قەدىرلەيلى دېدارلىشىش پۇرسىتىنى
ھەسەنجان ئۆمەر
ئۇنتۇلاركەن ھاياتلىقتا ھەر-ھەر ئىشلار،
ئۇنتۇلماسكەن پەقەت-پەقەت ساۋاقداشلار.
چوڭقۇر ئىكەن ساۋاقداشلىق سۆيگۈ مېھرى،
جەلىپ قىلار شۇڭا ھامان ئۇنىڭ سېھرى.
******
ساۋاقداشلار بەختىن تېلەپ تېلەكلەردە،
ياندى ئوت بوپ دېدار ئىشقى يۈرەكلەردە.
ئايرىلغانغا چارەك ئەسىر بولۇپ قاپتۇ،
ئاللاھ دېدار پۇرسىتىنى دىلغا ساپتۇ.
قەدىرلەيلى دېدارلىشىش پۇرسىتىنى،
ساۋاقداشلىق مېھرىنىڭ كۈچ -قۇدرىتىنى.
*****
ئەسكە چۈشتى ئۆتكەن كۈنلەر كۆرۈشكەندە،
قۇچاقلىشىپ تەبەسسۇمدا كۈلۈشكەندە.
زەپمۇ ئەركىن،زەپمۇ تاتلىق ئوقۇش چېغى،
كۈلگەن ئىدى باراقسانلاپ ھايات شېخى.
يانچۇق قۇرۇق بولسىمۇ گەر،كۆڭلىمىز توق،
تاغدا كىيىك يايرىغاندەك يايرايتتۇق شوخ.
بىر نان تاپساق تەڭ بۆلۈشۈپ يېيىشەتتۇق،
ئالماشتۇرۇپ بەزەن كېيىم كېيىشەتتۇق.
يىغا ،كۈلكە ئورتاق ئىدى ھەممىمىزگە،
ئىناقلىقنى سالغان ئۇستاز سەمىمىزگە.
ئىلىم -ئىرپان ئوكيانىدا ئۈزۈشەتتۇق،
بىر نىيەتتە جاۋاھىرات سۈزۈشەتتۇق.
شىرىن خىيال قاينىمىغا چۆكۈشەتتۇق،
كەلگۈسىنىڭ پىلانىنى تۈزىشەتتۇق.
شۇنچە خۇشھال تاماملىدۇق ئوقۇشنىمۇ،
بىلىپ قالدۇق قانات كېرىپ ئۇچۇشنىمۇ.
خوش قىلسىمۇ ئۇستاز بولۇش ئىستەكلىرى،
ئەزگەن دىلنى ئايرىلىشنىڭ مىنۇتلىرى.
******
ئۇستاز بولۇش ئۇنچە ئاسان ئەمەس ئىكەن،
باغلىرىدا گۈل بىلەن ھەم باركەن تىكەن.
ئۇستاز بولۇپ يەتتۇق ئۇستاز قەدرىڭىزگە،
چىن يۈرەكتىن رەھمەت ئېيتتۇق ئەجرىڭىزگە.
*******
ئاق قەغەزگە گۈلدىن سۈرەت سىزىپ كەلدۇق،
قۇياش تەپتى مېھرىمىزنى بېرىپ كەلدۇق.
ئاتا قىلىپ ئۆزگىچە زوق يۈرەكلەرگە،
تالماس قانات چىقىرىپ شوخ تېلەكلەرگە.
******
ئاق سانچىلدى چاچ-ساقالغا،يۈزدە قورۇق،
ئەسلەپ باقساق يۈزلىرىمىز بوپتۇ يورۇق.
ئۆكۈنمەكلىك قورۇقلاردىن ھاجەت ئەمەس،
چىن ئىنسانلار ياشار مەغرۇر،ۋايىم يىمەس.
ۋارىس قىلىپ يېتىلدۈردۈق ئوغۇل-قىزنى،
ئۇلار چوقۇم تاپار،بىزلەر باسقان ئىزنى.
******
دېدارلىشىپ تۇرىشايلى پۇرسەت تېپىپ،
ئىناقلىقنىڭ گۈلى ياشنار پۇراق چېچىپ.
مەنبە؛ئىجادىيىتىم
يوللىغان ۋاقتى 2015-1-11 10:45:01 PM
