!. بۇندىن بۇرۇن سېنىڭ ماڭا شۇ ئاپپاق سۈتنى بىرىۋاتقان كۆكسىڭنىمۇ پۇراپ تاپاتتىم. بۇ نېمە دىگەن ئۆتكۈر سىزىم-ھە ئاپا. شۇ سىزىمنى ھەقىچان سەن ماڭا ئاتا قىلغان بولغىيتىڭ! بەئەينى كۆزى ئوچوق قارىغۇ ئىدىم. سەن ماڭا پەرۋامۇ قىلمايۋاتىسەن. يەنىلا شۇنداق كۆرمەيدۇ دەپ ئويلاۋاتامسەن ئاپا!  بەزەن ساڭا خۇشامەت قىلىپ ئويناقشىپ، ئەركىلەپ كۈلۈشلىرىم... قانداقسىگە ساڭا قىلىنغان سۈلھى كۈلۈش ئەمەس، بەلكى سېنىڭدىن ئاپىرىدە بولغانلىغىمغا مەمنۇنلىنىپ كۈلۈش ئاپا!  توغرا، بۈگۈن بىر قۇتلۇق كۈن بولىشى مومكىن! تېخى ئاخشام بۆشۈكتە پاراسلاپ ئېتىلغان پوجاڭلارنىڭ ئاۋازىنى ئاڭلىغان ئىدىم. ياق، ئۇ بۇرۇنراق ئاڭلىغان ئىشتۇ بەلكىم. چاغاندا. شۇنداقتىمۇ مەن سېنىڭ ئۆزۈڭنى ئۇنتىۋاتقانلىغىڭنى، مېنى ئۇنتىۋاتقانلىغىڭنى بايقاۋاتىمەن ئاپا. شۇ تاپتا مەن قانداقسىگە بىر تۇمان، مودىھىش ئىچىدە تولغۇنىۋاتىمەن، بىر شۇملۇقنىڭ بىز تەرەپكە يېقىنلاپ كىلىۋاتقانلىغىنى سىزىۋاتىمەن ئاپا!  ساڭا ئايان بولمىدىما؟ سېنىڭ چۈشلىرىڭگە ئۇنداق كىلىشمەسلىكلەر ھەر ۋاقىت ئايان بولۇپ تۇراتتىغۇ جېنىم ئاپا؟! نېمىشقا؟ زادى نېمىشقا تۈنۈگۈن بۆشۈككە يۆلىنىپ تۇرۇپ ياش تۆكىسەن؟! مەن توغرۇلۇق دادام سېنىڭ نازۇك كۆڭلۈڭگە ئازار بەردىمۇ؟ ياكى دادام مېنى ياخشى كۆرمەمدىكىن جېنىم ئاپا؟! دىگىنە ئاپا مەن زادى نېمىنى خاتا قىلدىم؟! توغرا، مەن بەزەن دادام مېنى بىر تاتلىق سۆيگۈسى كىلىپ ئېغىزىنى سوزىغاندا، يىرىك، ئۈچلۈق تېكەن كەبى ساقال-بۇرۇتلىرىدىن ئۆزۈمنى ئېلىپ قاچقان، مېنىڭ يۇمىران تېرىلىرىم ئۇنداق نەشتەردەك ساقال-بۇرۇتلارنىڭ ئازابىغا چىدىمايدىكەن، شۇڭا يىغلاپ تاشلىغان ئاپا!. دادام شۇلارنى كۆڭلىگە ئاپتىما؟ نېمىشقا داداممۇ باشقىلاردەك ساقال-بۇرۇتلىرىنى پاكىز ئېلىپ تۇرمايدۇ ئاپا!. ياكى ۋاقتى يوقمۇ ۋە ياكى ئىختىسادىي ئەھۋالىمىز شۇ قەدەر ياخشى ئەمەسمۇ ئاپا؟!! بولمىسا دادامنى شۈنچە سېغىنىمەن!. كۈندە ئەتتىگەن ھاۋانىڭ سوغاقلىغىغا قارىماي ئىشقا چىقىپ كىتىدۇ. كەچ خېلى بىر چاغلاردا كىلىدۇ. ئۇ چاغلاردا بەزەن مەن كۈتۈپ يېتىپ ئۇيقىغا كىتىدىكەنمەن. ئويغانغاندا ئۇ يوق. تولىمۇ جاپاكەش كىشىمۇ دادام، ئاپا؟!  مەن تۇغۇلۇپلا سىلەرنىڭ مۇناسىۋېتىڭلار تازا ياخشى بولمايۋاتىدىغۇ ئاپا؟! بولمىسا دادام سېنىڭ پومپىيىپ كەتكەن قورسىغىڭغا قۇلاقلىرىنى يېقىپ مېنىڭ تېنىقلىرىمنى تېڭشىغانغۇ ئاپا؟! مەن تۇغۇلغاندا ساڭا تولىمۇ سۆيۈملۈك  ھىس-تۇيغىسى ھەم مەمنۇنىيەتلىك، رازىمەنلىك كەيپىياتى بىلەن قارىغانغۇ؟! ھەم ماڭا شۇنداق يېقىملىق ئەرك زاتىنىڭ ئېسمىدىن بىرنى سوۋغا قىلغانغۇ ئاپا؟! تېخى ماڭا سەن ياش تۆككەن كۈنىنىڭ ئەتىسى <كالتىسىي> ئەكىلىپ بەردىغۇ ئاپا؟! مەن ئۇ قۇتۇلۇق سۇغا شۇنچە ئامىراق بولۇپ كەتتىم. نېمە دىگەن تاتلىق نەرسە ئۇ ئاپا؟! سەن شۇ توغرۇلۇق ئىزا ئىتتىرىۋالدىڭمۇ؟ ئۇنى ئىچمەسەممۇ بولاتتىغۇ؟ مانا قارا شۇنداق ياخشى تۇرمامدىم ئاپا؟! بۇندىن كىيىن مەن ئۈچۈن دادام بىلەن ئۇنداق بىھۇدە ئازارلىشىپ يۈرمەڭ بولامدۇ ئاپا؟!! جېنىم ئاپا، مەن سېنىڭ ماڭا بىرىۋاتقان مۇنۇ ئاپپاق سۈتىڭنى قەيەردىن كىلىۋاتقاندۇ؟ نېمىنداق تۈگىمەيدىغاندۇ؟... دەپ ئويلايتىم. بۇ كۈنلەردە كۆردۈمكى، بۇ ئاپپاق سۈت جېسمىڭدىكى قانلاردىن ئاشۇ بىپايان كۆكسىڭگە پەقەت مەن ئۈچۈنلا يىغىلىپ، ئۈزلۈكسىز بىر مېنىڭلا ئاغزىمغا تامچىلايدىكەنغۇ ئاپا؟! -ئاپا! سېنىڭ ئۇ كۆكسىڭ پۈتمەس-تۈگىمەس، چەكسىز كەتكەن دېڭىزكەنغۇ ئاپا؟! دېڭىز سۈيى مۇزلامىش ھەم بەزەن يېرى تۇزلۇقمىش. ئەمما سېنىڭ بۇ سۈيۈڭ نېمە دىگەن شېرىن ھەم ئىللىق!؟. مۇشۇنداق بىر ئۆمۈر بەرسەڭ يىتەمدۇ جېنىم ئاپا؟! ئەمما مەن تولىمۇ خىجىل ئاپا. بىھۇدە چاغلاردا سېنى تەڭقىسلىقتا قىينايمەن. تۈن كېچىلەردىمۇ سېنىڭ ئاشۇ بىر جۈپ كۆكسىڭنى سېغىنىپ كىتىمەن ئاپا! تېخى سەل ۋاقىتنى ئارقىغا سۈرۈپ قويساڭ، كۆز يېشى قىلىپ نارازلىق بىلدۇرىمەن. شۇ چاغلاردا ماڭا نەشتەر كۆزلىرىڭنى تىككەنسەنمۇ ئاپا؟! بەزەن سەن ئالدىراش تاماق قىلىۋاتساڭ، كىر يۈيىۋاتساڭ...قولۇڭ مەينەت چاغلاردا ساڭا خاپىلىق سالىمەن. يەنە بەزەن ئۆيدە لىق مېھمان بار ۋاقىتلاردا سېنى ئارسالدا قىلىپ قويغان ۋاقىتلاردا، سەن ئۇ مەن ئۈچۈن تولىمۇ قىممەتلىك بىباھا نەرسەمنى، ئۆزگىلەردىن قىزغىنىپ، تولىمۇ ئوڭايسىزلىنىسەنغۇ ئاپا؟! جېنىدا ئاشۇ مېكىيان بىر تۇخۇم تۇغىۋېلىپ قاقاقلاپ جاھانغا پاتمايدىغۇ ئاپا؟!  سەن ئەركىن ئولتۇرۇپ مەغرۇرلۇق بىلەن مېنى ئېمىتىشىڭ كىرەكتىغۇ ئاپا؟! بەلكىم سۈتۈم ياكى بالامنىڭ رىسقى ئازلاپ كىتىدۇ  دىگەنسەن ۋە ياكى باشقا سەۋەپلەرمۇ باردۇ ئاپا؟! مەن تېخى ئالدىڭدا نۇرغۇن-نۇرغۇن بىلمىگەن ئىشلارنى ئۆگىنىمەن جېنىم ئاپا؟! چوڭ بولسام سېنىڭ ئېغىر-يېنىك ئىشلىرىڭنى قىلىشىپ بىرىپ، جاپايىڭنى يىنىكلىتىمەن. يەنە دادامنىڭ ئەڭ ياخشى ياردەمچىسى بولۇپ بىر بەخىتلىك ئائىلىگە ئىرىشىمىز ئاپا!  كۈت! سەۋرىچانلىق بىلەن كۈت! باققانلىرىڭنى بىرمۇ-بىر قايتۇرىمەن جېنىم ئاپا!! -ئاپا! كالېندارغا قارىسام < 2.14> دەپ تۇرىدۇ. بۇ نېمە سان؟ سېنىڭ بۇ كۈندە سىرىتتا نېمە ئىشىڭ بار ئىدى؟ سىرىت تولىمۇ سوغاق ھەقىچان. ئۆيدە ئىسسىق ئارام ئالساڭ بولمامدۇ؟ نېمىگىمۇ چىقارسەن ئاپا؟!  توختا ئاپا، مېنى يۆگەككە مەھكەم يۆگەشتىن بۇرۇن جامالىڭغا بىر قارىۋالاي! ئىللىق باغرىڭدا داۋالغۇۋاتقان ئاپئاق سۈتىڭدىن قېنىپ-قېنىپ شۇرىۋالاي! ساڭا بىر كۈلۈپ بىرەي! ئېغىزىڭنى ئېپكەل بىر سۆيىۋالاي ئاپا! - بۈگۈن سېنىڭ چىرايىڭ نىمانچە سۇلغۇن جېنىم ئاپا!  بازارغا چىقساڭ ئايلىنىپ كىرگىدەك، خەج قىلغۇدەك پۇلۇڭ يوقمۇ-يا؟ سۈتىڭگە نېمە بولدى؟ پەقەت شۇرالماي قالدىمغۇ؟ نېمىگە تىتىرەيسەن؟ توڭلىدىڭمۇ؟ نېمىشقا ئاۋۇ ساندۇقتىكى قېلىن كىيىملىرىڭنى كىيمەيسەن؟ شۇ مۇشۇنداق سوغاقتا كىيىمەن دەپ ئالمىغانمىدىڭ ئاپا؟! مەينەتمىدى-يا؟ ياق، سەن ھەرگىز ئۇنداق مەينەت نەرسىلەرنى ئۆيدە ساقلىمايسەن. ھەتتا كېچىلەردىمۇ ئېغىر كۆرمەي، ئورنىڭدىن تۇرۇپ مېنىڭ مەينەت قىلغان زاكاللىرىمنى يۇيۇپ، قۇرتىسەنغۇ؟ پات-پات تېخى بىر چىرايلىق پاكىزە ئۆيلەرنىمۇ قايتا تازلاپ، ھاۋا ئالماشتۇرۇپ، دېزىلفىكسىيە قىلىپ چىقىسەنغۇ ئاپا؟! ياكى ئۇ كىيىملەر ھازىرقى <مودا>غا ماسلاشماي قالدىمۇ؟  ئاپا! سەن ھەرگىز <مودا> قوغلاشمايسەنغۇ؟! باشقىلار بىلەن كىيىشتە-يىيىشتە بەسلەشمەيسەنغۇ-ھە! مەن گەپ قىلالىغان بولسام سىزگە ئۆتۈنۈپ تۇرۇپ، قېلىنراق كىيىنىشكە ئۈندەيتىم. ئۇنداق سىرىتقا چىقسىڭىز ئاسانلا زوكام بولۇپ قالمامسىز ئاپا؟! كۆڭلىڭىزدە ھەقىچان بۈگۈن بىر كۈن چىدىۋىتەي دەۋاتقانسىز بەلكىم. ئەمما <كوزا كۈندە سۇنمايدۇ، كۈنىدە سۇنىدۇ>غۇ ئاپا؟! سىز ھەر ھالدا ئىھتىيات قىلسىڭىز بولاتتى ئاپا!؟  شۇ تاپتا دادام قانچە سوغوقلاردا، قانداق جاپالارنى تارتىۋاتقاندۇ-ھە! شۇ جاپانى تارتىپ كىلىپ، تاپقان پۇلىغا يەنە بىزگە بىھۇدە دورا ئېلىپ يۈرسە تازا ياخشى بولماس جېنىم ئاپا! ئۇنىڭسىزمۇ بۇ ئۆيدە باشقا چىقىملارمۇ ئاز ئەمەسقۇ؟ دادامغىمۇ ئىچىمىز ئاغرىسۇن جېنىم ئاپا! تېخى ئۇ سوغوقتا ھېرىپ-ئېچىپ كەلسە، بىز زوكامدىن مىشىلداپ كۈتۈپ تۇرساق تولىمۇ ئادالەتسىزلىك بولمامدۇ ئاپا؟! سىز تولىمۇ ئاڭلىق، شەيتانلىرىڭىزغا ھاي بىرىپ قېلىن كىيىنىڭ جېنىم ئاپا!؟  ھەي! ئاپا. سەن بۇ نۆۋەت راستىنلا بىخەستەلىك قىلدىڭ! بەلكىم ئۇزاق تۇرماسلىقنى ئويلاۋاتقانسەن؟ مېنى ئويلاپ، تىزلا قايتىپ كىرمەكچى ئوخشايسەن، توغرىمۇ ئاپا؟! -ئاپا! بۈگۈن نىمانچە سوغاق. ئادەتتىمۇ شۇنداق سوغاقمىدى-يا؟ بەلكىم سىەنمۇ مەندەك تالا-تۈزگە كۆپ چىقمىغاندىكىن بىلمەسلىكىڭ مومكىن! دادام مۇشۇنداق سوغاقلاردا ئىشلەمدۇ ئاپا؟! مەن سەل توڭلىغاندەك قىلىمەن، سەنمۇ سەزگەنسەن ئاپا؟!  مەن سېنىڭ جان تومۇرۇڭغۇ؟ ئادەتتە مەن يىغلىساملا ئىللىق سۈتىڭ بىلەن مېنىڭ پۇتۇن جىسمىمغا ئىللىق ھارارەت ئاتا قىلىسەنغۇ؟ يىغلاپ بىرەيمۇ ئاپا؟! -ئاپا! بۇ ئاپتوبوسمۇ؟ ئادەم تولىمۇ جىق ئىكەن-ھە! سەن مېنى كۆتىرۈپ ئۆرە تۇرۇپسەنغۇ؟ بولدى. مەن كۆردۈم. يۈزۈمنى يېپىپ قوي ئاپا!؟ مەن چىدايمەن جېنىم ئاپا! سېنى بۇدا ھەرگىزمۇ بۇنداق ئادەم تولا يەردە قىستىمايمەن ھەم ئىككىلەندۇرمەيمەن ئاپا! -ئاپا! مەن باشقىلارنىڭ ئاپتوبوستا <ئاشىق-مەشۇقلار بايرىمى> دىگىنىنى ئاڭلاپ قالدىم. راستىنلا شۇنداق ئوخشايدۇ-ھە ئاپا! سەن دادامغا گۈل ئالغىلى مېڭىپسەن-ھە! بىچارە دادام كېچىدە ھېرىپ-چارچاق قايتىپ كەلگەندە، كۆڭلىگە ئەمىنلىك ئاتا قىلاي دەپسەندە... سەن نېمە دىگەن سۆيۈملۈك جېنىم ئاپا!؟! دادامنى بىر خۇشال قىلىش ئۈچۈن مۇشۇنداق سوغاقتا جاپا تارتىۋاتامسەن ئاپا؟! مەن ئېغىرمىكەنمەن؟ قانچە قىينىلىۋاتقانسەن-ھە! -ئاپا! ماڭغاندەك قىلدىڭ، ماشىنىدىن چۈشتىڭمۇ؟ مەن بەك توڭلاپ كەتتىم ئاپا! يىغلاي دىسەم كۆزۈم ئۇيقىغا سۆرەۋاتىدۇ جېنىم ئاپا! مېنى بىر ئېمىتىۋەتسىڭىز بولاتتى. ھوجۇدۇمدا بىر خىل بوشۇشۇش بولىۋاتىدۇ، سۈتىڭىزدىن ئايرىلسام  ھوجۇدۇمدا جانمۇ قالمايدىكەنغۇ جېنىم ئاپا؟!! -ئاپا! تولىمۇ شىرىن خىياللار مېنى ئەسىر قىلىپ كەتتىغۇ؟! دادام ئۈچەيلەننىڭ بەخىتلىك تۇرمۇش كۆرنۈشلىرى كۆز ئالدىمدا ئۇچۇپ يۈرۈيدىغۇ ئاپا؟! قاراڭ، ئەنە دادام بىر چىرايلىق ماشىنىنى ھەيدەپ، بىزنىڭ داچا تەرەپكە قاراپ كىلىۋاتىدىغۇ؟ سەن مېنى يىتىلەپ، دادامنى قارشى ئالغىلى خۇشال چىقتىڭغۇ؟ داچىنىڭ ئالدىدىكى بىر مۇنچە كىشىلەر بىزگە ھەۋەس بىلەن قارىشىپ كەتتىغۇ ئاپا؟!  دادام ماشىنىنىڭ ئارقا  كۈزىپىدىن نۇرغۇن نەرسىلەرنى بىز ئۈچۈن سېتىۋېلىپ ئېلىپ كەپتۇ ئەمەسمۇ ئاپا؟! ئۇ نەرسىلەرنى ساڭا بىرىۋېتىپ. ئاندىن مېنى كۆتىرىپ باغرىغا بېسىپ سۆيۈپ كەتتىغۇ مانا ئاپا! ھاۋا شۇنداق ئوچۇق تۇرۇپمۇ، توساتتىنلا تۈتۈلۇپ قار چۈشۈپ كەتتىيا ئەجەپ!  نېمە بولدى ئاپا؟! دادام باغرىدىن بىراقلا ئايرىپ تاشلاپ قويۇپ، چاپىنىنى ساڭا كەيدۇرۇپ، سېنى يىتىلەپ، مېنى تاشلاپ ئۆيگە يۈگۈرۈپ كىرىپ كىتىۋاتىدىيا ئاپا! مەن بىلەن كارىڭلار يوققۇ؟ قېنى ئابايقى ئاتىلارچە باغرىغا يېقىش؟ قېنى ئانىلارچە يۈرەك پارىسىنى ئاسىراش؟ مېنى ئىككىڭلار تەڭ قۇچاقلاپ، باغرىڭلارغا بېسىپ ئىسسىتساڭلار بولمامدۇ جېنىم ئاپا؟! -ئاپا! گۈلچىنىڭ <گۈل ساتىمەن!> دىگەن گېپى خىيالىمنى بۇزىۋەتتى. سەن گۈل قېشىغا يېقىن كەلگەن ئوخشىمامسەن! ئاپا مېنى بىر ئېمىتىۋېتىڭ! تىز بولوڭ ئاپا! ئۇنداق قىلماڭ! بەدەنلىرىم بەك سۇۋۇپ كەتتى!! مۇزلاپ قېلىۋاتىمەن ئاپا! بەلكىم سەن گۈلنى ئېلىۋېلىپ ئېمىتەي دەپ قالغانسەن ئاپا! ئەمما مەن ئۇ چاغغىچە چىدىمايدىغاندەك قىلىمەن ئاپا! شۇ ئۇزۇن پەلتۇسىڭنى كىيىپ چىققان بولساڭ، مېنى پىشىدە يۆگىۋالغان بولساڭ سېنىڭ تېنىڭنى پۇراپ تۇرغان بولسام، بۇنداق ئەھۋال يۈز بەرمەسمىدى ئاپا!؟ ياكى بۇ  اللا  ئالدىن ئورۇنلاشتۇرغان قىسمەتمىدۇ؟ ئاپا، سىز مەندىن رازى بولۇڭ! مەن يىغلىيالمايۋاتىمەن ئاپا! ئۆتىنىشىم شۇ: < مېنى بىر ئېمىتىۋېتىڭ جېنىم ئاپا! بۇ ئىلتىجاسىمنى بىر اللا دىلىڭىزغا ۋاختىدا سالسۇن ئاپا! ئاپا مېنى بىر ئېمىتىۋېتىڭ!...> -ئاپا! شۇ تاپتا سەن ئون يۈەن پۇلغا بىر گۈل سېتىۋالدىڭ. ئەمما بىر مۇزنى قۇچاقلىۋالدىڭ ئاپا! سەن ماڭا رازىلىق بىرەلمەي ئايرىلىپ قالدىڭ ئاپا! سۇلغۇن چىرايىڭ بىلەن يەنە قان-قان يىغلاپ كۆز يېشى قىشقا زادى بەرداشلىق بىرەلەسەنمۇ جېنىم ئاپا؟! دادامغا نېمە دەپ جاۋاپ بىرىسەن، نېمە دەرسەن ئاپا! مەن نېمىشقا بۇنچە چىدىماس ئاپا! ماڭا ئامىراق شۇ چوڭ دادا-چوڭ ئانىلىرىمغا <گۈلگە چىققان> دەرسەنمۇ ئاپا! ئۇلار سېنى كەچۈرەرمۇ ئاپا! مەن مۇشۇنچىلىك سوغوققىمۇ بەرداشلىق بىرەلمەي، سېنى پۈتمەس ئازاپقا تاشلاپ قويدۇم ئاپا! مېنى كەچۈر! -ئاپا! بۇ كۆرىنىش ئەجەپ بىر تال گۈل بىلەن مېنىڭ ھاياتىمنى تىگىشكەندەك بىر تىراگىدىيە ھاسىل قىلدى-ھە! باشقىلار شۇنداق چۈشۈنۈپ قالسا قانداق قىلارسەن ئاپا؟! نېمە دەپ ئۇلارغا جاۋاپ پۈتەرسەن جېنىم ئاپا؟! بولدى يۈزۈمنى ئاچماي <بالام ئەجەپ جىمجىت ئۇخلاپ بەردى> دەپ سۆيۈنۈپ، خۇشال-خورام ئۆيگە قايتىت جېنىم ئاپا! مەن سىلەرنى ئاخىرەتتە ساقلاي! خەيىر! يېپىق قازان يېپىق پېتى قالسۇن! ئۆيگە كىرىپ كۆز يېشى قىلما جۇمۇ جېنىم ئاپا!!! 2011-يىل 12-ماي قەشقەر مىسىرانىم مۇكاپاتلىق ئەسەرلەر سەرلەۋەسىگە سۇندۇم!

larzan

	بۇ ئەسەرنى نادىرلاشقا يەنە ئاۋازلىق ئەسەر قىلىپ ئىشلەشنى  تەۋىسيە قىلىمەن.

larzan

	كۆزلىرىمدىن چىققان ياشلىرىم،بىر ئۆزەم بىلىمەن،بۇ كەيپىياتىم بىلەن جېق سۆزلىگىم يوق ،بىر ئېغىز سوز :-ھەقىقەتەن ياخشى يېزلغان ئەسەر. تەسراتىمنى سوزلىمەيمەن،چۇنكى بارلىق ئانىلار،ئانا بۇلۇش ئالدىدىكى قىزلار چۇقۇم تۇلۇق بىر كۆرۇشكە تىگىشلىك ئەسەركەن.ئۇقۇپ بېقىڭلار.

kapTalis

	ئانىنىڭ بوۋىقىنى بىقىشتىكى  بارلىق ئىش پائالىيەتلىرىنى تولۇق  ئەكىس ئەتتۇرۇپ بىرەلەپسىز جىما ؟

Gulbar

	ئاھ خۇدا، مۇشۇنداق قىلىپ بىر نارەسىدە ۋاقىتسىز دۇنيادىن كەتتى.... [s:162] ھەقىقەتەن نادىر ئەسەر بوپتۇ!!! [s:166]

kqalmayman

	نۇرغۇن ئاياللار بار جۇما،ئىبرەتلىك بىر ئەسەر بۇپتۇ،نادىر تېما.

raddna

	مەنمۇ بىر ئانا ،مېنىڭ بالام 2ئايلىق بۇلدى ،مەن بالام ئۈچۈن ياشايمەن،اللا ئاشۇ نارسىدىلەر ئۈچۈن كوڭلىمىزگە ئىنساپ بەرگەيسەن......

ayixa-886

	نىمە دېيىشمنى بلمەيلا قالدىم ،ھەي........................... ئانىلار ھەقىقەتەن ئۇلۇغ ،لىكىن ھەممە ئادەم خاتالىقلاردىن ساقىت بولالمىغىنىغا ئوخشاش سىلەرمۇ بىلىپ بىلمەي خاتالىشىپ قالىسىلەر.............. ياخشى ئەسەر

Adarqiz

	شۇنچىلىك نېپىز يۆگەپ چىققان بولغىيمىتى بالىنى.....ئىچىم ئەجەپ ئاچچىق بوپ كەتتى....مۇشۇنداق چوكانلارمۇ بارمىدۇ ئارىمىزدا؟؟؟

xiren0997

	ناھايتى تەسىرلىك تېما يوللاپسىز،تاسلا قالدىم يىغلىۋەتكىلى،ئانىلىرىمىزنىڭ كۆڭلىگە ئىنساپ بەرسۇن.

نەمىرە

	ياخشى يېزىلىپتۇ،بىراق نىمىشقا بەزى جايلاردا "سەن"لەپ،بەزى جايدا"سىز"لەپ يېزىپتۇ........سەل غەيرىي تۇيۇلۇپ قالدى!!!!!!!!!!

akida918

	ئاپا دەپ ئالماي  ( ئانا ) دەپ ئالسىڭىز بوپتىكەن .. كىچىكىنە ئۇلۇغ تەۋسىيە ئاپا دەپ تىل چىقماي ئانا دەپ تىلى چىقسۇن  ..

بەرگى

	نەچچە يىل ئىلگىرى مۇشۇنداق بىر ئەھۋالنى ئاڭلىغان ئىدىم .... ھەقىقەتەن تەسىرلىك چىقىپتۇ ، بۇ ئەسەرنىڭ نادىرلىنشىنى ئۈمۈد قىلمەن  [s:166]

faeza

	قىزىم 9 ئايلىق بولدى ، خۇدايىم بويرىسا 2 ياشقىچە ئەمدۈرىمەن . بالام ھەر قېتىم ئەمگەندە نىمىشقىكىن ئىچى ئىچىمدىن سۈيۈنۈپ كىتىمەن . تاتلىق بالام ئۇيغاندى ، تىز ئەمدۈرىۋىتەي .... [s:127]