NASA تاشقىي پلانېتا سەپىرىگە ئائىت نادىر تام رەسىملىرىنى ئېلان قىلدى

bilimxumar

	NASA تاشقىي پلانېتا سەپىرىگە ئائىت نادىر تام رەسىملىرىنى ئېلان قىلدى بىلىمخۇمار 2015-يىلى 1-ئاينىڭ 9-كۈنى NASA مەركىزى ج پ ل (يەنى مېنىڭ ئىدارەم JPL) يېقىندا كەلگۈسىدە بىزنىڭ قۇياشتىن باشقا بىر يۇلتۇزنى ئوربىتلايدىغان تاشقىي پلانېتا ئۈستىدە ئېلىپ بېرىلىدىغان ساياھەتكە ئائىت 3 پارچە تام رەسىمىنى ئېلان قىلدى.  بۇ رەسىملەر ھازىرغىچە بايقالغان 3 دانە تاشقىي پلانېتىلارنىڭ ئەھۋالىغا ئاساسەن ج پ ل دىكى 3 نەپەر مۇتەخەسسىسلەر تەرىپىدىن سىزىلغان بولۇپ،  ئۇلارنىڭ ئۈستىدە ساياھەت قىلىش بولسا بىر خىل خىيالىي سنارىيىگە ۋەكىللىك قىلىدۇ.  يەنى، بۇ تام رەسىملىرىدە سىزىلغىنى 3 خىل خىيالىي كۆرىنىش بولۇپ، ئۇلارنى بىزنىڭ باش ئىدارىمىز بولغان دۇنياغا داڭلىق ئالىي مەكتەپ كالىفورنىيە تېخنولوگىيە ئىنستىتۇتىدىكى «تاشقىي پلانېتا ساياھەت ئىدارىسى» دەپ ئاتىلىدىغان بىر ئويدۇرما ئورۇن «باشقا دۇنيادىكى ساياھەت نۇقتىلىرى» دەپ تەشۋىق قىلىۋېتىپتۇ [1]. ئاشۇ 3 پارچە رەسىملەرنى سىزغان مۇتەخەسسىسلەرنىڭ بىرىنىڭ دېيىشىچە، ھازىرغىچە ناھايىتى كۆپ ساندىكى تاشقىي پلانېتىلار بايقالغان بولۇپ،   ھازىر بەزىلەردە خۇددى بىر كەلگۈسىدىكى دۇنيادا ياشاۋاتقاندەك تۇيغۇ بار ئىكەن.  شۇڭلاشقا ئۇلارنىڭ بۇ رەسىملەرنى سىزىپ چىقىشتىكى مەقسەتلىرىنىڭ بىرسى،  ساياھەت قىلىش سنارىيىسى ئىچىدە ھەر بىر تاشقىي پلانېتىنىڭ ئالاھىدىلىكلىرىنى تەكشۈرۈپ بېقىش ئىكەن.  بۇ رەسىملەرنى سىزغان 3 كىشى ج پ ل دىكى باشقا مۇتەخەسسىسلەر بىلەن يېقىندىن ھەمكارلىشىپ، رەسىمدە كۆرسىتىلگەن تاشقىي پلانېتىلارنىڭ ئالاھىدىلىكلىرىنى تولۇق گەۋدىلەندۈرۈشكە تىرىشىپتۇ.   تۆۋەندىكىسى ناسا بۇ قېتىم ئېلان قىلغان 3 پارچە تام رەسىملىرى. 1-رەسىم: «Kepler-16b» دەپ ئاتىلىدىغان تاشقىي پلانېتا ئىككى ئانا يۇلتۇزنى ئوربىتلايدۇ.  رەسىمدە بۇ پلانېتا بىر تاشلاردىن تۈزۈلگەن پلانېتا قىلىپ سىزىلغان بولسىمۇ، ئۇنىڭ ساتۇرنغا ئوخشاش بىر گازدىن تۈزۈلگەن پلانېتا بولۇپ قېلىش ئېھتىماللىقىمۇ بار.  بۇ پلانېتىنىڭ تېمپېراتۇرىسى قۇرۇق-مۇزنىڭ تېمپېراتۇرىسىغا ئوخشىشىپ كېتىدىغان بولۇپ، مىنۇس 100 گرادۇستىن مىنۇس 70 گرادۇسقىچە كېلىدۇ، دەپ پەرەز قىلىنماقتا.  شۇڭلاشقا ئۇنىڭ ئۈستىدە ھاياتلىق بولۇش ئېھتىماللىقى ئانچە يۇقىرى ئەمەس.  ئەگەر سىز مۇشۇ پلانېتا ئۈستىدە ماڭسىڭىز، سىز ھەر ۋاقىت ئۆزىڭىزنىڭ كۆلەڭگىسىدىن ئىككىنى تەڭلا كۆرىسىز.  بۇ پلانېتىنىڭ بىز بىلەن بولغان ئارىلىقى 200 نۇر يىلى بولۇپ، ئۇ 2011-يىلى 15-سېنتەبىر كۈنى بايقالغان.  بۇ پلانېتا ئىككى ئانا يۇلتۇزنى ھەر 229 كۈندە بىر قېتىم تولۇق ئايلىنىدۇ. 2-رەسىم: «HD 40307g» دەپ ئاتىلىدىغان تاشقىي پلانېتىنىڭ ماسسىسى يەر شارى ماسسىسىنىڭ 7 ھەسسىگە تەڭ بولۇپ، ئۇ بەزىدە «دەرىجىدىن تاشقىرى چوڭ يەر شارى» دەپمۇ ئاتىلىدۇ.  ئۇ 2012-يىلى 28-ئۆكتەبىر كۈنى بايقالغان بولۇپ، بىزدىن 44 نۇر يىلى يىراقلىقتا.  ئەگەر سىز ئۇنىڭ ئۈستىدە ماڭسىڭىز سىز دۇچ كېلىدىغان تارتىش كۈچى يەر شارى ئۈستىدىكىسىگە قارىغاندا كۆپ كۈچلۈك بولىدۇ.  يەنى، ئەگەر سىزنىڭ ئېغىرلىقىڭىز يەر شارى يۈزىدە 50 كىلوگرام كەلسە، مەزكۇر پلانېتىغا بارغاندا سىزنىڭ ئېغىرلىقىڭىز 350 كىلوگرامغا يېقىنراق كېلىشى مۇمكىن. 3-رەسىم: «Kepler-186f» دەپ ئاتىلىدىغان تاشقىي پلانېتىنىڭ چوڭلۇقى يەر شارىنىڭ چوڭلۇقىغا ئوخشاپ كېتىدىغان بولۇپ، ئۇ ھازىرغىچە بايقالغان تاشقىي پلانېتىلار ئىچىدىكى «جانلىقلار ياشىيالايدىغان رايون» ئىچىگە جايلاشقان تۇنجى پلانېتا بولۇپ ھېسابلىنىدۇ.  ھەر بىر يۇلتۇزنىڭ ئەتىراپىدا بەك ئىسسىقمۇ ئەمەس، بەك سوغۇقمۇ ئەمەس، شۇڭا سۇ مەۋجۇت بولۇپ تۇرالايدىغان  بىر رايون بار بولۇپ، ئاشۇ رايون «جانلىقلار ياشىيالايدىغان رايون» دەپ ئاتىلىدۇ.  ھازىر ناسا نۇرغۇن پۇل خەجلەپ تاپماقچى بولىۋاتقان تاشقىي پلانېتىلار ئەنە شۇنداق رايونغا جايلاشقان پلانېتىلار بولۇپ، مەن ھازىر ئاساسلىقى ئاشۇ مەقسەت ئۈچۈن ياسىلىۋاتقان ئالەم تېلېسكوپلىرىنىڭ تەتقىقاتلىرىنى قىلىۋاتىمەن.  «Kepler-186f» دېگەن تاشقىي پلانېتا  2014-يىلى 4-ئايدا بايقالغان.  بۇ پلانېتا ئوربىتلاۋاتقان رايون يەر شارىنىڭ ئوربىتىسىدىن سوغۇقراق بولۇپ، ئۇنىڭ ئانا يۇلتۇزىمۇ بىزنىڭ قوياشقا قارىغاندا بەكراق قىزىل-رەڭلىك كېلىدۇ.  شۇ سەۋەبتىن، ئەگەر بۇ پلانېتىنىڭ ئۈستىدە ئۆسۈملۈكلەر بار بولىدىكەن، ئۇلارنىڭ رەڭگىمۇ سەل قىزغۇچ كېلىدۇ.  شۇڭلاشقا يۇقىرىدىكى رەسىمدە ئۆسۈملۈكلەرنىڭ رەڭگى قىزغۇچراق قىلىپ سىزىلغان.    بۇ پلانېتىنىڭ بىز بىلەن بولغان ئارىلىقى تەخمىنەن 492 نۇر يىلى كېلىدۇ. يۇقىرىدىكى 3 پارچە رەسىم ج پ ل نىڭ ئىنگلىزچە «PLanetQuest» دەپ ئاتىلىدىغان تور بېتىدە ئېلان قىلىنغان بولۇپ [2]، تۆۋەندىكى رەسىمنى مەن ئاشۇ تور بېتىدىن كېسىپ ئالدىم: 4-رەسىم 5-رەسىم: ئانا يۇلتۇزىدىن ئىككىسى بار، ئىنگلىزچە «Kepler-16b» دەپ ئاتىلىدىغان تاشقىي پلانېتىنىڭ يەنە بىر كۆرۈنىشى.    بۇ رەسىمدىكى قىزغۇچ رەڭلىك شار بىرىنچى يۇلتۇزنى، سېرىق رەڭلىك شار ئىككىنچى يۇلتۇزنى، بىنەپشە رەڭلىك شار بولسا پلانېتىنى كۆرسىتىدۇ. «نۇر يىلى» دېگەن بىرلىكنىڭ ئېنىقلىمىسى: «نۇر يىلى» دېگىنىمىز ئاسترونومىيىدە ئىشلىتىلىدىغان بىر ئارىلىق بىرلىكى بولۇپ، ئۇ نۇرنىڭ بىر يىل ۋاقىت ئىچىدە باسىدىغان مۇساپىسىنى كۆرسىتىدۇ.  كائىناتتىكى جىسىملارنىڭ ئارىلىقلىرى بەك يىراق بولغاچقا، ئۇنداق ئارىلىقلارنى بىز ئادەتتە ئىشلىتىدىغان ئۇزۇنلۇق بىرلىكى «مېتىر»، «كىلومېتىر» بىلەن ئۆلچەپ بولغىلى بولمايدۇ. مەسىلەن، بىزگە ئاخشىمى ئاسماندا كۆرۈنىدىغان يۇلتۇزلارنىڭ ئىچىدىكى بىزگە ئەڭ يېقىن يۇلتۇزنىڭ بىز بىلەن بولغان ئارىلىقى 4.26 نۇر يىلى بولۇپ، بىر نۇر يىلى تۆۋەندىكىدەك ئۇزۇنلۇققا تەڭ: بىر نۇر يىلى دېگىنىمىز (365 كۈن) x (24 سائەت) x (60 مىنۇت) x (60 سېكۇنت) x (300000 كىلومېتىر/سېكۇنت) بولۇپ، بۇ يەردىكى ئەڭ ئاخىرقى سان نۇرنىڭ تېزلىكىدىن ئىبارەت. يەنى نۇر بىر سېكۇنتىغا 300 مىڭ كىلومېتىر ئارىلىققا ماڭىدۇ. يۇقىرىقى سانلارنى ئۆز-ئارا كۆپەيتسەك (يۇقىرىدىكى « x » كۆپەيتىش بەلگىسى): مېتىر 9،460،730،472،580،800 = بىر نۇر يىلى قۇياش بىلەن يەر شارىنىڭ ئارىلىقى 8.3 نۇر مىنۇتى كېلىدۇ.  يەنى، قۇياشتىن چىققان نۇر 8.3 مىنۇتتا يەر شارىغا يېتىپ كېلىدۇ. پايدىلىنىش ماتېرىياللىرى: [1] NASA Makes Vintage Posters for Futuristic Travel http://www.newsweek.com/nasa-mak ... istic-travel-297674 [2] Planet Quest http://planetquest.jpl.nasa.gov/

izdinish

	مۇئەللىم ئەسسالامۇئەلەيكۇم ، ئەلى قۇربان ، زىۋىدە خانىم توغىرلىق تۈگىمەس مۇنازىرىلەر ئۈستىگە مۇشۇنداق ياخشى يازمىڭىزنى تەقدىم قىپسىز ، ئالىم دېگەن سىزدەك بولسا ، قانچە كۆپ نەرسە بىلسىمۇ كىچىك پېئىللىق بىلەن بىز بىلەن مۇناسىۋەت قىلسا ئاندىن بىزمۇ سىزدەك چوڭ ئىشلارنى قىلغان كاتتا ئالىمنىڭمۇ ئەسلى بىزدەك ئاددىي ئادەم ئىكەنلىكىڭىزنى ھېس قىلغىنىمىزدا ــ بىزدىمۇ ئۆزلۈكىمىزدىن زور ھەرىكەتلەندۈرگۈچ ئىنىرگىيە پەيدا بولماسمېدى ! ھازىرقى بەزى يېتىشىۋاتقان «داڭلىق» لىرىمىز بەكلا ئالاھىدە بولۇۋالغاندەك تۇرىدۇ ! ئۇلارغا پىكىر بەرسەك غاجىغانلىق بولىدىكەن ، قاراپ ئولتۇرساق ۋىژدان قاينىتىدىكەن ، بىرەر يەرگە ئەرز قىلاي دېسەك قائىدىگە ، ئەخلاققا خىلاپ ، قانۇنغا خىلاپ ئەمەسكەن ! ئەمدى سىزدەك بىرەر زات ئوتتۇرىغا چىقىپ مۇشۇ مۇنازىرىلەرگە ئەتراپلىق بىر چۈشەنچە بېرىپ ، ئەلى ، مۇئەللىم ۋە زىۋىدە مۇئەللىم ، يەنە بىز خەلقنىڭ ئوتتۇرىدىكى ، ئۇقۇشماسلىق تەرەپۋازلىق ، ۋە ئۆزىدىن ھالقىپ كېتىشنىڭ يامان تەسىرىنى بىزگە ئەتراپلىق بىلدۈرۈپ قويامدىكى دېگەن ئۈمىدتىمەن ! قىممەتلىك ۋاقتىڭىزنىڭ ئىسراپ بولۇشىغا ياراتقۇچىمىز ئەجىر بەرگەي ! بىلىشىمچە سىز ئۇنىۋېرسال بىلىمگە ئىگە ئۇستاز ، سىز يەنە مېنىڭ بىلىشىمچە پىسخىكىغا دائىر بىلىملەرگە پۇختا ۋە ئۇيغۇرنىڭ پىسخىكىسىنى تەتقىق قىلىشقا ئەڭ ئاۋۋال كىرىشكەن ، شۇڭا بۇ جەھەتتە سىزدىن ئىناۋەتلىك ، سىزدىنمۇ مۇۋاپىق زات بولمىسا كېرەك ، تەكلىپىمنى قوبۇل قىلىشىڭىزنى تۆۋەنچىلىك بىلەن سورايمەن !

sardor0908

	بىلىمخۇمار ئاكا يىڭى يىلدىن كىيىنكى ئېسىل تېمىڭىز يەنە باشلاندى . رەھمەت سىزگە .يىڭى يىللىق سالام يوللىيالماي قالدۇق .بۇ تېمىڭىزنى بەك ياقتۇردۇم .مەن مۇشۇنداق ئاستىرونىيە ،تاشقى پىلانت جانلىق دىگەن سۆزلەر بار ماقالىلەرنى قالدۇرمايمەن .كىيىنمۇ مۇناسىپ تېمىڭىزنى ئايىمىغايسىز .     ئۈستىدىكى مۇنبەردىشىمىز دىگەندەك .سىزنىڭ ھازىرقى ئۇيغۇر جەمىئىتىدىكى ئەلى قۇربان قىزغىنلىقىغا قانداق قارايدىغانلىقىڭىزنى ،ئامىرىكىدا پىسخىك يىتەكچىسى بىلەن ،سىز ئاڭلىغان كۆرگەن ئەلى قۇربان ئوتتۇرىسىدىكى پەرق ۋە ئوخشاشلىقلار ھەققىدە توختىلىپ ئۆتكەن بولسىڭىز .چۈنكى ،بۇ تالاش-تارتىش بىرەر ھەپتە ،بىرەر ئاي ئىچىدە جىمىپ قالمايدۇ .كىلەر قىتىملىق ئەلى قۇربان لىكسىيى باشلانسا يەنە مۇشۇنداق دوللانلار چىقىدۇ .شۇڭا بىز جۈملىدىن ئۇيغۇر تور ئەھلى نوپۇزلۇق بىر كىشىنىڭ سۆزىگە مۇھتاج .ئەلۋەتتە بۇ مىنىڭ ۋە مەندەك نۇرغۇن كىشىلەرنىڭ ئارزۇسى دەپ قارايمەن .

izqel

	يېڭى يىلدىن كىيىنكى يېڭى يازمىڭىزدىن خۇش بولدۇق. ئىككىنجى رەسىمدىكى 40307g دىگەن ساندىن كىيىنكى ھەرىپنىڭ مەنىسى گىرامنى ئىپادىلەمدۇ؟

Taxnayurak005

	يېڭى يىلىڭىزغا مۇبارەك بولسۇن، يېڭى يىلدا تىنىڭىزگە سالامەتلىك، يېڭى ئۇتۇقلار سىزگە يار بولسۇن.

bayawat

	ئەسسالامۇئەلەيكۇم ئەركىن سىدىق ئەپەندىم ،  سىزنىڭ مۇشۇنداق  ئىدارىڭىزنىڭ  تەتقىقات نەتىجىرلىرنى تورلاردا ئىلان قىلۋاتقانلىقىڭىزنى ئىدارىڭىزدىكىلەر بىلەمدۇ؟ سىلەرنىڭ ئىداردىكى تەتقىقات نەتجىسنى سىر تۇتىدىغان ئىشلارمۇ بارمۇ ياكى  بارلىق نەتىجىنى ئۇچۇق ئاشكارا ئىلان قىلامدۇ؟

bilimxumar

	izqel يوللىغان ۋاقتى  2015-1-9 07:14 PM يېڭى يىلدىن كىيىنكى يېڭى يازمىڭىزدىن خۇش بولدۇق. ئىككى ... ۋەئەلەيكۇم-ئەسسالام! بۇ مېنىڭ يېڭى يىل كىرگەندىن كېيىنكى ئىككىنچى يازمام بولىدۇ.  بىرىنچىسىنى بۇ يەردىن كۆرەلەيسىز: بىلىمخۇمار: بالىڭىزغا توغرا كۆيۈڭ http://bbs.izdinix.com/thread-61626-1-1.html سىزنىڭ فىزىكىدىن قانچىلىك خەۋەرىڭىز بار، مەن ئۇنى بىلمەيمەن.  يەر شارى فىزىكىسىدا مۇنداق بىر سانلىق مىقتار بار: g = 9.8 m / sec^2 بۇ يەر شارىنىڭ تارتىش كۈچى كەلتۈرۈپ چىقىرىدىغان «تېزلىنىش» بولۇپ، ئۇ پەقەت يەر شارىغىلا ماس كېلىدۇ.  يۇقىرىدا تىلغا ئېلىنغان تاشقىي پلانېتىنىڭ ماسسىسى يەر شارى ماسسىسىنىڭ 7 ھەسسىسىگە تەڭ بولغاچقا، ئۇنىڭدىكى تېزلىنىشمۇ « g» نىڭ 7 ھەسسىسىگە تەڭ بولۇپ، مېنىڭچە بۇ يەردىكى «7g » شۇنىڭغا ۋەكىللىك قىلىدۇ.

bilimxumar

	Taxnayurak005 يوللىغان ۋاقتى  2015-1-9 08:10 PM يېڭى يىلىڭىزغا مۇبارەك بولسۇن، يېڭى يىلدا تىنىڭىزگە س ... رەھمەت! بىرگە بولسۇن!

heqqaniyet

	ئەلىگە ئوخشاش مەنمۇ گېپىمنى لېنتىغا ئېلىپ توردا تارقىتىدىغان يەرگە يەتتى. بۇ ئىشقا يەنە قايسى بىر بىلەرمەن ئارلىشىدىكەن مەن ھەققانىيەتمۇ يانمەيمەن. بىلىپ قويۇڭلار. ئەلى خېلى يۈز بېرىپتۇ سىلەرگە، ھەقىقەت ئۈچۈن سوققان يۈرەكنى توسىاڭ ياكى ھەقىقەتچىلەر ئۆلىمىز ياكى ھەقىقەت تىكلىنىدۇ. باشقا نەتىجە يوق!

bilimxumar

	izdinish يوللىغان ۋاقتى  2015-1-9 02:55 PM مۇئەللىم ئەسسالامۇئەلەيكۇم ، ئەلى قۇربان ، زىۋىدە خان ... ۋەئەلەيكۇم-ئەسسالام ئىزدىنىش ئۇكام! سەمىمىي سۆزلىرىڭىزدىن ناھايىتى سۆيۈندۈم. رەھمەت!   ئەلى قۇربان ئەپەندىمنىڭ لېكسىيىسى بىلەن زىۋىدە خانىمنىڭ ئۇنىڭغا قارىتا يازغان يازمىسىنى چۆرىدىگەن ھالدا تورلاردا ئېلىپ بەرىلىۋاتقان بەس-مۇنازىرىلەردىن مېنىڭمۇ بىر ئاز خەۋىرىم بار بولۇپ، مەن سىزگە ئوخشاش بىر قىسىم ئۇكىلارنىڭ كۆڭلى نېمە ئۇچۇن تىت-تىت ۋە يېرىم بولىدىغانلىقىنىمۇ بىر ئاز چۈشىنىمەن.  ھەمدە سىلەرگە چوڭقۇر ھېسداشلىقىم بار.  مەن بۇ مەسىلە ئۈستىدە بىر ئايرىم تېما يېزىش كېرەكمۇ-يوق، دېگەن ئىش ئۈستىدە بىر ئاز ئويلىنىپ باقاي.   مەن ئۆزەم ھازىرقى ئەھۋالدىن بىر تەرەپتىن خوشال بولسام، بىر تەرەپتىن ئۇنىڭغا بىر ئاز ئېچىنىۋاتىمەن. مېنىڭ خوشال بولغان تەرىپىم، بىز ئۈچۈن ھازىر ئاشۇنداق لېكسىيە سۆزلەش پۇرسىتىنىڭ مەۋجۇتلۇقى، ۋە ئۇنىڭدىن بەزى قېرىنداشلىرىمىزنىڭ ئۈنۈملۈك پايدىلىنىۋاتقانلىقى بىر چوڭ ئامەت.  ئۇنى ھەممىمىز قەدىرلىشىمىز، ئايىشىمىز، قوغدىشىمىز، ۋە بۇ جەھەتتىكى يولىمىزنى بارغانسېرى كېڭەيتىپ مېڭىشىمىز كېرەك.  ھەرگىزمۇ چاپاقنى ئېيتىمەن دەپ كۆزنى قارغۇ قىلىپ قويىدىغان ئىشنى قىلماسلىقىمىز كېرەك. ھەر قانداق ئىش ئەڭ دەسلىپىدە ئۇنچىۋالا مۇكەممەل بولۇپ كەتمەيدۇ.  ئەڭ دەسلىپىدە ئادەم بىر ئىشنىڭ ھەممە تەرىپىگە باراۋەر يېتىشىپ كېتەلمەيدۇ.  شۇڭا يېڭى ئىشنى باشلىغان بىر ئادەمگە بىر تەرەپتىن ئۆز ئىشىنى داۋاملاشتۇرۇپ، يەنە بىر تەرەپتىن ئۇنىڭ ھەممە تەرەپلىرىنى مۇكەممەللەشتۈرۈش پۇرسىتى بېرىش كېرەك.  ھېچ قانداق ئادەم مۇشۇنداق بىر تەدرىجى تەرەققىيات يولىنىڭ چېكىنىڭ سىرتىغا چىقىپ كېتەلمەيدۇ. ھەر بىر مەسىلە ئۈستىدە كۆپ ئادەمنىڭ كۆپ خىل كۆز-قارىشى مەۋجۇت بولىدۇ.  شۇڭا ئۇلارنىڭ ئۆز-ئارا ئوخشىمايدىغان كۆز-قاراشلارنى ئوتتۇرىغا قويىشى، بىر نورمال ئەھۋال.  ئۇنىڭغا بىئارام بولۇشنىڭ ھاجىتى يوق.  بولۇپمۇ مەن زىۋىدە خانىمنىڭ يازمىسى ئۆز-ئۆزىمىزنى توغرا تەربىيىلىشىمىز ئۈچۈن بىر زۆرۈر ۋە قىممەتلىك ماتېرىيال، دەپ ئويلايمەن. ئوخشاش بىر گەپنى قىلىشنىڭ، ئاڭلىغۇچىلارغا ئوخشاش بىر ئۇچۇرنى يەتكۈزۈشنىڭ ھەر خىل ئۇسۇللىرى بار.  چوڭ ئاممىۋى سورۇنلاردا لېكسىيە سۆزلەش ئارقىلىق باشقىلارنى يېتەكلەش رولىنى ئويناۋاتقان قېرىنداشلىرىمىزنىڭ ئۆزىگە خاس لېكسىيە سۆزلەش ئۇسلۇبى بار بولۇشى بىر مۇھىم ۋە قىممەتلىك ئەھۋال.  باشقىلىرىمىز ئۇنىڭغا ھۆرمەت قىلىشىمىز، شۇنداقلا ھەممىمىز ئۆز ئالاھىدىلىكىمىزنى تولۇق جارى قىلدۇرۇشقا، دورامچىلىق قىلماي، مۇستەقىل ئىش كۆرۈشكە تىرىشىشىمىز كېرەك.  شۇنىڭ بىلەن بىللە، بىز بۇنداق سورۇنلاردا مىللىتىمىزنىڭ ئېسىل ئەنئەنىسىگە ۋارىسلىق قىلىشىمىز، مىللىتىمىزنىڭ گۈزەل ئەخلاقىنى نامايان قىلىشىمىز، شۇنداقلا دۇنيادىكى ئەڭ تەرەققىي قىلغان ئەللەردىكى كەسىپ ئەھلىلىرىنىڭكىگە ئوخشاش يۇقىرى سۈپەتلىك كەسپىي ئەخلاقنى ئۆزىمىزگە ئۆلچەم قىلىشىمىز كېرەك.  ئۇنداق قىلمىساق بىز لېكسىيە ئاڭلىغۇچىلارنى ئەخلاق جەھەتتە يۇقىرىغا يۈكسەلدۈرەلمەيمىز.  ئۇنىڭدىن باشقا بىر قىسىم ئورۇنسىز ۋە پايدىسىز ئەھۋاللارنىمۇ كەلتۈرۈپ چىقىرىمىز. ھازىرچە ئېسىمگە كەلگەن گەپلەرنى مۇشۇنچىلىك يېزىپ تۇراي.  ئاخىرىدا ماڭا بىر ياخشى تەكلىپ بەرگىنىڭىزگە رەھمەت ئېيتىمەن.