غەم قايغۇنىڭ داۋاسى مۇنبەر،
چىن دوستلۇقنىڭ سەركىسى مۇنبەر،
چاڭقاپ كەتسە دىلىڭ سۇ سىراپ،
مەلھەم بولار بۇلاقتەك مۇنبەر.
مەلھەم بولار بۇلاقتەك مۇنبەر،
غەم-قايغۇغا پاتقان چېغىڭدا،
سايرىغاي ھەم خۇش ناۋا بۇلبۇل،
مۇنبەر دېگەن گۈزەل بېغىڭدا.
مۇنبەر دېگەن گۈزەل بېغىڭدا،
قۇياش بولۇپ چاقنايدۇ ئارمان،
بىلىم بىلەن كۈچلەنسە دىلىڭ،
زەپەر قۇچۇپ، يۈرمەيسەن سەرسان.
زەپەر قۇچۇپ، يۈرمەيسەن سەرسان،
مۇنبەردە سەن سەمىمىي بولساڭ،
تېما، ئىنكاس يازغان چېغڭدا،
ھەقنى كۆزلەپ، ۋىجداننى يازساڭ.
ھەقنى كۆزلەپ، ۋىجداننى يازساڭ،
ئىلىم-ئىرپان بۇلىقىنى قازساڭ،
راستنى قوللاپ، ئىللەتتىن قاچساڭ،
سىنى ھارماي كۈيلەيدۇ مۇنبەر.
سىنى ھارماي كۈيلەيدۇ مۇنبەر،
تېما، ئىنكاس ئېسىل بولغاندا،
تۆكىلىدۇ ئابرويىڭ سىنىڭ،
پۈچەك ئىنكاس تولا يازغاندا.
پۈچەك ئىنكاس تولا يازغاندا،
غەيۋەت قىلىپ، ئورا قازغاندا،
مەنپەئەت ئۈچۈن دوستقا يانغاندا،
ئورۇن بەرمەس زادىلا مۇنبەر.