ئوغۇزغا تويمىغان بوغۇز-ئەفغانىي

Elrexid

	‏         ئوغۇزغا تويمىغان بوغۇز           ئابدۇرەھمان ئەفغانىي    ...    قۇربان ھېيت يېقىنلاپ قالدى.    كىيىم-كىچەك زاۋۇتى كېرەكسىز دۆۋە-دۆۋە رەختلەرنى 300 يۈەن بىلەنلا چىرايلىق يۈز قۇر لىباس قىلىپ،بازارغا سالدى.‏ئۇلارنى بىر يايمىچىغا 1500يۈەنگە توپ سېتىپ بەرگەنىدى،يايمىچىنىڭ ‏ئاغزى قۇلىقىغا يەتتى.‏زاۋۇت ‏ئىشچىلىرىمۇ چاندۇرماي قاقاھلاشتى.يايمىچى ھەر بىر لىباسنىڭ باھاسىنى 49 يۈەن ‏بېكىتتى.خېرىدارلار شۇ ياققا يولىدى.يايمىچى ‏ئۆزىنىڭ ‏ئۇستا ئاراتۇرلىقى بىلەن يايمىلىرىنى بىردەمدىلا سېتىپ تۈگەتتى.باجچىلار كەلدى.يايمىچىدىن 100يۈەن سورىدى.يايمىچى خۇشامەت قىلىپ 150يۈەن تۆلىۋەتتى-دە،ئۆيىگە راۋان بولدى.شۇ سەۋەب,باجچىلار كېيىنكىسىنىڭ قېشىغا "200يۈەن!" دەپ باردى.يايمىچى ‏ئۆيىگە كېلىپ،دارامەتلىرىنى قانماي-قانماي سۆيۈشكە باشلىدى.دەرۋازا قېقىلدى.بىر ھاسىلىق دىۋانە.‏ئۇنىڭغا بىر يۈەن بېرىۋەتسىلا،دۇ‏ئاسىغا نا‏ئىل بولالايتتى.‏ئەمما تىللاقلىق ھەيدىۋەتتى.شۇ چاغدا،يىرتىق كىيىملىرى مەينەت،‏ئوماق يۈزلىرى توپا ‏ئىككى قىز يايمىچىنىڭ ‏ئالدىغا يۈگۈرۈپ كېلىپ:    ___دادا،‏ئۈچ كۈن ‏ئۆتسە قۇربان ھېيت!بىزگە ‏ئاياغ-‏ئېگىن ‏ئېلىپ بەرمەمسەن؟___دېدى.    ___پۇل بولسا ‏ئان ‏ئالغىلى بولىدۇ ‏ئېگىن دېگەننى.    ___سەندە بۇ يىل پۇل جىققۇ،دادا!‏ئۆتكەن يىلى يېنىڭدا پۇل شۇقەدەر ‏ئاز تۇرسىمۇ،ھېيتنىڭ يۈزى دەپ بىزگە،‏ئانامغا يېڭى نەرسىلەرنى ‏ئېلىپ بەرگەنتىڭ!‏ئاداشلىرىمىزنىڭ ‏ئاتا-‏ئانىسى ‏ئۇلارغا شۇنداق چىرايلىق كىيىملەرنى ‏ئېلىپ بېرىپتۇ.سەنمۇ ‏ئېلىپ بەرگىنچۇ،دادا!    ___ۋايجان ن،تولا كاپشىماي يوقىلىشە ماڭ!يا شۇلارغا بالا بولۇۋېلىش بېرىپ.جايى بار پۇللار ‏ئۇ مەندىكى.    بالىلار خاپا بولۇشۇپ ‏ئانىسىنىڭ باغرىغا يىقىلدى.‏ئانا ‏ئۇلارغا:    ___يىغلىماڭلار،مەلىكىلىرىم!سېلەر يىغلىساڭلار،مېنىڭ يۈرىكىممۇ ياش تۆكىدىكەن.‏مەن ‏ئەتە مۇشۇ كىيىمىڭلارنى پاك-پاكىز يۇيۇپ،تىكىپ بېرەي،بولامدۇ-ھە؟___دەپ تەسەللى بەردى.    دادا گۇگۇمدا ‏ئۆيدىن چىقتى.‏بىر تۈڭلۈكتىن ‏ئولجىنى مارىدى.‏ئاندىن قىچقاردى.    ___تېز كەت!___دېدى چوكان ‏ئاياللارغا خاس ناز بىلەن يايمىچىنى ھەيدەپ.    ___نەگە كېتىمەنۇي،يۈزسىز خېنىم؟    ___نەگە كەتسەڭ شۇ يەرگە كەت!باشقىلار كۆرۈپ قالسا...    ___مەيلى ‏ئەمەسمۇ!    يايمىچى يانچۇقىدىن بەش تال قىزىل پۇلنى چىقىرىپ،چوكاننىڭ ‏ئالدىدا گىچىڭلاتقىلى تۇردى.‏ئولجا ‏ئېرىدى.چوكاننىڭ ‏ئۇزۇندىن بېرى جىمىپ قالغان ناز-كەرەشمىسى پۇلنى كۆرۈپ بىردىنلا خۇيلىنىپ كەتتى.توغرا،ئۇ ‏ئەركەككە تويۇپ كەتكەن بىلەن،پۇلغا تېخى تويمىغان...    يايمىچى ‏ئۆيىگە بامدات پەيتىدە كەلدى.كېلىپلا خورەككە چۈشتى.بۇ ھالنى كۆرگەن ‏ئانا ‏ئېغىر خورسىندى.يايمىچى زاۋالدا ئويغىنىپ،قاۋاقخانىغا كەلدى.بىر مۇنچە بوتۇلكىلارنى بوشلىدى.بوغالتىر ھېسابنى ‏ئىككى ھەسسە قىلىپ بوغدى.يايمىچىنىڭ «مەرد» قوللىرى ‏ئىككىلەنمەستىن تاۋكاغا پۇل تاشلىدى.    يولدا بىر ‏ئوغرى يايمىچىنىڭ چۆنتىكىنى نىشان قىلدى.‏ئوغرى ‏ئىشنى پۈتتۈردى.مەست-‏ئەلەس يايمىچى بۇنى تۇيمىدى.قىسقىسى،ئۆزىنىڭ قاق-سەنەم بولۇپ كەتكەنلىكىنى تۇيالمىدى.    يايمىچى يولنىڭ ھېلى ‏ئۇ چېتىدە،ھېلى بۇ چېتىدە دەلدەڭشىپ مېڭىۋاتاتتى،ھەمساتتا بىر ماشىنا ‏ئۇچقاندەك كېلىپ ‏ئۇنى سوقىۋەتتى.شوپۇر ‏ئاقىۋەتتىن قورقتى.‏ئەتراپقا باقتى.‏ئىنسى-جىن يوق ‏ئىدى.ھاپىلا-شاپىلا قاچتى.    كېتىۋاتقان بىر كىشى يايمىچىنى كۆرۈپ،‏ئۇنىڭ قېشىغا كەلدى.‏ئاۋۋال يانچۇقىنى ‏ئاختۇردى.‏ئاندىن غەزەپتىن:«ھۇ قەلەندەر!» دەپ قارغىۋەتتى.‏ئۇنىڭغا نەدىن كەلگەن ‏ئىنسابكىن،120گە تېلىفۇن ‏ئۇرۇپ،ئەھۋالنى بايانات ئەيلىدى.كېيىنلا «بىكاردىن-بىكار» سەرپ بولغان توققۇز پۇڭىغا ‏ئىچى قەۋەت كۆۋرىدى.قۇتقۇزۇش ماشىنىسى دورا يەۋالغان بېلىقتەك ‏ئالدىرماي نەق مەيداندا ھازىر بولدى.دۇختۇرلار يايمىچىنى دۇختۇرخانىغا ‏ئاپىرىپ،يارىلانغان يەرلىرىنى بىر قاتار تەكشۈرۈپ چىقتى.    ‏ئەتىسى يايمىچى مەستلىكتىن يېرىم يېشىلگەن ھالەتتە ھوشىغا كەلدى.ھوشىغا كېلىپلا يانجۇقىنى مالتىلاپ،خۇددى چار يىلان چېقىۋالغاندەك چىرقىراپ كەتتى:«ۋاي پۇلۇم!».ياتاققا بىر دۇختۇر كىردى.ھەمدە بىر قەغەزنى يايمىچىنىڭ ‏ئالدىغا چىرايلىققىنە قۇيۇپ,كۈلۈمسىرەپ بىر ياققا ‏ئۆتتى.يايمىچى ‏ئاغرىۋاتقان قوللىرى بىلەن قەغەزنى ‏ئالدى ۋە يوغانغىنە يېزىلغان سانلارغا كۆزى چۈشتى:3000يۈەن.    يايمىچىنىڭ بېشىنى بۇس ‏ئورىدى.‏ئۇنىڭ سۆڭەكلىرىدىن تۆت-بەشى خېلى قاتتىق سۇنغان،شۇ تاپ ‏ئۇ چىدىغۇسىز ‏ئاغرىقنىڭ چاڭگىلىدا ‏ئېچىنىشلىق ‏ئىڭراۋاتىدۇ.دۇختۇرلار ‏ئالدىن پۇل تۆلەنمىسە،داۋالاشنى باشلىمايدىغانلىقىنى ‏‏ئېيتقان.رېئاللىق رەزىل!‏ئۇلارغا يايمىچىنىڭ جېنىدىن كۆرە پۇلى بەكرەك لازىم.    يايمىچىنىڭ كۆيۈمچان،بىچارە خوتۇنى يېقىن-يورۇقلارنىڭكىگە قەرز سوراپ باردى.‏ئۇنىڭ چىرايىغا ھېچكىم قارىمىدى.قارىسىمۇ ھېيتنىڭ كېلىۋاتقانلىقىنى،ھېيتتا ھەممە ‏ئادەمگە پۇل كېرەك بولىدىغانلىقىنى باھانە ‏ئەتتى.بىر قەدىناسى بار ‏ئىدى.‏ئۇ بەجايىكى جېنى تېنىدىن جۇدا بولغاندەك،تەستە مىڭ يۈەننى سۇندى.داۋالاش ‏ئىككى كۈنلا داۋام ‏ئەتتى.    ‏ئايالنىڭ قەدىناسى دەرۋازىنى قاقتى.«پۇل!» دېدى.‏ئايال تىرنىقىنى كوچىلىدى...      ●●●          ●●●          ●●● جاھاننامە روجىكىدىن 21-‏ئەسىرنىڭ ‏ئۇشبۇ كارتېنلىرىنى كۆرگەن دانىشمەن جاھان،زامان،ئىنسان...ھەممىسىنىڭ شەخسىيەتچىلىكىگە ‏ئۆكۈنمەي،ئېچىنماي ‏تۇرالمىدى.‏ئۇ كۆككە قاراپ نالە ‏قىلدى:    ---‏ئېھ بارچە قىسمەتنىڭ شاھىتى پەلەك،قېنى دەپ باققىنە!بۇ جاھان نېمە بولۇپ كەتتى؟زاۋۇت،يايمىچى،باجچى،جۇۋان،بوغالتىر،‏ئوغرى،شوپۇر،ئىنسابلىق،دۇختۇر،تۇغقان،قەدىناس...ھەممىسىلا پۇل دەيدىكەنغۇ؟!‏ئۇلار نېمىشقا پۇلنى دەپلا سەمىمىيلىكتىن،ئىپپىتىدىن،ۋىجدانىدىن،ئىنسابىدىن،بۇرچىدىن،قېرىنداشلىقتىن تانىدۇ؟ياكى پۇل شۇقەدەر قۇدرەتلىك نېمىمۇ؟بۇلار زادى نېمىشقا؟    ---‏ئوغۇزغا تويمىغان بوغۇز پۇلغىمۇ تويمايدۇ-دە!---دەپ گەپنى خۇلاسىلىدى پەلەك.              2014-يىلى ئىيۇننىڭ 18-كۈنى،يۇرۇڭقاش

azizyaxa

	ئەجەپ ياقتى ما تىما ماڭا تالانىت باكەن سىزدە  , يېزىڭ  ,يېزىڭ كۆپلەپ يېزىڭ سىزدەك يازغۇچىلا ئاز بىزدە بىزدە شۇئارچىلار كۆپ

TATLIHIM

	تېمىسىدىنلا ئادەمنى قىزىقتۇرىدىكەن ،،،ياخشى يېزىپسىز ،،تېخىمۇ تىرىشىڭ ! ئىشلىرىڭىزغا ئامەت،تېنىڭىزغا سالامەتلىك تىلەيمەن !

ehrami

	ئاجايىپ قاملىشىپتۇ. ئوغۇزغا تويمىغان بوغۇز

alhumar137

mehriya

	ياخشى چىققان ئەسەر ! نىمىسىنى دېسەم بۇلا ، دېمىسىمۇ ھەممە ئىشنىڭ يۈز بېرىشىگە شۇ ئۆزىمىز سەۋەپچى بۇلۇپ قالىمىزكەن ! تېمىسى راستلا بەك ياخشى قۇيۇلۇپتۇ !

Elrexid

	پىغانىي مېنىڭ بۇرۇنقى تەخەللۇسۇم،ئ‍ۆتكەندە باغداش تورىغا يوللىغان ئ‍ىدىم،ھازىر قايتا تەھرىرلەپ مىسرانىمغا يوللىغان.

babur99

	ساندۇقتا ساقلاپ يۈرمەي بالدۇرراق يوللىغۇلۇقتى بۇنداق ئېسىل تېمىنى ! تور يازغۇچىلىرمىز بىر-بىرىدىن يېڭىچە ئۇسلۇبلار بىلەن بىر -بىرىدىن ئۆزگىچە ئەسەرلەرنى يېزىۋاتىدۇ . ئاپىرىن !