ئوقۇتقۇچىلار ياقتۇرمايدىغان ئاتا-ئانىلار

uybura

	بالىلىرىنىڭ سىنىپ تەربىيەچىسى بىلەن ياخشى ئۆتۈش بارلىق ئاتا-ئانىلارنىڭ ئارزۇسى، ئەمما كۆپىنچە ئاتا-ئانا ئوقۇتقۇچى بىلەن ياخشى ئۆتۈشنىڭ يولىنى تاپالماي قىيىنىلىدۇ، ئوقۇتقۇچىنىڭ مايىللىقىنى قولغا كەلتۈرۈش ئۈچۈن قىلغان ئىشلىرى ئەكسىچە رول ئويناپ، ئوقۇتقۇچىنى بىزار قىلىپ قويىدۇ. ئۇنداقتا، ئوقۇتقۇچىلار قايسى خىل ئاتا-ئانىلارنى ياقتۇرمايدۇ؟ 1.ئوقۇتقۇچىلار ئاتا-ئانىلارنىڭ «بالىنى سىزگە تاپشۇردۇم، قانداق ئۇسۇل بىلەن تەربىيەلىسىڭىز بولۇۋېرىدۇ، تىللىسىڭىزمۇ، ئۇرسىڭىزمۇ بولىدۇ» دېيىشىدىن بىزار. ئاتا-ئانىلار شۇنداق دېيىش ئارقىلىق ئوقۇتقۇچىنىڭ كۆڭلىنى ئۇتماقچى بولىدۇ، بىراق ئوقۇتقۇچىنىڭ بۇنى قوبۇل قىلىشى ناتايىن، چۈنكى بالا ئوقۇتقۇچىنىڭ ئەمەس، بەلكى شۇ ئاتا-ئانىنىڭ، ئوقۇتقۇچىنىڭ ئۇنى تىللاش، ئۇرۇش ھوقۇقى بولمايدۇ، يەنە كېلىپ بىر سىنىپتا نەچچە ئون ئوقۇغۇچى بار، ئاتا-ئانىلار بالىلىرىنى مۇشۇنداق تاپشۇرغىلى تۇرسا، بىر ئوقۇتقۇچى بۇنچە كۆپ ئوقۇغۇچىنىڭ ھۆددىسىدىن چىقالمايدۇدە. 2.ئوقۇتقۇچىنىڭ چۈشەنچە بېرىشىگە پۇرسەت بەرمەي، ئۆزىنىڭلا گېپىنى قىلىدىغان، ئوقۇتقۇچىنىڭ مەسئۇلىيەتسىزلىكىنى تەنقىدلەپ، بالىسى ئۈچۈن نېمە قىلىپ بەرگەنلىكىنى ئويلاپمۇ قويمايدىغان ئاتا-ئانا ئوقۇتقۇچىنىڭ ئەڭ چوڭ باش ئاغرىقى ھېسابلىنىدۇ. بۇنداق ئەھۋالدا ئوقۇتقۇچى ئاڭلىغۇچىغا ئايلىنىپ قالىدۇ-دە، ئاتا-ئانا بىلەن پىكىر ئالماشتۇرۇش پۇرسىتى بولمايدۇ. 3. ئوقۇتقۇچى ئاتا-ئانىلارنىڭ بارلىق مەسئۇلىيەتنى ئوقۇتقۇچى ۋە مەكتەپكە ئارتىپ قويۇشنى خالىمايدۇ. كۆپىنچە ئوقۇتقۇچىلارنىڭ كەسپىي ئەخلاقى ئىنتايىن ياخشى، ئوقۇغۇچىلىرىغا ناھايىتى مەسئۇلىيەتچان كېلىدۇ. ئەلۋەتتە ئارىدىن بىر قانچە مەسئۇلىيەتسىزلىرىمۇ چىقىپ قالىدۇ، ئاتا-ئانىلار بۇنى چىڭ تۇتۇۋېلىپ، بارلىق ئوقۇتقۇچىنى بىر تاياقتا ھەيدىسە بولمايدۇ. بۇنداق ئاتا-ئانىلار مەسىلىنى ئۆزىدىن، بالىسىدىن ئىزدەشنى خالىمايدۇ. 4.ئوقۇتقۇچىلار ئاتا-ئانىلارنىڭ ئۆزىگە مۇناسىۋەتلىك ھەر تەرەپلىمە ئۇچۇرلارنى تىڭتىڭلاپ، ئاخىردا ئائىلىسىدىكىلىرىنى سوراق قىلىشنى ياقتۇرمايدۇ. تور تەرەققىياتىغا ئەگشىپ مائارىپ خىزمىتىنىڭ ئاشكارىلىقىمۇ كۈچەيتىلىدى، ھازىر ئاتا-ئانىلار ئوقۇتقۇچىلارنىڭ تۈرلۈك ئۇچۇرلىرىنى كۈچىمەيلا تاپالايدۇ. ئاتا-ئانىلار ئوقۇتقۇچىدىن سەللا نارازى بولسا، دەرھال تېلېفون بېرىپ سوراق قىلىدۇ، ناۋادا ئوقۇتقۇچى تېلېفوننى ئالمىسا، ئۇنىڭ ئۆيىدىكىلىرىگە تېلېفون بېرىپ ئاچچىقىنى چىقىرىدۇ، بۇ ئوقۇتقۇچىلارنىلا ئەمەس، ھەممە كىشىنى بىزار قىلىدۇ. 5. ئوقۇتقۇچىلار يەنە نام-ئابرۇي قوغلىشىپ، ئۆزىدىن ئۇنى-بۇنى تەلەپ قىلىدىغان ئاتا-ئانىلاردىن بىزار. قىسمەن ئاتا-ئانىلار بالىسىنىڭ ئىمتىھان نەتىجىسى كۆڭۈلدىكىدەك بولمىسا، ئوقۇتقۇچىدىن بالىسىغا كۆڭۈل بۆلۈپ قويۇشنى، كۆپرەك ماختاپ رىغبەتلەندۈرۈپ تۇرۇشنى تەلەپ قىلىدۇ، ئەلۋەتتە ئاتا-ئانىلارنىڭ بۇ خىل كۆڭلىنى توغرا چۈشىنىشكە بولىدۇ، ئەمەلىيەتتە بالىنى رىغبەتلەندۈرۈش ئاتا-ئانىنىڭ ئىشى. مەنبەسى: شىنجاڭ قانۇنچىلىق گېزىتى.

mehriya

	ئاشۇنداق ئاتا -ئانىلارمۇ بارمىكەن ئاچچىقىنى ئوقۇتقۇچىدىن چىقىرىدىغان ؟ بىزلەر ئوقۇتقۇچىلارغا ئۆزۈرھالىق ئېيتىپ ، رەھمەت دەپ ھارمايمىز .

mahatjan

	بالىلارنى تەربىيلەشتە،ھەرقانداق ئەھۋالدا ئوقوتقۇچى بىلەن ئاتا-ئانىلار مەسئۇلىيەتنى تولوق ئۈستىگە ئېلىپ ئۆز ئارا ماسلىشىش كىرەك.ئۇنداق بولمىغاندا-----

ehrami

	3-سى بەك ياخشى گەپكەن.

huxhal

	بالىنى رىغبەتلەندۈرۈش ئوقۇتقۇچىلارنىڭلا ۋەزىپىسى ئەمەس  ، بەلكى ئاتا - ئانا بولغۇچىلرنىڭمۇ ۋەزىپىسى بولىشى كېرەك ، ئوقۇغۇچى بىر تۈپ كۆچەت ، ئۇنىڭغا مۇۋاپىق مىقداردا سۇ قۇيۇش ، ئوغۇت بېرىش  زۆرۈر ، ئەتراپلىق  تەربىيە ئوقۇغۇچىنى باراقسان ئۆسۈپ مېۋە بېرىدىغان دەرەخكە ئايلاندۇرىدۇ ، نامۇۋاپىق تەربىيە بالىلارغا ھەر خىل ناچار ئىللەتلەرنى يۇقتۇرۇپ ، ئۇلارنى قۇرۇتىدۇ ، شۇڭا ھەرگىزمۇ مەيلى مەكتەپ ياكى ئائىلىدە بولسۇن ، بالىلارنى ھاارەتلىمەسلىك ، كەمسىتمەسلىك كېرەك ، ھاقارەت ۋە كەمسۇندۇرۇش گوياكى بۇلغانمىدۇر ، بالىلارنى ھاقارەتلەش ، بىر تۈپ كۆچەت ھېساپلانغان بالىلارغا بۇلغانما قۇيۇپ بەرگەنلىكتۇر .

xopur

	ئاقماس پاراڭ.............

سەدەف

	ئەۋلاد تەربىيەسىنىڭ فورمۇلاسى يوق.مۇرەككەپ بىرجەريان.ئوقۇتقۇچىنىڭلا ئەمەس،مۇھىمى،ئاتا-ئانا بولغۇچىنىڭ ساپاسىغا تاقىلىدۇ.

kok-sultan

	ئائىلە باشلىقلىرى بىلەن ئوقۇتقۇچىلار مۇناسىۋىتىنىڭ ياخشى بولۇشى بىۋاستە تەلىم-تەربىيە ئۈنۈمىگە تەسىر كۆرسىتىدۇ.......

iltebir

	ئاساسى پەن ئوقۇتقۇچىلار بىلەن  قەرەرلىك ھالدا سۆھبەتلىشىپ تۇرغان ئاتا-ئانىلار، بالىلىرىنىڭ ئۆسۈپ يېتىلىشنى ياخشى كاپالەتكە ئىگە قىلىدۇ.