غېنى باتۇرنىڭ ئۈمىد مەكتىپىگە ياردەم قىلى

kizilkowruk

	غۇلجا شەھەر ئۈمىد مەكتىپى (ھازىرقى 2-ئوتتۇرا مەكتەپ) 1903-يىلى ئۈچدەرۋازا مەھەللە جامائىتىنىڭ كۈچ چىقىرىشى بىلەن قۇرۇلغان بولۇپ ،ھازىرغىچە بولغان يۈزنەچچە يىللىق تەرەققىيات جەريانىدا يوقلۇقتىن بارلىققا كېلىپ ،كىچىكلىكتىن زورىيىپ ،بۈگۈنكىدەك مەشھۇر بىر مەرىپەت گۈلزارىغا ئايلانغىچە ئىلىدىكى كۆپلىگەن ئەلسۆيەر ،مەرىپەتپەرۋەر ،تەرەققىپەرۋەر كىشىلەرنىڭ تەمەسىز، مىننەتسىز ئەجىر-مېھنىتىنى ،ئارزۇ-ئۈمىدلىرىنى ئۆزىگە سىڭدۈرۈپ ،پۈتكۈل ئۇيغۇر دىيارى ئۈچۈن نۇرغۇن شېرىن مىۋىلەرنى يېتىشتۈرۈپ بەردى. خەلق قەھرىمانى غېنى باتۇرمۇ بۇ گۈلزارلىققا تېگىشلىك تۆھپە قوشقانلارنىڭ بىرىدۇر.             1948-1949-يىللىرى بولسا كېرەك ،شۇ يىللاردا ئۈمىد مەكتىپىنىڭ ئوقۇغۇچى سانى مىڭدىن ئاشقان بولسىمۇ ،لېكىن سىنىپ سانى ئاز ،مەيدان تار ،كىچىك بولغانلىقتىن ،ئوقۇتۇش ،تەنتەربىيە خىزمىتىگە بەلگىلىك تەسىر كۆرسەتكەن ئىدى .شۇ چاغدىكى مەكتەپ مۇدىرى مەشھۇرمائارىپچى ئابدۇسالام ئەسقىرى بۇنى ھەل قىلىشنىڭ چارە-تەدبىرى ھەققىدە چوڭقۇر ئويلىنىپ ،ئاخىرى بۇمەسىلىنى ئاتا-ئانىلارنىڭ كۈچىگە تايىنىپ ھەل قىلماقچى بولۇپ ،بۇھەقتىكى پىلانىنى مەكتەپ ئىشلىرى ھەيئىتىنىڭ ماقۇللۇقىدىن ئۆتكۈزىدۇ .بۇنىڭ ئۈچۈن ئۇ ئالدى بىلەن شۇ چاغلاردا مەكتەپنىڭ كۈنچىقىش تەرىپىدە ئولتۇرۇشلۇق ئادىل ئاخۇننى ئىككى-ئۈچ مو بېغى بىلەن بەش ئېغىزلىق ئۆيىنى مەكتەپكە سېتىپ بېرىشكە ماقۇل كەلتۈردى .ئاندىن بۇ قورۇ-جاينى سېتىۋېلىشقا كېتىدىغان مەبلەغنى ھەل قىلىش ئۈچۈن  شۇ چاغدا مەكتەپ ئالدىدا ئولتۇرۇشلۇق غېنى باتۇرنىڭ ياردىمىنى قولغا كەلتۈرمەكچى بولدى .غېنى باتۇر كاتتا باي بولمىسىمۇ قولى ئوچۇق ،مەرد ئادەم ئىدى ،ئۇنىڭ ئۈستىگە غېنى باتۇرنىڭ پاتىگۈل ،ئايشەم دېگەن ئىككى قىزى ئۈمىد مەكتەپتە ئوقۇيتتى .ئابدۇسالام ئەپەندى قىزلىرى ئارقىلىق غېنى باتۇرنىڭ كۆكسىگە نۇرغۇن مىداللارنى تاقاپ چۈشكەن رەسىمىنى ئۆيدىن ئەچىقتۇرۇپ ،ئۇنى مەكتەپتىكى ئاتاقلىق رەسسام  زەينىدىن يۈسۈپكە چوڭايتىپ سىزىپ چىقىشقا تاپشۇردى .زەينىدىن رەسىمنى ئەينەن ئۆزىدەك سىزىپ چىققاندىن كېيىن ،رەسىمنى ئەينەكلىك رامكىغا ئېلىپ ،قەغەزگە ئوراپ تەييارلايدۇ .ئاندىن ھىلىقى قىزلاردىن غېنى باتۇرنىڭ ئۆيىدە بار ۋاقتىنى ئۇقۇپ ، مەكتەپ ئىشلار ھەيئەتلىرىدىن ئابدۇسالام ئەپەندى ،مەۋلان قاراباش ،سادىق ئارۇپ ،بۇرھانىدىن مەنسۇر ،زەينىدىن يۈسۇپلەر بىرلىكتە غېنى باتۇرنىڭ قورۇسىغا كىرىپ كېلىدۇ ،قىزلار خەۋەر قىلغان بولسا كېرەك ،غېنى باتۇر ئۇلارنىڭ ئالدىغا چىقىپ سالاملىشىپ كۆرۈشتى ۋە ئۇلارنى ئۆيگە كىرىشكە تەكلىپ قىلدى .ئابدۇسالام ئەپەندى قولىنى كۆكسىگە ئېلىپ:     _تەقسىر،سىزنى ئاۋارە قىلمايلى ،رەخمەت ،بىز مەشەدىلا قايتايلى ،_دەپ ئۆزرە ئېيتقاندىن كېيىن ،مەۋلاننىڭ قولىدىكى رەسىمنى باتۇرغا سۇنۇپ تۇرۇپ،_بىزنىڭ مۇنۇ ئوقۇتقۇچىمىز سىزنىڭ رەسىمىڭىزنى چوڭايتىپ سىزغان ئىكەن ،شۇنى سىزگە تەقدىم قىلىش ئۈچۈن كىرگەن ئىدۇق ،_دېدى .      باتۇر <<رەخمەت>>دەپ رەسىمنى قولىغا ئېلىپ:        _پاھ ،بۇنى قالتىس سىزىپسەنغۇ ،بەك ئۇستا رەسىمچى ئكەنسەن جۇمۇ!_دېدى .ئاندىن رەسىمنى قىزلىرىغا بېرىپ ،_بۇ رەسىمنى ياخشى قىپسىلەر ،بۇنىڭغا كۆپ رەخمەت! مېنىڭچە،سىلەر بۇ يەرگە بۇ رەسىمنى بېرىپ قويۇش ئۈچۈنلا كىرمىگەنسىلەر؟ باشقا دەيدىغان گېپىڭلارمۇ باردۇر_ھە! بولسا دەڭلار قېنى ،_دېدى .       بۇ چاغدا پۇرسەتنى غەنىمەت بىلگەن ئابدۇسالام ئەپەندى تەمكىنلىك بىلەن :        _باتۇرۇم ،ئۆزىڭىزمۇ كۆرۈپ تۇرۇۋاتقانسىز ،مەكتىپىمىزنىڭ سىنىپ سانى ئاز ،بالىلار نۆۋەت بىلەن ئوقۇيدۇ.(بۇنى ئابدۇسالام ئاكا بىر سىنىپتا ئىككى سىنىپ بالىلىرى چۈشتىن بۇرۇن ۋە چۈشتىن كېيىن نۆۋەتلىشىپ ئوقۇيدۇ ،دەپ چۈشەندۈردى) ئۇنىڭ ئۈستىگە مەيدان كىچىك ،بالىلار پاتمايۋاتىدۇ._دېدى.       بۇ گەپنى ئاڭلاپلا غېنى باتۇر:       _ھە، كېڭەيتىدىغان يەر بارمىكەن؟_دەپ سوراپ قالدى.       _شۇنداق ،باتۇر .يېنىمىزدىكى ئادىل ئاخۇن جايىنى ساتىدىكەن ،بەش ئېغىز ئۆيى سىنىپقا يارايدىكەن ،قورۇسىمۇ خېلى چوڭ ئىكەن ،بۇنىڭغا ئۆزىڭىز بىر مەسلىھەت بەرگەن بولسىڭىز،_دېدى ئابدۇسالام ئەپەندى .       _ھە ... رەسىمنىڭ كەينىدە بىر ئويۇن بارمىكىن دەپ ئويلىۋېدىم ،ئويلىغىنىمدەك چىقتى ،_دېدى غېنى باتۇر چاقچاق قىلىپ ،_بولىدۇ ،بولىدۇ .جاينى ئېلىڭلار ،مەن مەكتەپكە ئاتمىش تۇياق غونان (ئۈچ ياشلىق)ئۆكۈز ياكى شۇنىڭ قىممىتىچىلىك پۇل بېرەي .جايدىن ئېشىپ قالسا  ،مەكتەپنىڭ باشقا ئىشلىرىغا ئىشلىتىڭلار .ناۋادا يەتمىسە يەنە دەڭلار ،بىر كېچە ئۇيقۇمنى قويسام  مەنسۇرنىڭ ئۆيىگىچە(مەنسۇر لومىيوف_ئۆز ۋاقتىدا ئۈچ ۋىلايەت تۇڭگان پولكىنىڭ كوماندىرى ،كېيىن بانكا باشلىقى بولغان .مەكتەپنىڭ شەرق تەرىپىدە ئۇنىڭ قورۇ-جايى بار ئىدى) ئېلىپ بېرىمەن ،_دېدى ئۇ يەنە چاقچاق قىلىپ . ھەممەيلەن كۈلۈشتى ۋە باتۇرغا تەشەككۈرىنى ئېيتىپ قايتىپ چىقىشتى .           ئابدۇسالام ئەپەندى قايتىپ چىقىپلا ،ئاتىلار كومىتىتىنىڭ ئەزالىرى بىلەن بۇ ۋەدىنى قانداق ئەمەلىلەشتۈرۈشنى  مەسلىھەتلەشتى ھەم بۇ ئىشقا باتۇرنىڭ خوشنىسى  ئىمرەمزە ئەپەندى بىلەن زېرىپ ئاخۇننى ،مەكتەپتىن زاپخوز غوپۇر ئاخۇننى مەسئۇل قىلىپ بېكىتتى .ئاخىر ئادىل ئاخۇننىڭ جايى ئېلىنىپ ،مەكتەپنىڭ قىيىنچىلىقى ھەل قىلىنغان بولدى . غۇلجا شەھەر 2-ئوتتۇرا مەكتەپ تۈزۈپ نەشر قىلدۇرغان <<ئۈمىد يۇلتۇزى>>ناملىق توپلامدىكى بۇرھانىدىن مەنسۇر ئەپەندىنىڭ<<ئاتاقلىق مائارىپچى ئابدۇسالام ئەسقىرىنى ئەسلەيمەن>>ناملىق ماقالىسىدىن ئېلىندى.

GOX~POLO

	مەن يەنە بىر تارىخنى بىلىۋالدىم رەخمەت سىزگە

tarim2179

	<<ئانايۇرت>>تېرلوگيىسىدە،غېنى باتۇر(1901-1990)<<ئەركەك ئوغىرى>> دەپ تەسۋىرلەنگەن. دىمەك،يەنىلا ئەركەكلىگىنى قىلىپتۇدە.

ramu

	ئېھ سۈيۈملۇك قەدىردان ئوغرىمىز ،سىنى مەڭگۈ ئەسلەيمىز!!!!!!!!!!!!!!!!!!!!!!!!!!!!!!!!!!!!!!

kaktos0996

	ئاپتور جاۋابىنى بويلاپ 2قەۋەت  tarim2179 كە 2011-04-18 11:16 PMئەۋەتىلدى  : <<ئانايۇرت>>تېرلوگيىسىدە،غېنى باتۇر(1901-1990)<<ئەركەك ئوغىرى>> دەپ تەسۋىرلەنگەن. دىمەك،يەنىلا ئەركەكلىگىنى قىلىپتۇدە. غېنى باتۇرنى ھەققىدە بىلىدىغانلىرىڭىز بولسا يوللاپ قويسىڭىز بوپتىكەن. بولۇپمۇ، 1948-يىلىدىن 1990- يىلىغىچە بولغان پائالىيەتلىرىنى.

turkinaz0992

	سۈيۈملۈك  باتۇرلىرىمىز نى مەڭگۈ ياد  ئېتىمىز !

tewelgha

	غېنى باتۇر گەرچە پىكىر قىلىش ئۇسلۇبى دىھقانلاردەك تۈز ،ساددا بولسىمۇ ،ئالدىن كۆرەرلىگى جەھەتتە ئۈچ ۋىلايەت رەھبەرلىرىنىڭكىدىن خېلى ئۈستۈن تۇرۇدىغان پالىۋاننىمىز ئىدى.

جاسۇس

	مېنىڭ ئاڭلىشىمچە راسمۇ يالغانمۇ ئۇقمايمەن،غىنى باتۇر ئالمۇتۇدا جان ئۇزۇش ئالدىدىكى  ۋەسىيتىدە <<مىنى دەپنە قىلغاندا يۇزۇمنى شەرىققە قىلىپ كۆمۈڭلار مەن ھەر ۋاقىت ۋەتىنىم تەرەپكە قاراپ ياتاي>> دەپ ۋەسىيەت قىپتىكەن.

xam1980

	غېنى باتۇر 1950-يىلدىن كىيىن نىمە ئىشلانى قىلغان؟قەيەردە ياشىغان؟ .......؟ھەققىدە بىلىدىغانلىرىڭلار بولسا يوللاپ قويساڭلا .