بىلىمخۇمار: نىيەت بار يەردە، ئامالمۇ بار

bilimxumar

	نىيەت بار يەردە، ئامالمۇ بار بىلىمخۇمار 2015-يىلى 1-ئاينىڭ 19-كۈنى بۇ يىل 1-ئاينىڭ 15-كۈنى ئامېرىكىنىڭ نۇرغۇن مېدىيە تاراتقۇلىرى تومى كالدۋېل (Tommy Caldwell) بىلەن كېۋىن جورگىسان (Kewin Jorgenson) ئىسىملىك ئىككى ياشنىڭ بىر كىلومېتىر ئېگىزلىكتىكى بىر تاغقا غەلىبىلىك چىققانلىقىنى خەۋەر قىلدى [1].  نېمە ئۈچۈن بۇ ئىش بۇنچىۋالا چوڭ خەۋەر بولۇپ كېتىدۇ؟  ئۇنىڭ سەۋەبى مۇنداق: ئامېرىكىدا 10 دەك چوڭ تەبىئىي باغچىلار بار بولۇپ، «يوسېمىتې» (Yosemite National Park) دەپ ئاتىلىدىغان دۆلەتلىك تەبىئىي باغچا ئۇلارنىڭ ئىچىدىكى ئەڭ ياخشىسى ھېسابلىنىدۇ.  بۇ باغچا كالىفورنىيە شتاتىنىڭ شەرىقى-شىمالىي تەرىپىگە جايلاشقان بولۇپ، ھەر يىلى پۈتۈن دۇنيادىن بۇ يەرنى كۆرۈش ئۈچۈن 3.4 مىليوندىن 4.1 مىليونغىچە بولغان ساندىكى كىشىلەر كېلىدۇ [3].  ھېلىقى ئىككى يىگىت چىققان، ئىنگلىزچە «El Capiton» دەپ ئاتىلىدىغان تاغ مۇشۇ باغچىنىڭ ساياھەت مەركىزىگە جايلاشقان بولۇپ، ئۇ بىر قاتتىق تاشتىن تۈزۈلگەن ناھايىتىمۇ تىك تاغدۇر.  تاغنىڭ ئۇلار ياماشقان تەرىپى «تاڭ سەھەر تېمى» (Dawn Wall) دەپ ئاتىلىدىغان بولۇپ، تاغنىڭ بۇ تەرىپىگە ھازىرغىچە باشقا ئادەملەر يامىشىپ باقمىغان ئىكەن.  بۇ ئىككى يىگىتنىڭ بۇ بىر كىلومېتىر كېلىدىغان مۇساپىنى يامىشىپ تۈگىتىشى ئۈچۈن جەمئى 19 كۈن ۋاقىت كېتىپتۇ.  يەنى ئۇلار ئاشۇ 19 كۈن ئىچىدە كېچىسى ئۆزلىرىنى تاغقا ئېسىپ قويۇپ ئۇخلاپ، كۈندۈزى تاغقا يامىشىپ، ئارىلىقتا بىرەر قېتىممۇ يەر يۈزىگە قايتىپ چۈشمەپتۇ.  ھەمدە تاغقا يامىشىش جەريانىدا ئۆزىنى باغلاپ قويۇپ، ئۆزىنى قوغدايدىغان تانىلارنى باغلايدىغان ھالقىلىق مىقلارنىمۇ تاغقا يامىشىپ ئۆرلەش جەريانىدا تاغقا ئۆزلىرى قېقىپتۇ.   ھېلىقى ئىككى يىگىتنىڭ دېيىشىچە، ئۆزلىرىنىڭ قىلغىنى بىر «بويسۇندۇرۇش» يولىدىكى تىرىشچانلىق بولماستىن، پەقەتلا ئۆزلىرىنىڭ بىر غايىسىنى ئەمەلگە ئاشۇرۇش يولىدا ئالغان بىر قەدەم ئىكەن.   جورگىسان تاققا يامىشىشنى 11 ياشقا كىرگەندە باشلىغان ئىكەن. مەن بۇ خەۋەرنى كۆرگەندىن كېيىن، مۇنداق بىر ئىنگلىزچە ئىدىئومنى ئېسىمگە ئالدىم: «Where there is a will there is a way».  ئۇنىڭ مەنىسى مۇنداق: ئەگەر سىز يېتەرلىك دەرىجىدە ئىرادە باغلىسىڭىز، سىز ئۆزىڭىز ئىستىگەن نەرسىگە ئېرىشىش ئۈچۈن چوقۇم بىر ئامال تاپالايسىز، سىز ئىستىگەن نەرسە ئىنتايىن قىيىن بولغان ئەھۋالدىمۇ شۇنداق قىلالايسىز.   بۇ ئىدىئوم بىلەن ئۇيغۇرلارنىڭ «قىيىن ئىش يوق ئالەمدە، كۆڭۈل قويغان ئادەمگە» دېگەن ئىدىئومى ئوخشىشىپ كېتىدىكەن.   بۇ ئىدىئومدا سۆزلەنگىنى بىر ھەقىقەت بولۇپ، ئۇنى ھازىرغىچە نۇرغۇن ئۇيغۇرلار ئىسپاتلاپ بولغان.  مەن مەنىلىك ياشاشنى، ۋە مۇۋەپپەقىيەت قازىنىشنى ئىستەيدىغان بارلىق ئىنى-سىڭىللاردىن يۇقىرىدىكى ئىككى يىگىت، يۇقىرىدىكى تاغ، ۋە مەزكۇر ئىدىئومنى ئەستە چىڭ ساقلاشنى ئۈمىد قىلىمەن.  بىزنىڭ ھازىر ئۆسۈپ يېتىلىۋاتقان يېڭى ئەۋلادلىرىمىز ئىچىدىن بۇ ئىدىئومنى ئىسپاتلايدىغانلار ھەسسىلەپ كۆپىيىشىنى ئۈمىد قىلىمەن. تۆۋەندىكىسى يۇقىرىدىكى ئىككى يىگىتنىڭ تاغقا يامىشىش جەريانىدىكى بىر قىسىم كۆرۈنۈشلەر (ئۇلار تۆۋەندىكى 1-مەنبەدىن ئېلىندى). پايدىلىنىش ماتېرىياللىرى: [1] Summiting Yosémité's Dawn Wall, Climbers Make History http://news.nationalgeographic.com/news/2015/01/150114-climbing-yosémité-caldwell-jorgeson-capitan/ [2] A Guide to Yosémité National Park http://jrabold.net/yosémité/faqs.htm <http://jrabold.net/yosemite/faqs.htm> [3] where there's a will there's a way <http://dictionary.cambridge.org/ ... l-there-s-a-way> 1-رەسىم: قىزىل سىزىق ئىككى يىگىت يامىشىپ ماڭغان يولنى كۆرسىتىدۇ. 2-رەسىم: بىر يىگىتنىڭ تاققا يامىشىۋاتقان كۆرۈنىشى 3-رەسىم: ئىككى يىگىت كېچىنى مانا مۇشۇنداق ئۆتكۈزگەن 4-رەسىم:  تاققا يامىشىۋاتقان يەنە بىر كۆرىنىش 5-رەسىم: ئىككى يىگىت يېرىلىپ كەتكەن بارماقلارنى يېلىملىك لاتا ۋە يېلىم بىلەن يەملەپ قويۇپ، تاققا چىقىشنى داۋاملاشتۇرغان 6-رەسىم: بەزىدە كېچىسىمۇ تاغقا ياماشقان 7-رەسىم: غەلىبىنى تەبرىكلەش 8-رەسىم: يوسېمىتې تەبىئىي باغچىسى ئايالىم بىلەن ئىككىمىزنىڭ ئەڭ ياخشى كۆرىدىغان جايلارنىڭ بىرى بولۇپ، ئۇ يەرگە بىز كۆپ قېتىم بارغان.  باغچىنىڭ ئىچىدىكى بەزى جايلار بىر خۇددى سىزىپ قويغان رەسىمگىلا ئوخشايدۇ.  بىز بۇ باغچىغا ئاخىرقى قېتىم 2014-يىلى 7-ئايدا بارغان بولۇپ، بۇ رەسىم ئەنە شۇ چاغدا تارتىلغان.

Gvljahan

	رەھمەت بىلىمخۇمار ئەپەندى ، سىز دائىم ئەھمىيەتلىك تېمىلارنى يوللايسىز ، بۇمۇ ناھايتى «نان تېگىدىغان »تېما بوپتۇ ، رەھمەت سىزگە !

kakkuk11

	ئەسسالامۇ ئەلەيكۇم بىلىمخۇمار ئاكا...ئاللاھنىڭ سالىمى سىزگە بولسۇن ! تېمىڭىزغا تەشەككۈر.... جاپا چەكتىڭىز...ئاللاھ ئاسانلىق بەرگەي... نىيەت بولسا ، ئامالمۇ بار... بۇ گەپكە بەك ئامراقمەن.. مېنىڭ خارەكتىرىم باشقىلار قىلالمايسەن ..بولمايدۇ دېگەن ئىشلارنى قىلىشقا ئامراق.. مەسىلەن بىرەر ئىشنى مانداق قىلسام بولمىغۇدەك دەپ كۆڭلۈمدە ئويلىساممۇ يەنە قىلىپ باققۇم بار...بىرەرسى قەتئىي بولمايدۇ ..دېسە تېخىمۇ قىلىغۇم كېلىپ كېتىدۇ... مۇشۇ چەتئەللىكلەرنىڭ تەۋەككۈلچىلىك( پۈتۈنلەي تەۋەككۈلچىلىكمۇ ئەمەس ئۆزى ئويلىغاننى قىلىش)ئىدىيىسىنى بەك ياقتۇرىمەن... تولۇقسىزدىن تارتىپ تولۇق ئوتتۇرا ھەمدە ئالى مەكتەپتىكى تۈزۈملەر ئۆزۈم ھەممىسى مېنى ئەركىن تۈمىگە سولاپ قويغاندەك بىرخىل رېتىمدا ئۆتۈپ كەتتى ئەمدى جەمىيەتمۇ ماڭا ئىنسان بۇ يەرگە جان باققىلى كېلىدۇ..پەقەت تاماق يېمەك ئىچمەك ..كىشىلىك ئورۇن ئىقتىساد ئۈستىدىكى رىقەبەتلىكك دۇنيادۇر دېگەنلەرنى سۆزلەيدۇ...بىراق مەن بۇنىڭغا يەنىلا ماسلىشالمايمەن... ئاساسەن ئۆزۈمنىڭ يولىدا مېڭىشنى تاللايمەن... تىرىشقان تاغ ئاشار... مېنىڭ ئەڭ ياقتۇردىغان سۆزۈم...سەن زامانغا باقما زامان ساڭا باقسۇن ، ئەگەر زامان ساڭا باقمىسا سەن زامانغا باق...بۇ سۆزنى بەك ياقتۇراتتىم...ھەرقانداق بىر ئىش قىلسام.. مۇشۇ جۈملىنىڭ ئالدىغا ئېسلىۋالاتتىم..پەقەت ئامال قىلالمىسام...ئاندىن كېيىنكى يېرىم جۈملىسىنى ئىشلىتىپ قويىمەن

bulack

	ئەسسىلام ئەلەيكۇم بىلىمخۇمار ئاكا ئالدىراش ۋاقىت ئىچىدىن ۋاقىت چىقىرىپ بىزلەر ئۈچۈن ئېسىل ، ئەھمىيەتلىك تېما يوللاۋاتىسز.

abdualim

	ئەسسالامۇ ئەلەيكۇم بىلىمخۇمار رەھمەت سىزگە ، مېنى تېخىمۇ جاسارەتلىك قىلىۋەتتى بۇ تىمىڭىز....تېخىمۇ كۆپ مەزمۇنلار بىلەن ئۇچراشتۇرۇپ تۇرىشىڭىزنى ئۇمىد قىلىمەن...

بانكىر

	تاغ ئۈستىگە تىك ئۇچار ئايرۇپىلاندىلا چىقسا بولىۋىرىدۇ.

mercury

	بانكىر يوللىغان ۋاقتى  2015-1-19 12:07 PM تاغ ئۈستىگە تىك ئۇچار ئايرۇپىلاندىلا چىقسا بولىۋىرىدۇ ... توغرا ئىيتتىڭىز ،  سىزنىڭچە  يەنە   تاغ  ئۈستىدىن تۈزلەڭ ياخشى ،  تاغقا  چىقىشنىڭ  زۆرۈرىيىتى يوق . مىڭ ئادەمنىڭ ئىچىدىن 999  ى  ئادەتتىكى  ئىشلارنى قىلسا  بىرەرى   ئۇلار  قىلالمايدىغان ئىشلارنى  قىلىدۇ . ئۇلار  ھەقىقەتەن ئىرادىلىك ئىكەن .

jmgur

	بانكىر يوللىغان ۋاقتى  2015-1-19 02:07 PM تاغ ئۈستىگە تىك ئۇچار ئايرۇپىلاندىلا چىقسا بولىۋىرىدۇ ... راسلا بانكىردەك گەپ قىپسز

jmgur

	بانكىر يوللىغان ۋاقتى  2015-1-19 02:07 PM تاغ ئۈستىگە تىك ئۇچار ئايرۇپىلاندىلا چىقسا بولىۋىرىدۇ ... راسلا بانكىردەك گەپ قىپسز

kapitan2

	بانكىر يوللىغان ۋاقتى  2015-1-19 02:07 PM تاغ ئۈستىگە تىك ئۇچار ئايرۇپىلاندىلا چىقسا بولىۋىرىدۇ ... قارىغىنە يازغان نىمەڭگە. ئەقلىڭنىڭ يىتىلمىگەن كەمتۈك،مەجرۇھلىقىڭنى ھەر بىر ئېغىز گىپىڭدە ئىسپاتلاپلا تۇرىسەنغۇ سەن زادى!.