ئەر -ئاياللاردىكى يامان ئادەتلەر .

zulayha

	[blockquote] ئەر -ئاياللاردىكى يامان ئادەتلەر ئەرلەردىكى يامان ئادەتلەر 1. شاللاقلىق سىرتقا چىققاندا چىرايلىق ئاياللارغا قاراپ تويمايدىغان، دائىم ئايال چولپانلارنى، خىزمەتداشلىرىنى مۇلاھىزە قىلىدىغان، ئايالىنىڭ ئالدىدا باشقا ئاياللارغا بولمىغۇر چاقچاق قىلىدىغان ئەرلەرنى كۆرسىتىدۇ. 2. تازىلىققا رىئايە قىلماسلىق بۇ خىلدىكى ئەرلەرنىڭ بەدىنىدىن ھەمىشە سېسىق تەر پۇرىقى كېلىدۇ،پۇتى پۇرايدۇ، چىشىنى چوتكىلىمايدۇ، ئاممىۋى سورۇنلاردا بۇرنىنى كولايدۇ، كىيىنىشكە دېققەت قىلمايدۇ، تىرنىقىنى ئالمايدۇ، تىرناق ئارلىقى قارا كىر بىلەن تولغان بولىدۇ. 3. بوشاڭلىق بۇ خىل ئەرلەرنىڭ ئالغا ئىنتىلىش روھى كەمچىل، ھېچقانداق ئىشنى ۋۇجۇدقا چىقىرالمايدۇ. قىيىنچىلىق ئالدىدا ئاسانلا باش ئېگىدۇ، ئوڭاي مەغلۇپ بولىدۇ، ئوڭۇشسىزلىققا ئۇچرىسا ياش تۆكىدۇ. 4. شۆھرەت پەرەسلىك ئۆزىنى كۆرسىتىشكە، نوچىلىق قىلىشقا ئامراق، يېنىدا پۇلى بولمىسىمۇ، باشقىلار ئالدىدا ئۆزىنى نامايان قىلىشقا ئامراق، ھەر خىل باھانە- سەۋەب بىلەن كىيىمىنىڭ ماركىسىنى كۆز - كۆز قىلىدىغان، بىرەر چوڭ سورۇندا تۇرۇپ ھەممە كىشىگە تېلېفون بېرىپ مەن مەلۇم كاتتا يەردە دەپ ماختىنىدىغان ئەرلەرنى كۆرسىتىدۇ. 5. بېخىللىق خىزمەتداشلىرى بىلەن تاماق يېگەندە دائىم يېنىمغا پۇل سالماپتىكەنمەن دەپ باھانە كۆرسىتىدىغان ياكى ئاپتۇبۇستا بېلەت ئېلىشقا تېگىشلىك بولسا باشقىلاردىن كېيىن قالىدىغان، ھەمىشە ئايالى سېتىۋالغان لازىمەتلىكلەرنى قىممەت دەپ قاقشايدىغان ئەرلەرنى كۆرسىتىدۇ. 6. يالغانچىلىق ئۆيگە كەچ قايتسا ئىشلىدىم دەپ باھانە كۆرسىتىدىغان، بېجىرمىگەن ئىشلارنىڭ ھەممىسىنى ئۇنتۇپ قاپتىمەن، دەپ باھانا قىلىدىغان، بارلىق خاتالىقلارنى تاسادىپىيلىق دەپ قارايدىغان، قارشى تەرەپكە زىيان يەتكۇزىدىغان قىلمىشلىرىنى مېھىر - مۇھاببەت ئۈچۈن دەپ باھانە قىلىدىغان ئەرلەرنى كۆرسىتىدۇ. 7. ھەراقكەشلىك تاماقتىن بۇرۇن، كېيىن، ئۇخلاشتىن بۇرۇن، كېيىن ئۈزۈلدۈرمەي تاماكا چېكىدىغان، ھاراق ئىچىپ مەست بولىۋىلىپ ئايالىنى بىزار قىلىدىغان ئەرلەرنى كۆرسىتىدۇ. 8. بىخەستەلىك ئايالىنىڭ نېمە ئۈچۈن رەنجىپ قالغانلىقىنى مەڭگۇ بىلمەيدىغان، ئايالى يېڭى كىيىم كىيسە، چاچ پاسونىنى ئۆزگەرتسە ھېس قىلمايدىغان، ھەتتا ئائىلە سايمانلىرى يىڭىلانسىمۇ ھېس قىلالمايدىغان، ئايالىنىڭ تۇغۇلغان كۈنىنى ئۆتكۈزۈپ بېرىشنى پەقەت ئويلىمايدىغان ئەرلەرنى كۆرسىتىدۇ. 9. خىزمەتكە بېشىچىلاپ كىرىپ كېتىش خىزمەت ئۈچۈن ئائىلىسىنى قۇربان قىلىدىغان، خىزمەتتىكى كىچىك ئىشلار ئۈچۈن ئائىلىسىگە قايتمايدىغان، پەقەت كەسىپدىنلا خۇشاللىق تاپىمەن دەپ قارايدىغان، دوست تۇتسىمۇ ئۆز كەسپىگە مۇناسىۋەتلەك دوستلارنى تاللاپ تۇتىدىغان، ئۆز كەسپىگە مۇناسىۋەتلەك پائالىيەتلەرگە قاتنىشىدىغان، ئائىلە ئەزالىرىغا سەل قارايدىغان ئەرلەرنى كۆرسىتىدۇ. ئاياللاردىكى يامان ئادەتلەر 1. كوت - كوتلۇق خۇددى جۈمەكتىن سۇ توختىماي ئاققاندەك ئۆز بۇيرۇقىنى توختىماي تەكرارلاپ تۇرىدىغان، شۇ ئارقىلىق ئائىلىسىدىكىلەرنى، ئېرىنى ۋە باشقىلارنى بىزار قىلىدىغان ئاياللار، بۇنداق بولىۋەرسە ۋاقىتنىڭ ئۆتۈشى بىلەن ئەرنىڭ سەۋەر قاچىسى تېشىپ ئايالىدىن بىزار بولۇپ زىددىيەت كېلىپ چىقىدۇ. 2. ئېرىنى باشقىلارنىڭ ئېرى بىلەن سېلىشتۈرۈش باشقىلارنىڭ پۇلدار، ئەمەلدار، ئىقتىدارلىق ئەرلىرى بىلەن ئۆزىنىڭ ئېرىنى سېلىشتۈرۈپ ھە دېسىلا باشقىلارنى ئۈستۈن ئورۇنغا قويۇپ، ئۆزىنىڭ ئېرىنى كەمسىتىپ، ھاقارەتلەيدىغان ئاياللارنى كۆرسىتىدۇ. 3. توختىماي بازار ئارىلاش ھە دېسىلا بازار ئارىلاپ، كېرەكسىز نەرسىلەرنى سېتىۋالىدىغان، ئېرى خالىمىسىمۇ زورلاپ بازار ئارىلاشقا بىللە ئېلىپ چىقىپ، بىزار قىلىدىغان ئاياللارنى كۆرسىتىدۇ. 4. گۇمانخورلۇق ئېرىگە كەلگەن ھەربىر تېلېفوندىن گومانلىنىدىغان، ئېرىنىڭ يېنىدىكى ھەربىر ئايالنى ئۆزىگە تەھدىت دەپ ھېس قىلىدىغان، ئېرىنىڭ تېلېفونىنى تەكشۈرۈپ سومكىسىنى ئاقتۇررىدىغان، ئامال قىلىپ ئېرىنىڭ خەت ساندۇقىغا كىرىپ ئەھۋال ئىگىلەپ، ئورۇنسىز گۇمانلىنىپ بېشەملىك قىلىپ ئېرى بىلەن ئۈرۈش - جېدەل قىلىدىغان ئاياللارنى كۆرسىتىدۇ. 5. كۆزى كىچىكلىك ھەمىشە ئېرىدىن ئاتا - ئانىسىغا جىق پۇل بېرىۋەتتىمىكىن، پۇلنى ئىسراپ قىلىۋەتتىمىكىن، خىزمەتداشلىرى بىلەن تاماق يېگەندە تاماق پۇلىنى ئېرىم تۆلىۋەتتىمىكىن، دەپ گۇمان قىلىدىغان، ھەر خىل باھانە - سەۋەبلەر بىلەن ئېرىنى دائىم ئەيىبلەپ بىئەپ ئەھۋالغا چۈشۈرۈپ قويىدىغان ئاياللارنى كۆرسىتىدۇ. 6. ئۆزىنى چوڭ تۇتۇش ئاممىۋى سورۇنلاردا دائىم ئۆزىنى ماختايدىغان، باشقىلار ئالدىدا ئۆزىنى چوڭ تۇتۇدىغان، سورۇنلاردا مەن ئېرىمگە كۆيۈنىمەن، ياخشى كۆرىمەن دېگەننى باھانە قىلىپ ئېرىنى چۈشۈرىدىغان، ئەيىبلەيدىغان گەپ - سۆزلەرنى قىلىدىغان، ئاياللارنى كۆرسىتىدۇ. 7. ياسانچۇقلۇق سىرتقا چىقىش ئالدىدا توختىماي ياسىنىپ، كىيىم ئالماشتۇرۇپ، بارىدىغان ئورۇنغا كېچىكىپ قېلىۋاتسىمۇ، ئېرى ساقلاپ بىتاقەت بولۇپ كەتسىمۇ ئېرىنى كىيگەن كىيىملىرىگە باھا بېرىشكە قىستايدىغان ئاياللارنى كۆرسىتىدۇ. 8. غەيۋەتخورلۇق خىزمەتداش، ئۇرۇق - تۇققانلىرى ۋە دوستلىرى ئارىسىدا ئۆيمۇ ئۆي غىتىلداپ يۈرۈپ غەيۋەت قىلىدىغان، گەپ توشۇشقا ئامراق، سىرى ئاشكارىلىنىپ بىئەپ ھالەتكە چۈشۈپ قالغاندىمۇ ئۆزىنىڭكىنى راست قىلىدىغان ئاياللارنى كۆرسىتىدۇ. 9. ھورۇنلۇق ئۆزى ياسىنىپ پارقىراپ يۈرىدىغان، ئۆينىڭ پاكىز يېرى يوق، كىرلارنى ۋاقتىدا يۇمايدىغان، يۇسىمۇ ئەستايىدىل يۇمايدىغان، ئىشنى قولىنىڭ ئۇچىدا قىلىدىغان، ئۆي سەرەمجانلىرىنى جايىدا قويمايدىغان، دائىم تەييار تاماق ئارقىلىق ئۆيىدىكىلەرنىڭ قورسىقىنى بابلايدىغان، پەرزەنتلىرىگە ئىجابىي ئۈلگە بولمايدىغان ئاياللارنى كۆرسىتىدۇ. 10. ئۆزىنىڭكىنى مەڭگۇ توغرا دېيىش خاتالىق بولسا باشقىلارغا ئىتتىرىپ قويدىغان، ئۆزىنىڭ قىلغان ئىشىنى خاتا بولسىمۇ چىقىش نوقتام توغرا دەپ قاراپ « سىز يەنە . . . سىزگە نېمە دېسەم بولار » دەپ باشقىلارنى ھە دېسىلا ئەيىبلەيدىغان ئاياللارنى كۆرسىتىدۇ. مەنبە: «شىنجاڭ ئاياللىرى» ژورنىلىدىن ئېلىندى [/blockquote]

alim0903

	مەندە 6بىلەن 9- تۈردىكى ئىشلار باركەن ھى ھى  [s:181]  [s:177]

alafasy

	ئەجەپ ياخشى يېزىپسىز، باشقىلار كۆرسە ئۆزىدە بار ئىللەتلەرنى كۆرۈۋالسا بولغۇدەك.

BabySorry

	ھەممىسى مەن ياقتۇرمايدىغان ئىللەتلەر ئىكەن . ھەرنىمە بولسا مەندە بۇ خىلدىكى ئىللەتلەر يوق ئىكەن ! شۈكرى !

JAMALIM

	مەندە بەزىبىر ئىللەتلەر باركەن ،تۇزەتسەم بولغىدەك.رەھمەت سىزگە...

ئەجەل

	مەندە 8-چىسى باركەن .نەچچىسى مېنى تىللاپ بولدى بىپەرۋا دەپ. تۈزىتەي دېسەم، بۇنداق ئۇششاق ئىشلارنىڭ ھەممىسىگە سەپ سېلىپ ئولتۇرۇش خوشياقامدۇ دەيمەن.....بولدىلا ئاۋارىچىلىقكەن [s:164]

ArmanimⅡ

	مەندە 2 ۋە 9 قۇردىكى ئادەتلەر باركەن ،  دېققەت قىلمىسام بولمىغۇدەك  [s:129]

guzallarr

	اللاغا شۇكرى بۇئىللەتلەر مەندە يوق ئىكەن. [s:141]