ئۆمۈر قانچىلىك

Gvljahan

	ئۆمۈر قانچىلىك ؟ خاسىيەت ئابلىمىت بىرلەھزە نەپەستىن ياشىرار تىنىڭ ، ھەر سەھەر «شۈكرى» دە ،كۈلەر جان-دىلىڭ. يۈرەكنى قۇچسا گەر پاكىزە دىنىڭ ، قۇياشىڭ كۈلگۈسى كۆكسۈڭدە سىنىڭ ، سورىغىن ئۆزەڭدىن « ئۆمۈر قانچىلىك ؟» يۆلىگىن ئاجىزنى ، داداڭ - ئاناڭنى ، قولىغا سۇ بەرگىن ، سۈرتكىن ماناننى ، تاپساڭ گەر ئىككىنى ، سۇنغىن بىر ناننى ، بىھۇدە چاچمىغىن ھەتتا بىرداننى ، سورىغىن ئۆزەڭدىن «ئۆمۈر قانچىلىك ؟» «خالايىق يولىدا ياتسا بىر تىكەن ، ئازارى بولمىسۇن ، ئېلىۋەت » دىگەن ، بۇغۇنلار بەختىچۈن ياۋنى چېنىگەن ، بوۋىلار ئۆزى شۇ، ھارام يىمىگەن . سورىغىن ئۆزەڭدىن« ئۆمۈر قانچىلىك ؟» ئاۋامسىز كۆكلىگەن -كۈلگەن نەدە بار ؟ يۇرتنى- يۇرت ئەتمىگەن ئەرەن نەدە بار ؟ تۇرقى بىر ئىنساندەك ، ئېيتماس «يارى-يار »، ۋۇجۇدى زىياسىزلارغا تەييار دار ، سورىغىن ئۆزەڭدىن «ئۆمۈر قانچىلىك ؟» زەر -ئۈنچە قاپلىسا ئۈستى -بېشىڭدىن ، تۆكۈلسە ئىپارۇ- ئەنبەر تېشىڭدىن . سۇنمىساڭ قوشناڭغا چىمدىم ئېشىڭدىن ، ياخشىلار تۇرمايدۇ ، توزار قېشىڭدىن ، سورىغىن ئۆزەڭدىن «ئۆمۈر قانچىلىك ؟» رىياكار ، تاماگەر كىشى دوست ئەمەس ، ئاجىزنىڭ بېشىغا دەسسەيدۇ ئۇ ، بەس. يۈرىكى خۈنۈك قان -يىرىڭغا پەۋەس، يولۇقما ئاڭا ، باسمىغاي سىنى نەس، سورىغىن ئۆزەڭدىن «ئۆمۈر قانچىلىك ؟» پايدا- نەپ پۇراپ ھىچ ھالى قالماسلار ، ھارام يول -زىنادىن پۇتى تايماسلار ، نام -ئەمەل كوچىسىدىن  ئەسلا يانماسلار ، «خان بېسىم »دەستىدىن بېشى قايماسلار ، سورىغىن ئۆزەڭدىن «ئۆمۈر قانچىلىك ؟» يىقىلسا ئاجىز غول ئۇنى ھۇللىغىن ، ياشارسا بىرتال گۈل ئۇنى يۇلمىغىن ، «ياردەم...» دەپ قول سوزسا تارتقىن - يۆلىگىن، تەشنالىق دەشتىدە قۇرىسا ، ھۆللىگىن ، سورىغىن ئۆزەڭدىن «ئۆمۈر قانچىلىك ؟» مىننەتدار بولۇشنى ئۇنتىما  ئەسلا، ئىنسانغا ئاداققا ياخشىلىق ئەسرا ، ۋۇجۇدۇڭ چۆللىشىپ ياسىسا سەھرا ، تويمايسەن تەختىنى بەرسىمۇ كىسرا، سورىغىن ئۆزەڭدىن  «ئۆمۈر قانچىلىك ؟» يەتتە قات ئاسماندىن تاكى يەرگىچە ، ئىلىمدۇر تامچە قان ھەتتا تەرگىچە ، توختىماي ئۆگەنگىن جاننى بەرگۈچە ، ھەق سېخى ، بىرىدۇ سەن قول سوزغىچە ، سورىغىن ئۆزەڭدىن «ئۆمۈر قانچىلىك .....» مەنبە :ئۆز قەلەم 2015- يىل 2- ئاينىڭ 6 -كۈنى

tikanlik-gul

	يازغان شېئىرلىرىڭىزنى كىتاب قىلىپ چىقىرىپ  باقسىڭىز بولغۇدەك جۇمۇ ... ياخشى يېزىپسىز ... قەلىمىڭىز توختاپ قالمىغاي ...

hadrat

	مول مەزمۇنلۇق،ئەھمىيەتلىك، ياخشى يىزىلغان شېئىركەن.ھارمىغايسىز...

tumaris01

	بەك   ئېسىل  چىقىپتۇ…

قورغان

	ئىنسان ،ئىنساندەك ياشاش ئۈچۈن ھەر قاچان ئۆزىنى تونىشى،مەن نەدىن كەلدىم ،نەگە بارىمەن  دەپ ئۆزىنىڭ قىلغان-ئەتكەنلىرىدىن ھېساپ ئېلىپ تۇرىشى كىرەك...شئېرىڭىزدا بۇلارغا خىلى ياخشى جاۋاپ بېرىلىپتۇ.. ئەھمىيەتلىك تېمىلىرىڭىز ئۈزۈلۈپ قالمىغاي!

زىبا.

	ئەتتىگەندە تاتلىق ئەسەردىن بىرنى ئۇقۇغىنىمدىن خۇرسەنمەن .مەزمۇنى ياخشى چىققان ئەسەر بىلەن ئۇچراشتۇرغىنىڭىزغا كۆپ رەھمەت .

saliha24

	ئاللا ئىشلىرىڭىزنى ئاسان ،قەلمىڭىزنى يەنىمۇ ئۆتكۈر قىلسۇن ئىنشااللا .

turmux.net

	ياخشى يېزىپسىز، قەلىمىڭىز توختاپ قالمىغاي...

mingbexi

	بەك مەزمۇنلۇق تەربىيەۋى ئەھمىيىتكە ئىگە ئىكەن.

Gvljahan

	قېرىنداشلىرىمنىڭ ئىزدىگەن يىرىدىن چىققان بولسام مەن رازى ...باھايىڭلارغا تەشەككۈر ، سىلەر ئۈچۈن قەلەم تەۋرىتىش مەن ئۈچۈن ھوزۇر ...........