ئەجىر ( ھېكايە )

pahtikar

	ئۇ ئەتىگەنلىك بامدات نامىزىنى ئىخلاس بىلەن ئوقۇپ تۈگەتكەندىن كېيىن ئايالى ناشتا تەييارلىغان جوزىغا كېلىپ ، بالىلىرى بىلەن دەرقەمدە ئولتۇرۇپ تاماقلىناتتى . گەرچە ئۇلارنىڭ تۇرمۇشى شۇنچە غورىگۈل بولسىمۇ ، ئەمما باشقىلارغا بىر خىل بەختىيارلىق تۇيغۇسىنى بېرەتتى . ئاددى سەرەمجانلاشتۇرۇلغان ئۆي ، پاكىز تازىلانغان ھويلا _ ئارام سىرتتىن كىرگەن ئادەمگە ئازادىلىك بېغىشلايىتتى . مۇھەممەد تاماقلىنىپ بولغاندىن كېيىن بالىلىرىغا ئاپىسىنى قاقشاتماي ئۆي ئىشلىرىغا ياردەملىشىشنى جېكىلەپ تۇرمۇش غەملەش ئۈچۈن سىرتقا ماڭاتتى . دەرۋازىغىچە ئۇزۇتۇپ چىققان ئايالىنىڭ ئۆزىگە تەلمۈرۈپ قاراپ تۇرىۋاتقانلىقىنى سېزىپ تۇرىۋاتسىمۇ ، ئارقىسىغا قاراپ قېلىشتىن ئەنسىرەپ ، تېز _ تېز قەدەم ئېلىپ ، دوقمۇشتىن بۇرىلاتتىدە ئۇدۇللا مەدىكار بازىرىغا باراتتى . بەزىدە كۈنلەپ ساقلىسىمۇ تۈزۈكرەك بىرەر ئىشمۇ چىقمايىتتى . بۇنداق چاغدا ئۇ ئۆيىگە تولىمۇ مەيۈس قايتاتتى . شۇنداقتىمۇ ئۇ دەرۋازا ئالدىغا كەلگەندە ئائىلىسىدىكىلەرنىڭ كۆڭلىنى غەش قىلىپ قويماسلىق ئۈچۈن ئۆزىنى بىر قۇر تۈزەشتۈرۈپ روھلۇق ھالدا بوسۇغىدىن ئاتلايىتتىدە : _ بۈگۈن پېقىر ئالامەت ھۇزۇرلۇق ئارام ئالدى جۇمۇ ، كوچىدىكى ئادەملەر بىلەن مۇڭدۇشۇش ، ئۆتكەن _ كەچكەن نەرسىلەرگە قاراش كىشىنىڭ قەۋەتلا ھاردۇقىنى چىقىرىدىكەن دېگىنىچە ئايالىنىڭ تۇخۇم بىلەن ئەتكەن تامىقىنى ھۇزۇر بىلەن ئىچەتتى . شۇنداقتىمۇ قەدىناس ئايالىنىڭ ئۆزىنىڭ ياسالمىلىق قىلىۋاتقانلىقىنى سېزىپ تۇرىۋاتقانلىقىنى بىلىپ تۇراتتى . شۇڭا بۇنداق چاغدا ئۇ ئايالىغا تىكىلىپ قارىيالمايىتتى . بالىلىرى بولسا دادىسىنىڭ مۈرىسىگە ئېسىلىپ ھېچ ئىشتىن خەۋىرى يوق ئويناۋېرەتتى . شۇ كۈنى ئىش چىقىپ ، قولى پۇل كۆرسە ، چارچاپ ھالىدىن كېتىپ ئىشىك ئالدىغا ئاران كەلگەن بولسىمۇ ، يەنە باشقىدىن روھلىناتتىدە بوسۇغىدىن ئاتلاپ : _ ئاخشامقى چۈشۈم بىكار ئەمەسكەندە ، پوق _ سۈيدۈككە مىلىنىپ چۈش كۆرىۋېدىم . بۈگۈن بىر مۇنچە پۇللۇق بولۇپ قالدىم دېسە ، دېگىنىچە قولىدىكى تۇرمۇش لازىمەتلىكلىرىنى ئايالىنىڭ قولىغا تۇتقۇزاتتى . ئەمدىلا ئىش ئۇققۇدەك بولغان ئىككى بالىسى ئاپىسى يالتىراق خالتىلاردىن ئېلىپ بەرگەن نەرسىلەرنى كۆرۈپ ، خۇشاللىقىدىن قوزىچاقتەك سەكرىشىپ كېتەتتى . ئەمما ئايالى ئېرىنىڭ دۈمبىسىدىكى پۈرلىشىپ كەتكەن چاپان ھەم ئۇنىڭدىكى خەرىتىدەك تەر داغلىرىنى كۆرۈپ ، ئىچى ئاچچىق بولۇپ قالاتتى . ئۇ ئېرى بىلەن تەڭ خۇشال بولۇشنى ئويلايىتتىيۇ ، ئاغزى كۈلگەن بىلەن كۆزىدىكى مۇڭنى يوشۇرالمايتى ئېرى شۇنچە جانپىدالىق كۆرسەتسىمۇ. كۈنلەرنىڭ ئۆتىشى بىلەن ئايالىنىڭ چىرايى سارغىيىپ ، ئورۇقلاشقا باشلىدى . كېچىلىرىدە تۈزەك ئۇخلىيالمايدىغان بولۇپ قالدى . بۇ ئىش مۇھەممەتنى ئەنسىرىتىپ قويدى . شۇڭا : _ خوتۇن سېنىڭ بىر يېرىڭ ئاغرىۋاتقان ئوخشايدۇ _ ھە ، تۇرمۇشتىن ئەنسىرىمەي دەۋەر ، ھەمكارلىشىپ داۋالىنىشنىڭ كېنىشكىسى بولغاندىن كېيىن چىقىمدارمۇ بولۇپ كەتمەيمىز ، بىر تەكشۈرتۈپ باقاي سېنى دېدى . _ مەندە نېمە ئاغرىق بولسۇن ، ساق _ سالامەت تۇرىۋاتىمەنغۇ مانا ، كەيپىياتىم تۇراسىز بولىۋاتىدۇ شۇ، دېدى ئايالى . ئېرىنىڭ چېكە چاچلىرىنى تۈزەشتۈرگەچ . شۇنداق بولسىمۇ ئېرى ئايالىنىڭ ئۇنىمىغىنىغا قويماي ئەتىسى دوختۇرخانىغا تەكشۈرۈتكىلى ئاپاردى . تەكشۈرۈشتىن ئايان بولدىكى ، ئايالدا ھېچقانداق كېسەللىك ئالامىتى بايقالمىدى . بۇ ئىش مۇھەممەدنى قەۋەتلا خۇش قىلىۋەتتى . « بالىلارنىڭ بەختى ئۈچۈن بولسىمۇ ، ئايالىمنى سالامەت قىل ئىگەم » دەپ ئويلىدى ئىچىدە . بىراق ئايالىنىڭ ئاغزى كۈلسىمۇ ، كۆزى كۈلمەيدىغان مۇڭلۇق ھالىتى ئۇنى بىئارامچىلىقتىن قۇتۇلدۇرالمىدى . ئەمدى ئۇ ئىش ئىزدەپ چىقسا ، ئىشلەتكۈچىلەرنى كۈتۈپ ئولتۇرۇشتىن ئۆزى تەشەببۇسكارلىق بىلەن باشقىلارنىڭ ئالدىغا ئىش ئىزدەپ بارىدىغان ، قولدىن كېلىدىغان ئىشلارنى ئېلان تەرىقىسىدە يازدۇرپ تونۇش _ بىلىشلەرگە تارقىتىدىغان بولدى بۇنىڭ بىلەن ئۇنىڭ ئىشلىرى خېلى يۈرىشىپ ئىزدەيدىغانلارمۇ كۆپەيدى . ئۇنىڭ كاللىسىغا ئايالىنىڭ كۆزىدىكى ئاشۇ مۇڭنى يوقىتىش كىرىۋالغاچقا ئولتۇرسا _ قوپسا ئايالىنى پۈتۈن ۋۇجۇدى بىلەن خۇش بولىدىغان ھالغا كەلتۈرىدىغان كويدا بولدى . شۇڭا ئېشىنغان چاغدا ئايالى ياخشى كۆرىدىغان نەرسىلەرنى ئەكىلىپ ئايالىغا سۇندى . ئەمما يەىلا ئەھۋالنى ئۆزگەرتەلمىدى . بۇ ئىشتىن ئۇنىڭ يۈرىكى بەكمۇ سىقىلدى . ئەمما ئايالىغا چىش يېرىپ بىر نەرسە دېمىدى بۇنداق چاغدا ئۇ « بەلكىم ئۇمۇ بىر نەرسىنى ئويلاۋاتقاندۇ » دەپ ئۆزىگە تەسەللى تاپتى . شۇنداق كۈنلەرنىڭ بىرىدە ئۇ ئىشتىن قايتىپ ئۆيگە كېلىپ ھەيران قالدى . ئايالىنىڭ چىرايى ئاپتاپتەك نۇرلىنىپ كەتكەن بولۇپ ، ئىلگىركىدىن خېلىلا چەبدەسلىشىپ قالغان ئىدى . _ ۋوي خوتۇن بۇ سەنمۇ ئەمەسمۇ ؟ بۆلەكچىلىغۇ سەن دېدى . _ بۈگۈن خوشنىلار ساڭزا سېلىشىپ بەر دېگەن ، ئىشىم ياراپ كەتتىمۇ ئۇنىمىغىنىمغا قويماي ، بۇ پۇلنى خىراجەت قىلىڭ دەپ يانچۇغۇمغا سېلىپ قويدى . دېدى ئايالى پەرتۇقىنىڭ يانچۇقىغا سېلىپ قويغان 80 يۈەن پۇلنى ئېرىگە تەڭلەپ : _ ھۈششەرە دەۋەتتى مۇھەممەد پۇلنى قولىغا ئېلىپ ، ھەجەپ ئىسىمگە كەلمەپتا سەن ئۆي تامىقىنى گۈل قىلىۋېتەتتىڭ ئەمەسمۇ ، بەش كۈن ئالدىدا بازاردا ئۆي تامىقى چىقىرىدىغان ئايگۈل ئايالىڭىز ماڭا ياردەملىشىپ بەرسە ، ئىش ھەققى بەرسەم يەنە كېلىپ ئۆزىمۇ سودىنىڭ ئېپى _ جېپىنى بىلىپ قالاتتى دېگەن . شۇنداق قىلەمسەن _ يە . ئادەمنىمۇ ئۆيدە ئولتۇرىۋەرسە تۆت تام يەپ كېتىدۇ . ئايالى ئېرىنىڭ تەكلىپىگە خۇشاللىق بىلەن قوشۇلدى . شۇنداق قىلىپ ئايالىنىڭ كۆزىدىكى ھېلىقى مۇڭمۇ يوقالدى . ئائىلىنىڭ ئىللىقلىقى تىخېمۇ كۈچەيدى . ئۇلارنى تېخىمۇ خۇش قىلغىنى ئايالى ئۆي تائاملىرى چىقىرىشقا ياردەملىشىپ بىر ئاي بولغاندا ئۆز ئەجرىدىن سۆيۈنگەن ھالدا تاپقان 600 يۈەن پۇلنى ئاۋايلاپ ئالغىنىچە ئىرىگە تۇتقۇزدى . ئېرى بۇ پۇلدىن 300 يۈەن پۇلنى ئايرىۋېلىپ قالغىنىنى ئايالىغا ئۇششاق _ چۈششەك ئىشلارغا خىراجەت قىل دەپ قايتۇردى . ئەتىسى مۇھەممەد چەكسىز بەختىيارلىق ئىلكىدە چېيىنى ھاپىلا _ شاپىلا ئىچتىدە ئايالىنىڭ تەخىر قىلىڭ دېگىنىگە قارىماي كوچىغا چىقتى . ئۇ ئۇدۇل « ئايگۈل خام تائام دۇكىنى » دېگەن ۋېۋىسكا ئېسىلغان دۇكانغا باردىدە ئايگۈلنى چاقىرىپ : رەھمەت ئايگۈل سىزگە ، بۇ ئۈچ يۈز يۈەننى ئېلىڭ ، ئىش دېيىشكىنىمىزچە بولىۋەرسۇن ئەمما سىزدىن ئۇ دۇنيا ، بۇ دۇنيا ئۆتىنىپ قالاي ئىشىمىزنى ئايالىم ھەرگىز بىلىپ قالمىسۇن دەپلا كەينىگە قايرىلدى . ئايگۈل مۇھەببەتلىك بۇ ئائىلىنىڭ خوجايىنىغا كەينىدىن بىر ھازا قاراپ قالدى . مۇھەممەد ئىتتىك _ ئىتتىك قەدەم ئالغىنىچە ، كوچىدا كېتىۋاتقان كىشىلەر توپىغا سىڭىپ كەتتى . مۇڭغۇلكۈرە ناھىيە ئاقىللار مەكتىۋىدىن : ئادىلجان ھەسەن 2011-1-28

QIQAK0903

	تەسىرلىك ھىكايىكەن ، تۇر مۇشىمىزدا مۇھەممەتتەك ئەرلەر ئاز ئۇچرايدۇ .

pahtikar

	[s:166] تېىخىمۇ تىرىشىڭ!ھەممە ئەرلەر شۇنداق بولسا ھە؟