مەكتەپتىكى مەكتۇپلار (3)

Elrexid

	مەكتەپتىكى مەكتۇپلار (3)             ئابدۇرەھمان ئەفغانىي               ئۈچ بۇرجەك ھايات                   (ئېپىك نەسر)      كومپيۇتېر مېھرىدىن مېھرىمنى ئاران ئۈزۈپ،ئېرىنچەكلىك بىلەن مەكتەپكە ماڭدىم.ئۆيىمىز بىلەن مۇساپىسى يەتمىش چاقىرىم كېلىدىغان داڭلىق مەكتىپىم ھەپتىدە بىر قويۇپ بېرىدىغان ياتاقلىق مەكتەپ ئىدى.دادام بەرگەن ھەپتىلىك خەجىمنىڭ تېڭى يولدىلا تۈگىدى،نېمىگە خەجلىگەنلىكىمنى ئۆزۈممۇ ئۇقۇپ بولالمايمەن.      ئادىتىم بويىچە ئاقساراق تاكسىدىن بىرنى خىللاپ،شۇنىڭدا كېتىۋاتىمەن.ھەربارى تاكسىغا ئولتۇرغىنىمدا،يولنىڭ ئىككى تەرىپىگە رەتلىك سەپلەنگەن دۇكان-ساراي،دۇختۇرخانا-تاماقخانىلار ماڭا خۇددى خان ئالىيلىرىنى قارشى ئالغىلى چىققان ئەمىر-ئۆمەرا،لەشكەرى-جاللاتلارنى ئەسلىتەتتى.شۇ ئىمارەتلەرنىڭ چوققىسىغا قونۇۋالغان تۈمەن رەڭلىك ۋىۋىسكىلار مەن ئۈچۈن ئاشۇ كۈتۈۋالغۇچىلارنىڭ خۇشخۇيغىنا چىراي ئىپادىسى ئىدى.ۋىۋىسكا بايانىدىكى شېرىن-سۇخەن سۆزلەرچۇ تېخى،ئۇلار نەق ئاشۇ ئەمىر-ئۆمەرا،لەشكەرى-جاللاتلارنىڭ خۇشامەتگۇيلىقى.شۇ ۋەجىدىنمۇ،مەن خاس تاكسىغا چىققىنىمدا،ئۆزۈمنى ئون ئىككى غۇلاچلىق كادىلەك ماشىنىدا كېتىۋاتقان كاتتا مەرتىۋىلىك پادىشاھ سانايتتىم.ۋاي نېمىلەرنى دەپ كەتتىم؟!ھې-ھې...كۆرگىنىڭلاردەك،ئويغاق تۇرۇپمۇ چۈش كۆرىمەن بەزى.      ●●●         ●●●          ●●●      مەكتەپ مۇئەككەللىرىنىڭ بىر چارەكلىك قاتتىق بىخەتەرلىك تەقىبىسىدىن كېيىن،ئاندىن مەكتەپ دەرۋازىسىدىن ئاتلىيالىدىم.«كونا جاي»غا بېرىپ،دوستۇمدىن پىۋا-تاماكىلىرىمىزنى سۇنۇۋالدىم.مەكتەپ مەيدانىغا ئېلىنغان تۇنجى قەدىمىمدىلا،باياتىنقى ھەۋزىكەۋسەر ھارارىتىدىكى پادىشاھلىق روھانىيلىقلىرىم قاياققىدۇر ئۇچۇپ كەتتى.بىر سېكۇنتتىلا،كىرسە چىقماس قاباھەتلىك تۈرمىگە سولىنىپ قالغاندەك تۇيغۇغا ئەسىرلەندىم.ئېيتمىسىمۇ،مەكتىپىمىز تۈرمىدىن پەرقلەنمەيتتى.يەكشەنبە كەچ كىردىڭمۇ،شەنبە چۈش چىقىسەن.ئۇنغىچە ئۆلۈپ كەتمىسەڭلا،پۈتۈن دۇنيايىڭ ئاشۇ مەكتەپ.بىراق ياخشى يېرى،مەكتەپتە قۇرداش ھاياتداشلىرىم بار.                       ياتاق      بىز سەككىز ياتاقداش.بىلال «رايىش»تىن باشقا بېرىمىز بىر-بىرىمىزدىن قېلىشمىغۇدەك ئائىلىدىن چىققان.شۇڭا بىلالمۇ ئۆزىنى تۇيۇپ،بىز خانزادىلەرنىڭ ئارىسىغا قىسىلمايدۇ.بىزنىڭ بىر يانچۇقىمىزدىن توم بىر چەندازا،يەنە بىر يانچۇقىمىزدىن چاقماق-تاماكا،قولىمىزدىن ئالىي ماركىلىق يانفۇنلار ئۈزۈلمەيدۇ.تېلىفۇننىڭ ئەتىۋار باتارىيەسى ياكى ھەق سوممىسى تۈگەپ قالمىسىلا،ۋەياكى بىراۋغا ھاجىتىمىز چۈشۈپ قالمىسىلا،ئۆز-ئارا بەك مۇڭدىشىپمۇ كەتمەيمىز.تېلىفۇندىن زېرىككەنلىرىمىزدە،كېچىلىرى پاراڭ سوقۇپ تۈنەيمىز.نېمە؟...نېمە پاراڭ بولماقچىدى؟!قىزلارغا ئائىت بولىدۇ-دە،ئەلۋەتتە!تۈنەيمىزۇ،سەھەرگە ئۇلىشىپ كۆزىمىز يەنە يۇمۇلۇپ قالىدۇ.      ھە-راست،ئېسىم قورۇسۇن!بىلال «رايىش»نىڭ ھەپتىلىكى بىر كۆك قەغەز،ئىشلىتىشى باسماقلىق داگېدا.ئويلاپ باقساق،بىزنىڭمۇ دىلىمىز مەلەق،ئادىمىيلىكىمىزمۇ خېلى باركەن.بىز بىلال «رايىش»نى مەيلى دەپ نەچچە سىپە يېنىمىزغا تارتىپ قويايلى دېگەن،تېخى ئۇ بىرنېمە ئۆزى ئۇنىمايدىكەن.ئۇ ماڭقا تېخى ئۆزىنىڭ ھالىغا باقماي،بىزنى ياراتماسمىش!                      سىنىپ      سىنىپقا كىرسىڭىزمۇ،ئوخشاشلا ياتاقتىن پەرقى يوق.پەقەتلا كارىۋاتلار ئۈستەل-ئورۇندۇقلارغا تۈسلەنگەن.ئاندا-ساندا ئۇيقۇسى تاماملانغانلارنى ھېسابقا ئالمىغاندا،قالغان بېرى كاللا ئۆز ئۈستىلىگە مەھكەم چاپلاشقان.ئاخشامقى تىنىق كۆزلەر بۈگۈن ئەتىگەن چاپاقلاشقان،قىزىل رەڭگە ھەللەنگەن.ئۇ كۆزلەرمۇ كەچكە يېقىن ئان ئۆز ئىسكەتىنى تاپىدۇ.شۇنىڭ بىلەن،كېچىسى يەنە ئۇخلايدىغانغا ئۇيقۇ يوق،ئاي بىلەن جاھان كېزىدىغان گەپ.بەزىدە ھەممىمىز كۆزىمىزنىڭ كۈنبويى بەڭگى-زابوي كەبى يۇمۇلۇپلا يۈرگەنلىكىگە قاراپ،مىللىتىمىزنىڭ ئەينى چاغدىكى ئاسارەتلىك يىللىرى بىزگە ئىرسىيەت قالغان ئوخشايدۇ،دەپ ئويلاپمۇ قالىمىز.      ئىستىراھەت پەيتلىرىدە،ھەتتا مۇئەللىمدىن تارتىپ ھېچكىم ئىستىراھەتگاھىمىزغا(سىنىپ) كىرىش تۈگۈل،قارىيالمايدۇ.بىز كىرگۈزمەيمىز ئەمەس،ئۆزلىرى ئىزا تارتىپ كىرمەيدۇ،قارىمايدۇ.چۈنكى بىز شۇ چاغدا،بۈگۈن ئاخشامقى «قىزلار ھەققىدە پاراڭ» ئاتلىق چايخانىمىزغا ئۇلتاش تىزىۋاتاتتۇق.      بۈگۈن دەرسخانىغا قايسى-قايسى ئوقۇتقۇچىنىڭ كىرىپ،چىقىپ كەتكەنلىكىمۇ بىزگە نائېنىق.بىز قەپەس ئىچىدىكى ئەركىنلىككە زار قۇشتەك تۆت كۆزىمىز بىلەن ھەپتىنىڭ ئالتىسىدىكى ئازادلىققا تەشنا.بىزنىڭ بۇخارادىكى خىياللىرىمىزدا ھېلىھەم ھېلىقى كۈنى تورخانىدا ئوينىغان ئويۇننىڭ قالدۇق ئەسلىمىلىرى مەۋجۇت.      مەن ئاتا-ئانامنىڭ ئۆزلىرى ئەمگەنىپ ئىشلەپ،مېنىڭ توققۇزىمنى تەل قىلىپ بېرىۋاتقانلىقىنى؛مەندىن ناھايىتى ئۇلۇغۋار غايە-ئىستەكلەرنى تاما قىلىپ تۇرۇۋاتقانلىقىنى؛ئۆزۈمنىڭ بىر يالقاۋ پارازىتلىقىمنى بىلمەيمەن ئەمەس،بىلىمەن.بىراق...!بىز ھەممىمىز مۇشۇنداق.بەلكىم بۇ تەتۈر پىسخىكىلىق ھالەتتە بىرەر بۈيۈك ھېكمەت باردۇر.ئىشقىلىپ ئالىملار بۇ خاسىيەتلىك ئىندىۋىدۇئاللىقنى قېتىرقىنىپ بىر تەتقىق قىلىپ باقسا،ھەقىقەتەن ئەرزىيدۇ-جۇمۇ!                    ئاشخانا      مەكتەپ ھاياتىمىزدىكى بىردىنبىر ئەھمىيەتلىك ھەرىكىتىمىز___ئاشخانىغا يۈگۈرۈش.بىز پەقەت قىلىۋاتقان مۇشۇ ئىشىمىزنىڭلا سەمەرىسىنى كۆرەلەيمىز:ئاچ ئاشقازان غەلىبىلىك ھالدا لىقلىشىدۇ.      بىراق،ئاشخانىدا تارتىدىغان سىتەمىمىزمۇ ئاز ئەمەس.ئەگەر قورساق دېگەن تۆكسە-تۆكسە توشمايدىغان ھام-ھامخۇمار بۇ ئاۋاپ ئازگال بولمىغان بولسىدى،بىز ھەرگىز ئاشۇ تېتىمسىز ھەم ھەشەمسىز روزغارلارغا كۆزىمىزنى تۆت قىلماس،يۈز تۆكۈپ ئۆچرەت بۆسمەس،ئىككى موما ياكى يېرىم چىنە ئاق بەتتە ئۈچۈن ياقىماق سىقىشماس ئىدۇق.بىزگىغۇ ھېچكىم «ھۆت-پۆت!» دېيەلمەيدۇ.نېمىشقا دەمسىز؟چۈنكى بىز مەكتەپنىڭ ئاتامانى تۇرساق،شەمايىلىمىز شەمشادتەك تۇرسا.باشتىكى ئىككى يىلدا يەيدىغان تاياق-سامسىلارنى يەپ بولدۇق،ئەمدى ئۇرۇش نۆۋىتى بىزگە كەلدى.مەكتەپنىڭ تۈزۈمىغۇ ئاجايىپ چىڭ،بىراق مەكتەپمۇ بىزدەك ئەكابىر-ئەشرەپزادىلەرنىڭ سەركەشلىكىنى ئامال يوق چىشىنى چىشلەپ كۆتۈرىدۇ.قىلمىشىمىز بائىسىدىن جازا ياكى ھازاغا مۇپتىلا بولساقمۇ،ھېچنەرسىدىن سەرىشىمىز يوق.سەۋەبى،بىزنىڭمۇ ئۆز ئالدىمىزغا:«ئۆلۈمدىن باشقىسى تاماشا!» دەيدىغان سەقىمىمىز بار.      لېكىن،ھەپتە ئاخىرىدا پۇل قالمىغىلى تۇرسا،يەنىلا بىلال «رايىش»نىڭ قاتتىق-قۇرۇق نانلىرىغا رايىشلىق بىلەن تەلمۈرىمىز.ئۇ «ساراڭ» شۇچاغدا بىزگە يېقىن كېلىدۇ.       ●●●         ●●●          ●●●      ئىشقىلىپ مېنىڭ ھاياتىم،ياق،بىزنىڭ ھاياتىمىز مانا مۇشۇ نەتىجىسىز ئۈچ بۇرجەك ھايات:ياتاق___سىنىپ___ئاشخانا.ئاتا-ئانىلىرىمىز ئۇ يەردە بىزدىن يۈسۈپ-مەھمۇد قۇچقان شەرەپ-شانلارنى كۈتمەكتە،بىز بولساق بۇ يەردە شەنبە كۈنىنى كۈتمەكتە!         2014-يىلى نويابىرنىڭ 23-كۈنى،يۇرۇڭقاش

alhumar137

	تىمىسى نىمانداق قىززىق  ئۆزىمۇ ياخشى يىزىلىپتۇ    ھەممە شۇ  شەمبىنى كۇتىدۇ

feruq

	alhumar137 يوللىغان ۋاقتى  2014-11-25 08:28 AM تىمىسى نىمانداق قىززىق  ئۆزىمۇ ياخشى يىزىلىپتۇ    ھەممە ... شەمبە   ئەمەس شەنبە

feruq

	alhumar137 يوللىغان ۋاقتى  2014-11-25 08:28 AM تىمىسى نىمانداق قىززىق  ئۆزىمۇ ياخشى يىزىلىپتۇ    ھەممە ... شەمبە   ئەمەس ، بەلكى شەنبە

alhumar137

	feruq يوللىغان ۋاقتى  2014-11-25 10:46 AM شەمبە   ئەمەس ، بەلكى شەنبە خاتا بوپ قاپتۇدە

مېھرىما

	يازغان نەسىرىڭىز شۇنداق ياخشى چىقىپتۇ ،قەلەم تۇتقان شۇ قوللىرىڭىزغا دەرت بەرمىسۇن.

ئۆچمەس

	ئاخىرىغا تەشنامەن،

b1a2g

	ئاھ خۇتەن تەجىربە ئوتىرا..... بۇ يازمىڭىز ئاشۇ تۈرمە مەكتەپتىكى  كۈنلىرمنى بىرمۇ بىر ئېسىمگە سالدى...قارىسام سىز مۇھەممەتجان مۇئەللىمنىڭ ئوقۇغۇچىسىدەك تۇرىسىز...مەنمۇ ئاشۇ مۇئەللىمنىڭ سىزدىن بىر قارار بورۇنقى ئوقۇغۇچىسى....