شەھلا كۆزلىرىڭ...

menggutax

	شەھلا كۆزلىرىڭ (ئابدۇقەييۇم تۇرادىن مەجنۇننىڭ شۇ ناملىق غەزىلىگە تەخمىس) يالقۇنجان ئىسلام سەندەل نۇرلىنارمەن چاقمىقىن چاققاندا شەھلا كۆزلىرىڭ، تاڭ قالارمەن نەرىلەر تارتقاندا شەھلا كۆزلىرىڭ، بىقارارمەن ھەر ئىشىك ياپقاندا شەھلا كۆزلىرىڭ، چوغلىنارمەن ھەر قىيا باققاندا شەھلا كۆزلىرىڭ، تولغىنارمەن جانغا ئوت ياققاندا شەھلا كۆزلىرىڭ. ئاي بېشىڭدا ئاخشىمى مەستانغا ئوخشاپ ئايلىنار، كۈندۈزى قۇياش نۇرى غۇلاچ - غۇلاچلاپ ئايلىنار، گۈل - گىياھلار ئۇھسىنىپ كۆزىنى ياشلاپ ئايلىنار، گەردىشى يەر شارىنىڭ بىر لەھزە توختاپ ئايلىنار، بىر چىكىت - بىر نۇقتىدا قاتقاندا شەھلا كۆزلىرىڭ. بېقىشىڭدۇر ئاشىقىڭنىڭ سېھرى ھېكمەت تۇتىمى، بۇزغىلى يول يوق، بۇزۇلماس ئەھدىنامە، بېتىمى، سالمىساڭچۇ، ئەي ھايات ماڭا بۇ كۆز ئوتىنى، ئادىشار ئۇدارىدىن گۈلگۈن ھاياتنىڭ رىتىمى، شىددەتىن ئۇچقۇن بولۇپ چاچقاندا شەھلا كۆزلىرىڭ. چوڭقۇرۇڭنى ئوخشىتاي سايرامۇ سەيدام كۆلىگە، چۈشۈشۈمنى بىلمىدىم قايسى بىرىدە كىمىگە، ياخشىسى چۆكۈپ كېتەي قايناملىرىڭنىڭ تەكتىگە، گۈررىدە ئوت كەتكۈسى سەۋدايىلىقنىڭ چۆلىگە، «لىپ» قىلىپ كىرپىكنى شوخ قاققاندا شەھلا كۆزلىرىڭ. مۇڭ ئېزىپ تۇرغان يۈرەكتە شوخلىنار نۇر شولىسى، جان بېرىپ سۇلغۇن ئۈمىدكە شاخلىنار نۇر شولىسى، يۈرىكىگە دەستە - دەستە جىقلىنار نۇر شولىسى، سارغىيىپ كەتكەن تىلەكتە بىخلىنار نۇر شولىسى، جانغا - جانلار رىشتىنى چاتقاندا شەھلا كۆزلىرىڭ. كۆزلىرىڭ - سەييارە قوشماق، تېخىچە بايقالمىغان، تىلسىماتتۇر، سېھرى ئەلگە يوشۇرۇن، تارقالمىغان، تېخى مۇنداق نۇردا دۇنيا پاكلىنىپ چايقالمىغان، سانجىلار تۈن كۆكسىگە ئالتۇن شەپەقنى يالمىغان، نەپرىتىڭنى ئوق قىلىپ ئاتقاندا شەھلا كۆزلىرىڭ. ئاچتى ھەمدە قىلدى كور، شۇ كۆزكى يالقۇن كۆزىنى، دىل يارامغا بولدى مەلھەم، چاچتى ئاچچىق تۇزىنى، كۆرسىتىپ سۆيگۈدە يول، بەزەن يوقاتتى ئىزىنى، دەردۇ ھىجراندا بوغۇزلايدۇ يۈرەك ئۆز - ئۆزىنى، كىرپىكىڭ تالزارىغا پاتقاندا شەھلا كۆزلىرىڭ. شىنجاڭ گېزىتى توردىكى مەنبە : http://www.xjtsnews.com/normal/content/bak/wenxue/content/2011-01/18/content_123971.htm

umak88

	نەپرىتىڭنى ئوق قىلىپ ئاتقاندا شەھلا كۆزلىرىڭ... ئەجەپ ياخشى يېزىلغان شئېىر ئىكەن بۇ ......

zulayha

	ئالغۇسى جاننى يۇلۇپ ، باققاندا شەھلا كۆزلىرىڭ . بىلمىدىم كىمدىن بىزار ، كىملەرگە تەشنا كۆزلىرىڭ .  لەپپىدە سالساڭ نىگاھ بار ۋۇجۇد تەسلىم ساڭا ،  قارا قول گورۇھىغا بولغانمۇ ئەزا كۆزلىرىڭ .  ئىلنىشىپ قالسام نىگاھىڭغا ئۆزۈم ئۆزۈم ئەمەس،  قاينىغاي كۆكسۇمدە چۆگۈن ئاتقاندا لاۋا كۆزلىرىڭ ياغدۇرۇپ شىددەتتە ئوقنى تاشلىساڭ ئوتلۇق نىگاھ ، مىسلى ئاتەش باغرىغا بېشلايدۇ گويا كۆزلىرىڭ .      ئەيلىدىڭ سەۋدائى كۆپنى كۆزدىكى سىھرىڭ بىلەن ،   بىلمىدىم كىمنى قىنى تاللايدۇ دانا كۆزلىرىڭ .

xayima

	بەك ياخشى يىزىلغانشىئىركەن.

OTYAK

	ياخشى يېزىلغان مۇخەممەس يوللاپسىز . رەھمەت !

ablkm504

	كۆزلىرىڭ - سەييارە قوشماق، تېخىچە بايقالمىغان،   تىلسىماتتۇر، سېھرى ئەلگە يوشۇرۇن، تارقالمىغان،   تېخى مۇنداق نۇردا دۇنيا پاكلىنىپ چايقالمىغان،   سانجىلار تۈن كۆكسىگە ئالتۇن شەپەقنى يالمىغان،   نەپرىتىڭنى ئوق قىلىپ ئاتقاندا شەھلا كۆزلىرىڭ.   بۇمىسرا بەك قاملىشىپتۇ.............

ablkm504

	جاپا چىكىپسىز....يەنە بىر قىتىم رەخمەت....

YuqunAdam

	سالامەت بولۇڭ ياخشى يېزىلغان مۇخەممەسكەن.