بەختىنىڭ سەرگۈزەشتىللىرى(چۆچەك)

oghuz8

	بەختىنىڭ سەرگۈزەشتىلىرى ئوغۇز      ناھايىتى ئۇزاق زامانلار ئىلگىرى يىراق بىر تاغلاق كەنىتتە بەختى ئىىسىملىك بىر يىگىت ياشانغان ئانىسى بىلەن بىرلىكتە،ئىنتايىن نامىرات يۇرمۇش كەچۈرىدىكەن. ئۇلارنىڭ تۇرمىشى بەختى ھەركۈنى تاغدىن كېسىپ چۈشكەن ئوتۇننى ساتقان ئازغىنە پۇل بىلەن غورگۇل ئۆتىدىكەن،بەختى ئۆزىنىڭ بۇنداق نامىرات بىر ئائىلىدەدۇنياغا كېلىپ قالغانلىقىدىن ئاغرىنىپ،دائىم ئانىسىغا ھال ئېيتىپ قاخشايدىكەن.      شۇنداق كۈنلەرنىڭ بىرىدە بەختىدە بىردىنلا جاھان كېزىش ئىستىكى تۇغۇلۇپتۇ.      -ئانا ،مەن بۇنداق نامىراتلىق ئىچىدە كۈن كەچۈرۈشتىن زىرىكتىم،شۇڭا جاھان كېزىپ ئۆز رېسقىمنى ئىزدەپ تېپىش قارارىغا كەلدىم،بەلكىم بىر جايلاردا مىنىمۇ ئۆز رىسقىم كۈتۈپ تۇرغاندۇ-دەپتۇئۇ، ياشانغان ئانىسىغائۆز قارارىنى بىلدۈرۈپ.        بەختىنىڭ سۆزلىرىنى ئاڭلىغان ئانا،ئۇنىڭدىن بۇ قارارىدىن ۋاز كېچىشىنى سوراپ يىغلاپ يالۋۇرۇپتۇ ،لېكىن بەختى يەنىلا ئۆز گېپىدە چىڭ تۇرۇۋاپتۇ.ئامالسىز قالغان ئانا ،ئۇنىڭغا ئاق يول تىلەپ قوللىرىنى دۇئاغا كۆتۈرۈپتۇ،ۋە-بالام ،مېنىڭ ساڭا يوللۇق ئۈچۈن بېرىدىغان ھېچ بىرەر نەرسەممۇ يوق،بۇ ئاتاڭدىن قالغان تولۇم ،ئۇنىڭغا لىق سۇ تولدۇرۇپ قويدۇم-دەپ ئۇنىڭغا بىر تولۇمنى تۇتقۇزۇپتۇ ،ئاندىن يولدا يىگىن دەپ،بىر قاتتىق ناننى ئەسكى خۇرجۇنغا سېلىپ بېرىپ-ئىسىڭدە بولسۇنكى،بۇ سۇنى ھەرقېتىم ئىچكىنىڭدە مېنى ئۇيلا،بۇ ناننى ھەر قېتىم چىشلىگىنىڭدە مېنى ئويلا-دەپ كۆز ياشلىرىنى تۆكۈپ تۇرۇپ بەختىنى يولغا ساپتۇ. زالىم شاھنىڭ ھېكايىسى      بەختى ياشايدىغان يۇرتقا ئوتتۇز كۈنلۈك يىراقلىقتا بىر مەملىكەت بار بولۇپ،بۇ مەملىكەتكە ،ئېنتايىن زالىم بىر پادىشاھ ھۆكىمىرانلىق قىىلىدىكەن.ئۇ ئىنتايىن زالىم بولغاچقا پۇقرالىرى يىل بويى ھاشار-ئەمگەكتىن باش كۆرۈرەلمەيدىكەن،پادىشاھ شۇ قەدەر زالىم ئىكەنكى ،ئۇ ھەتتا ئۆز پەرزەنتلىرىگىمۇ ،شۇ قەدەرر باغرى تاشلىق قىلىدىكەن.ئۇنىڭ زۇلىمىدىن پۇقرالىرىلا ئەمەس ،خوتۇن بالا -چاقىللىرىمۇ دات- پەريات چېكىپ،ئۇنىڭغا كۈندە مىڭ ئۆلۈم تىلەيدىكەن. شۇنداق كۈنلەرنىڭ بىرىدە،پادىشاھ ئۆز ئەمىرلىرىنى باشلاپ،ئوۋغا چىقىپ،بىر كېيىكنى قوغلاش جەريانىدا ھەمراھلىرىنى يوقىتىپ يولدىن ئېزىپ قاپتۇ،ھەمراھلىرى بولسا ،زالىم پادىشاھنى كەچ كىرگۈچە ئىزدەپ تاپالمىغاندىن كېيىن،ئۇنىڭدىن قۇتۇلغانلىقىغا خۇشال بولۇپ،قايتىپ كېتىپتۇ.       ئەمدى گەپنى بەختىدىن ئاڭلايلى؛      بەختى يول يۈرۈپتۇ،يول يۈرسىمۇ مول يۈرۈپتۇ،ئۇ ھەرقېتىم ئۇسساپ كېتىپ تولۇمنى قولىغا ئالغان چېغىدا،ئانىسىنىڭ سۆزلىرىنى يادىغا ئېلىپ،ئانىسىنى سېغىنىپ ياش تۆكۈپتۇ،قىززىق يېرى شۇكى،ئۇ ھەرقېتىم تولۇمدىكى سۇنى ئىچكەندىن كېيىن ،تولۇم لىپمۇلىق،ناننى چىشلەپ يەپ خۇرجۇنغا سېلىپ قويغاندىن كېيىن،قارىسا نان پۈتۈن تۇرامىش.بەختى باشتا بۇنىڭغا ئىنتايىن ھەيران قاپتۇ،كېيىن ،ئانىسىنى يادىغا ئېلىپ،بۇ ئىشلارنىڭ ئانىسى بېلەن مۇناسىۋەتلىك ئىكەنلىكىنى چۈشىنىپ يېتىپ،ئىچىدە ئانىسىغا مىڭ رەھمەت ئوقۇپتۇ.        شۇنداق كۈنلەرنىڭ بىرىدە بەختى كېتىۋېتىپ،ئاچلىق ھەم ئۇسسۇزلىقتىن يىقىلىپ قالغان زالىم پادىشاھنى ئۇچرىتىپتۇ،ئۇنى قۇچىقىغا ئېلىپ ،تولۇمدىكى سۇدىن ئىچىرىپتۇ،پادىشاھ ھوشىغا كەلگەندىن كېيىن ،بەختىگە رەھمەت ئېيتىپتۇ،شۇنىڭدىن كېيىن ،ئۇلار بىرلىكتە پادىشاھنىڭ ئوردىسى بار شەھەرگە قاراپ يولغا چىقىپتۇ،بەختى بىلەن پادىشاھ،يول بويى ھېلىقى تولۇمدىن سۇ ئىچىپ،خۇرجۇندىكى ناننى يەپ ماڭغان بولسىمۇ ،تولۇم لىق،نان پۈتۈن پېتى تۇرۇۋېرىپتۇ.بۇنىڭغا ھەيران بولغان پادىشاھ بەختىدىن بۇنىڭ سەۋەبىنى سوراپتۇ.       -بۇلارنىڭ ھەممىسى ئانامنىڭ مېھرى-مۇھەببىتىنىڭ كارامىتى-دەپتۇ بەختى ھەم بولغان ئىشلارنى پادىشاھقا بىر مۇ-بىر سۆزلەپ بېرىپتۇ.       -ھەقىقەتەن تەسىرلىك ھېكايە ئىكەن-دەپتۇ پادىشاھ بەختىنىڭ ھېكايىسىنى ئاڭلىغاندىن كېيىن ،ئۆمرىدە تۇنجى قېتىم كۆزلىرىگە ياش ئېلىپ،ئاندىن ئۇ بەختىگە،ئۆزىنىڭ بۇرۇنقى ئۆتكۈزگەن كۈنلىرىنى سۆزلەپ بېرىپتۇ،ھەم بۇندىن كېيىن زالىملىقىنى تاشلاپ،ئادىللىق ،مېھرىبانلىق بېلەن يۇرت ،سورايدىغانلىقىنى ئېيتىپتۇ.ھەم بۇرۇن قىلغانلىرىغا ئىنتايىن پۇشايمان قىپتۇ.       بەختى يېنىدىكى ھەمراھىنىڭ پادىشاھ ئىكەنلىكىنى بىلگەندىن كېيىن،ئۇنىڭغا ئىگىلىپ تازىم- بەجا كەلتۈرۈپ،ئۆزىنى كەچۈرۈشىى سوراپتۇ.       زالىم شاھ،بەختىنى ئورنىدىن تۇرغۇزۇپ،ئۆز جېنىنى قۇتقۇزىۋالغانلىقى ئۈچۈن رەھمەت ئېيتىپتۇ. ئۇلار نەچچە كۈن يول يۈرگەندىن كېيىن پادىشاھنىڭ ئورسىغا يېتىپ كەپتۇ.زالىم شاھنىڭ قايتىپ كەلگەنلىكىنى كۆرگەن ئوردا ئەھلى،ئۇنىڭدىن قورقۇپ ساراسىمىگە چۈشۈپتۇ.        زالىم شاھ بارلىق ئوردا ئەھلى،ھەم بالا-چاقىللىرىغا بۇرۇن قىلغانلىرى ئۈچۈن،ئەپۇ سوراپتۇ.بەختىنى بۇ يەردە قېپقېلىپ،ئۆزىگە ۋەزىر بولۇشقا تەكلىپ قىپتۇ.       بەختى پادىشاھنىڭ تەكلىپىنى چىرايلىق رەت قىلىپ،سەپرىنى داۋام ئېتىشنى خالايدىغانلىقىنى بىلدۈرۈپتۇ.پادىشاھ،بەختىنىڭ چىن نېيىتىنى سېزىپ،ئۇنىڭغا نەچچە تۆگە مال-دۇنيا بېرىپ،ئىززەت-ئېكىرام بىلەن يولغا،سېلىپ قويۇپتۇ.       بەختى سەپىرىنى داۋام قىپتۇ،شۇنىڭدىن كېيىن،زالىم پادىشاھ ئادەلەتلىك ،مېھرىبان پادىشاھقا ئايلىنىپتۇ،ئۇنىڭ خەلقى،بەخىتلىك-خۇشال-خۇرام كۈنلىرىنى باشلاپتۇ.

sirdaxtewip

	ياخشى ئەسەردىن بىرنى ئەكىلىپسىز . زادى جاھاننى ئايلىنىش كىرەك ، جاھان كەزمىگەن ئەركەك ، ھاياتنىڭ پەيزىنى سۈرەلمەيدۇ .  بۇ يىگىت جاھان كەزمىگەن بولسا خەلىقنىڭ بېشىغا كەلگەن بالاقازا   كۈتۈرىلىشى تەس گەپ.

ئاكىجان

	ماڭا داۋامى باردەك بىلىنىۋاتىدۇ ، داۋامىنى ساقلايمەن .

feruq

	sirdaxtewip يوللىغان ۋاقتى  2015-3-18 08:19 PM ياخشى ئەسەردىن بىرنى ئەكىلىپسىز . زادى جاھاننى ئايلىنى ... سىز يول ئازابى— گۆر ئازابى دېگەننى بىلمەيدىغان ئوخشايسىز ھە

oghuz8

	ئاكىجان يوللىغان ۋاقتى  2015-3-18 09:28 PM ماڭا داۋامى باردەك بىلىنىۋاتىدۇ ، داۋامىنى ساقلايمەن . داۋامى بار،

firoz

	مېھىر-مۇھەببەت ھەممە نەرسىنى ئېرىتىۋىتەلەيدۇ، بولۇپمۇ ئانىنىڭ مۇھاببىتى.

ئاسۇق

	ئۇيغۇر خەلىق چۆچەكلىرىنى بالىللىرىمىزغىمۇ يېقىنلاشتۇرۇش كېرەك. مۇشۇ كۈنلەردە چۆچەك ئوقۇيدىغان باللىرىمىز ئازلاپ كەتتى.

sirdaxtewip

	feruq يوللىغان ۋاقتى  2015-3-19 09:22 AM سىز يول ئازابى— گۆر ئازابى دېگەننى بىلمەيدىغان ئوخشا ... مانا مەنمۇ مۇساپىرچىلىقتا يۈرگىلى ئۇزۇن يىللار بۇلۇپتۇ ! چىمەنلەر ئىچىدە نازۇك چىمەن بار دىگەندەك ، شۇ ئازاپلار ئىچىدە شۇنداق شىرىن ئەسلىمىلەر بار دە!

كەپسىز9

	تازا قىزىقىپ ئ‍وقۇۋاتسام تۇيۇقسىزلا تۇگەپ كەتتى، ئايىغى قېنى…