ئاشكار قاۋاقخانىسىدىكى بايراملار

axkar

	قاۋاق ئاچتىم بالادا قالدىم، ئاچمىسام تالادا قالدىم .        خېلى كۈنلەردىن بىرى قاۋاقخانامدا بولغان نۇرغۇن ئىشلارنى سىرتقا يايغىم كەلمەيدىغان بولۇپ قالدىم . نىمىلا دىمىگەن بىلەن شۇ قاۋاق مەستانىلىرىغا مىھرىم بار ئەمەسمۇ . ئۇلارنىڭ قۇرۇقدىغان بىر بوتولكىسى مىنىڭ بىر كۈنلۈك كۆكتاتلىرىمنىڭ چىقىمىنى كۆتۈرسە ،بەش-ئالتە ئادەمنىڭ << ساخاۋەتلىك >> قوللىرىدىن چىققان سورۇننىڭ پۇلى مىنىڭ بىر ھەپتىلىك چىقىمىمنى بىمالال كۆتۈرۈپ كىتىپ بارىدۇ . مىھمانلىرىم ئېچىپ بىر يەرگە بارغاندا پۇكەيدە كىرىم ھىسابلاپ ئولتۇرغان ماڭا قاراپ رومكا تەڭلەيدۇ ، يېنىغا تارتىدۇ ، - بولدى ئاكا، ئىچىۋىرىڭلا ، سىڭسۇن ، - مەن ئىچمەي ، دوختۇر ئىچمە دىگەنتى دىگەندەك باھانىلەر بىلەن ئۆزۈمنى دالدىغا ئالىمەن . ئەمما بەزى بىر ھاراققا چىلىنىپ بولغان ， گىرادۇسى 100 گە يىقىنلاپ قالغان كىشلەردىن قۇتۇلۇش بۇنچە ئاسانغا چۈشمەيدۇ ، ئامالنىڭ يوقىدىن ئۇلارغا - مەن ئەتتىگەندىلا 3 رومكىنى ئۇلاپ كۆتۈرىۋىتىمەن ، ئەتە ئەتتىگەندە بىرگە ئولتۇرامىز ، ئاكا ، ماڭا سۇنغان رومكىنى سىزگە كۆڭۈل قىلىۋەتسەم دىگەندەك تۇتامى يوق ، كۆڭۈل رەنجىتمەيدىغان سۆزلەر بىلەن نېرى بولىمەن ، ھەم مۇشۇ كۆڭۈل تۈپەيلىمۇ بەزى بىر مىھمانلىرىم بىلەن رەنجىشكەن چاغلارمۇ ، ھەتتا بىر جوزىدىكى ئۈلپەتلەر بىر بولوپ گىلىمنى سىققان چاغلارمۇ بولغان . :" بولمىساڭ ئىللىق چىراي ، ئاچمىغىن دۇكان-ساري " دەپ توغرا ئىيتىپتىكەن ، مەيلى سەتلىنەي مەيلى مۇشىت-پەشۋالارغا ئۇچىراي كۈلۈپ تۇرىمەن ، شۇ سورونىڭ ئارسىدىكى غەرەز ئۇقىدىغان بىرەرسىنىڭ قۇلىقىغا ئاستاغىنە " پالانچىكام مەسىت بولۇپ قاپتۇ ، سىز ساق بولغاندىكىن ئاستا يۆلەپ ئاپىرىپ قويۇڭ دەيمەن ، ئەلۋەتتە مىنىڭ بۇ كۆيۈمچانلىقىمدىن تەسىرلەنگەن << سورۇن ساقلىرى>> ، قولۇمنى چىڭ سىقىپ ئاز قالىدۇ ياش تۆككىلى .          نەۋرۇزغا ئاز قالغان كۈنلەردە دۇكاننىڭ سودىسى خۇددى ئېتىز باشلىرىدەك قاينام-تاشقىنلىققا چۆمگەن ئىدى . ئېچەرمەنلەرمۇ جاھاننىڭ ئىللىشىغا بېقىپ قوقماي -قوقماي ئېچىدىغان بولوپ كەتتى ، سىرت سوغۇق بولمىغاچقا كىچىلەردە كوچىلاردا يىقىلىپ قالساق توڭلاپ ئۆلۈپ قالمايمىز دەپ ئويلىسا كىرەك . مۇشۇ ئەتىراپقا تونۇش بولغان بىر دىۋانە بار ئىدى . بۇ كىشىنى دىۋانە دىگەندىن كۆرە ھاراقكەش دىسەك ئۇنىڭغا تىخىمۇ توغرا باھا بەرگەن بولىمىز . ئەتىراپتىكى دۇكانلارنىڭ ھەممىسىگە بىر قىتىم كىرىپ پۇل سوراتتى ، دۇكانچى بالىلارمۇ بۇ كىشىنىڭ پۇلنى نىمىگە ئىشلىتىدىغانلىقىنى بىلىپ كەتكەچكە دائىم ھارغىچە گەپكە سېلىپ ئاندىن ئون يىگىرمە تېيىن پۇل تۇتقۇزۇپ قوياتتى ، پۇللىرى يىغىلىپ بىر رومكا ھاراققا يەتكۈدەك بولغاندا مىنىڭ قاۋىقىمغا يۈگرەيتتى ، مەنمۇ ئۇنىڭ قولىدىكى پارچە پۇللارنى ساناپ ئولتۇرمايلا رومكىنى لىقلاپ بىرەتتىم ، ئۆزى ھاراقكەش ، دىۋانە بولغان بىلەن ئىنسابى بار كىشى ئىدى ئۇ ، قولىدىكى پارچە پۇللىرى رومكىغا يەتمىسە ھەرگىز دۇكىنىمغا ئالدىراپ قەدەم باسمايتتى .          بۈگۈن نەۋرۇز ، دۇكاننى ئەتتىگەنرەك ئاچتىم ، چۈنكى نىمىلا دىمىگەن بىلەن بۈگۈنكى سودىنى قويىۋىتىشكە بولمايتتى ، ئەتىراپىمدىكى كىشلەردىن نەۋرۇز ئېشى ئىچىدىغانلارغا قارىغاندا ھاراق ئىچىدىغانلارنىڭ كۆپلىكى ماڭا ئېنىق ئىدى . بىردىن ئىككىدىن بولۇپ دۇكىنىممۇ توشۇپ قالدى ، بۈگۈن ياشلارغا قارىغاندا ياشقا چوڭ كىشلەر قاۋىقىمغا كۆپىرەك كىرگەن ئىدى . ئەلۋەتتە مىنىڭ دائىملىق چۆپقەتلىرىمنىڭ بىرىمۇ كەم ئەمەس ، دائىم بىر بۇلۇڭدا ئولتۇرۇپ ئۆزى يالغۇز ھاراق ئىچىدىغان نۇرمەمەت قاسساپ ، يەنە ھەممىمىز قاۋاق شائىرى دەپ ئاتىۋالغان بىر قارا سومكىنى قولتۇقىغا قىستۇرۇپ كىرىپ يەنە شۇ قولتۇقىغا قىستۇرۇپ چىقىپ كىتىدىغان ھىزىم شائىر .... ئەلۋەتتە ئۇنىڭ شېئىرلىرى مەتبۇئاتلاردا بىرەر قىتىم يۈزىنى ئاچمىغان بولسىمۇ بۇ يەردە باشقىچە بىرخىل ئىناۋەتتە ئىدى ، ئۇنىڭ تۈنۈگۈن ئوقولغان مۇنۇ شېئىرىنى ئاڭلاپ بىقىڭلا . - ھە ھىزىمكا ، قۇرۇق كۆتۈرمەيمىز ھە رومكىنى ، ھىزىمكام ئەتىراپتىكىلەرنىڭ ۋەس-ۋەسى بىلەن شېئىر ئوقۇشقا باشلىدى . يارىم مەڭزى ئانار ئوخشاش قىزارغاندا ، مەن كىلەرمەن يىراقلاردىن گۈل قۇچاقلاپ. ئۈلپەتلەرگە ھەمرا بولوپ مەن مەي ئىچسەم، يار تۇرارمۇ چىلانباغدا مىنى ساقلاپ . قەدەھ بىرلە ، كۆڭۈللەرنى يۇم قىپ يۇتسام ، يۈرەك -باغرىم قىزارغايمۇ يار مەڭزىدەك . باشقا شائېر قەلەمىگە سىياھ بەرسە ، ھىزىم ئاكاڭ شۇ مەي بىلەن خەت يازغىدەك.        مانا مۇشۇنداق شادلىق ، ئاراملىقنى باشقا -باشقا نەرسىلەردىن ئىزدەيدىغان كىشلەر مىنىڭ قاۋىقىمدا نۇرغۇن . ھەر كىشىنىڭ ئۆزىگە چۇشلۇق دەرت-ئەلەملىرى ، قايغۇ -پىغانلىرى بار ، بەزى چاغلاردا مۇشۇ كىشلەردىن زوق ئېلىپمۇ قالىمەن ، ھاراقكەشتىنمۇ زوق ئالغىلى بولامدۇ ؟ دەپ قالماڭ . مىڭ ئاڭلىغاندىن بىر كۆرگەن ئەلا دەپتىكەن ، ئەلۋەتتە بۇ يەردىكى زوق ئۇ باشقىچە زوق . سىز ھەم ئۇ چۈشەنمەيدىغان زوق . راسىت ، شەھەرگە تىرىقچىلىق ئۈچۈن ئۇرۇق ، سۇلياۋ يوپۇق دىگەندەك لازىمەتلىكلەرگە كىرگەن بەزەن دىھقانلارنىڭ قاۋىقىمدا قونۇپ قالغانلىقىنى ئۇنتۇپ قاپتىمەن .       5- ئاي كارامەت بىر ئاي ، ھەپتە ئىچىدە ئىككى قىتىم بايرام بولىدۇ ، بۇ بايراملارنىڭ ئاتلىشى مىنىڭ خىرىدارلىرىمنىڭ نۇرغۇنلىرىغا ماس كەلمىسىمۇ ئويناۋىرىدۇ ، ئەلۋەتتە بۇ ئىش مىللىتىمگە ئومۇملاشقان ، خەتنە تويدا خەتنىسى بولغان بالىنىڭ بىر بۇلۇڭدا شۈمشىيىپ قىلىپ ئاتا-ئانىسىنىڭ ئۇسسۇل -تانىسىغا چۈشكىنىدەك ، ئەزەلدىن يەر بىلەن جان باقىدىغان دىھقانلارنىڭ نەۋرۇزدا يەرگە ئۇرۇق سالالماي ئىقدىسادتىن قىينىلىپ كەتمەن قۇچاغلاپ تۇرغىنىدا يانچۇقى تومپايغان كىشلەرنىڭ رىستۇرانلاردا نەۋرۇزلۇق شىرە ھازىرلىغىنىدەك . ئاياللار بايرىمىدا نۇرغۇن ئەرلەرنىڭ ئۆيگە غىرىق مەسىت ھالدا كىرگىنىدەك . يەنە ياتلارنىڭ بايرىمىدا ئۇيغۇرۇمنىڭ قوللىرىدا گۈل تۇتاملاپ كوچا-كويلاردا ئايلىنىپ يۈرگىنىدەك.....      ئەلۋەتتە مەنمۇ بۇ بايراملارغا ياخشى تەييارلىق قىلدىم ، ھاراق -زاكوسكىلارنىڭ باھاسىنى تەڭشىدىم ( ئۆستۈردۈم ئەلۋەتتە ) . بىر نەچچە كوي بۇ بايرامدا مىھمانلىرىمنىڭ كەيپىياتىغا ھىچقانچە تەسىر قىلماسلىقى ئېنىق ئىدى ، بايرام ئەمەسمۇ . بۇ كۈنلەردىكى دۇكان كەيپىياتى مىنى ئۆزگىچە خوش قىلىۋەتتى ، بىرىنچى كۈنى ئۈستەللەر توشۇپ مىنىڭ پۇل ئالىدىغان پۇكىيىمدە بىر نەچچە كىشى ۋاقىتلىق سورۇن قۇردى . دۇكان ئىچى قاڭسىق ھاراق پۇرىقى بىلەن ئاچچىق تاماكا ئېسىغا توشقان بولسىمۇ كىشلەرنىڭ نەپىسى شۇنچىلىك ئەركىن ئىدى . يان تەرەپتىكى ئۈستەلدىن كۈلكە-چاقچاق ئاۋازى توختىماي ئاڭلىنىپ تۇراتتى ، دۇكىنىمغا ھەپتىدە ساق يەتتە كۈن قەدەم باسىدىغان ياسىن پاخپاق تۈگىمەس چاپچاق-پاراڭلىرى بىلەن بىر دۇكان ئىچىدىكى كىشلەرگە ھەقسىز كۈلكە ئاتا قىلىۋاتاتتى ، - ياسىن ئۇكا ، خوتۇنۇڭ سىنى كۆپ گەپ قىلىسەن دەپ ئۆيگە بارساڭ ئېغىزىڭغا پايپاق تىقىپ قويىدىكەنغۇ ۋەيىت - قىززىق ھە سەن نودۇركا ، مۇشۇ ئېغىزىمغا توشۇڭ پايپاق بولسىمۇ كىرىپ كىتىدىغان تۇرسا ، ئىشتان-پايپىقىنى تېقىپ قويسا قانداقكىن ، ۋەيىت ، - توقوم نىمىشقا ۋەيران بولدىكى دىسەك ، سارجىلىرىنى سەن يۈتۈپ بوپسەنكەندە ۋەيىت. -ۋوي ، ئالىم ئىشتىنىڭ سارجىمۇ نىمە ، ئاۋايلا ياسىن يەپ قويمىسۇن ، ۋەيىت ،، مۇشۇنداق كەلسە - كەلمەس گەپلەرنىڭ ھەممىسىگە بىرىلىۋاتقان ۋەيىتلەردىن دۇكاننىڭ ئىچى بىرەر تويغا قوپقان يىگىتنىڭ مەسلىھەت چېيىغا ئوخشاپ قالغان ئىدى . ( بۇ يەردە ئازىراق چۈشەنچە بىرەي توقۇم دىگەن غۇلجا شەھەردە بۇرۇن تازا بازار تاپقان توقۇمىچىلىق ، رەختچىلىك ئىشلىرى بىلەن شۇغۇنلانغان زاۋۇت ، سارجا بولسا بىرخىل رەختنىڭ ئىسمى ). مۇشۇنداق قىززىقچىلق بىلەن مەنمۇ كۈندە كۈلكىگە تويۇنۇپ ياشاپ كىلىۋاتىمەن . كەچ بولۇپ كۆزگە ئۇيقۇ ئولاشقاندىلا بۇ كىشلەر پەس كويغا چۈشىدۇ ، بىرى يەنە بىرىنى يۆلەپ دۇكىنىمدىن ئېغىر قەدەملەر بىلەن ئايرىلىدۇ ، بەزەنلىرى ئەتىكى ئۈستەللەرنى ئاۋال زاكاس قىلىپ قويۇشۇپ ئاندىن خاتىرجەم بولىدۇ . مەن بولسام ھارغىچە تەكەللۇپ ھەم كۆڭۈل بۆلۈشلەرنى بۇ مىھمانلىرىمغا قايتا-قايتا تۆكۈپ ئۇلارنى ئۇزۇتۇپ چىقىمەن .       بۈگۈن يەكشەنبە يەنى ئانىلار بايرىمى ئىكەن ، بۇمۇ بىر بايرام . ئەمما قاۋىقىمدا خوشە ، خوشە دەپ قەدەھ كۆتىرىۋاتقانلار بۇنداق بىر بايرامنىڭ بارلىقىنى بىلمەيدۇ ، بىلمىگىنىمۇ ياخشى . بىلىپلا قالسا ئىشنىڭ تۈگەشكىنى شۇ ، ئۆزۈم قاۋاق ئاچقان بىلەن ھاراق ئىچمەيمەن ، كۈندە ئەتتىگەندە مىنىڭ دۇكىنىمدىن بوتولكا يىغىدىغان بىر خەنزۇ بۇۋاي بار ، ھارۋىسىنى سۆرەپ كىلىدۇ ، ئاز بولغاندا بىر خالتا ، كۆپ بولغاندا بىر نەچچە تاغار قۇرۇق بوتۇلكا يەنە ھارغىچە قەغەز يەشىكلەرنى يىغىپ كىتىدۇ . مەندىن نەچچە تېيىنگە ئالغان بوتولكىلارغا بىر نەچچە تېيىن چاپلاپ ئەسكى-تۈسكى يىغىدىغان ئورۇنلارغا ئۆتكىزىدىكەن . ئۆزىنىڭ ھاجىتىدىن ئۆزى چىقىپ ئاچ قالماي ياشاۋىتىپتۇ . بەزى چاغلاردا ئۇ بۇۋاي بىلەن ئانچە -مۇنچە پاراڭلىشىپ قويىمەن ، بىر كۈنى ئۇ مەندىن تۇيۇقسىزلا : - سەن ھاراق ساتساڭ يامان بولمامدۇ؟ دەپ سوراپ قالدى ، -يامان بولىدۇ ، دەپ جاۋاب بەردىم ، - ئەمىسە يەنە نىمىشقا ساتىسەن ؟ - ئىككى بالام بار ، ئائىلەم بار ، جان باقمىسام بولمايدۇدە ، -يامان بولمايدىغان ئىش بىلەن جان باقساڭ بولمامدۇ ؟ -ساڭا ئوخشاش بوتولكا يىغامدىم ؟ ئۇنىڭغا سەل ئاچچىقىپ كەلدى ، ئۇنىڭ دىگەنلىرى ھەقىقەت بولسىمۇ ، ئۇنىڭغا قوپال تىگىپ ئۇنىڭدىن بالدۇراق قۇتۇلىشنى ئويلىدىم .      دۇكاننى ئېچىپ يەنە سودامنى قىلىۋەردىم ، پۇكەيدە ئىڭەك يۆلەپ ئولتۇرۇپ باياقى بۇۋاينىڭ سوئاللىرىغا چۆكۈپ كىتىپتىمەن، - ئۇكام ، ئىڭەك يۆلىمەڭ ، يامان بولىدۇ ، ھىزىمكام پۇكەينىڭ ئالدىدا تۇراتتى ، - يامان بولىدۇ ، ھە يۆلىمەي ، يامان بولىدۇ . ئاشكار

mahbusman

	ئاشكار................................................ يەنە شۇ تۇنۇش ئىسىم،تۇنۇش ئۇسلۇپتىكى يۈرەككە تىگىدىغان تېما،مۇنبەرگە كىرسەم شۇنچە ئىزدەيمەن تېمىلىرىڭىزنى،بۈگۈن تېمىڭىزنى تولۇق ئوقۇشقا ۋاقىت  چىقماي قالدى،ئىنكاستا  ساقلىۋېلىپ تولۇق ئوقۇپ چىقاي......................

siyitnoqi

	مەنمۇ ئىنكاس ئارقىلىق ساقلىۋىلىپ ئوقاي

چېچەك

	ئاشكار ئالدى بىلەن سىزنى بىر ماختىۋىتەيمۇ، يا ئەرزىمەس باھالىرىمىنى يازايمۇ؟ماختىسام يەنە شۇ قېلپلىشپ قالغان گەپ سۆزلەر:ياخشى يېزپسىز يەي،قولىڭىزغا دەرىت بەرمىسۇنەي دېگەندەك..شۇڭا قۇرۇق گەپتىن نەق پۇل ياخشى دەپتىكەن ئىتوتتا..گەرچە سىزدەك باي بولمىساممۇ سىزنى 22دوللار بىلەن مۇكاپاتلاي،ئازكەن دېمەڭ ھە.بۇ 22دېگەن سان مەن ئۈچۈن ئۇلۇغ ئەھمىيەتكە ئىگە جۇمۇ....... ئۇسلۇبىڭىزنى مەمتىمىن ھۇشۇرنىڭ ھېكايە يېزشتىكى ئۇسلۇبىغا ئوخشاتتىم.چىنلىق،بەدىئيىلىك ۋە تىل ئىشلىتشتكى ئۆزگىچىلىك قۇشۇلۇپ ئەسىرىڭىزگە ھاياتىي كۈچ بېغىشلاپتۇ..ئۇيغۇر جەمئيتىمىزدىكى بىز كۆرۈپ تۇردىغان ،ئاڭلاپ تۇردىغان لېكىن ئېرەن قىلمايدىغان ،ئېرەنشىسەكمۇ كىتاپ.مەتبۇئاتلاردا ۋە پاراڭلىرىمىزدا قاقشاپ قۇيۇش بىلەن بولدى قىلدىغان نۇقتىنى ناھايتى ئەپچىلىك بىلەن يۇرۇتۇپ بېرىپسىز...ئاۋۇ ھېزىم شائىرىنىڭ شېئرنى ياقتۇرۇپ قالدىم... [s:159] سەمىمىي تەكلىپ : ‹ھىزىم› دىگەن سۆز ئىملا قائىدىسى بويىچە ھېزىم دەپ يېزىلاتتىغۇ دەيمەن،كىتاپلاردىمۇ شۇنداق كۆرگەندەك ئېسمدە.... ئاز لېكىن ساز ئەسەرلىرىڭىزنى يەنە كۆرۈشكە نېسىپ قىلسۇن.

begana

	سالام ئاشكار ،تېمىڭىزنى ئوقۇپ ھەرخىل مۇھىت ،ھەرخىل كىشلەر ،ھەر خىل كوي ،ھەرخىل بايراملار بىلەن يۈز كۆررۈشۈپ قالدىم .يازغانلىرىڭىز ئىچىمنى ئاچچىق قىلدى .ھەزىلىڭىز دەل جايىغا تىگىپتۇ. تۇنۇگۇن ئانىلار بايرىمى ئىكەن بىراق كوچا -رەستىلەر ئاشىق -مەشۇق بايرىمىدەك قىزغىن ئەمەسكەن ،يەكشەنبە بولغاچقا تالاي كىلىن قىزلىرىمىزنىڭ "قاتار چىيى"غا توغرا كىلىپ ئۆزىرلىكمىش. ئانىمىز ئوغۇل دەپ تۇققان نۇدەر يىگىتلىرىمىز نى سىزنىڭ قاۋاقخانىڭىزدا دەپ ئاڭلىدىم .بىراق تۈنۈگۈن ئىنىمنىڭ دىيىشىچە قولىدا كۈرەك كۆتۈرۋالغان دىھقان يىگىت ئازراق ۋاقىت چىقىرىپ ئانىسىنى ئاشخانىغا ئىلىپ كىرىپتۇ . چىۋەر ،كۆيۈمچان كىلىن بىر قازان پولۇ دۇملەپ ئاتا.ئانىلىللىرىغا يامغۇرلۇق كۈنلەردە بايرام قىلىپ بىرىپتۇ. بۇتۇلكا يىغىپ ساتسا قانداق بولىدۇ؟ئۇ دىگەن باشقا مىللەتنىڭ كەسپى تۇرسا ،بىزنىڭ غۇرۇرىمىز كەسىپ تالىشىشقا يول قويامدۇ.ئۇنداق قىلساق يامان بولىدۇ.بولۇپمۇ كاپىرلارنى دورىساق ... قاۋىقىڭىزنىڭ بازىرىنى بەرسۇن .ھەدىڭىزنىڭ گەپلىرىنى توغرا چۈشىنىدۇ دەپ ئويلايمەن .

Eltekin

	5- ئاي كارامەت بىر ئاي ، ھەپتە ئىچىدە ئىككى قىتىم بايرام بولىدۇ ، بۇ بايراملارنىڭ ئاتلىشى مىنىڭ خىرىدارلىرىمنىڭ نۇرغۇنلىرىغا ماس كەلمىسىمۇ ئويناۋىرىدۇ ، ئەلۋەتتە بۇ ئىش مىللىتىمگە ئومۇملاشقان ، خەتنە تويدا خەتنىسى بولغان بالىنىڭ بىر بۇلۇڭدا شۈمشىيىپ قىلىپ ئاتا-ئانىسىنىڭ ئۇسسۇل -تانىسىغا چۈشكىنىدەك ، ئەزەلدىن يەر بىلەن جان باقىدىغان دىھقانلارنىڭ نەۋرۇزدا يەرگە ئۇرۇق سالالماي ئىقدىسادتىن قىينىلىپ كەتمەن قۇچاغلاپ تۇرغىنىدا يانچۇقى تومپايغان كىشلەرنىڭ رىستۇرانلاردا نەۋرۇزلۇق شىرە ھازىرلىغىنىدەك . ئاياللار بايرىمىدا نۇرغۇن ئەرلەرنىڭ ئۆيگە غىرىق مەسىت ھالدا كىرگىنىدەك . يەنە ياتلارنىڭ بايرىمىدا ئۇيغۇرۇمنىڭ قوللىرىدا گۈل تۇتاملاپ كوچا-كويلاردا ئايلىنىپ يۈرگىنىدەك.....。。。。。。。。。。。。。。。。。。。  。。。。。。   。。。。。。 。。。。。。。 كۈندە ئەتتىگەندە مىنىڭ دۇكىنىمدىن بوتولكا يىغىدىغان بىر خەنزۇ بۇۋاي بار ، ھارۋىسىنى سۆرەپ كىلىدۇ ، ئاز بولغاندا بىر خالتا ، كۆپ بولغاندا بىر نەچچە تاغار قۇرۇق بوتۇلكا يەنە ھارغىچە قەغەز يەشىكلەرنى يىغىپ كىتىدۇ . مەندىن نەچچە تېيىنگە ئالغان بوتولكىلارغا بىر نەچچە تېيىن چاپلاپ ئەسكى-تۈسكى يىغىدىغان ئورۇنلارغا ئۆتكىزىدىكەن . ئۆزىنىڭ ھاجىتىدىن ئۆزى چىقىپ ئاچ قالماي ياشاۋىتىپتۇ . بەزى چاغلاردا ئۇ بۇۋاي بىلەن ئانچە -مۇنچە پاراڭلىشىپ قويىمەن ، بىر كۈنى ئۇ مەندىن تۇيۇقسىزلا : - سەن ھاراق ساتساڭ يامان بولمامدۇ؟ دەپ سوراپ قالدى ، -يامان بولىدۇ ، دەپ جاۋاب بەردىم ، - ئەمىسە يەنە نىمىشقا ساتىسەن ؟ - ئىككى بالام بار ، ئائىلەم بار ، جان باقمىسام بولمايدۇدە ، -يامان بولمايدىغان ئىش بىلەن جان باقساڭ بولمامدۇ ؟ -ساڭا ئوخشاش بوتولكا يىغامدىم ؟ ئۇنىڭغا سەل ئاچچىقىپ كەلدى ، ئۇنىڭ دىگەنلىرى ھەقىقەت بولسىمۇ ، ئۇنىڭغا قوپال تىگىپ ئۇنىڭدىن بالدۇراق قۇتۇلىشنى ئويلىدىم .      دۇكاننى ئېچىپ يەنە سودامنى قىلىۋەردىم ، پۇكەيدە ئىڭەك يۆلەپ ئولتۇرۇپ باياقى بۇۋاينىڭ سوئاللىرىغا چۆكۈپ كىتىپتىمەن، - ئۇكام ، ئىڭەك يۆلىمەڭ ، يامان بولىدۇ ، ھىزىمكام پۇكەينىڭ ئالدىدا تۇراتتى ، - يامان بولىدۇ ، ھە يۆلىمەي ، يامان بولىدۇ .     ھىكايىڭىزنى ئوقۇپ چىقىپ سىزنىڭ ئالغا سۈرمەكچى بولغان ئاساسى ئىدىيىڭىزنىڭ يۇقىرىقى قۇرلاردا ئىكەنلىكىنى ھىس قىلدىم. سىزنىڭ يېزىش ئۇسلۇبىڭىز، مەمتىمىن ھوشۇرغا، ئاندىن قالسا غۇلجىدا ئىشلەنگەن <قىرلىق ئىستاكان پاجىئەسى> فىلىمىنىڭ سىنارىستىنىڭ يېزىشىغا ئوخشاپتۇ. سىز شۇ ئەمەسسىز ھە؟! باشتىن ئاياغ شۇنداق راۋان ، قىزىقارلىق جەلىب قىلارلىق يېزىپسىز، بەزى ئۇزۇن ئەسەرلەردەك ئاتلاپ ئۆتۈپ ئوقۇمىغىدەك. مەن باشتىن ئاخىر قىزىقىپ تولۇق ئوقۇدۇم.     بۇ دېگەنلىرىمدىن ئەسىرىڭىزنى قانداق باھالىغىنىم چىقىپ تۇرىدۇ دەپ قارايمەن. شۇڭا ، ئەنئەنىۋە ماختاش سۆزلىرىنى ئىشلەتمىدىم.    سىزنىڭ بۇرۇنقىدەك، ھازىرقىدەك يەنە داۋاملىق ياخشى ئەسەرلىرىڭىزنى كۆرۈپ تۇرۇشنى ئۈمىد قىلىمەن. سالامەت بولۇڭ !

Alzar.Uyghur

	ياخشى تىمىكەن. داۋاملىق يوللاپ تۇرغايسىز ئاشكار ئەپەندىم، سىز مەيپۇرۇشمۇ ياكى ئەسەردە شۇنداق دەپ قويدىڭىزمۇ؟

wisal521

	نەدە دۇكان ئاچىسىز ..مەنمۇ كىرىپ باقاي....... [s:180] چاخ چاخ

tagnur

	ھازىرقى ھاراققا قۇل بۇلۇپ ياشاۋاتقان ، كىچىكىنە مەنپەت ئۈچۈن ۋاستە تالىماي ھارام يول بىلەن كىرىم قىلىپ ، ئۆزىنىمۇ ، ئۆزگىنىمۇ بۇلغاۋاتقان بىر قىسىم كىشىلەر تەسۋىرلەنگەن تۇرمۇش كارتىنىسى ، ھاراق بايانى قولۇڭدا رومكىدا تۇرسام لىغىلداپ ، كەيىپكە مىلىنىپ تاپامسەن ھوزۇر. مەس بۇلۇپ خۇدۇڭنى يۇقاتمىغىچە ، پوتولكا سەن ئۈچۈن بۇلىدۇ كوزۇر  . توشتۇرۇپ رومكىغا مىنى ئىچكىنىڭ ، بىلسەڭتى تىنىڭنى زەيىپ قىلغىنىڭ . ئويلىساڭ ئۇ دۇنيا يىراقمۇ ئەمەس ، شەيتانغا قۇل بۇلۇپ چىرىدى تىنىڭ . سىنىڭدىن بىزاردۇر جۆرۇڭ ھەم بالاڭ ، جىسمىڭدىن تارقىغان سېسىق پۇراقتىن . توختىماي ئاقىدۇ ئاناڭ كۆز – يېشى ، بېشىڭنى كۈتەرمەي ياتساڭ يالاقتىن . بىلمىدىڭ ھەي ئازغۇن مىنىڭ قىلقىمنى ، تالاشتىڭ سەن ئۈزۈڭ شەيتان رىسقىنى . زىنا ھەم ئىللەتكە سەۋەپچى قىلىپ ، يالىتىپ قۇسۇقنى ، شورۇدۇم قېنىڭنى . مەسلىكتىن پەسلىكنىڭ چىققىنى يالغان ، سەن ئەسلى غورۇر ھەم ۋىجداندىن تانغان . مەن ئۈچۈن كەيىپتە پەيىز سۈرگىنىڭ ، مىللەتتىن يۈز ئۆرۈپ،دىنىڭدىن قاچقان . بەزىدە مەن ئۈچۈن پەخىرلىنىپ كىتىسەن ، ئازغۇنلۇق ئىشىكنى قولۇڭدا چىكىسەن . گۇناھقا چىلىشىپ ،قانۇن ئالدىدا ، ئازدۇرغان ئەسلىدە شەيتانتى دەيسەن . روھىڭدا خۈنۈكلىك بولمىسا ئەگەر ، شەيتانمۇ زادىلا ئازدۇرماس پەقەت . كىچىكىپ ئەسلىڭگە قايتىساڭمۇ ھازىر ، ئاللاھ ھەم ئەللەردىن ياغىدۇ شەپقەت . مەنبە----- تاڭنۇر < خەيرۇللا قۇربان > بۆرتالا

sadih

	راست،قاۋاقلار بىزنىڭ ئىچ پۇشىقىمىزنى چىقىرىدىغان ،بايراملىرىمىزنى تەبرىكلەيدىغان،دەردىمىزنى ئالىدىغان ئېسىل جاي.    مېنىڭچە قاۋاقلارغا ئىككى خىل ئادەملەر كىرىدۇ: بىرخىلى:ۋىژدانى ۋولقاندەك قايناپ تۇرىدىغانلار.ئۇلار نېرۋىسىنى ئارام تاپقۇزۇش مەقسىتىدە كىرىدۇ . بولمىسا ئۇلار چاققان ساراڭ بوپ كېتىدۇ. يەنە بىر خىلى: ۋىژدانى زەئىپ ئادەملەر.ئۇلار ئادەملىكىنى ئۇنتۇش ئۈچۈن كىرىدۇ.       قاۋىقىڭىزنىڭ تىجارىتىنىڭ ياخشى بولۇشىنى تىلەيمەن.