غېرىپسىنار ئانام قالغان ئۆي

arzugul.halam

	غېرىپسىنار ئانام قالغان ئۆي ئارزۇگۈل ھۈسەن خالەم بۇرۇن بار ئىدى بەكمۇ كونا ئۆيىمىز  ، شۇ ئۆيدە ياڭرىغان ئۇنتۇلماس بالىلىق كۈيىمىز. شۇ ئۆيگە بەش بالا قىستىلىپ ئاران پاتاتتۇق ، خۇددى ئانار دانىسىدەك قىستىلىپ ياتاتتۇق . زىمىستان قىشنىڭ پەيلى بۇزۇلغان كۈنلەردە ، سوغۇق قۇتىرغان تۈنلەردە ، قار لەپىلدەپ چۈشەتتى ، بىز بىر-بىرىمىزنى مەھكەم باغاشلاپ كۈلەتتۇق ، ئانامغا ئەركىلەپ قۇچىقىغا چىقىپ سۆيەتتۇق . قۇشلار ، دەرەخلەر سوغۇقتىن تىتىرەيتى ، سوغۇق غېرىپلىقنى باشلاپ دېرىزىدىن ئۇدۇل كىرەتتى ، ئەمما بىز ئانامنىڭ تەپتىدىن ئىسسىق تەرگە چۈمەتتۇق ، شۇڭلاشقىمىكىن  كىچىككىنە ئۆيىمىزنى جەننەت دەپ بىلەتتۇق . ئۆينى بىر ئالاتتى بەشىمىزنىڭ پۇشۇلدىغان تىنىقى ، ئۇيقۇ دېڭىزىدا لەرزان ئۈزەتتۇق . گاھىدا ئۇيغۇنۇپ كەتسەك ، ئانامنىڭ مۈكچۈيۈپ ئولتۇرۇپ بىزگە كىيىم تىكىۋاتقىنىنى كۆرەتتۇق . بىزنى قىستىلىپ قالمىسۇن دەپ ، ياتماي بىزگە قاراپ ئولتۇرۇپ ،تاڭ ئاتقۇزغىنىنى سېزەتتۇق . ئاھ ... ئانام تۇتقان ئۆي ، بەكمۇ كونا ئۆي ، بىراق ،تۆكۈلەتتى ھەممە يېرىدىن ئەڭ گۈزەل  بىر كۈي . ياشلىق مېۋە بەرگەندە، تەرەپ-تەرەپكە كەتتۇق تارقىلىپ . ئانار يېرىلىپ دانىسى چېچىلغاندەك ، ياكى قۇش بالىسى ئۇچۇپ قاتارغا قېتىلغاندەك . يوق ئەمدى كونا ئۆي ، ئىزىدا بار رەت-رەت ئېسىل ئىمارەت ، خۇددى ئايۋان -سارايدەك ، شۇنچە چوڭ ئۆيدە يالغۇز قالدى ئانام تىكەندەك . كۆزى يولدا ، يولدا ئولتۇرۇپ كۈننى كەچ قىلار . بىزنى ساقلاپ ، نەۋرىسىگە ئالما ئاقلاپ ، ئۆزى تىكىپ بەرگەن كىيمدىن تونۇش ھېدىمىزنى  ھېدلاپ ... ئانامنىڭ ‹‹بالام ›› دەپلا تەلمۈرشىنى  بىلەتتۇق ، توۋا ! نىمىشقىدۇ ، ‹‹ ئالدىراش ›› دىگەن سۆزنىلا قالقان قىلاتتۇق . ئاھ ... يالغۇز ئاناملا قالغان ئۆي، يېڭى ، بەكمۇ ئېسل ئۆي  . بىراق ،تۆكۈلۈپ تۇرار ھەممە يېرىدىن ئەڭ غېرىپ بىر كۈي ! ئۆز ئىجادىيىتىم

ilmi

	شۇ  جاپاكەش  ئانىلىرىمىز  ئامان  بولسۇن     مەنمۇ ئانا  بولغاندىن كىيىنلا  ئانامنىڭ  قەدىرىگە  يىتىپ  يەنە بىر قېتىم ئەقىل تاپقاندەك بولدۇم

turmux.net

	ياخشى يېزىپسىز...

قورغان

	شۇنداق يېقىشلىق بەلەن شئېركەن،ئىلھاملىرىڭىز ھوسۇللۇق بولغاي!

faruh193

	ھازىر شۇنچە .ئىسىل ئويلەرنى سالدۇق ،لىكىن ئاشۇ ئانام باردىكىدەك ئىللىق ئەمەس

قۇددۇس

	نىمە دىگەن يېقىشلىق مىسرالار بۇ، خۇددى بالىلىقىمدىكى كونا ئۆيىمىزگە بېرىپ قالغاندەك بولۇپ قالدىم. قوللىرىڭىزغا دەرت بەرمىسۇن.

0998-123456

	بەك ياخشى يېزىپسىز! مەنمۇ كونا ئۆينى ئەسلەپ قالدىم.

feruq

	بۇ شېئىرىڭىزنى ئوقۇپ رەھمەتلىك ئانام (ئاپامنىڭ ئاپىسى) ئېسىمگە كېلىپ قالدى.

hadrat

	ياخشى ئەسەركەن.

mahatjan

	بۇ شىئېرىڭىزنى ئوقوپ رەھمەتلىك ئانامنى ئەسلەپ قالدىم.