تاغام

pahtikar

	تاغام ( ھېكايە ) دادام تۇرۇپلا : _ سېنىڭ زامان دەيدىغان بىر تاغاڭ بولىدىغان يېشىڭ چوڭايغانچە مىجەزىڭ ، چىرايىڭ قۇيۇپ قويغاندەك تاغاڭنى تارتىۋاتىدۇ دەپ قوياتتى . _-ئۇنداقتا ئاشۇ تاغام ھازىر نەدە ؟ دەپ سورايىتتم . مەن ئوننەچچە يىلنىڭ ئالدىدا ھەممىمىزنى ئۆيلۈك _ ئوچاقلىق قىلىپ قويۇپ ئۆزى قاڭقىپ چىقىپ كەتكەن . بىر _ ئىككى قېتىم تېلفۇن ئالاقىسى قىلغاندىن بۆلەك ھازىرغىچە دېرىكىنى ئالالمايۋاتىمەن تاغاڭ. ئەينى چاغدا ھەربىگە بارىمەن دەپ ئىككى يىل يۈگىرەپ ، ئېغىر تاشلارنى كۆتۈرۈپ مەشىق قىلغان ، بىراق ئارزۇيىغا يېتەلمىگەن . دادامنىڭ مۇڭ تۆكىلىپ تۇرغان كۆزىدىن ئىنىسىنى قەۋەتلا سېغىنغانلىقى چىقىپ تۇراتتى . بۇ چاغدا مەندە دادامغا ئاشۇ مەن كۆرمىگەن تاغامنى تېپىپ بېرىپ ئۇنى خۇش قىلغۇم كېلەتتىيۇ ، ئەمما بۇ ئىش قولۇمدىن كەلمەيىتتى . شۇنداق كۈنلەرنىڭ بىرىدە ئۆيىمىزنىڭ تېلفۇنى جىرىڭلاپ كەتتى . _ ئەسسالاممۇ ئەلەيكۇم ! _ ۋائەلەيكۇم ئەسسالام ، ئاكامما ؟ مەن دادامنى چاقىردىم ، دادام يۈگىرەپ دېگىدەك تېلفۇننى قولىغا ئالدى . _ زامانمۇ سەن ؟ دادامنىڭ ئاۋازى تىترەپ كەتتى ، ئامانمۇ سەن ئۇكام ، ئۆزۈڭ نەدە ؟ يېنىڭدا تېلفۇنىڭ بارمۇ ؟ دادام بەكمۇ ھاياجانلىنىپ كەتكەچكە تاغامغا سوئاللارنى ياغدۇرىۋەتتى . ئۈرۈمچىدە دېدىڭما ؟ توختا تېلىفۇنىڭنى يېزىۋالاي . بولە مۇرات بالام دەپتەر قەلەم ئەكەل . مەنمۇ چەبدەسلىك بىلەن دادام بۇيرىغان نەرسىلەرنى ئەكىلىپ تېلفۇن نومۇرنى خاتىرىلىدىم . ئەپسۇس ئۇلار ئۇزاق پاراڭلاشمىدى . دادام كۆزىدىن ئاققان ياشقا ئىگە بولالماي ، تۇرۇپكىنى قويىۋەتتى . بىر ھازادىن كېيىن ئۆزىنى دەڭسىۋېلىپ ، قايتا تېلفۇن قىلدى .تېلىفۇن ئۇلانغىچە دادام بەكلا جىددىيلەشكەن ئىدى . تەلىيىمىزگە تېلفۇن ھايالشىمايلا ئۇلاندى . بۇ قېتىم ئۇلار خېلى ئۇزۇن پاراڭلاشتى . تېلفۇنلىشىش توختىغاندىن كېيىن دادام گۆھەر تېپىۋالغاندەك خۇشال بولۇپ ، چىرايى نۇرلىنىپ كەتتى . ھەمدە : _ بالام ، تاغاڭ كېلەلمەيدىغان ئوخشايدۇ . بىز ئەتە تەييارلىق قىلىپ ئۆگۈنلا ئۈرۈمچىگە ماڭايلى . مېنىڭ مۇشۇ كۈنگە كېلىشىمگە ئۇ ئاز ياردەم قىلمىغان ، بىر كۆرمىسەم كۆڭلۈم ئارام تاپمايدۇ ئۇيقۇم ئۇيقۇ بولمايدۇ دىدى . شۇنداق قىلىپ ئۆگىنى ئىككىمىز ئۈرۈمچىگە قاراپ يولغا چىقتۇق . ھەر ئىككىمىز تۈگىمەس خىياللار بىلەن شۇنچە ئۇزاق يولنى بېسىپ ئۈرۈمچىگە قانداق كېلىپ قالغانلىقىمىزنى تۇيماي قاپتۇق . ئابتۇبۇستىن چۈشۈپ خۇددى توڭ ئىسكىلاتقا كىرىپ قالغاندەك بولۇپ قالدۇق . تۇمان قاپلىغان ئۈرۈمچى شەھىرى شۇنداق سوغۇق ئىدىكى بىز تالادا بىردەم تۇرۇشقىمۇ تاقەت قىلالماي ، بېكەتكە كىردۇقتە تاغامغا تېلفۇن قىلىپ ئورنىمىزنى دېدۇق . ئالاھەزەل بىرەر سائەتلەردىن كېيىن دادام -_ئەنە تاغاڭ كېلىۋاتىدۇ ، دېگىنىچە سوغۇقتىن دالدىلىنىپ بېكەتكە كىرىۋالغان سانجاق ئادەملەر توپىنى يېرىپ ، مېنى يېتىلىگىنىچە بېكەت ئىشىكىدىن چىقتى . يۈرىكىم تۇيدىمۇ خېلىلا يىراقتىن كېلىۋاتقان ئوتتۇرا بوي ئادەمگە قاراپ ھەيران قالدىم . ئىت ئۆلگىدەك قارا سوغۇقتا يېلىڭلا كىيىنىۋالغان ھەتتا پۇتىدا كونىراپ ئەبجىقى قالمىغان شىبلىت بىلەن بىزگە ئېغىر قەدەم ئېلىپ يېقىنلاشماقتا ئىدى . مەن دادام ئىككىسى يىغا _ زارە قىلىشىپ قۇچاقلىشىپ كۆرۈشىدۇ دەپ ئويلىغان ئىدىم . ئۇنداق بولمىدى . ئۇلار سالماق قول ئېلىشتىدە ھەر ئىككىسى ئىككى يانغا قاراپ جىمىپ كېتىشتى . ئاشۇ جىمجىتلىققا دۇنيانىڭ مېھرى سىغقۇدەك بىر خىل مەنا سىڭگەنلىكىنى ھېس قىلدىم . بىر ھازادىن كېيىن تاغام ئۆزىگە كېلىپ : _ بۇ ياق مۇراتجانمۇ ؟ _ دەپ سورىدى . _ ھەئە ، سەن ئىسمىنى قويۇپ بەرگەن بالام مۇراتجان مۇشۇ _ چوپچوڭلا بولۇپ كېتىپتۇ ، نېمە دېگەن تېز ئۆتكەن ۋاقىت . ئۇمېنى باغرىغا باستى . ئۇنىڭ قۇچاقلشىدىن بەكمۇ كۈچلۈك ئادەم ئىكەنلىكىنى ھېس قىلدىم . ئۇ مېنى قويىۋەتمىدى . قۇلىقىمغا ئىسسق سۇيۇقلۇقنىڭ تامچىۋاتقانلىقىنى ھېس قىلدىم . مېنىڭمۇ پۈتۈن ۋۇجۇدۇم لەرزىگە كېلىپ ئۆزۈمنى تۇتىۋالالمىدىم . مەن بۇ قېتىم تېخىمۇ ھەيران قالدىم سەۋەبى تاغامنىڭ ئاستى_ ئۈستىچىشى پۈتۈنلەي چۈشۈپ كەتكەن بولۇپ كالپۇكى ئولتۇرۇشۇپ كەتكەن ئىدى.- _ يۈرۈڭلار ، سوغۇقتا تۇرىۋەرمەي ئۆيگە بارايلى . سىلەرنىڭ كېلىشىڭلاردىن قىلچە خەۋەر تاپالماپتىمەن . ئابتۇبۇسقا چىققاندا تاغامنىڭ ئون يۈەندەك پۇل ئارىسىدىن كونىراپ كەتكەن ئۈچ يۈەننى بېلەت ساندۇقىغا تاشلىغىنىنى كۆرۈپ قالدىم . بىز ئالاھەزەل بىرەر سائەتتەك يۈرگەندىن كېيىن شەھەر سىرتىدىكى بىر كونا مەھەللىگە كېلىپ ئابتۇبۇستىن چۈشتۇق . تاغامنىڭ تۇرۇپ _ تۇرۇپلا : _ كېلىشىڭلاردىن خەۋەرسىزلا قاپتىمەن ، دېگىنىدىن ئۇنىڭ بىر ئىشتىن ئوڭايسىزلىنىۋاتقانلىقىنى سېزىپ قالدىم . بىز بىر ھازا ئەگرى _ بۈگرى يوللارنى بېسىپ ماڭغاندىن كېيىن تولىمۇ كونىراپ ، مەينەتلىشىپ كەتكەن بىر ئۆينىڭ ئالدىغا كېلىپ توختىدۇق . _ مەن مۇشۇ ئۆيدە تۇرىۋاتقان ، قېنى ئۆيگە كىرىڭلار . ئۆي ئىچى تولىمۇ ئاددى بولۇپ ، بۇلۇڭغا يىغىپ قويغان بىر كىشىلىك يوتقان _ كۆرپە ، رەڭسىز تېلىۋېزور ، پىلىتىلىك مەش ۋە باشقا تۇرمۇش لازىمەتلىكلىرىدىن بۆلەك قولغا چىققۇدەك ھېچنەرسە يوق ئىدى . تاغام بىر نەرسىدىن خىجالەت تارقاندەك بېشىنى يەردىن كۆتۈرمەي ، بۇلۇڭدىكى ئۇن خالتىسىغا قاچىلاپ قويغان كۆمۈردىن ئېلىپ مەشكە ئوت قالدى _ دە ، دادامنىڭ شۇنچە توسىغىنىغا ئۇنىماي : _ سىلەر بىرئاز ئولتۇرۇپ تۇرۇڭلار ، مەن چىقىپلا كىرەي دەپ تالاغا ماڭدى . خېلى ئۇزۇن ساقلىساقمۇ تاغام كىرمىگەندىن كېيىن بىز تالاغا چىقتۇق . ئۆيدىن يۈز قەدەمچە نېرىدا بىر يۈك ماشىنىسى تۇراتتى . ماشىنا ئۈستىدە بىرى بېشىنى يەردىن كۆتۈرمەي كۆمۈر چۈشۈرىۋاتاتتى . _ دادا ئاۋۇ كۆمۈر چۈشىرىۋاتقان تاغامغۇ دېدىم ، مەن دادامغا قاراپ . _ شۇكەن ، جۈر ئۆيگە كىرىۋالايلى . دادام ئىككىمىز ئۆي ئىچىدە شۇنچىلىك ئازاپ ئىچىدە زۇۋان سۈرمەي ئولتۇرۇپ كەتتۇق . مەشتىكى ئوت تۇتۇشۇپ ، ئۈستىگە قويغان چۆگۈن غىڭىلداشقا باشلىدى . ئۇزاق سۈكۈتتىن كېيىن ئىشىك غىچىرلاپ ، تاغام كىرىپ كەلدى . ئۇنىڭ قولىدا ئېغىر خالتا بولۇپ ، چىراي قىزىرىپ چاچلىرى ھۆل بولۇپ كەتكەن ئىدى . ئۇ قولىدىكى نەرسىلەرنى يەرگە قويۇپ ، تۆش يانچۇقىدىن كۆمۈر قارىسى يۇققان 20 يۈەننى ئالدىدە : _ تۇتە مۇراتجان ، بۇ مېنىڭ كۆرۈملىكىم بولۇپ قالسۇن ، يانچۇقىڭغا سېلىپ قوي ئاز بولۇپ قالدى. مەن يىغلىۋېتىشكە تاس قالدىم . پۇلنى قەتئى ئالغۇم بولمىسىمۇ ، يەنىلا ئالدىم ، ھەم پۇلنى ئايرىم يانچۇقىمغا سېلىپ ، يەنە بىر يانچۇقىمدىكى ساقلاپ قويغان ئىككى يۈز يۈەندەك پۇلنى تاغامنىڭ تاماققا تۇتۇش قىلغان پۇرسىتىدىن پايدىلىنىپ يېنىمغا قويۇپ قويغان چاپىنىنىڭ يانچۇقىغا ئاۋايلاپ سېلىپ قويدۇم . تاماقمۇ پىشتى . شۇ كۈنى مەن ئۆمرۈمدە بۇنچىلىك مېزىلىك تاماق يېمىگەنلىكىمنى ھېس قىلدىم . بۇ جەرياندا داداممۇ تاغامدىن ، تاغاممۇ دادامدىن ھال _ ئەھۋالى تۇغۇرلۇق بىر نەرسە سوراشىمىدى . لېكىن ئىككىسىنىڭ يۈرىكىدە نېمە دېيىشىۋاتقانلىقىنى بىلىپ تۇردۇم . تاماق يېيىلىپ ، دۇئا قىلىنىپ بولغاندىن كېيىن ، دادام : _ ئۇكام توغرا چۈشەنسەڭ ، ئۈرۈمچى قەۋەتلا سوغۇق ئىكەن . دېمىم سىقىپ كېتىپ بارىدۇ ، ئۇنىڭ ئۈستىگە مۇراتقىمۇ قېلىن كىيدۈرمەپتىمەن . سوغۇق ئۆتكۈزىۋالماي ، بىز كېتىۋالساق دېدى . تاغام بىر ھازا تۇرۇپ كەتتى _ دە ، _ بوپتۇ ، سەنمۇ ياخشى تۇرۇپسەن . مەنمۇ شۈكرە يامان ئەمەس . يازدا كېلەرسىلەر . ئۇنىڭ ئاۋازى تىترەپ كېتىۋاتاتتى . دادام يۇرتتىن ئەكەلگەن نەرسىلەرنى جوزىغا قويدى ھەم يانچۇقىدىن پۇل چىقىرىپ تاغامغا تەڭلىدى . تاغام پۇلنى قەتئىيلا ئالغىلى ئۇنىمىدى . _ مېنى ئايا دېدى ئۇ ئاخىرى ، مەن بىر جان ، سەن تۆت جان مەن قانداقلا قىلسام بىر جېنىمنى جان ئېتىپ كېتىمەن . مېنى ئايا . تاغام يىغلاپ سالىغاندەك قىلاتتى . دادام ئەمدى پۇلنى زورلىمىدى . دادام شۇ پۇلغا بازاردىن ئۇرۇق _ تۇققانلارغا نۇرغۇن نەرسىلەرنى ئېلىپ ، يۇرتقا كەلگەندە تۇققانلارنىڭ ئالدىغا « مۇراتنىڭ يوللىقى » دەپ قويدى . مەن تاغام بەرگەن كۆمۈر يۇقى 20 يۈەننى خاس ساندۇقىمدىكى كۈندىلىك خاتىرەمنىڭ ئىچىگە ئاۋايلاپ سېلىپ قويدۇم . شۇ كۈنى خېلى ۋاققىچە ئۇخلىيالمىدىم . قاچانلاردىدۇر ئۇخلاپ قاپتىمەن . چۈش كۆردۈم . چۈشۈمدە ئىنىم ئىككىمىز بىر _ بىرىمىزنى يۆلەپ ئېگىز بىر تاغقا چىقىپ كېتىۋاتقۇدەكمىز ، ئەتراپتا مېھىر _ مۇھەببەتنىڭ چىرايلىق گۈللىرى خۇش پۇراق چېچىپ تۇرغۇدەكمىش. ئاپتور: مۇڭغۇلكۈرە ناھىيە ئاقىللار مەكتىۋىدىكى ئادىلجان ھەسەن.

nazarxah

	ھەمىمىزگە مېھىر _ مۇھەببەت  گۈللىرى مەڭگۈ خۇش پۇراق چاچسۇن!

TOGRAKPADIXASI

	ناھايىتى تەسىرلىك يېزىلىپتۇ.

@SAHRAKIZI

	بەكتەتەسىرلىك كەن  قەلىمىڭز ھارمى غاي رەخمەت

nurlala

	ئاللاھ قولىڭىزغا دەرت بەرمىسۇن.رەخمەت.