ئېرىمگە يېزىلغان خەت

musilina

	بۇ گەپلەرنى سىزگە بىۋاستە دېيىش ئەپسىز بولغاچقا، خەت ئارقىلىق ئىپادىلەشنى توغرا تاپتىم، ئۇنىڭ ئۈستىگە بۇ گەپلەرنى ئۆز ئاغزىم ئارقىلىق سىزگە ئېيتىپ بولغۇچە،مىڭ يېرىمدىن ئېقىپ -تۆكۈلۈپ ، مەقسىدىمنى ئۇقتۇرالماي قالغاننى ئاز دەپ ،كۆزىڭىزگە سەت كۆرۈنۈپ  تۇرغاننىڭ ئۈستىگە ،تېخىمۇ بەك ئۆچلىكىڭىزنى قوزغاپ قويۇشۇم مۈمكىن،شۇڭا ئەڭ ياخشىسى خەت ئارقىلىق مەقسىدىمنى ئۇقتۇرۇشنى مۇۋاپىق كۆردۈم....       بۈگۈن يەنە سىزنىڭ ھېلىقى << گۈلىڭىز>>نىڭ، << جېنىم>> ىڭىزنىڭ << تاتلىق>>ىڭىزنىڭ تېلىفونىنى تاپشۇرىۋالدىم،نېمىشقا <<جېنىم>> << تاتلىق>> ىڭىز دەپ ئاتىغانلىقىمنىڭ سەۋەبىنى ئېيتىپ بېرەيمۇ ؟ ئاڭلاپ بېقىڭ خالىسىڭىز......     نەچچە كۈننىڭ ئالدىدا قولۇمنى يۇيۇش ئۈچۈن كىرىپ ،تازىلىق ئۆيىدە <<  بىرنى ھاببا ئېتىۋېتە جېنىم ....گۈلۈم ....،سېنى بەك سېغىندىم، بۈگۈن چىقماي.... تاتلىق.... قېنى...ھە...>> دېگەن گېپىڭىزنى ئاڭلاپ قالدىم، مېنىڭ سىزنىڭ گېپىڭىزنى ئوغرۇلۇقچە ئاڭلاش مەقسىدىم يوقتى ،پەقەت قولۇمنى يۇيماقچى ئىدىم، سىزنىڭ تازىلىق ئۆيىدە ئىكەنلىكىڭىزنىمۇ بىلمەيتتىم،پەقەت تەسادىىپى ھالدا ئاڭلاپ قالدىم بۇ گېپىڭىزنى.....تازىلىق ئۆيى بىلەن قول يۇيىدىغان جاينى نېپىز بىر قەۋەت تام توسۇپ تۇرغاچقا ئ،ۇنىڭ ئىچىدىكى ھەرقانداق ئاۋاز ئېنىق ئاڭلىنىدۇ -دە..... ( سىز<< مېنىڭ كەينىمدىن ماراپ گېپىمنى ئوغۇرۇلۇقچە  ئاڭلىۋاپسەن ...!>> دەپ مەندىن خاپا بولۇپ يۈرمەڭ يەنە)قولۇمنى سۈرتىۋاتسام قىلغان گەپلىرىڭىز  تېخىمۇ ھەددىدىن ئاشقىلى تۇردى، مەنمۇ چىقىپ كەتمەي ئاخىرىغىچە ئاڭلاپ تۇردۇم  بېشىنى ئاڭلىغاندىن كېيىن ،<< <تاز بولساڭ گەدەنگىچە بول> دەپتىكەن  >> دەپ.      مەن دەسلەپتە گېپىڭىزنى  ئاڭلاپ <<تۇققانلارنىڭ بىرەر كىچىك بالىسىنى ئەركىلىتىۋاتقان ئوخشايدۇ >>دەپ ئويلاپ تازا پەرۋا قىلماپتىمەن، كېيىن ئاندىن سىزنىڭ بۇ گەپلەرنى شۇ <<تاتلىقىڭىز>>غا قىلىۋاتقانلىقىڭىزنى جەزىملەشتۈردۈم، چۈنكى سىز تۇققانلارنىڭ بالىلىرىنى ئادەتتە ئۆيگە كېلىپ قالسىمۇ ئۇنچە ئەركىلىتىپ كەتمەيتتىڭىز،ھەتتا ئۆزىمىزنىڭ بالىلىرىغىمۇ  ئوچۇق چىراي ئېچىپ ، يېقىملىق گەپ قىلىپ باقمىغىنىڭىزغا خېلى ۋاقىتلار بولۇپ قالغان ئىدى،دوستلىرىڭىزمىكىن دەي دېسەم ،ئەركىشى ئەركىشىگە ھەرگىزمۇ << ھاببا ئېتىپ قويۇش >> توغرۇلۇق تېلىفون قىلمايدۇ ئەلۋەتتە،  ئۇنىڭ ئۈستىگە ئاغزىڭىزدىن بىرەر ئېغىز يېقىملىق ، ئەركىلىتىش تەرىقىسىدىكى  سۆزنى ئاڭلاش ماڭا  ۋە بالىلىرىڭىزغا  بەك تەس ئىدى مۇشۇ كۈنلەردە.     ئۇنىڭسىزمۇ  سىزنى << ھاببا >> ئېتىپ قويىدىغان ئۇ  چىرايلىق << تۇمۇچۇق>>ىڭىز ماڭا بىرنەچە قېتىم تېلىفون قىلىپ مېنىڭ سىزگە << چاپلىشىۋالماسلىقىمنى >>سىزنى ئۆزىگە << قايتۇرۇپ >>بېرىشىمنى  ئېيتقان ئىدى، شۇلارنى ئويلاپ تېلىفون قىلىۋاتقان كىشىڭىزنىڭ شۇ ئىكەنلىكىنى جەزىملەشتۈردۈم.......      بىلەمسىز...؟ سىزنىڭ تېلىفوندىكى  ئۇ << تاتلىقىڭز>> غا قىلغان شۇ ئەركىلىتىش  ئاۋازىڭىزنى ئاڭلاپ يۈرىكمنى بىرسى پىچاق بىلەن تىلغاندەك ئاچچىق بولۇپ كەتتى، ئۈنسىز بىر يىغا ئىچ -ئىچىمدىن ئۆرلەپ بوغۇزۇمغا قاپلىشىپ قالدى، ئۆزەمنى تۇتالماي ياتاق ئۆيگە كىرىپ بوغۇلۇپ -بوغۇلۇپ يىغلىدىم ،بىراق شۇ ئېنىقكى، سىز بۇ يىغامنى ھەرگىزمۇ كۆرمىدىىڭز، ئايالىڭىز بولغان پۈتۈن سۈرۈك بىر ئايال ئۆي ئىچىدە كۆز ئالدىڭىزدا يۈرسەممۇ، چىرايىمغا قارار تەزىڭىز بولمىسا ،كۆزۈمدىكى ياشقا دىققەت قىلاتتىڭىزمۇ....؟    بىلسىڭىز بۇ ياشلار ئاچچىقتىن ،ھەسەتتىن، رەشىكتىن، تۆكۈلگەن ئىدى،نېمىشقىمۇ ھەسەت قىلماي....؟ شۇنچە يىللاردىن بېرى << گۈلىڭىز>> << جېنىڭىز >> مەن بولۇپ، ئەمدىلىكتە بۇنىڭ ئورنىنى باشقا بىرسى ئىگىلىۋالسا ،قانداقمۇ ھەسەت قىلماي، ئاچچىقلانماي تۇرالاي....؟مەندەك بىر ئايالىڭىز  ئەمەس ،باشقا بىر كىشى بولسىمۇ غەزەبلىنىدۇ بۇ ئىشقا....   خوش، گەپنى بەك ئۇزارتىپ ئىچىڭىزنى پۇشۇرۇپ قويماي نەق گەپنىڭ ئۆزىگە كېلەي،ھېلىقى << تاتلىقىڭز>>نىڭ ماڭا نېمە دەپ تېلىفون قىلغانلىقىنى بىلگۈڭىز بارمۇ؟ ( ئۇ << جېنىڭىز>> غا تېلىفون نومۇرۇمنى سىز ئېيتىپ بەردىڭىزمۇ   ياكى باشقىلاردىن سۈرۈشتۈرۈپ بىلدىمۇ بۇنى ئۇقالمىدىم..)ئۇ ماڭا تېلىفوندا << ئەينەككە بىر قاراپ باقە، ئەپتىڭ نېمىگە ئوخشايدۇ....؟ ئۆينى بىكارلىماي كەچكىچە چاپلىشىپ ئولتۇرىۋېرەمسەن...؟ ئېرىڭگە سەن يارىمىغاچقا  مېنى تاپتى،ئۇنىڭ سېنى كۆرەرگە كۆزى يوق، ھۇي چاپلاندى......>> دېگەندەك بىرمۇنچە گەپلەرنى قىلىپ مېنى شۇنداق سەت تىللار بىلەن ھاقارەتلىدى. بەزى گەپلەرنى ئېغىزغا ئېلىشقىمۇ ئۇيىلىمەن، ئۇنىڭ رەسۋا تىللار بىلەن تىللىغان گەپىلىرىدىن يۈرىكىم ئاغرىپ،  ھۇشۇمدىن كەتكەندەك بولۇپ قالدىم.    ئۇ مېنى شۇنداق ئەپسانە گەپلەر بىلەن تىللاۋاتسا ئەلۋەتتە مەنمۇ قاراپ تۇرمۇدۇم،مەنمۇ ياندۇرۇپ تىللىدىم ،لېكىن  مېنىڭ  قايتارما ھۇجۇمۇم ئۇنىڭ پېلىموتتەك تاتىلداپ چىقىۋاتقان تىللىرى ئاستىدا كۆمۈلۈپلا قالدى، <<توۋا >>دەپلا قالدىم ئۇنىڭ رەسۋا بىشەملىكىگە..........شۇنداق بىر << رەسۋا >><< تۇمۇچۇق>>قا سەۋدايىلارچە ئاشىق  بولۇپ قالغانلىقىڭزغا ھەيرانمەن، ياكى ئۇ ئۇ ئەڭ نومۇسسىز تىللىرىنى ئۆزىنىڭ<< دۈشمىنى >><< كۈندىشى>> بولغان مەندەك بىر چاپلاندىغا ئىشلتىپ، ئەڭ <<گۈزەل >> << ئەڭ يېقىملىق >> << ئاڭلىسا ئاڭلىغۇسى كېلىدىغان >> تاتلىق گەپىلىرىنى، ئەرلەرنىڭ يۈرىكىنى ئويناتقۇدەك يېقىملىق ناز -كەرەشمىلىرىنى سىزگە كۆرسەتكەن بولغاچقا ،مەندەك ئىككى بالىنىڭ ئاپىسى، بولۇپمۇ ئۇنداق رەسۋا گەپلەرنى ئېغىزغا ئېلىشقا ئۇيىلىدىغان مەندەك بىر ئايالغا نىسپەتەن ( بۇ يەردە ئۆزۈمنى يۇۋاش، ئەخلاقلىق كۆرسىتىشكە ئۇرۇنماقچى ئەمەسمەن...) يۈرىكىڭىز مۇز بولۇپ قېتىپ، ئۇنىڭدەك توي قىلمىغان قىز تۇرۇپ شۇنچە نومۇسسىزلىقلارنى كۆرسىتىپ << تالا  مۈشۈكى ئۆي مۈشۈكىنى قوغلاپتۇ>> دېگەندەك شۇنچە يىللاردىن بېرى قولۇمنى كۆسەي، چېچىمنى سۈپۈرگە قىلىپ ،جاپا  -مۇشەققەتلەر بىلەن تۇتقان ئۆيۈمدىن قوغلاپ چىقارماقچى بولغان بۇ << <<گۈزەل>>گە سۇ بولۇپ ئېقىۋاتامدۇ تاڭ،ھېچ بىلمىدىم..... بۇنداق دېسەم ،<<سەن ئۇنىڭغا ئۆچ بولغاچقا ،يامان نىيەت بىلەن شۇنداق  دەۋاتىسەن >> دېيىشىڭىز مۈمكىن، لېكىن ئۇنىڭ شۇ تىللىغىنى سىز ئۆز قۇلىقىڭىز بىلەن ئاڭلىغان بولسىڭىز،ئۇنىڭ  سىزگە يېقىملىق ئەركىلەپ بېرىدىغانلىقىغا ئىشەنمەي قالغان بولاتتىڭىز.......     << تاتلىقىڭىز>>نىڭ  تېلىفون بۇنداق ھاقارەتلىك تىللىرىنى گومۇشلارچە ئاڭلاپ، بار دەردىمنى كۆز ياشلىرىمدىن ئېلىۋاتقىنىمغا  بىرنەچچە قېتىم بولدى، شۇنى ئويلاپ قويۇڭكى، مەنمۇ ئۇنچىۋالا مەتۆ، دەلتىلەردىن ئەمەس، << ئاچچىقى كەلسە توشقانمۇ ئادەم چىشلەيدۇ >> دېگەن گەپ بار، لېكىن مەن <<ئاچچىقى  كەلگەندە ئادەم چىشلەيدىغان توشقان>> بولۇشنى  خالىمىدىم، ئېغىر -بېسىقلىق قىلىپ ئەمەس، دەردىمنى ئىچىمگە يۇتۇپ، سىزنى دەپلا بۇ ئازابلارغا بەرداشلىق بەردىم....    << قانداقسىگە مېنى دەپ....؟>>سورىشىڭىز مۈمكىن، جاۋابىمنى قۇلاق سېلىپ ئاڭلاڭ، مەن ئۇ<< ئاشىقىڭىز>>نىڭ ماڭا تېلىفون قىلغان << تېلىفون خاتىرسى>>ۋە يازغا ئۇچۇرلىرىنى سىزگە كۆرسىتىپ سىز بىلەن راسا سوقۇشساممۇ ياكى ئىدارىڭىزگە بېرىپ ئىدارە باشلىقلىرى ۋە خىزمەتداشلىرىڭىز ئالدىدا بىچارىلەرچە يىغلاپ ،قىلغان ئەتكەنلىرىڭىزنى ئۇلارغا ئاشكارىلاپ ،ئۆزۈمگە نىسپەتەن ھېسداشلىق ، سىزگە نىسپەتەن نەپرەت قوزغىساممۇ، شۇ ئارقىلىق سىزنىڭ ئىناۋىتىڭىزنى يەرگە ئۇرساممۇ ۋە ياكى  بالىلارغا   ( ئۇلار دېگەن 18-14 ياشقىچە بولۇپ قالغان بالىلار)  ،ئۇرۇق -تۇققانلارغا بۇ ئەھۋاللارنى ئېيتىپ ھېلىقى < گۈلىڭىز>>نىڭ ئىش ئورنىغا بېرىپ، ئۇنى تازا دۇمبالاپ رەسۋايىنى چۇۋۇپ، ئىچ -قارنىمنى بوشىتىۋالساممۇ بولاتتى، ( تېخى يېقىندىلا بىزنىڭ ئىدارىدىمۇ مۇشۇنداق ئىشتىن بىرسى يۈز بەردى،بىر خىزمەتدېشىم بىرسى بىلەن تېپىشىپ قاپتىكەن ،ئۇ كىشىنىڭ ئايالى ئوغلى بىلەن كېلىپ ئۇ خىزمەتدېشىمنى ئۇرۇپ -دۇمبالاپ ھالىنى قويمىدى...يۈز -كۆزلىرىدىكى كۆك خېلىغىچە يۈتمىدى) بىراق مەن ئۇنداق قىىلشنى خالىمىدىم، ئۇنداق قىلسام بولمايدىغانلىقىنى، ئاچچىقنىڭ ئەقىلنى كېسىدىغانلىقىنى ئويلاپ ،ئۆزۈمنى تۇتىۋېلىپ ، سىزنىڭ ئۆزلىكىڭىزدىن ئىنساپقا كېلىپ، ئۆزىڭىزنى تونۇۋېلشىڭىزنى، ئىككى بالىنىڭ دادىسى ئىكەنلىكىڭىزنى ئويلاپ يېتىشىڭىزنى كۈتتۈم، ئۈمىد ۋە ئۈمىدسىزلىك ئىچىدە، كۆز ياشلىرىم ئىچدە كۈتتۈم.....     سىزگە شۇنى ئېيتىپ قويماقچى،مەن كۈتۈپ چارچىدىم، ئېغىر يۈكنى يەلكىسىگە  ئارتىپ دەشتى -باياۋانلاردا ئېزىپ قالغان،ئۇسسۇزلۇق ۋە ئاچلىق ئازابىدىن ھالسىزلانغان  يولۇچىغا ئوخشاش ھالىمدىن كەتتى، سىزنىڭ  (بىر -بىرىمىزنى ئۆلگۈدەك ياخشى كۆرۈشۈپ، بىر -بىرىمىزدىن ئايرىلپ قالساق جېنىمىز چىقىپ كېتىدىغاندەك ھېسياتتا توي قىلغان ،بارلىقىم بىلەن سىزنى سۆيۈشكە، بار مېھرىمنى سىزگە بالىلىرىمغا  بېغىشلاشقا تىرىشىۋاتقان مەندەك بىر ئايالنى ياخشى ككرمەس بولۇپ قېلىپ ،ئورنۇمغا باشقا بىرسىنى يەڭگۈشلىمەكچى بولىۋاتقان ،ماڭا تاغدەك يار -يۆلەك بولىدۇ دەپ ئىشەنچ باغلىغان  ئوننەچە يىللىق يولدۇشۇمنىڭ ،ھەمراھىمنىڭ)ماڭا ئېلىپ كەلگەن ئازابلىرى زېھنىمنى خورۇتۇپ، يۈرىكىمنى قۇرۇتتەك غاجىلاپ ئارامىمنى قويمىدى.....مەن كۆپ ئويلاپ كەتتىم، ئويلاۋېرىپ مىڭەمنىڭ قېتىغى چىقىپ كېتەي دەپ قالدى، لېكىن خىياللىرىمنىڭ ئاخىرىنى چىقىرالمىدىم، ئويلىغانلىرىمنى ئېيتىپ بېرەي ئاڭلاپ بېقىڭ.    سىز <<  قېرىپ كەتتى،ئەمدى مېنىڭ كۆڭلۈمنى ئالالماس بولۇپ قالدى،ئادەمنى ئۆزىگە تارتالمايدىغان بولۇپ قالدى...>> دەپ ھېسابلىغان مېنىڭ خېتىمنى بېرىۋېتىپ، ئورنۇمغا شۇ << تاتلىقىڭىز>>نى يەڭگۈشلىمەكچى بولغىنىڭزدا شۇنى ئويلاپ باقتىڭىزمۇ ؟ مەنمۇ سىز بىلەن توي قىلغان ۋاقتىمدا تېخى 22 ياشقا كىرگەن ،ھەرقانداق بىر يىگىتنىڭ يۈرىكىگە ئوت ياققۇدەك بىر << تۇمۇچۇق  >> ئىدىم، مەن كەينىمدىن قوغلاشقان شۇنچە يىگىتلەرنى نادامەتتە قالدۇرۇپ، << ماڭا ئۆمۈرلۈك ھەمراھ بولالايدۇ، مېنى بەختلىك قىلالايدۇ، بىر ئۆمۈر بىللە ئۆتۈپ كېتەلەيمىز...>> دەپ سىزنى تاللىغان ئىدىم،ھاال بۈگۈنگە كەلگەندە كۆزىڭىزگە << قېرى>><< سىزنىڭ كۆڭلىڭىزنى ئالالمايدىغان ...>> بولۇپ كۆرۈنۈپ قاپتىمەن...    شۇ تۇمۇچۇققا دۈم چۈشكەن ۋاقىتتا شۇنىمۇ ئېسىڭىزدىن چىقىرىپ قويماڭكى، سىزمۇ  يىگىرمە نەچچە ياشلىق قىران يىگىت ئەمەس،  قىرىقنەچچە ياشلارغا كىرىپ قالغان كىشى، بەلكىم مېنىڭ ئورنۇمغا ئۇ << گۈل >>نى يەڭگۈشلەپ قالسىڭىزمۇ، ئۇنى ئۆزى كۈتكىنىدەك رازى قىلىپ كېتىشىڭىز ناتايىن، ئۇ ۋاقىتتا ئۇ << تۇمۇچۇق>>نىڭ سىزدىن كۆڭلى سوۋۇپ باشقا بىرسىنى تېپىۋالمايدىغانلىقىغا ئىشەنچىڭىز بارمۇ......؟      ئاخىرىدا سىزگە شۇنداق سوئال قويماقچى، سىزغۇ ئۇ << تاتلىق>>نى چىن ھېسياتىىڭز بىلەن سۆيۈپسىز، ئىككىڭلار بىر -بىرىڭلاردىن ئايرىلالمۇغىدەك دەرجىدە بىر -بىرىڭلارنى ياخشى كۆرىدىكەنسىلەر،لېكىن ئۇ <<گۈل>>ىڭىز سىزنى مەن كۈتكەندەك كۈتۈپ ،ھاجىتىڭىزدىن چىقالارمۇ؟ سىز ياخشى كۆرىدىغان تاماقلارنى ئېتىپ ئالدىڭىزغا ئېلىپ كېلەرمۇ؟ھالىڭىزدىن خەۋەر ئالالارمۇ؟ ئەڭ مۇھىمى بىز ئاجرىشىپ كەتسەك، بالىلىرىمىز يېتىم بولۇپ قالىدۇ،ئۇ << گۈل>>ىڭىز بالمىزغا مەن بەرگەندەك ئانا مېھرىنى بېرەلەرمۇ؟ مەندەك باغرىغا باسالارمۇ؟ بېشىنى ئانىلىق مېھرى بىلەن سىلىيالارمۇ؟ بالىلارمۇ ئۇ بولغۇسى << ئۆگەي ئانا>>نى مېنى << ئۆز ئاپا>>سىنى كۆرگەن كۆزدە قارىيالارمۇ؟<< ئاپا >>دەپ بوينىغا ئېسىلپ ئەركىلىيەلەرمۇ؟ كۆڭلىدىكى  گەپلىرىنى دېيەلەرمۇ؟ بالىلىق مېھرى بىلەن ياخشى كۆرەلەرمۇ؟ كۆڭلى يېرىم بولغان ۋاقىتلىرىدا باغرىغا ئۆزىنى ئاتالارمۇ؟........مېنىڭ مۇشۇ سوئالىم ئۈستىدە ئەستايىدىل ئويلۇشۇپ كۆرۈپ ئاندىن ،بىر قارارغا كېلىشىڭىزنى ئۆتىنىمەن...   راستىنى ئېيتسام،گەرچە سىزنى چىن يۈرىكىمدىن سۆيسەممۇ، سىزدىن ئايرىلىپ كېتىشكە، بالىلىرىمنى يېتىم قىلىشقا كۆزۈم قىيمىسىمۇ، لېكىن  سىزدەك  ۋاپا -مېھرنىڭ قەدرىنى بىلمەيدىغان  ئەردىن سەل رايىم قايتىپ قالدى،<<بولدىلا ،ئاجرىشىپ كېتەي >>دەپ ئويلۇدۇم لېكىن ئىككى بالام...... ئۇنداق قىلسام بالىلىرىم شۇ << تاتلىقىڭىز>>نىڭ ئالدىدا سارغىيىپ يۈرسە، يۈرىكىم تېخىمۇ  ئېچىشىپ كېتە....؟ ئۇنداق دېسەم رەنجىپ كەتمەڭ، بەلكىم مەندىنمۇ ئۆتۈپ كەتكەن تەرەپلىرى باردۇ،ئۆزەم ھېس قىلالمىغان بىلەن، << ھەركىمنىڭ تېزى بېشىدىن ئېگىز، ئۆزى كۆرمەيدۇ>>دېگەن گەپ بار بىزدە، مەنمۇ بەزىبىر ئەيىبلىرىمنى ئۆزۈم ھېس قىلىپ يەتمىگەن بولۇشۇم مۈمكىن،بۇ توغرۇلۇق مەنمۇ ئەستايىدىل ئويلۇشۇپ باقاي......      بىر ئالىنى بۇزۇش ئىنتايىن ئاسان، لېكىن ئۇ ئائىىلنى قۇرۇپ چىقىش، ئوننەچچە  يىللىق تارخقا ئەكىلىش ئۇ بەك تەس، ئائىلە دېگەن قۇشقاچ ئۇۋىسى ئەمەس، بوراندا چۇۋۇلۇپ كەتسە، قايتىدىن چاڭگا تىزىپ ئورنىغا ئەكىلىپ قويىدىغان.... بۇنى نۇقتىنى ئېسىڭىزدىن چىقىرىپ قويماسلىقىڭزنى سورايمەن..... ئاخىرىنى ئۆزىڭىز ئويلاپ بىر قارارغا كېلەرسىز، ئۆزىڭزگە قويدۇم، مېھرىبان اللاھتىن كۆڭلىڭىزگە ئىنساپ تىلەيمەن......خېتمنى تولۇق ئوقۇپ چىقىشىىڭزنى ئۈمىد قىلىمەن......      سىزنى چىن يۈرىكىدىن سۆيگۈچى ، باغرى قان  ئوننەچچە يىللىق ئايالىڭىز X دىن....      ئىزاھات :ئەسسالام،قەدىرلىك تورداشلار ، ھەممىڭلار تېنچلىق ، ئوبدان تۇردۇڭلارمۇ؟ .......بۇ يازمىنى يېزىش سەۋەبىنى قىسقىچە ئەسكەرتىپ ئۆتۈشنى لايىق تاپتىم،قايسى كۈنى چۈشتە ئىشتىن چۈشۈپ ئۆيگە ماڭسام تولۇقسىزدا بىرگە ئوقۇغان بىر ساۋاقدىشىم ئۇچراپ قالدى، ئۇزاق بوپتىكەن كۆرۈشمىگىلى، ھال -ئەھۋال سوراشقاندىن كېيىن قارىسام ،قولىدا ئۇزۇن قاتلانغان تېلىفون نومۇر خاتىرسى تۇرىدۇ، <<  نېمانداق  جىق  نومۇر بۇ ،تېلىفون دېگەننى بولىشىغا ئۇرۇپسەن =ھە....؟ >> دەپ چاخچاق قىىلپ قويارمەنمۇ، كۆزىگە ياش ئالغىلى تۇردى، تەسەلى بېرىپ نېمە بولغانلىقىنى سورىسام< بۇ ئېرىمنىڭ ئاشنىسىنىڭ ئېرىمگە، ماڭا ئۇرغان تېلىفون نومۇر خاتىرسى.....>دەپ دەردىنى تۆكۈپ كەتتى،ئۇنىڭ دېيىشىچە يولدىشىنىڭ <<مۇھاببىتى>> ساۋاقدىشىمغا  قىسقا ئۇچۇر يوللاپ، تېلىفون قىلىپ پەقەتلا ئارام بەرمەپتۇ، ئېرىدىن ئاجرىشىپ كېتەي دېسە ئىككى بالىسىغا تارتىشىپ قاپتۇ، بۇگەپلەرنى ئاڭلاپ يۈرىكىم ئېچىشىپ كەتتى، <<نېمىشقا شۇنداق بولىدىغاندۇ...؟>> دېگەن سوئال كاللامغا كىرىپلا ئالدى.....     سۆيۈملۈك سىڭىللىرىم، << كۆڭۈل>> << ياخشى كۆرۈش >> دەپلا بىر ئائىلىنى ۋەيران قىلماڭلار، ئەگەر شۇ ئايالنىڭ ئورنىدا مەن بولسام قانداق قىلاتتىم ....؟ دېگەننى ئويلاپ قويۇڭلار، باشقىلارنىڭ بېشىنى قوشۇپ قويۇش ئىنتايىن ساۋاب ئىش، لېكىن ئىككى باشنى ئايرىپ، ئەلەمگە قويۇش بۇ ئىنتايىن رەزىللىك، اللاھ -تاللاھ ئىگەممۇ كەچۈرمەيدۇ جۈپتلەرنى ئايرىۋەتلەنلەرنى، مېھرىبان اللاھ كۆڭلۈڭلەرگە ئىنساپ -تەۋپق ئاتا -قىلسۇن.......

Gaday

	بۇ يالغۇز ئىرىڭىزگە يازغان خىتى بولماستىن نۇرغۇنلىغان ئاياللىرىمىزنىڭمۇ كوڭلىدىكى خېتى.قايسى كۈنى بىر قۇشقاچنى بىر ئارامگاھقا تاكسىرىمدا ئاپىرىپ قويغان ئىدىم ، پۇلنى ھىلىقى يەدە ساقلاپ تۇرغان  ئەر بەرمەكچىكەن.  ئۇ قىز نىمە دەيدۇ  دىمەمسلەر : ئاۋۇنىڭ پۇلى كۆپ، كوپەرەك ئىلىڭ دەيدۇ .....توۋۋا .

كەھرىۋا

	بۇ يوللانمىنى ئۆتكەندە قايسىبىر توربەتتە كۈرۈپ ئىچىم شۇنچىلىك ئاچچىق بولغانتى ، قايتا ئۇقۇپ يەنە بىر خىللا بوپ قالدىم . خۇدايىم ھەممىمىزنىڭ كۆڭلىگە ئىنساپ بەرسۇن !ھەممە بەندىللىرىگە توغرا يول ئاتا قىلسۇن !

Azizan

	توي قىلماي دېسە تېخى چوڭى بوۋا-موما ئاتا-ئانا قاراپ تۇرغان ... توي قىلىپ كېلىشەلمەي ئاجرىشاي دېسە پاقلاندەك بالىدىن ئىككى-ئۈچى قاراپ تۇرغان ... خىزمەتكە بارسا باشلىق بىلەن خىزمەتداشتىن سانجىق ، ئۆيگە كىرسە مۇئاشتىن سوراق ، ئىچىۋالسا خوتۇن يامانلاپ بىر ھەپتە بالا ئاچ-يالىڭاچ ، كەچ قالسا قاچا-قۇچىلار تاراڭ-تاراڭ ، تالاغا چىقمىسا كۆزگە سەت كۆرۈنۈپ ۋاراڭ-ۋاراڭ ! ئاجراشقىلى تېخى كۆڭلى ئۇنىماي ، گەپ بىلەن دەرتكە تېخى چىدىماي ، خوتۇن كەينىنى قىلىپ يامانلاپ قالغاندا تالادا كۆڭلىنى شەيتان ئېلىۋالدى دەيلى ، مانا ئوخشىغىنى ، ھېكايە بىلەن مۇنبەردە پاراڭ-پاراڭ !!! ھەي ... ئەرچىلىك ، ھەي ئەرچىلىك ... ( مەن ھېكايىدىكى ئەر بىلەن تونۇشمايمەن ، پەقەت شۇ يولدىن ئېزىپ قالغان كىشى نۇقتىسىدىن ئازراق سۆزلەپ باقتىم ، بۇنداق ئىشنى قوللايمەن دېگىنىم يوق . ) خاتا چۈشەنمەڭلار ئىنكاسنى .

غەلبە

	مۇسلىنە ھەدە. ئاۋۇ باغرى قان دېگەن گەپنى كۆرۈپ يۈرۈكۈم سەپ كەتتى، ئىلگىرى بۇ گەپنى پەقەت مەنلام ئىشلىتەتتىم.....خۇدا خالىسا ھەممە ئىش يۈرۈشۈپ كېتىدىكەن......غەلىبە دېگەن سۆز ھەر دائىم قولاق تۈۋۈمدە جاراڭلايتتى....بولدى بۇنى دىمەي..... يەنە يېرىم سائەت جالاپ بۇ تىمىغا ئىنكاس يېزىشنى توغرا تاپتىم......مەن سىزدەك بىر پىشقان ،ئەقىللىق بىر ئايالنىڭ تۇرمۇشدا دۇچ كەلگەن ئىشى مېنى گاڭگىراتتى. ئىزاھاتنى كۆرۈپ گەرچە ئازراق تەسكىن تاپقان بولساممۇ يەنىلا بىئارام بولىۋاتىمەن. ئىككى ئائىلىنى ۋەيران قىلىدىغان گەپ چىققان چاغدا ئاسمان گۈلدۈرلەيدۇ دەپ بار.30 پىرسەنىت كىشى بار ھەقىقەتەن بەغىرەز .ئەگەر ئۇ ئەر بەغىرەز بولسا بۇ تىما كار قىلماس........تەبلىغ ئاڭلاپ ،جامائەت سورۇنلىرىغا كۆپ بېرىپ ،كۆپ كىتاپ ئوقۇپ   ئاندىن ھۆكۈم چىقارسۇن ئۇ ئەر......ئەر بىپەرۋا ئەمما ئايال يەنىلا ئەرنىڭ كۆڭلىنى ئاياپتۇ........بۇنىىڭ سەۋەبىنى باشقىلارمۇ بىلەر.

lazzat

	مۇشۇنداق ئۆزىنى بىلەلمەيىدغان ئاياللارغا مىڭ لەننەت...!  شۇ بەختلىك  بىر ئائىلىنى بۇزۇپ  ئۆزى قانچىلىك بىر بەختكە ئېرىشەر-ھە؟

kamran

	بۇ راستلا بولغان ئىشما .

Azizan

	ئاپتور جاۋابىنى بويلاپ 5قەۋەت lazzat كە 2010-06-03 01:40 AMئەۋەتىلدى : مۇشۇنداق ئۆزىنى بىلەلمەيىدغان ئاياللارغا مىڭ لەننەت...!  شۇ بەختلىك  بىر ئائىلىنى بۇزۇپ  ئۆزى قانچىلىك بىر بەختكە ئېرىشەر-ھە؟ مېنىڭچە لەنەت ئوقۇشتىن كۆرە ، توۋا دېسەك توغرا بولارمىكىن . باشقا كەلگەندە ھەممە توغرا كۆرۈنىدىغان ئىشلار بار ، خۇدا ساقلىسۇن دەيلى . بەلكىم شۇ ئائىلە بۇزغان ئاياللارمۇ بىلىدۇ ياكى بىلەتتى ...

dil-rus

	ئاياللارنىڭ  ئاياللارنى  ئېزىشى  ....... مانا بۇ  خىل پاجىئە  بىر  جىنىس  ئىچىدىكى شەپقەتسىزلىك ، مىھىر - مۇھابەتنىڭ يوقىلىشى تۈپەيلىدىن  كېلىپ  چىقىدۇ   !