نەغمەڭگە نەزمەمنى قىلىمەن تارتۇق
(خەلق قىززىقچىسى ،سازەندە ئۇستازىمىز تۇرسۇن رېشىت ئاكىغا ھەزىل)
قاراخان
تۇتسا سېپى،قىچقارسا ئېتى تايىن تۇسۇنكا،
سالدى سېنى ئۇسۇلغا كۆڭۈل رومكا،بوتۇلكا،
خوپ ياراشقان ئۇچاڭغا چاقماق كاستۇم بۇرۇلكا،
پارلاشقان جۈپ ئارزۇگۈلۈڭ ماشىنا، ساز كابىنكا،
يۈرىگىڭ قوش،ئۆپكەڭمۇ ساز بار قولۇڭدا مۇزىكا،
سېنىڭسىز دوست ئىچكەن شاراپ ھەتتا تەمسىز زاكۇسكا،
كەيپىڭ چاغمۇ خۇشۋاقمۇسەن ئېيتقىن ئوتتۇز ئوغۇلغا.
يەتتە ياش نە يەتمىش ياشنىڭ بولدۇڭ قاياش ئۈلپىتى،
سەن بىلەن ئول ‹‹مەسىفۇ››نىڭ كۆككە يەتكەن كۈلكىسى،
تۇردى ھەر چاغ ئۆز قولۇڭدا ئەرلىكىڭنىڭ سۈلكىتى،
ئاشتى دىلدا چاخچىقىڭنىڭ ھەر نادانغا ئىبرىتى،
سەنچە بولار چېكىسىگە گۈل قىسقاننىڭ قۇدرىتى،
باقتىڭ خۇدا رۇسۇلغا گاھى دۇتتار ئۇسسۇلغا .
سەن بارمىغان قەشقەر ،خوتەن ،غۇلجا قۇمۇل قالمىدى،
سەنسىز چەتكە تۇرسۇن ئەخمەت ۋىزا پاسپورت ئالمىدى،
سەن بار يەردە سەيفى،يارلار يۈرەكلىك ساز چالمىدى،
رۇستەم ،نىياز،ھوشۇر توغراق گەپكە لوقما سالمىدى،
ئەخمەتجانمۇ سېنى تاشلاپ ئالمۇتىغا بارمىدى،
تۇراخۇنكام چاخچاق بىلەن پەشۋا ئېتىپ ھارمىدى،
ساقىلىڭغا ياماشمىغان ‹‹ئىلى سەيفۇڭ›› قالمىدى،
ھەر باپ بىلەن قىلغان گېپىڭ تەگدى تىتاڭ تومۇرغا.
ۋادەرىخا! دىسەڭ توۋلاپ داۋۇت ناسىر قوپقىدەك،
قايسى تۈگمەن قۇندۇز باشنى قىلدى تاقىر چوققىدەك،
دىلمۇراتقا قاراپ باققىن تۇرار مۆلدۈر ئوقىدەك،
سېنى بوزەك قىلدى كېسەل ئىگىسى يوق توخۇدەك،
يەنە سەپتە نەرە تارتىپ يۈردەك كەپسىز بۇقىدەك،
ئورۇندۇقنى ئۆرۈي ساڭا تۈگەل توقسان نومۇرغا.
ساھىبىخان بىلەن ئاۋات سەيفىدىننىڭ كوچىسى،
شۇ كوچىدا تۇغۇلدۇڭ سەن قىزىلگۈلنىڭ غۇنچىسى،
ئەمەت بىلەن ،رېشىتكامنىڭ يوقمۇ مۇڭغا رىشتىسى،
ئەمما مەۋلان سېنى دوراپ بولدى ئەلنىڭ كۈيچىسى،
چۆلدە يۈكۈڭ قالماس ئەندى بار ئىزىڭنىڭ ئىزچىسى،
دەيمىز شۇڭا تۇرسۇنكامنىڭ ئۈزۈلمەس دىل تارىسى،
دىگىن سەنمۇ ئاغزىم تالماس تېخى ھەزىل يۇمۇرغا.
بىر چاغلاردا ئۆمەر ھەييام بولۇپ چۇقان سالدىڭسەن،
شەيتىنىڭغا ھاي بېرەلمەي تاۋاقتا مەي ئالدىڭسەن،
ئېمىل دەريا بويلىرىدا شالغۇت كۈيگە چالدىڭسەن،
كۆچمەنلەرنى ئېنىقلاشتا چارچىدىڭسەن ،ھاردىڭسەن،
ئەنۋەركام بىلەن چىلەك ،يەتتە سۇدا ياندىڭسەن،
ئەمما ئۇستاز قالپىقىڭنى چۆرۈپ قاتتىق ئازدىڭسەن،
بۈگۈن باقسام ئايلىنپسەن يولى مەخپى شوپۇرغا.
ئەل غېمىنى ئەر غېمى دەپ بىلگەن مەغرۇر كۈلىدۇ،
‹‹ياخشى كۈنلەر ئالدىمىزدا››ئەخمەتجانلار بىلىدۇ،
جوڭگۇ بىلەن داخىيەنزى ئورتاق يىغلاپ كۈلىدۇ،
ئەمەلىڭدىن ئەلىمىڭ كۆپ خەلقىم ئوبدان بىلىدۇ،
مىرۋەك ئۈزۈپ قېچىپ چىقساڭ يەڭگەم قوغلاپ كېلىدۇ،
پەرھىزىڭنى تېگىشمەي تۇر بىردەملىك رەڭ، ھوزۇرغا.
كۆككە بېقىپ تۈكىرىسەن غۇچۇرلىتىپ چىشىڭنى،
بىلىۋاپتۇ ئۆسەكچىلەر قەنگە ئامراق ئىشىڭنى،
ئۇچراتمىدۇق دەسسىتىشكە بىراۋغا ھۆل خشىڭنى،
بېشىڭ سالقىن،قارنىڭ توق،ئۆتكۈزدۈڭ ياز قىشىڭنى،
نۇر دوختۇرمۇ ئوخشاش دەپتۇ ctدا ئىچ -تېشىڭنى،
ئەللىك ياش دەپ يوشۇرۇپسەن نەچچە يەردە يېشىڭنى،
بۇ گۈناھنى سەندە ئەمەس قويدۇق رەخى, غوپۇرغا.
ئالتۇن بويۇڭ ئامان بولسۇن قوي يىلى قىش تومۇزدا،
تالا سوغۇق ،يولۇڭ تايغاق قولۇڭ تۇرسۇن تورمۇزدا،
ئاي زوھرەنى توۋلاش ئۈچۈن كېتىدۇ كۈچ نورۇزدا،
بۇ كەمگىچە ئازار بەرمەي كەلدىڭ قۇرۇت قوڭغۇزغا،
شۇڭلاشقا گاھ ئوخشىتىمەن سېنى قۇتۇپ يۇلتۇزغا،
بېرىلمەيسەن ئۆزۈڭمۇ ھەم ئەمەل مەنسەپ نوپۇزغا،
كۆز كۆڭۈلدىن ئورۇن ئېلىپ ھۆسىن قوشقىن غورۇرغا!
2015-يىلى 23-يانۋار
بۇ يازمىنى ئاخىرىدا qaraxani تەھرىرلىگەن. ۋاقتى 2015-1-24 02:19 PM