تاشپولات: كارتون مۇئەللىمى ئېرپان ئۈرۈمچىدە سىنىپ ئاچماقچى

TashpolatRozi

	كارتون مۇئەللىمى ئېرپان ئۈرۈمچىدە سىنىپ ئاچماقچى تاشپولات روزى سالام قېرىنداشلار، يۇرتىمىز غۇلجا رايونىدا يامغۇرنىڭ توختىماي يېغىشى تۈپەيلى كۆپلىگەن تەبىئىي ئاپەتلەرنى پەيدا بولدى. بۇ قېتىمقى تەبىئىي ئاپەتتە مەن تۇغۇلۇپ ئۆسكەن توققۇزتارا رايونى بىرئاز تالاپەتكە ئۇچرىدى. مەن توققۇزتاراغا تېلېفون بېرىپ ئەھۋالنى ئۇقۇپ تۇردۇم. بىزنىڭ چوڭ ئۆيدە ئۆيلەر بۇزۇلۇش ئىشلىرى يۈز بەرمىدى. بىراق كونا ئۆيلەر بولۇپمۇ لايدا ياسالغان ئۆيلەر ئۆرۈلۈپ چۈشۈش ھادىسىلىرى يۈز بېرىپتۇ. بولۇپمۇ دېھقانچىلىق زىرائەت مەيدانلىرى ئېغىر تەسىرگە ئۇچراپتۇ. بۇ ئاپەتلەر بىزنىڭ يۈرىكىمىزنى ئاغرىتتى. مەن بۇ قېتىمقى ئاپەتكە ناھايىتى تېزلىكتە ئىئانە توپلاپ ۋاقتىدا ئاپەت رايونىغا بېرىپ ھال سورىغان قېرىنداشلىرىمنىڭ ئاجايىپ ئىش ئىزلىرىنى ئاڭلىدىم ۋە قىسقا سۈرەتلىك فىلىملەرنى كۆرۈپ ھاياجانلاندىم ۋە پەخىرلەندىم. مەن بۇ ئالىيجاناب كىشىلەرگە چىن كۆڭلۈمدىن رەھمەت ئېيتىمەن ۋە پەخىرلىنىمەن! ئاپەتكە ئۇچرىغان بارلىق قېرىنداشلىرىمنىڭ تېزرەك ئەسلىگە كېلىپ نورمال تۇرمۇش كەچۈرۈشىنى چىن كۆڭلۈمدىن ئۈمىد قىلىمەن! ئەمدى دىققىتىڭىزنى بۇ تېما ئۇچۇرىغا مەركەزلەشتۈرىشىڭىزنى ئۈمىد قىلىمەن. ئۇيغۇر كارتونچىلىقىنى دۇنياغا تونۇتقان تالانتلىق ياش ئېرپان يارمۇھەممەد ئۈرۈمچىدە كارتون سىنىپى ئاچماقچى. مەن ئېرپان ئۇكىمىزنى يېقىندا ۋەتەندىكى تور بەتلەردە تونۇشتۇرغاندىن كېيىن، ناھايىتى كۈچلۈك تەسىر قوزغىدى. ئۇنىڭ تەرجىمىھالىنى مۇشۇ يازمىنىڭ ئاخىرىغا قويۇلغان ئۇلىنىشتىن ئوقۇڭ. بەزى قېرىنداشلىرىمىز ئىنكاسلىرىدا كارتون توغرىلىق سىنىپلارنىڭ شىنجاڭدا ئېچىلىشىنى كۈچلۈك تەلەپ قىلدى. مانا مۇشۇنداق كۈچلۈك تەلەپلەرگە جاۋاب بېرىش ئۈچۈن ئېرپان ئۇكىمىز ئۈرۈمچىدە كارتون سىنىپى ئاچماقچى. ياپونىيەنىڭ كارتونچىلىق ساھەسىدە ئەڭ ئالدىنقى قاتاردا تۇرىدىغانلىقى ھەممىمىزگە مەلۇم. ھەممىمىز كىچىكىمىزدىن ياپونىيەنىڭ كارتونلىرىنى كۆرۈپ چوڭ بولدۇق، مەسىلەن: ماركونىڭ ئاپىسىنى ئىزدىشى، ئەقىللىق يىشۇ، ۋاسكېتبول ماھىرى، رازۋېدچىك كونان، نارۈتو قاتارلىقلار. ھەتتا كىچىك چېغىمىزدىكى كارتون فىلىملەرنى ھازىرغىچە ياقتۇرۇپ كۆرىمىز.   جەمئىيەتنىڭ تەرەققىياتىغا ئەگىشىپ، كارتونچىلىقمۇ كىنولىشىشقا قاراپ يۈزلەندى. نۇرغۇن دۆلەتلەرنىڭ ئۆز تۇرمۇشى ۋە ئۆرپ ئادەتلىرى تەسۋىرلەنگەن كارتون فىلىملىرى بار. بۇنىڭغا قىزىقىش بىلەن بىرگە بەزىدە بىزنىڭمۇ ئۆز ئۆرپ ئادىتىمىز تەسۋىرلەنگەن كارتونلىرىمىز بولسىكەن دېگەن خىيالغىمۇ كېلىپ قالىمىز، بەلكى بۇ مىللىتىمىز ئارىسىدىكى نۇرغۇن ياشلارنىڭ ئارزۇسى بولسا كېرەك. يېقىندا بىزنىڭ ئۇيغۇر ياشلىرىمىزنىڭ سەركىسى ئېرپان يارمۇھەممەد، بىزنىڭ بۇ ئورتاق ئارزۇيىمىزنى ئەمەلگە ئاشۇردى. ئۇ ئۇيغۇر ئۆرپ ئادەتلىرى تەسۋىرلەنگەن كارتون فىلىمنى دۇنيا سەھنىسىگە ئېلىپ چىقتى. ئېرپان يارمۇھەممەد ياشلىرىمىزنىڭ كارتون فىلىم ئىشلەش توغرىسىدا تېخىمۇ مۇكەممەل بىلىم ئېلىشى ئۈچۈن شىنجاڭدىكى بىردىنبىر كارتون فىلىم ئىشلەشتىكى باشلامچى كارخانا قارلۇق شىركىتى بىلەن بىرلىشىپ  شىنجاڭدا (ئۈرۈمچى) تەتىللىك كارتون فىلىم ئىشلەش تەربىيىلەش سىنىپ ئاچماقچى. قىزىققۇچى دوستلارنىڭ تىزىملىتىشىنى قىزغىن قارشى ئالىمىز. مېنىڭ پەرىزىمچە كارتون ساھەسى ئۇيغۇرغا ناھايىتى يېڭى بولۇپ، بۇ ساھەدە ئېچىلمىغان تەرەپلەر ئىنتايىن كۆپ. كەلگۈسىدە كارتون ساھەسىنىڭ دىيارىمىزدا ئىقتىسادى قىممەت يارىتىشى ئىنتايىن مول. بولۇپمۇ مۇشۇ ساھە ئارقىلىق خىزمەت يارىتىش ئۈنۈمىمۇ ئىنتايىن يۇقىرى دەپ ئويلايمەن. تۆۋەندىكى ئۇلىنىشنى چەكسىڭىز  ئېرپان ئۇكامنىڭ تەرجىمىھالىنى ئوقالايسىز. https://uyghur-archive.com/misranim/thread-137605-1-1.html تۆۋەندىكى بۇ قېتىم ئېچىلماقچى بولغان كارتون سىنىپىنىڭ ۋاقىت جەدۋىلى: دەرس ئۆتۈش ۋاقتى: ئىككى ھەپتە، جەمئىي 60 سائەت. ئۆتۈلىدىغان مەزمۇن: كارتون فىلىم تارىخى، ئاساسى نەزەرىيە، ھەرىكەت نەزەرىيىسى، ياپونچە ئىپادىلەش، بىرلىكتە فىلىم ئىشلەش قاتارلىق مەزمۇنلارنى ئۆز ئىچىگە ئالىدۇ. تەلەپ ۋە شەرت: گۈزەل-سەنئەت ئاساسى بىر قەدەر ياخشى، دىسنېي شۇنداقلا ياپونىيە كارتون فىلىملىرىغا قىزىقىدىغان كەلگۈسىدە ئىمكانىيەت بولسا مۇشۇ ساھەدە ئىلگىرىلەشنى مەقسەت قىلغانلار. تىزىملىتىش ۋاقتى: 2015-يىلى 7-ئاينىڭ 1-كۈنىدىن باشلاپ 8-ئاينىڭ 25-كۈنىگىچە. دەرس باشلاش ۋاقتى: 2015-يىلى 8-ئاينىڭ 10-كۈنىدىن 2015-يىلى 8-ئاينىڭ 25-كۈنىگىچە. ئوقۇش ھەققى: خەلق پۇلى 1280 سوم. ئادرېس: ئۈرۈمچى شەھەر يەنئەن يولى 4-نومۇر شىنخۇا كىتابخانا بىناسى 4-قەۋەت. تېلېفون: 0991-287-7080 فاكس: 0991-287-7016 پوچتا نومۇرى: 830049

روھناز

	مۇئەللىمنىڭ ئىشلىرى ئوڭۇشلۇق بولغاي

uyol

	رەھمەت تاشپۇلاتكا.... ياش ھەۋەسكارلار ئۈچۈن بۇ ناھايىتى ياخشى پۇرسەت بوپتۇ..

tumaris01

	ياخشى بوپتۇ ، دېمىسىمۇ ئۇيغۇر كارتونچىلىقىنى تېخىمۇ گۈللەندۈرۈش كېرەك . شەخسەن ئۆزۈممۇ كارتۇن فىلىملىرىنى بەك ياقتۇرۇپ كۆرىمەن .

KaLGuSi

	رەسىم سىزىشقا ماھارىتى يوقلارمۇ ئۆگەنسە مۇۋاپىقىيەت قازىنالامدۇ

ئىخبال

	KaLGuSi يوللىغان ۋاقتى  2015-7-2 03:42 PM رەسىم سىزىشقا ماھارىتى يوقلارمۇ ئۆگەنسە مۇۋاپىقىيەت ق ... ئۇنىڭغا بىرئاز ۋاقىت كىتىدۇ .

izdinish

	بۇ 60 سائەتنى لاياقەتلىك پۈتتۈرگەندىن كىيىن قانداق ئىمتىيازغا ئېرىشىدۇ ؟ دېمەكچىمەنكى ئارىمىزدا كارتونغا قىزىقىدىغانلار كۆپ ، ئائىلە تەربىيىسى ئىنتايىن مۇھىم بولۇۋاتقان بۈگۈنكى كۈندە ، بالىلارنىڭ ئەڭ يېقىن دوستى بولغان كارتوننى ئائىلە تەربىيىسى ئۈچۈن خىزمەت قىلدۇرۇش بەكمۇ ئاقىلانىلىك ، مەن بۇ ساھەنى ئۆگىنىپ قالسام ، ئۇ 60 سائەت چىشىمنىڭ ئارىسىغا كىرىپ كېتىدۇ ! مۇشۇ نۇقتىدىن ئېيتقاندا ، بۇ پەسىللىك ئوقۇش پۈتسە يەنە قانداق ياخشى پىلانلاربار بۇنى بىلىشكە مۇمكىن بولارمۇ ؟

ئارزۇ01

	ياخشى پۇرسەتكەن مەن سۇرەتچى سۇرەت تارتالايمەن بىراق رەسىم سىزالمايمەن شەرتكە توشمامدىم نىمە؟

Discuz

	بۇ بىر ياخشى باشلىنىش بوپتۇ، ئۇيغۇر كارتونچىلىقى تېخىمۇ يۈكسەلسە بەك ياخشى بولاتتى. مەن گۈزەل-سەنئەت جەھەتتە قىزىقىششىمۇ يوق ھەم تالانتىممۇ يوق ، لېكىن كارتوننى ياخشى كۆرىمەن. ئۇتۇقلار يار بولسۇن !

yodobashi

	ئەسسالامۇ ئەلەيكوم مىسرانىم مۇنبىرىدىكى قېرىنداشلار! رەھمەت سىزگە تاشپولات ئاكا. ئىېرپانجاننىڭ دوستى بولۇش سۈپىتىم بىلەن سىزگە يەنە بىر قېتىم تەشەككۈر ئېيتىمەن. قارىسام بۇ تېمىغا باشقا مەزمۇندىكى ئىنكاسلارمۇ يېزىلىپ قاپتۇ. شۇڭا تورداشلارنىڭ تېما مەزمۇنىغا ئاساسەن ئىنكاس قالدۇرىشىنى ئۈمىد قىلىمەن. بۇ قېتىملىق كارتون فىلىم تەربىيىلەش سىنىپىنىڭ قارلۇق شىركىتىدە ئېچىلىدىغانلىقىنى ئاڭلاپ شەخسەن ئۆزۈم ناھايىتى ھاياجانلاندىم. چۈنكى كارتون فىلىم ساھەسىدە ئۇيغۇرلار ئىچىدە ئەڭ ئالدىنقى ئورۇندا تۇرىدىغان ئىككى باشنىڭ ھەمكارلىشىشى بۇ چوقۇم يېڭى سەھىپە ۋە بۇ ساھەگە ئەڭ يېڭى يول ئاچىدۇ. مۇھىم تارىخى ئەھمىيەتكە ئىگە بولغان ئىش دەپ قارايمەن. بۇنىڭدىن باشقا مۇنبەرلەردىمۇ تاشپولاتكام يوللىغان تېمىغا قالدۇرۇلغان ئىنكاسلار ناھايىتى ياخشى. قوللاشمۇ ناھايىتى كۈچلۈك. شۇنىڭدەك تۆۋەندىكىدەك سۇئاللارمۇ باركەن. مېنىڭچە مىسرانىم مۇنبىرىدىكى بۇ تېمىنى كۆرگەن قېرىنداشلاردىمۇ مۇشۇنداق سۇئاللارنى سورىغىسى بارلار بولۇشى مۇمكىن. 1. 60 سائەتلىك دەرس ئاز بوپ قالدىمۇ قانداق؟ پەسىللىك قىلىپ تەربىيىلىسە بولاتتى. 2. بۇ سىنىپتا ئۆگىنىپ قانچىلىك سەۋىيەگە يەتكىلى بولىدۇ؟ 3. بۇ ئوقۇپ بولساق نېمە ئىش قىلىمىز؟ 4.ياش چەكلىمىسى يوقمۇ؟ 5.رەسىم سىزالمايمەن، ئەمما قىزىقىمەن،قاتناشسام بىر نېمە ئۆگىنەلەمەنمۇ؟ يۇقارقى سۇئاللارنى ئۈندىداردا ئىرپانجانغا يەركۈزدۈم.ئۇنىڭ جاۋابى تۆۋەندىكىدەك بولدى. 1. مائارىپ لايىھىسى تۈزۈش بۇ دەرس ئۆتۈش بىلەنلا چەكلەنمەيدۇ. چۈنكى ۋاقىت ئورۇنلاشتۇرۇش، مىتوت، يەتمەكچى بولغان نىشان قاتارلىقلارنى تەتقىق قىلىش ۋە تەھلىل قىلىش كېرەك. بۇ قېتىمقى سىنىپنىڭ ئاساسى نىشانى ‹كارتون فىلىم› دېگەن ئۇقۇمنىڭ زادى قانداق نەرسە ئىكەنلىكىنى، قانداق تارىخى ئەھمىيەتكە ئىگە ۋە تەرەققىياتىنىڭ قانداق بولىۋاتقانلىقىنى نەزىرىۋىي چۈشەندۈرۈش ئارقىلىق، ئۇمۇملاشقان ئىشلەش سېستىمىسىدىكى ھەربىر باسقۇچنى قول سېلىپ توغرا ۋە قائىدىلىك ئىشلەشنى يېتىلدۈرۈش، كەسپى ساپاغا بولغان تەلەپنى كۈچەيتىپ، بۇ ساھەنى ئىلگىرلىتىش ۋە تەرەققىي قىلدۇرۇشقا زادى قانداق قىلىش كېرەكلىكىنى بىرلىكتە فىلىم ئىشلەش قاتارلىق ئەمەلىي مەشقلەر ئارقىلىق ئوقۇغۇچىلار ئۆزىگە تەپەككۈر قىلدۇرۇشتۇر. ‹كارتون لايىھىلەش› دېگەن ئۇقۇم ئۇمۇمەن سىڭىپ كەتكەنلىكى ئۈچۈن، لايىھە پەقەت كارتون فىلىم ئىشلەشتىكى بىر خىزمەت تۈرى ئىكەنلىكىنى، ئۇنىڭدىن سىرت، كۆپلىگەن خىزمەت تۈرلىرىنىڭ بارلىقىنى، بۇ خىزمەت تۈرلىرىنىڭمۇ فىلىم ئىشلەش ئۈچۈن كەم بولمايدىغانلىقىنى توغرا ۋە ئۈنۈملۈك چۈشەندۈرۈپ، كارتون فىلىم ئىشلەشكە بولغان قىزغىنلىقنى ئاشۇرۇشتۇر. بۇ قېتىملىق تەربىيىلەشنىڭ ئۈنۈمى ۋە نەتىجىسىگە ئاساسەن ئۇزۇن مۇددەتلىك تەربىيىلەشكە ئەڭ ئۈنۈملۈك مائارىپ لايىھىسى تۈزۈپ چىقىش بۇنىڭدىن كېيىنكى شىنجاڭنىڭ كارتون ساھەسىنى تەرەققىي قىلدۇرۇشتىكى قارلۇق ۋە مېنىڭ ئورتاق نىشانىمدۇر. 60 سائەتتە ئەڭ مۇھىم بولغان، كارتون فىلىم دېگەن ساھەنى بىلىشتە كەم بولسا بولمايدىغان ئاساسىي بىلىمنى ئوقۇغۇچىلار ئۆزىدە ھازىرلىيالايدۇ، ۋە 2013 - يىلىدىكى 3 - قېتىملىق سىنىپنىڭ ئوقۇغۇچىلىرىغا ئوخشاش ئەمەلىي فىلىم ئىشلەش پىلانلىرىغا قاتناشتۇرۇلۇپ، چەتئەلدىكى كارتون فىستىۋاللىرىغا ئۇيغۇر كارتون فىلىملىرىنى ئېلىپ چىقىشقا تۈرتكە بولالايدۇ. شۇڭا 60 سائەتلىك دەرس تەربىيىلەشنىڭ مەقسىتى ۋە مەزمۇنىغا ئەڭ ماس كېلىدۇ. 2. بۇ سىنىپتا كارتون فىلىمگە ئائىت نەزىرىۋىي بىلىم جەھەتتە ئوتتۇرىھال سەۋىيىگە يەتكىلى بولىدۇ. چۈنكى خۇسۇسىيەت، تارىخ، ئىقتىسادىي ئۈنۈم، ئاساسىي بىلىملەرنى ئۆگەنمەي بىراقلا فىلىم تېخنىكىسىنى ئۆگەنسىمۇ فىلىم ئىشلىيەلىگەن بىلەن فىلىم سۈپىتى ۋە ئىپادىلەشتە خەلقئارالىق سەۋىيىگە يەتكىلى بولمايدۇ. ‹ كومپيوتېر ئالدىدا ئىشلىسە بولىدىغان نەرسە› ئەمەس، بىر سەنئەت، شۇنداقلا مېدىيا پەنلىرى سۈپىتىدە مۇئامىلە قىلىش ئەڭ مۇھىم. ئىشلەش جەھەتتە بولسا مۇكەممەل بولغان سەۋىيىگە يېتىش 15 كۈن ئەمەس، نەچچە يىلدىمۇ يېتىش تەستۇر. لېكىن، مۇكەممەل  ۋە تولۇق بولغان فىلىم ئىشلەش سېستىمىسى، قائىدىسى ۋە ئىشلەش باسقۇچلىرىنىڭ ھەممىنى بىر - بىرلەپ قول سېلىپ ئىشلەپ كۆرۈش، دەل مۇكەممەل سەۋىيىگە يېتىشكە يول باشلايدىغان مۇھىم مەشخۇلاتتۇر. نەزىرىۋىي بىلىمنى ئەمەلىيەتكە بىرلەشتۈرۈش ئارقىلىق، ئۇمۇمىي جەھەتتىكى بىلىم سەۋىيىسىنى ئاشۇرۇش، بۇ قېتىملىق تەربىيىلەشنىڭ ئاساسىي مەقسەتلىرىنىڭ بىرىدۇر. 3. بۇ سىنىپ 15 كۈنلۈكلا سىنىپ بولغان بىلەن، فىلىم ئىشلەش ئۈچۈن ئەڭ ھالقىلىق بىلىملەرنى ئۆگىتىدىغان سىنىپتۇر. فىلىم ئىشلەش ئىستىكى بار، ھەقىقىي ئىلگىرلەشنى خالايدىغانلار ئۈچۈن، سىنىپ تۇگىگەندىن كېينمۇ مەن قۇرغان ئۇيغۇر ئەنئەنىۋىي كارتون گۇرۇپپىسىنىڭ فىلىم ئىشلەش پىلانلىرى ۋە پائالىيەت پىلانلىرىغا قاتناشتۇرۇلىدۇ. ئۆز ئالدىغا فىلىم ئىشلەش ۋە شىركەت قۇرۇش پىلانى بارلارغىمۇ مەسلىھەت ۋە يول كۆرسىتىش، ھەمكارلىق ئورۇنتۇشقا ياردەمدە بولۇش بىزنىڭ مەجبۇرىيىتىمىزدۇر. شۇڭا پۈتتۈرۈپ نېمە ئىش قىلىمەن ئەمەس، مۇۋەپپەقىيەتلىك ئوقۇپ پۈتتۈرۈش ئۈچۈن قانداق قىلىمەن دېگەن سۇئالنى ئالدى بىلەن قويۇشىنى ئۈمىد قىلىمەن. 4. ياش چەكلىمىسى توغرىسىدا تەشۋىقاتتا يېزىلمىغان بولسىمۇ، ئامال بار تولۇقسىز ئوتتۇرا 2- يىللىقتىن يۇقىرى بولسا نەزىرىۋىي بىلىمنى تولۇق چۈشۈنۈشكە ياخشى دەپ قارايمەن. چۈنكى ھەرىكەت نەزىرىيىسى، ئىقتىساد ئەھۋالى، فىلىم ئىشلەش باسقۇچىدىكى مۇھىم تەركىبلەر، كامېرا تىلى دېگەندەك مۇرەككەپرەك مەزمۇنلارنى چۈشىنىشتە باشلانغۇچ مەكتەپ ئوقۇغۇچىلىرى قىينىلىپ قېلىشى ۋە يېتىشىپ كېتەلمەسلىكى مۇمكىن. شۇڭا 15 ياشتىن يۇقىرى بولسا، قانچە ياشتا بولسا قاتناشسا بولىدۇ. 5. گەرچە تەشۋىقاتتا گۈزەل - سەنئەت سەۋىيىسى بولغان دېگەن تەلەپ بولسىمۇ، كارتون فىلىمغا چوڭقۇر ئىشتىياق باغلىغان ۋە ھەقىقىي مۇشۇ ساھەدە ئىلگىرلەشنى مەقسەت قىلغانلار بولسا قاتناشسا بولىدۇ. چۈنكى كارتون فىلىم ئىشلەشتە لايىھە ۋە ھەرىكەت رەسىمى سىزىشتىن سىرت نۇرغۇنلىغان گۈزەل - سەنئەت بىلەن مۇناسىۋەتسىز خىزمەتلەر بار. مەسلەن، رەڭ بېرىش، كىرىشتۈرۈش، باشقۇرۇش، سۆرەتكە ئېلىش دېگەندەك. بۇ سىنىپتا گەرچە ھەممە باسقۇچنى باشتىن كەچۈرۈش ئاساس بولسىمۇ، مۇشۇ باسقۇچلاردا ئۆزىگە ئەڭ ماس كەلگەن ىىزمەت دائىرىسىنى تېپىشمۇ بۇ قېتىملىق تەربىيىلەشنىڭ ئاساسىي مەقسەتلىرىنىڭ بىرى ھېسابلىنىدۇ. يۇقارقى ئېرپانجاننىڭ جاۋابلىرىدا ئېيتىلغاندەك، قىسقا مۇددەتلىك تەربىيىلەش بولغان بىلەن، ھەقىقىي مۇشۇ ساھەنى بىلىش ۋە ئۆگۈنۈش ئۈچۈن ئىنتىلىۋاتقانلار ئۈچۈن، مۇھىم پۇرسەتتۇر. بۇ پۇرسەتنى چىڭ تۇتۇشىڭلارنى ئۈمىد قىلىمەن. تەشۋىقاتىمىز توختاپ قالمىسۇن.