مۇدىرىمىزنىڭ ئىلغارلىق ماتېرىيالى (فىليەتون)

yulhun45

	مۇدىرىمىزنىڭ ئىلغارلىق ماتېرىيالى (فىليەتون) ئەيساجان تۇردى ئاچچىق مۇدىرىمىزنىڭ ئىسىمى ماقۇلجان، ئەر، مىللەت تەۋەلىكى ئېنىق ئەمەس، بۇ يىل سوقىۋالغان يېشىنى ھېساپقا ئالمىغاندا 40ياشقا كىرگىلى ئاران تۆت يىل بولدى. ئۇنىڭ ئىلگرىكى لەقىمى «سومكا» بولۇپ ھازىرقى لەقىمى «ئامبار» بۇنىڭدىن باشقا ئاشكارلاشقا بولمايدىغان بىر مۇنچە ئەركىلەتمە ئىسىملىرى بار تېخى... ئۇنىڭ بويى ئېگىزمۇ ئەمەس، پاكارمۇ ئەمەس، پۇقرالار ئارسىدا بىراقلا ئىگىزلەپ كېتىدۇ، يۇقىرى دەرىجىلىك ئەمەلدارلارغا يولۇقۇپ قالغىنىدا يۇقۇقسىزلا سۆڭەكلىرى بوشۇشۇپ دەرىجىدىن تاشقىرى پاكارلاپ كېتىدۇ. ھىيلە-نەيرىڭى ئاقماي «لوقما»غا ئېرىشەلمىگەن كۈنلىرى چىرايلى قارىداپ، ئۇرۇقلاپ كېتىدۇ. ئاز-تولا مەنپەئەتكە ئېرىشكەن كۈنلىرى بولسا چىرايى ئاقىرىپ، بىراقلا سەمىرىپ كېتىدۇ. ئۇ كۈلىۋېتىپ يىغلىيالايدۇ، يىغلاۋېتىپ كۈلەلەيدۇ ھەمدە باشقىلارنىڭ كۆزىگە توپا چېچىپ ئاقنى قارا، قارىنى ئاق قىلىپ كۆرسىتەلەيدۇ. ئۇنىڭ بەزىدە ئادەملەشكەن ھايۋانغا، بەزىدە ھايۋانلاشقان ئادەمگە ئۆزگۈرۈپ ئاجايىپ  يۇقىرى تالانتى بىلەن ھەق بىلەن ناھەقنى، گۈزەللىك بىلەن رەزىللىكنى قالايمىقان رىياكسىيەلەشتۈرۈپ روھىيەت ئېكىلوگىيەسىنى ئېغىر دەرىجىدە بۇزۇپ تاشلىشى بەرىبىر ھۆكۈمەت خىزمىتى ئۈچۈن ئەمەسمۇ؟! ئادەم دېگەن ئادەم، ئۇ خۇدا ئەمەس، ئادەملەرنىڭ ھەممىسى گۇناھ سادىر قىلىدۇ. مۇدىرىمىزمۇ ئادەم، شۇڭا ئۇنىڭ قىسمەت گۇناھلارنى سادىر قىلىشى ھېچنىمگە ئەرزىمەيدۇ. ئەگەر ئۇ تەكرار گۇناھ سادىر قىلمىغان بولسا ھازىرغىچە ھەقىقەتنىڭ خەرىتىسىنى قولغا چۈشۈرەلمىگەن بولاتتى. ھەقىقەتنىڭ خەرىتىسىنى قولغا چۈشۈرۋالدىمۇ ھەقىقەتنى قاچان تاپسا ئۆزىنىڭ ئىشى، ھېچ بولمىغاندا ئۆلۈش ئالدىدا باشقىلارغا  ۋەسىيەت قالدۇرسا بولمىدىمۇ؟! مۇدىرىمىز ئاڭلاشلارغا قارىغاندا بۈگۈننىڭ ئالدىدا ئۆتمۈشنىڭ كەينىدە، ئاسماننىڭ ئاستىدا، يەرنىڭ ئۈستىدە، قىش باھاردەك، باھار قىشتەك بىر پەسىلدە....مەلۇم بىر دۇشەنبە كۈنى بايدىن كەمبەغەل، كەمبەغەلدىن باي بىر ئائىلىدە دۇنياغا كەلگەن ئىمىش. كونا كىتابلاردا خاتىرلىنىشىچە دۇشەنبە كۈنى تۇغۇلغانلارنىڭ راھىتى كۆپ، مەرتىۋىسى يۇقىرى بولارمىش... ئۇنىڭ ئۈستىگە رەھمەتلىك ئانىسى مۇدىرىمىز تۇغۇلغان چاغلاردا «ئوغلۇم چوڭ بولغاندا رەئىس بولىدۇ» دەپتىكەنمىش. مۇدىرىمىز ھەر كېچىسى قاناتلىنىپ ئۇچۇپ چۈش كۆرەرمىش. ھە راسىت ! يېقىندا تەڭ دەرىجىلىك بىر رەھبەر مۇدىرىمىز بىلەن زۇكۇنلىشىپ قېلىپ غەزەپلەنگەن ھالدا «چېھرىڭدىكى مۇشۇ سۈنئىي تەبەسسۇم ئۆچۈپ قالمىسىلا چوقۇم رەئىس بولىسىەن» دەپ تىللاپتىمىش. بۇ ئەھۋاللارنى ئويلىغىنىمىزدا مۇدىرىمىزنىڭ ھازىرقى ئورنى ئۇنىڭغا ئىنتايىن تۆۋەنلىك قىلىدۇ. مۇدىرىمىز بۇ مەرتىۋىگە ئانچە ماس كەلمىسىمۇ ئۆز ئورنىنى ئانچە تۆۋەن چاغلىماي ئىشلىگەنلىگىنىڭ ئۆزىلا بىر زور تۆھپە! ئۇنىڭ خىزمەت نەتىجىسىنى تۆۋەندىكى بىر نەچچە نۇقىتىغا يىغىنچاقلاشقا بولىدۇ. 1. مۇدىرىمىزنىڭ تۇغۇلغانلىقىغا 50يىلدىن ئاشقان بولسىمۇ بۇ يىل ئاران 40ياشقا كىرىدى. بۇ كەمدىن-كەم ئۇچرايدىغان مۆجىزە. كۆپ ساندىكى كىشلەر بىر يىلدا بىر ياشقا كىرسە، مۇدىرىمىز ھوقۇق سەھنىسىگە چىققاندىن بۇيان ھەر ئىككى يىلدا بىر ياشقا كىرمەكتە. ئىنسان بالىسىدىكى ئىقتىدار بۇنىڭدىن ئارتۇق بولماس. ئەگەر مۇدىرىمىزنىڭ بۇ تېخنىكىسىنى پۈتۈن يەر شارىغا كېڭەيتىشكە توغرا كەلسە بوۋاي-مومايلارمۇ كۈندىن-كۈنگە ياشىرىپ، ئىنسانلارنىڭ قېرىش سۈرئىتى ئىنتايىن تۆۋەنلەپ كېتىدۇ. مۇدىرىمىزنىڭ يۇقارقى تەتقىقات نەتىجىسىگە نوبېل مۇكاپاتى بەرسىمۇ كەملىك قىلىدۇ. 2. مۇدىرىمىزنىڭ مەدەنىيەت سەۋىيەسى تۆۋەن، ئەسلىدە كان ئىشىچىسى بولۇپ ئىشلىگەن بولسىمۇ بىراق، مائارىپ سېپىگە دومىلاپ كىرىۋالغان 15 يىلدىن بېرى بۇ كەسپىنى قىزغىن سۆيۈپ، ئوقۇتقۇچى-ئوقۇغۇچىلارنى يات كۆرمەي، ھەر كۈنى يوقلىما قىلىش ۋە يىغىن ئېچىشىنى ئۇنتۇپ قالمىغاچقا ھەر قايسى مەكتەپلەردە پارتىلاش، گازدىن زەھەرلىنىش، مەكتەپ تېمى ئۆرۈلۈپ چۈشۈپ بالىلارنى بېسىۋېلىشتەك ۋەقە سادىر بولمىدى. 3. مۇدىرىمىز مەكتەپلەردە ئوقۇتۇشقا قارىغاندا ئەمگەك پائالىيەتلىرىنى كۆپرەك ئورۇنلاشتۇرىدۇ. چۈنكى ئۇلۇغ پورۇلتورىيات ئۇستازى ماركىس بوۋىمىز «دۇنيانى ئەمگەك ياراتقان» دېگەن ئەمەسمۇ؟! بۇ نۇقتىنى ئىنتايىن چوڭقۇر چۈشەنگەن مۇدىرىمىز مەكتەپ خىزمەتلىرىدە ئەمگەك بارلىق خىزمەتلەرنىڭ مۇھىم ھالقىسى دەپ قاراپ، دەرس ئوقۇماي ئەمگەككە ئورۇنلاشتۇرغان مەكتەپ مۇدىرلىرىنى ھاراق، تاماكا بىلەن پات-پات مۇكاپاتلاپ تۇرىدۇ. مۇدىرىمىزنىڭ بۇ قارشى شۇھبىسىز توغرا ئەمەسمۇ؟! چۈنكى بىرىنچىدىن: دەرس دېگەننى قاچان ئۆتسە بولىۋېرىدۇ، كىتابتىكى بىلىم يىتىپ قالمايدۇ. ئىككىنچىدىن: دېھقانچىلىق ۋاقىتچانلىققا ئىگە. بىر كۈن كېيىن قالسا ياخشى ھوسۇل ئالغىلى بولمايدۇ. ئۈچىنچىدىن: كىتاپتىكى بىلىمىنى قورساق ئاچقاندا يىگىلى بولمايدۇ. يالىڭاچ قالغاندا كەيگىلى بولمايدۇ. تۆتىنچىدىن: ئەمگەك ئادەمنى ياشارتىدۇ. تەننى ساغلاملاشتۇرىدۇ. بەشىنچىدىن: ئوقۇغۇچىلار كىتاپنى كۆپ ئوقۇپ كەتسە كىتاۋى بىلىمگە قامىلىپ قېلىپ، رېئاللىقتىن ئايرىلىپ قالىدۇ. ئۇلۇغ داھىمىز ماۋزېدۇڭ «كىتابۋازلىققا قارشى تۇرايلى!» دەپ شۇئار توۋلىغان ئەمەسمۇ؟! دېمەك مۇدىرىمىزنىڭ يۇقارقى خىزمەت ئىجادىيىتىگە قارشى تۇرغانلىق ماركىس، ماۋزېدۇڭ قاتارلىق داھىلارنىڭ قارشىغا تۆۋەن باھا بەرگەنلىك ھېسابلىنىدۇ. 4. مۇدىرىمىزنىڭ ھەر قايسى ئوتتۇرا-باشلانغۇچ مەكتەپلەرگە مۇدىر تەيىنلەشتىكى ئادىللىقى بارلىق خىزمەت نەتىجىلىرىنىڭ گۈلتاجىسى ھېسابلىنىدۇ. چۈنكى :‹1› ئۇ كىم مەكتەپ مۇدىرى بولۇشنى خالىغان بولسا شۇنى مەكتەپ مۇدىرى قىلىپ ئۆستۈردى. ‹2› مەكتەپ مۇدىرى بولۇش ئىشقىدا سەۋدايى بولۇپ كەتكەن كىشلەر مۇدىرىمىزنىڭ ئۆيىگە ھەرقانداق سوۋغات ئېلىپ كىرسە ئاددى كۆرمەي ھەم شەرت بەلگىلەپ بەرمەي قۇبۇل قىلىپ، مەخسۇس دۇكان ئېچىپ خېرىدارلارغا كېلىشىم باھادا سېتىپ بەردى. مانا بۇ «ئاممىدىن ئېلىپ، قايتۇرۇش» دېگەن شۇ ئەمەسمۇ؟! ‹3› سوۋغاتقا كىرگەن پۇللارنى بانكىغا قويۇشمۇ دۆلەت ئۈچۈن، ئەگەر بۇ پۇللارنى بانكىغا قويماي پوكىنىغا بېسىپ يېتىۋالغان بولسا خەلق پۇلىنىڭ ۋاقىتى-ۋاقتىدا ئوبۇرۇت بولۇپ تۇرىشىغا زور تەسر كۆرسەتكەن بولاتتى. ‹4› گۆش، تاماكا، مېۋە-چېۋە قاتارلىق بۇيۇملارنى قايتا دۇكانغا سېلىپ خېرىدارلارغا ساتمىغان بولسا سېسىمچىلىق يۈز بېرىپ مۇھىت بۇلغانغان بولاتتى. يەنە بىر تەرەپتىن ئۇنىڭ بۇ قىلمىشى مىللىتىمزنىڭ ئىسراپچىلىققا قارشى تۇرۇشتىن ئىبارەت ئېسىل ئەنئەنىسىگە تولىمۇ ئۇيغۇن كېلىدۇ. ئۆزى ئىستېمال قىلىپ بولالىمىغان تاۋارلارنى باشقىلارغا سېتىۋېتىش نۆۋەتتىكى بازار ئىگىلىكى قانۇنىيىتىگە ماسلاشقانلىق ئەمەسمۇ؟! ‹5› مۇدىرىمىزنىڭ قول ئاستىدىكى بۆلۈم خادىملىرىنى ۋە مەكتەپ مۇدىرلىرىنى مەخسۇس چاقىرىپ، ھۆكۈمەت غەزىنىسىدىن راسخوت ئاجرىتىپ «قارت قىمىرى ئويناش مۇسابىقىسى»، «ھاراق ئىچىش مانىۋېرى» ۋە «ئىقتىدارلىق ئوقۇتقۇچىلارنىڭ غەيۋىتىنى قىلىش كۆرگەزمىسى» قاتارلىق پائالىيەتلەرنى ئۇيۇشتۇرۇپ تۇرۇشى تۆۋەندىكدەك ئەھمىيەتكە ئىگە. ‹1› ھۆكۈمەت راسخودىنىڭ مەلۇم بىرلا شەخىسنىڭ يانچۇقىغا چۆكۈپ كېتىشنىڭ ئالدىنى ئالغىلى بولىدۇ. ‹2› ھەر قايسى دۇكاندارلارنىڭ ۋە ھاراق زاۋۇتلىرىنىڭ كىرىمىنىڭ ئېشىشىغا پايدىلىق. ‹3› مەكتەپ مۇدىرلىرىنىڭ خىزمەت جىددىلىكى تۇپەيلىدىن پەيدا بولغان چارچاش ئالامىتىنى يوققا چىقىرىپلا قالماستىن بەلكى ئىككى دەرىجىلىك رەھبەرلەرنىڭ تىل بىرىكتۈرۋېلىشقا شارائىت ھازىرلىنىدۇ. ‹4› گەدەنكەش، ياغاچ قۇلاق، ئىسيانكار...ئىقتىدارلىق ئوقۇتقۇچىلارنى قانداق ئەدەپلەشنىڭ ئۈنۈملۈك لاھىيەسىنى تۈزۈپ چىقىلىدۇ. ‹5› ھۆكۈمەت پۇلىغا ياغ گۆشنى كۆپ يەپ سەمىرىپ كەتكەن مەكتەپ مۇدىرلىرى پات-پات ھاراق ئىچىپ تۇرمىسا قېنىدىكى ياغ ماددىسى ئېشىپ كېتىپ، تۇيۇقسىز قازا تاپسا مىللى مائارىپىمىز ئۈچۈن تولدۇرۋالغۇسىز يوقۇتۇش بولمامدۇ؟؟! 5.مۇدىرىمىزنىڭ «ھۆكۈمەت پۇلىغا يىگەن تاماق ۋە شەخسىي پۇلغا يىگەن تاماق ئۈستىدە دەسلەپكى ئىزدىنىش» ناملىق تەتقىقات ماقالىسى «دوقمۇش پاراڭلىرى» مەجمۇئەسىدە ئېلان قىلىنىپ، ئوقۇرمەنلەرنىڭ ياخشى باھاسىغا ئېرىشتى. ئۇنىڭ بۇ ماقالىسىدا ھۆكۈمەت پۇلىغا يىگەن تاماق بىلەن شەخسىي پۇلغا يىگەن تاماقنىڭ تەسىرى ئەمىلى مىساللار ئارقىلىق جانلىق سېلىشتۇرۇلغان. ماقالىدا قەيىت قىلىنىشچە ھەر قانداق ئادەم ھۆكۈمەت پۇلىغا تاماق يىگەندە روھى جەھەتتىن شاتلىنىپ ھېچقانداق بېسىم ھېس قىلماي.. تېزلا سەمىرىپ كېتەرمىش. شەخسىي پۇلغا تاماق يىگەندە بولسا ئازاپلىنىش تۇيغۇسىدا راھەتلىنىش ھېس قىلالماي تاماقنىڭ تەمىنى ئالالماسمىش... 6.بۈگۈنكىدەك كۈندە بۇنداق دانا پىكىرىنى دادىللىق بىلەن ئوتتۇرغا قويماق ئەدەبىيات-سەنئەت ۋە جەمئىيەتنىڭ تەرەققىياتى ئۈچۈن تۈرتكۈلۈك رول ئويناپلا قالماستىن بەلكى سەمىرىش ئىستىكى كۈچلۈك كىشلەرگە ئەڭ ياخشى رېتسىپ بولالايدۇ. 7. مۇدىرىمىزنىڭ كېچىلىك ماشنا ئالماشتۇرۇش سەنئىتى خېلىلا يۇقىرى. ھازىر مۇدىرىمىزنىڭ تۆۋەنگە بارغاندا مىنىدىغان ماشىنا ۋە يۇقىرى دەرىجىلىك ئورۇنلارغا يىغىن ھەم سەيلى-ساياھەتكە بارغاندا مىنىدىغان ماشىنىدىن ئىبارەت ئىككىلا ماشىنىسى بار. مۇدىرىمىزنىڭ ئىسىل ماركىلىق ماشىنلارنى تاللاپ مىنىشى تەۋەلىكىمىزدىكى بارلىق ئوقۇتقۇچى-ئوقۇغۇچىلارنىڭ شان-شۆھرىتى، ئەگەر مۇدىرىمىزنىڭ كونا، ئەرزان باھالىق ماشىنلارنى مىنگەن بولسا قانداقمۇ بىزنىڭ ئىناۋىتىمىز بولسۇن؟! كىممۇ بىزنى ئوقۇتقۇچى دېسۇن؟! ئەگەر كېچلىك ماشىنا ھاجەتخانىلارغىمۇ كىرەلىگەن، رېستۇنلاردىكى شىرە ئۈستىگىمۇ بىمالال چىقالىغان بولسا بىزنىڭ خىزمەتلىرىمىز تېخىمۇ جانلىنىپ كەتكەن بولاتتى. 8. مۇدىرىمىز ئانا تىلىدا سۆزلەشنى ئانچە ياقتۇرۇپ كەتمەيدۇ. مىللى مائارىپ بىلەن مىللى مەدەنىيەتنى مۇناسىۋەتسىز ئىككى گەۋدە دەپ قارايدۇ. مۇدىرىمىزنىڭ بۇ ھەقتىكى قاراشلىرى نۆۋەتتىكى «يەر شارىلىشىش»مۇقامىغا تولىمۇ ئۇيغۇن كېلىدۇ. 9. مۇدىرىمىزنىڭ تىلغا ئېلىپ ئۆتمىسە قەتئى بولمايدىغان يەنە بىر تۆھپىسى شۇكى ئۇ قول ئاستىدىكى خانىم-قىزلارنى شۇ قەدەر ئەتىۋارلاپ قالماستىن بەلكى ئايالىنىڭ كۆرسەتمىسى بويىچە ئىش بىجىرىدۇ. رۇس ئەدەبىياتىنىڭ ئاتىسى دەپ نام ئالغان بۈيۈك يازغۇچى گوركى: « بىر ئادەمنىڭ قىز – ئاياللارغا تۇتقان مۇئامىلىسىنىڭ ياخشى-يامان بولىشى شۇ كىشىنىڭ مەدەنىيەت ساپاسىنى كۆرسىتىپ بېرىدۇ» دىگەن ئىكەن. شۇنىڭغا قارىغاندا مۇدىرىمىزنىڭ مەدەنىيەت ساپاسى ناھايىتى يۇقۇرى. يەنە بىر تەرەپتىن تەھلىل قىلغاندا مۇدىرىمىزنىڭ خانىم-قىزلارغا ئامراقلىقى ۋە ئايالىدىن قورقىدىغانلىقى.... ئاياللارنىڭ يېرىم دۇنيالىق ئورنىنى مۇئەييەنلەشتۈرگەنلىكى ۋە «ئاياللار ئازادلىقى » نى تەشەببۇس قىلغانلىقى ئەمەسمۇ؟! 10. مۇدىرىمىز « 3 كە ئەھمىيەت بىرىش » ۋە « 3 كە ۋەكىللىك قىلىش » شۇئارى بىلەن تەڭلا ئەتراپلىق ئويلىنىپ «3نى سورىماسلىق» ۋە «3كە رۇخسەت يوق» تۈزۈمىنى يولغا قويدى. «3نى سورىماسلىق» تۆۋەندىكىچە: ‹1› نېمە ئۈچۈن ئىش ھەققىنى ۋاقتىدا ئالمايمىز؟! دەپ سورىماسلىق. ‹2› نېمە ئۈچۈن شەنبە-يەكشەنبە كۈنلىرى ئارام ئالمايمىز؟! دەپ سورىماسلىق. ‹3› نېمە ئۈچۈن بۇ ئىشىنى بۇنداق قىلىمىز؟! دەپ سورىماسلىق. «3كە رۇخسەت يوق» تۆۋەندىكىچە: ‹1› جىددى پەيتلەردە تۇغۇشقا ۋە ئۆلۈشكە رۇخسەت يوق. ‹2› جىددى پەيتلەردە توي قىلشقا ۋە نەزىر-چىراغ ئۆتكۈزۈشكە رۇخسەت يوق. ‹3› جىددى پەيتلەردە رۇخسەت سوراشقا ۋە كېسەل بولۇپ قېلىشقا رۇخسەت يوق. دېمەك: مۇدىرىمىزنىڭ يۇقارقىدەك قاتتىق تۈزۈم ئورنىتىشى نۆۋەتتىكى «ئىككى قولدا  تۇتۇش ، ئىككىلى قولىدا قاتتىق تۇتۇش » پىرىنسىپقا ناھايىتى ھۆرمەت قىلغانلىق ھېسابلىنىدۇ **                                  ** « چوڭ خاتالىقلارنى ئۆتكۈزمىگىچە ھېچكىم ئۇلۇغ ياكى مۇنەۋۋەر بولالمايدۇ » دېگەن فىرىندىرىك زوبېرسۇن . مۇدىرىمىزنىڭ ئازتولا خاتالىق سادىر قىلىشى دەل مۇنەۋۋەر بولۇشى ئۈچۈندۇر . مۇدىرىمىز بولمىغان بولسا قۇياشمۇ بۇ يۇرتقا نۇرىنى سېخىلىق بىلەن سەپمىگەن بولاتتى . مۇدىر كۈلسە زىمىنمۇ تەڭ كۈلىدۇ . مۇدىرىمىزنىڭ قاپىقى تۈرۈلسە ئاسماننى قارا بۇلۇتلار قاپلايدۇ . مۇدىرىمىزنىڭ ئويقۇسنى ئاچمىغىچە بوشلۇقتىكى ھاۋامۇ ساپلاشمايدۇ . مۇدىرىمىزنىڭ بۇيرۇقىسىز بىرەر قېتىممۇ كۈلەلمەيمىز . مۇدىرىمىزنى تاپماستىن بىرەر تال تېرىقنىمۇ گېلىمىزدىن ئۆتكۈزەلمەيمىز . مۇدىرىمىزنىڭ مەۋجۇتلىقى دەل بىزنىڭ بەختىمىز . بىز مۇدىرىمىزنىڭ يۇقارقىدەك خىزمەت نەتىجىلىرىنى كۆزدە تۇتۇپ ، « مائارىپ سېپىدىكى ئەڭ مۇنەۋۋەر تۆھپىكار باغۋەن » دەپ قاراپ ئىلغارلىق ماتېرىيالىنى سىزلەرگە يوللىدۇق . شۇڭا سىزلەرنىڭ مۇۋاپىق بولغىنىدا كۆرۈپ تەستىقلىشىڭلارنى تۆۋەنچىلىك بىلەن ئۈمۈد قىلىمىز . ھۆرمەت بىلەن : XX XX XX دىن مىلادى 2222 – يىلى 09 – ئاينىڭ مەلۇم بىر كۈنى ئاپتۇر: كەلپىن ناھىيەلىك ئەدەبىيات-سەنئەتچىلەر بىرلەشمىسىدىن. MANBA:http://bijirim.com/asarkorux.asp?id=201&tur=1

albax

	ئالامەت ، خەنچە ڧىليەتۇنلارغا ئوخشاپ قالىدىكەن .

ramu

	ھەجەپمۇ«ئىقتىدارلىق»مۇدىر ئىكەن،ۋوي راس، مۇدىرلا ئەمەس مۇتىر ئىكەن.

nur414

	ئارتۇق گەپ ئىشەككە يۈك كاتتا زات شوجاڭ دىگەن ئاپتۇرى:ئالاھىدىن ئابدىرىشىت كاتتا زات شوجاڭ دىگەن ھۆرمەت قىلىڭ ئەڭ ياخشىسى، باش ئورۇپ تازىم قىلىپ ئىززەت قىلىڭ ئەڭ ياخشىسى. كۈندە مىڭ (خوش- خوش ) نى پەرز. سۈننەت قىلىڭ ئەڭ ياخشىسى، توغرا ئۆتمەڭ ئالدىدىن، دىققەت قىلىڭ ئەڭ ياخشىسى، ئۆزىڭىزنى قۇل بىلىڭ ، بەيئەت قىلىڭ ئەڭ ياخشىسى. ئالمىغان  ھوقۇقنى  ھەرگىز ئاسانلا قولىغا، تىشىلىپ كەتكەن تاپانلار كۈندە ماڭغان يولىغا. ئورا كولاپ مىڭ جاپادا  باشقىلارنىڭ ھولىغا، سېتىۋالغان تۆگىنى ، تۈگمە ساتقان پۇلىغا . توشسىمۇ پەيمانىڭىز تاقەت قىلىڭ ئەڭ ياخشىسى. شۇڭا ئۇ ھوقۇقنى شۇنداق كەلسە- كەلمەس ئىشلىتەر، كوچىلاردا چاپتۇرۇپ ئات خالىغانچە كىشنىتەر، ئىتلىرى كۆپ ئالدىدا ،بۇيرۇق بىلەن كىش- كىشلىتەر، سىز بىلەن مەندەكنى بىر دوكلات بىلەن يەر چىشلىتەر، مۆرىمەسلىكنى ئىسىل ئادەت قىلىڭ ئەڭ ياخشى. ئالتە كۈندە سىزگىمۇ تارقاقلىشىشنىڭ گىپى بار، بېشىڭىزدا ئوينىتىشقا ياخشىلارنىڭ دېپى بار، ياخشىلارنى ( ئىقتىدارسىز ) دەپ چېقىشقا ئېپى بار، ( يا قىزىل ياكى ئىگىز يەرگە مېڭىڭ ) دەپ خېتى بار، كۈندە بىر شوجاڭ بىلەن سۆھبەت قىلىڭ ئەڭ ياخشىسى. سىزنى قوغلاپ ئورنىڭىزغا توغقىنىنى قويىدۇ، ئىززىتىنى ھۆرمىتىنى ئوققىنىنى قويىدۇ، پايدا مەنپەئەت نەدە بولسا يۇققىنىنى قويىدۇ، ھەر كۈنى كۆڭلىنى بىر رەت ئۇتقىنىنى قويىدۇ، قولىڭىزنى كەڭ ئېچىڭ، ھىممەت قىلىڭ ئەڭ ياخشىسى. بىرلىرى ۋالىيغا يا شۈجىگە يۇرتداش كىلىدۇ، بىرلىرى ھاكىمغا تۇققان، دوست، ساۋاقداش كىلىدۇ، بىرلىرى شوجاڭ بىلەن سىرداش- پىكىرداش كىلىدۇ، بۇنى ئېيىتساق ئاغزىمىزغا ئاش ئەمەس تاش كىلىدۇ، سىزمۇ چوڭ باشلىقنى دوست ئۆلپەت قىلىڭ ئەڭ ياخشىسى. بولسىڭىز خانىم ئەگەر لىپتىكنى سەل جىڭراق قىلىڭ، مەيدىڭىزنى كۆتۈرۈڭ ، ئەمچەكنى سەل دىڭراق قىلىڭ، ساغرىڭىزنى ئارقىڭىزغا چىقىرىڭ- چىڭراق قىلىڭ، ئەتە- ئۆگۈن دەپ يۈرمەڭ بۇنى تىزراق قىلىڭ، ئىرىڭىزنى كۆندۈرۈپ نەسىھەت قىلىڭ ئەڭ ياخشىسى. ئۆيىڭىزگە ئاخشىمى پاقلان سويۇپ باشلاپ تۇرۇڭ، ( شوجىڭىم ) دەپ ( باشلىقىم ) دەپ كۆڭلىنى ياشلاپ تۇرۇڭ، دۈمبىسىنى ئوۋۇلاپ خوشياقتۇرۇپ قاشلاپ تۇرۇڭ، تال چىۋىقتەك تولغىشىپ قاش كۆزنىمۇ تاشلاپ تۇرۇڭ، ۋايىغا بىر يەتكۈزۈڭ غەيرەت قىلىڭ ئەڭ ياخشىسى. ئىشلىدىم جان كۆيدۈرۈپ خىزمەتنى مەن دەپ جۆيلىمەڭ، يەتمىسە شوجاڭغا نەپ ، بۇ بىر قۇرۇق گەپ ،  جۆيلىمەڭ، تاغنى تالقان قىلسىڭىزمۇ سىزگە يوق نەپ،  جۆيلىمەڭ، جۆيلىمەيمەن مەنمۇ ئەمدى بولدىلا (خەپ )  جۆيلىمەڭ، ئولتۇرۇپ ئىشخانىدا غەيۋەت قىلىڭ  ئەڭ ياخشىسى. نىمە ئۇ جان كۆيدۈرۈپ بىز ئىشلىگەن خىزمەت دىگەن؟؟؟؟ نىمە ئۇ ھوقۇق ئەمەلنىڭ ئالدىدا مىھنەت دىگەن؟؟؟؟؟ نىمە ئۇ دىجدان- غورۇر، بىلىم دىگەن، خىسلەت دىگەن؟؟؟؟ نىمە ئۇ ۋەتەن دىگەن، ئەۋلات دىگەن،مىللەت دىگەن؟؟؟؟ تىزلىنىپ شوجاڭغىلا خىزمەت قىلىڭ ئەڭ ياخشىسى. كۈندۈزى ئادەم سىياقتا كېچىشى شەيتان بولۇڭ، رېستۇرانلاردا- قاۋاقتا ئادىمى ھايۋان بولۇڭ، قىز تېپىپ -چوكان تېپىپ بىر چەتتە سىز (مىھمان ) بولۇڭ، مەيلى خەق دەللال دىسە شوجاڭ ئۈچۈن قۇربان بولۇڭ، ئار نومۇسنى ساتقىلى جۈرئەت قىلىڭ ئەڭ ياخشىسى. باغدىكى ئوغرى تىكەننى گۈل قىلار شوجاڭ دىگەن، شۇ سېسىق ھۆپۈپنىمۇ بۇلبۇل قىلار شوجاڭ دىگەن، بىر قوتۇر ئىشەكنىمۇ دۇلدۇل قىلار شوجاڭ دىگەن، بولمىسا بىر يولىڭىز بىر يول قىلار شوجاڭ دىگەن، قەلبىڭىزنى گەندىدەك مەينەت قىلىڭ ئەڭ ياخشىسى. قاغىلارنى ئاق دىسە ئاق دەپ تۇرۇڭ باش لىڭشىتىپ، ئوغرىلارنى ساق دىسە ساق دەپ تۇرۇڭ باش لىڭشىتىپ، ئىككىنى تاق دىسە تاق دەپ تۇرۇڭ باش لىڭشىتىپ، ياق دىسە سىزمۇ ھەم ياق دەپ تۇرۇڭ باش لىڭشىتىپ ئاغزىدىن چىققاندا ھور، ھەركەت قىلىڭ ئەڭ ياخشىسى. يېزىغا قوغلانسىڭىز مىڭبىر جاپانى تارتىسىز، دولىڭىزغا ئىككى تاغنى كۈندە يۈكلەپ ئارتىسىز، باشقىلار قوغلاندى دەر ئىزا- ئەلەمگە پاتىسىز، جۆرىڭىز يوق بالىڭىز يوق، ئۇخلىماي دۈم ياتىسىز، تۇتسىمۇ شوجاڭ زەھەر، شەربەت بىلىڭ ئەڭ ياخشىسى. سىزنى خىزمەتداش بىلىپ كۆڭلۈمدىكى گەپنى دىدىم، تېخى تۆت كۈنلا بۇرۇن كەلگەن ئەلەم دەرتنى دىدىم، مەيلى ئاڭلاڭ- ئاڭلىماڭ گەپ بولسىمۇ نەپنى دىدىم، ئوڭ دىدىم تارتتىم زىيان ، ئەمدى شۇڭا چەپنى دىدىم، ماڭىمۇ دەل ۋاقتىدا تۆھمەت قىلىڭ ئەڭ ياخشىسى مۇدىر، يىغىننى ئاز ئېچىڭ!!! ئالاھىدىن ئابدۇرېشىت پاڭ بولۇپ كەتتى قۇلاق، مۇدىر، يىغىننى ئاز ئېچىڭ، بۇرنىمىز بولدى بۇلاق، مۇدىر، يىغىننى ئاز ئېچىڭ، گەپنى سوزماڭ سىز ئۇزاق، مۇدىر، يىغىننى ئاز ئېچىڭ، بار قۇرۇق گەپتە چاتاق، مۇدىر، يىغىننى ئاز ئېچىڭ، دەرسكە چالدى قوڭغۇراق، مۇدىر، يىغىننى ئاز ئېچىڭ.    ئۇخلىماستىن كېچىلەردە ئۆيدە لاۋزا گەپ تىزىپ، بىر سىزىقنى يولىمىزغا مىڭ سىزىپ، مىڭبىر سىزىپ، ئەتىگەندە كەتتىڭىزغۇ ئەزمىڭىزنى بەك ئېزىپ، ھاردى كاتىپ توختىماستىن ئالتە دەپتەرگە يېزىپ، گېىپڭىز ئۇلاق-قۇراق، مۇدىر، يىغىننى ئاز ئېچىڭ.    كاسكىراپسىز ساق يېرىم كۈن، گېىپڭىزدە يوق مېغىز، يەنە شۇ گەپ كۈندە مىڭ ۋاق دەيدىغان شۇ بىر ئېغىز: بالىلارغا پايدىسىز شىمىشكا، كەمپۈت ۋە سېغىز، شاخلىتىپ گەپنى تۈگەتمەس، سىزدىكى قانداق ئېغىز؟ «ۋە، لېكىن، ئەمما، بىراق...»، مۇدىر، يىغىننى ئاز ئېچىڭ.    رايىمىز يوقتۇر يىغىنغا يەتتى چەككە سەۋرىمىز، دەرسمۇ قالدى بىزنى ساقلاپ بالىمىز ھەم نەۋرىمىز، بۇ يىغىننىڭ دەستىدىن ئاشتى جاپايۇ-جەۋرىمىز، كۈندە شۇنداق مەنىسىز ئۆتكەيمۇ ئالتۇن دەۋرىمىز؟ سىزگىمۇ باردۇر سوراق، مۇدىر، يىغىننى ئاز ئېچىڭ.    چۈشمۇ بولدى، جۆرىڭىزمۇ ساقلىغاندۇ ھەقاچان، يۇغۇرۇپ خېمىرنى، كۆكتات ئاقلىغاندۇ ھەقاچان، بالا يىغلاپ ئۆزىنى شالتاقلىغاندۇ ھەقاچان، بىرلىرى ئاپتاپقا ھۆلنى قاقلىغاندۇ ھەقاچان، سىزنى ساقلايدۇ تاماق، مۇدىر، يىغىننى ئاز ئېچىڭ.    گېپىڭىزدىن باش قېيىپ، كەتتى كۆڭۈللەر ئېلىشىپ، بالىلار قايتتى تالاي«دەرس قالدىغۇ»دەپ كېلىشىپ، ئاخىرى مەكتەپنى باشقا كەيدى غەۋغا سېلىشىپ، بىر-بىرىنىڭ بۇرنىدىن قان، كۆزىدىن ياش ئېلىشىپ، قالمىدى ساق قاش-قاپاق، مۇدىر، يىغىننى ئاز ئېچىڭ.       ئەمدى ئۆي-ئۆيلەرگە قاتراپ ھەپتە داۋا سورىمىز، ئاتلىنىپ«ئالدىنقى سەپ»كە، سەپتە داۋا سورىمىز، بىز مۇئەللىم خەق دېگەن شۇ گەپتە داۋا سورىمىز، سىزگە لەنەتلەر ئوقۇپ مىڭ، «خەپ!»تە داۋا سورىمىز، بىزگە كۆپ بەرمەڭ ساۋاق، مۇدىر، يىغىننى ئاز ئېچىڭ.    مانا، ئىشتىن چۈشكىلى نىكەم، قاۋاشنى توختۇتۇڭ، كىم گېپىمنى ئاڭلىمايدۇ دەپ ماراشنى توختۇتۇڭ، ئاغزىڭىز كەتتى قۇرۇپ، كالپۇك يالاشنى توختۇتۇڭ، غودۇرۇساق شالنى چېچىپ، ئىتتەك تالاشنى توختۇتۇڭ، كوكۇراپ كەتتى قوساق، مۇدىر، يىغىننى ئاز ئېچىڭ.    ئەمدى بىزدە يوق ئامال، ئۈزمەي تاھارەت قىستىدى، چىڭقىلىپ دوۋساق، ئەجەپ جان يەرنى ھاجەت قىستىدى، ئىككى قول قاماللىغانچە كەتتى تاقەت، قىستىدى، گېپىڭىزنى ئاڭلىماسكەن بۇ ھاماقەت، قىسىتىدى، توشتى بۇ كۈنلۈك قاماق، مۇدىر، يىغىننى ئاز ئېچىڭ.       قاقشىمايتتۇق ئاچسىڭىز كۈندە يىغىننى ئاز قىلىپ، ئۆيدىكى گەپنى قويۇپ، خىزمەت گېپىنى ساز قىلىپ، ئاچىسىز ئەمما يىغىننى بىزگە شۇنداق ماز قىلىپ، گەپنى ئۆردەكتىن قىلىپ بىر باشقا چىقماي غاز قىلىپ، سىزنى كۆپ قىلدۇق مازاق، مۇدىر، يىغىننى ئاز ئېچىڭ.    بىر كۈنى ئېغىزمۇ گەپتىن تالىدۇ دەپ ئاڭلىدىم، گەپنى كۆپ قىلغان زۇۋاندىن قالىدۇ دەپ ئاڭلىدىم، بۇ كېسەل مۇدىرنى ئوڭدا سالىدۇ دەپ ئاڭلىدىم، كاسكىدىن ۋاقت ھېساپنى ئالىدۇ دەپ ئاڭلىدىم، سىزگە تەنبىھ بۇ قوشاق، مۇدىر، يىغىننى ئاز ئېچىڭ! . .

mamatkurban

	يېغىنۋازلىق تۈگىمەيدىغان ئىللەت ئىكەن يىغىن ئاچمىسا باشلىقلار سۈرىنى (ھەيۋىسى)كۆرسىتەلمەيدىۈان ئوخشايدۇ زادى.

mamatkurban

	ھەقىقەتەن «قابىلىيەتلىك»مۇدىركەن مىللىتىمىز كۆكلەپ كىتىدىغان ئوخشايدۇ

yusayinnu

	ۋاي تالانت دېگەن مۇشۇ دە تىرىشىڭلار بەك ياخشى يېزىلىپتۇ

jmgur

	تېگىدىكى ئىنكاس شىئىرلارمۇ تازا كەپتۇ

jmgur

	تېگىدىكى ئىنكاس شىئىرلارمۇ تازا كەپتۇ

xajarim

	nur414 يوللىغان ۋاقتى  2015-1-15 09:01 AM ئارتۇق گەپ ئىشەككە يۈك كاتتا زات شوجاڭ دىگەن ئاپتۇرى:ئ ... ۋاھ  ما شئېر ئالامەت ياخشى چىقىپتىغۇ...