ئوغۇللىرىم: بۈگۈن بايرىمىڭلار ئىدى، بىراق.

oguzyar

	ئاخشامقى ھەقسىز سىمىنا قوشۇپ ئىشلىگەننىڭ ھاردۇقىغا چوڭ ئوغلۇم ئېرپاننىڭ مۇئەللىمى بەرگەن بىر تالاي تاپشۇرىقىغا مىقتەك قادىلىپ ئولتۇرۇپ، بىر قاتار تەكشۈرۈش، كىچىك ئوغلۇم ئېھساننى يۇيۇپ قويۇش، ئۇنىڭغا ئات بولۇپ ئۆمىلەش بىلەن يەتكەن ھاردۇقتا ئەتىگەندە يان تېلىفۇنۇمنىڭ يېقىمسىز توۋلىشى مېنى سائەت 5 بولا بولمايلا ئورنۇمدىن تۇرۇشقا مەجبۇر قىلدى. ئورنۇمدىن تەستە تۇردۇم. ئاخشامقى تاپشۇرۇق بويىچە بۈگۈنكى بالىلار بايرىمىنى قايرىپ قويۇپ، ئەتىگەندە سەھەر تۇرۇپ، 35 مەكتەپكە تېلىفۇن قىلىپ، چۈشكىچە بولغان ئارىلىقتا ناھىيە چۈشۈرگەن مۇھىم بىر ئۇقتۇرۇشنى تارقىتىپ بولۇشۇم كېرەك ئدى. يۈز- كۆزۈمنى يۇيۇپ، ئۇيقۇم ئېچىلغاندەك بولدى. ئىككى چەتتە ياتقان ئىككى ئوغلۇم شۇنداق تاتلىق ئۇخلاۋاتاتتى. ئېرپاننىڭ جۈدەڭگۈ قىياپىتى، ئاق سېرىق چىرايىدىن ھارغىنلىق چىقىپ تۇراتتى. ئۇ كېچە سائەت 10 لارغىچە تاپشۇرۇق ئىشلىگەن، خەنزۇ تىلى، ماتىماتىكا، ئېلىپبە تاپشۇرۇقلىرىنى بىر- بىرلەپ ماڭا كۆرسىتىپ ئىمزا قويدۇرۇپ بولغۇچە خېلى بىر ۋاخ بولغانىدى. توۋا دېدىم .ئىچىمدە. "1- يىللىق ئوقۇغۇچىسىغىمۇ شۇنداق كۆپ تاپشۇرۇق بېرەمدۇ. مەنمۇ مائارىپچى، باشقا كۈنى بولسىغۇ بىر نۆرى، ئەمما بۈگۈن ئۇلارنىڭ بايرىمى بولغاندىن كېيىن ئاخشامقى تاپشۇرۇقنى بەرمىسە بولمامدىغاندۇ".... ئامال يوق. ئۇنى ئويغاتتىم، چۈنكى بۈگۈن ئۇلارنىڭ مەكتىپىدە ئەتىگەن سائەت 6 دىن باشلاپ بايرام پائالىيىتى بولماقچى ئىدى. ئۇنىڭ مەڭزىگە سۆيۈپ، ئاستاغىنە ئىسمىنى چاقىرغىنىمدا ئۇيقۇغا قانمىغان كۆزلىرىنى بەك تەستە ئاچتى. يۈز- كۆزلىرىنى يۇيۇپ بولغۇچە چاي تەييارلىدىم. چالا- پۇلا ناشتا قىلىۋاتقان ئوغلۇمنىڭ بايرىمىنى تەبرىكلەپ، قولىغا ئازراق پۇل تۇتقۇزۇپ قويغاندىن كېيىن ئۇنى مەكتىپىگە يولغا سالدىم. كىچىك ئوغلۇم تېخىچە ئۇخلاۋاتاتتى. ئۇنىڭ ئاپپاق چىرايى، ئۇزۇن كىرپىكلىرى قىزلارغىلا ئوخشايتتى. ئەمدىلا ئىككى يېرىم ياشتىن ئاشقان ئومىقىم ئۇخلاۋېتىم پىسسىڭڭىدە كۈلۈپ قويدى. يۈرىگىم "پىژ" قىلىپ قالدى. قوزام ئېھتىمال چۈشىدە ئانىسىنى كۆردى. ئۇنىڭ ئانىسىنى كۆرمىگىنىگە بۈگۈن ساق 27 كۈن بولغانىدى. ھازىر "ئانا" دېگەن سۆزنى كەمدىن كەم قىلىدىغان بۇ ئوغلۇم ماڭا بەك يېپىشاتتى، ئەمما ئامال يوق، ھەپتىدە كۆپ بولسا ئىككى قېتىم، بولمىسا بىر قېتىم ئۇنىڭ بىلەن بىللە ئۇخلىيالايتتىم. ئايالىم ئەتىگەندىلا تېلىفۇن قىلىشى كېرەك ئىدى، تېلىفۇن قىلمىدى. بەلكىم ئۆگىنىش ھاردۇرغان بولسا كېرەك. ئۇنىڭ ئۈرۈمچىدىكى بىلىم ئاشۇرۇش ۋاقتىنىڭ توشۇشۇشىغا يەنە بىر يېرىم يىل بار. ئامالىم قانچە، ھازىرقى رىقابەت دەۋرىدە ئۇنىڭ مەكتىپىدىكى مۇدىرلىرىغا يالۋۇرۇپ يۈرگەندىن كۆرە، سەۋىيىسىنى ئۆستۈرۈپ، بېشىنى تىك تۇتۇپ ئىشلىيەلەيدىغان ھالغا كەلگۈچە، مەن جاپا تارتساممۇ رازىمەن. ئېھساننىڭ مەڭزىگە سۆيۈشۈمگە تاتلىققىنە كۈلۈپ كۆزىنى ئاچتى. كىچىك ئوغلۇم پەقەت قەغىشلىك قىلمايتتى، ئويغانغاندا كۈلۈپلا ئويغىناتتى. ئۇ كۆزىنى ئېچىپلا مېنى چىق قۇچاقلىۋالدى. بۇرنۇمنىڭ ئۇچى ئېچىشتى، "چىڭ قۇچاقلىۋال ئوغلۇم" دېدىم ئىچىمدە. " يەنە بىر نەچچە سائەتتىن كېيىن مەندىن ئايرىلىسەن، يەنە بىر ھەپتە سېنى كۆرەلمەيمەن" سائەت ئويلىغىنىمدىنمۇ تېز مېڭىپ كېتىۋاتاتتى. ئىدارە باشلىقىمغا كېچىچە ئېھساننى قۇچىمىقدا ئولتۇرغۇزۇپ قويۇپ تەييارلىغان دوكلاتىمنى كۆرسەتمىسەم بولمايتتى. شۇڭا بالامنى كىيىندۈرۈپ، ئۆزۈممۇ، بالاممۇ ناشتا قىلمايلا ئىشكتىن چىقتۇق، بالام پەلەمپەيلەرنى ساناپ تەم -تەم مېڭىپ پەسكە چۈشۈۋاتاتتى. جەمئىي 60 پەلەمپەي، ماڭا ياد بولۇپ كەتكەن، ئەمما ئېھسان ھەپتىدە بىر قېتىم چىقىپ چۈشەلەيدىغان پەلەمپەيدىن چۈشكىسى يوقتەك پات- پات رىشاتكىنى قاماللاپ تۇرېۋىلىپ، مېنى جىلى قىلدى. بالامنى ئېلىپ ئىشخانام ئالدىغا كەلگىنىمدە ئىدارە باشلىقى ساقلاپ تۇرغانىكەن، ماتىرىياللارنى تاپشۇردۇم، بىر قولۇمدا دوكلات، بىر قولۇمدا ئېھسان... ئىشخانىنىڭ ئىشلىرىنى بىر قۇر بېسىقتۇرغىچە بالام بىر ۋاراق قەغەزلەرگە ئۆزىنىڭ خىيالىدىكى ئەسىرىنى يېزىپ پۈتتۈرۈپ بولدى. خىزمەتدىشىمغا ئىشلارنى تاپىلاپ قويۇپ، بالامنى موتۇسېكلىتقا مىنگەشتۈرۈپ، ئايالىمنىڭ ھەدىسىنىڭ ئۆيىگە يول ئالدىم. بارغىنىمدا ئۇلار ساقلاپ تۇرغانىكەن، بالامنى ئۇلارغا تاپشۇرۇپ بەرگىنىمدە بالام بوينۇمدىن قۇچاقلاپ، مەڭزىنى مەڭزىمگە ياققىنىچە چىرقىراپ يىغلاپ، قويۇۋەتمىدى. يۈرىگىم ئېچىشسىمۇ ئامال يوق. سىلكىشلەپ ئاجرىتىپ، كېتىپ قالدىم، مەڭزىمدە ئىككى تامچە ياش.... ئىشتىن چۈشۈپ، چوڭ ئوغلۇم ئېرپاننىڭ ئامراق تامىقى لەغمەن ئېتىش ئۈچۈن پالاقلاپ يۈگرەپ كۆكتات ئالدىم، ئۆيگە كېلىپ يەڭلىرىمنى شىمايلاپ، خېمىر يۇغۇرۇشقا تۇتۇندۇم. ئوغلۇم پىئونېر بوپتۇ، كۆڭلى بەك خۇش، ئىشىكتىن كىرىپلا چۇڭۇلداپ كەتتى. ئۆزىنىڭ پېئونېر بولۇپ، سەھنىگە چىققانلىقىنى، چوڭ ئوقۇغۇچىلارنىڭ ئۇنىڭغا گالىستۇك تاقاپ قويغانلىقىنى ئاغزى- ئاغزىغا تەگمەي سۆزلەۋاتاتتى. مەن تاماق ئەتكەچ، ئۇنىڭ بىلەن مۇڭدىشاتتىم، ئىختىيارسىز مېنىڭمۇ بالىلىق ۋاقىتلىرىم، رەھمەتلىك دادام، ئاناملارنىڭ مېنى پەپىلەپ باققانلىرى ئېسىمگە كېلىپ، يەنە بىر قېتىم بۇرنۇمنىڭ ئۇچى ئېچىشتى. ئوغۇللىرىم: بۈگۈن سىلەرنىڭ بايرىمىڭلار ئىدى. ئەسلى مەن ۋە ئاناڭلار دەرقەمدە تۇرۇپ، سىلەرنى ئوينىتىدىغان، سىلەرنىڭ كۆڭلۈڭلارنى خۇشھاللىققا تولدۇرىغان كۈن ئىدى. تۇرمۇشنىڭ دەردى شۇنداق ئىكەن. ئاناڭلار يىراقتا يۈرەك پارىسىنىڭ بايرىمىنى ئۈنسىز ياش تۆكۈپ تەبرىكلاۋاتقاندۇ، داداڭلار بولغان مەندەك پۈتۈنسۈرۈك بىر ئەرمۇ شۇ تۈگىمەس خىزمەت، تۈگىمەس ئائىلە ئىشلىرىنىڭ بېسىمىدا ئاكا- ئۇكا ئىككىڭلارنى بىر يەرگە جەم قىلالماي، بىرسىڭلارنىڭ تامىقىنى بازاردىكى تاماقخانىلار بىلەن دىيىشىپ قويۇپ، بىرسىڭلارنى تۇققانلارغا باققىلى ئاپىرىپ قويۇپ ئىككىڭلارنىڭ  ئۈمىت، سېغىنىش، تەلپۈنۈشكە لىق تولغان بۇلاقتەك كۆزلىرىڭلارغا ھەر بىر قارىغىنىمدا كۆزلىرىمدىن تۆكۈلۈشكە تەييار بولغان ياشلىرىمنى ئەرلىكىمگە ئېلىپ، يۇتۇۋېتىپ يۈرمەكتىمەن. ئوغۇللىرىم، شۇنداق كۈن كېلىدۇ، ئاناڭلار قايتىپ كېلىدۇ، سىلەرمۇ چوڭ بولىسىلەر. مەن ھەممىڭلارنىڭ بەخت كۈلكىسى ئىچىگە غەرق بولۇپ، يۈرىكىم ئاچچىق بولمايدىغان، ئاناڭلار ھەر بىر تېلىفۇن قىلسا ياش تۆكمەيدىغان، سىلەرمۇ ماڭا قىيالماسلىق ئىچىدە مېنى چىڭ قۇچاقلاپ يىغلىمايدىغان كۈنلەر ھامان كېلىدۇ. بايرىمىڭلارغا مۇبارەك بولسۇن بىر جۈپ باھادىرىم... ( مۇشۇنى يېزىۋېتىپ، يەنە ئىككى تامچە يېشىم كۇنۇپكا تاختىسىنى ھۆل قىلىپ قويدى.)

Hakan

	قولىڭىزغا درت بەرمىسۇن ! ياخشى يېزىپسىز !

apchil

	ھەقىقەت تەسىرلىك ئىشلاركەن .مەن مۇ وقۇپ بولغۇچە بۇرنۇمنىڭ ئۇچى ئېچىشقاندەك بولدى .چۈنكى مەن مۇ بىر دادا، مېنىڭمۇ ئوماق ئىككى پەرزەنتىم بار بۈگۈن ئۇلارنىڭ بايرىمى .ئىدى بۈگۈن ئۇلارنىڭ بايرىمى ........بالامنىڭ بايرىمى ،ئوماق سەبىلەرنىڭ بايرىمى

melek

	بالىلىرىڭىز چوقۇم سىزنى توغرا چۈشىنىدۇ مەيۈسلەنمەڭ،چۈنكى ئۇلار دادىسىنىڭ ئۆزلىرىگە بۈگۈن بىر كۈن بايرامدىلا ئەمەس بەلكى ھەركۈن بايرام قىلىپ بېرىدىغانلىقى  بىلىدۇ

dilharaj

	ياخشى تىما ئىكەن .مەيۈسلەنماڭ ئاتائانىنىڭ ساقلىقى پەرزەت ئۈچۈن ئەڭ چوڭ بايرام.

kamran

	كۈيۈمچان دادا ئىكەنسىز

munglukkadam

	بەك  ياخشى يىزىپسىز ،گەرچە باللارنى ئاران كىلىدىغان بىر بايرامدا ئويناتقىلى ئىلىپ چىقالمىغان خىزمەتنىڭ ئالدىراشچىلىقى بىلەن ۋاقىتنى يىتۈشتۈرەلمىگەن بولسىڭىزمۇ  ،لىكىن ئاتانىڭ ئاشۇ جاپالرنى چىكىشىنىڭ ئاشۇ تۈگمەس خىزمەتلەرنى ئىشلىشىمۇ ئاشۇ سۆيۈملۈك ئوماق باھادىرلار ئۈچۈنلىكىنى ئۇلارمۇ ئاتا بولغاندا بىلىدۇ ،بەك ياخشى يىزىپسىز تۇرمۇشقا مۇشۇنداق يىقىن ئەمىلى يىزىلغان ئەسەرلەرنى ئوقسام شۇنداق تەسىرلىنىپ كىتىمەن دىسە .. قولىڭىزغا دەرت كەلمىسۇن،مۇشۇنداق ياخشى ئەسەرلەرنى داۋاملىق يوللاپ تۇرۇڭ دوستۇم سىزنى قوللايمەن

watan

	ئاتىغا بالا ،بالىغا ئاتا  بۇلسىلا  ھەر كۈنى بايرام، مەنمۇ كىشىنىڭ يۇرتىدا يۈرۋاتىمەن مانا،2 ئۇغلۇم  بايرامنى ئانسى جاپاكەش بىلەن بىللە ئۈتكۈزۋاتىدۇ.

~OT~

	شۇنداق، شۇ كۈنلەر چوقۇم كېلىدۇ. ئۈمىدۋار بولۇڭ! ئايالىڭىزنىڭ بالدۇرراق يېتىپ كېلىپ بىر ئائىلە كىشىلىرىنىڭ تىزراق جەم بولۇشىنى ئۈمىد قىلىمەن.

Danggal

	بۇرنۇمنىڭ سۈيى ئېقىۋاتامدۇ كۆز يېشىممۇ؟ خەپ دۇنيا ! ئاخىرى مىنىمۇ يىتىشتۈرسەنغۇ!؟