ھەققانىي: نادانلىق

akkani

	نادانلىق ** ئاپتۇرى: ئابدۇۋەلى راخمان ھەققانىي ** قالاقلىققا سالجىدەك چاپلىشادۇر نادانلىق، جاھالەتلىك دەۋرىگە تارتىشادۇر نادانلىق، قاراڭغۇنى خوپ كۆرۈپ ماقتىشادۇر نادانلىق، ئالغا ماڭساق ئارقىغا قايتىشادۇر نادانلىق، يول تاپالماي ئازگالغا قاپلىشادۇر نادانلىق. ** نەزمە تۈزسەم بەرى بىر، قارا قورساق تەلۋىگە، نادان قاچان يەتكەن بار ئېلىم-پەننىڭ قەدرىگە، تىل سالادۇر تەپ تارتماي ھەتتا بىلىم ئەھلىگە، ماس كېلەمدۇ قاتماللىق بۈگۈنكى بۇ دەۋرىگە، ماڭغان ھەربىر قەدەمگە پۇتلىشادۇر نادانلىق. ** ئەسلى نادان دوستلاردىن زىرەك دۈشمەن ياخشىراق، خۇراپاتلىق-تۈن گۇيا،ئېلىم يۇلى نۇر چىراق، ئەقىلسىزدە كۆز غۇۋا، كۆرۈنمەيدۇ بەك يىراق، ئېلىمسىزنىڭ كۆڭلى غەش نۇرغا تولسا ھەممە ياق، خار بولۇشقا قەدەمنى تاشلىشادۇر نادانلىق. ** مەنسەپ تەگسە نادانغا،زەخمەت يېتەر ئاۋامغا، ھالى ئۆسۈپ ئاسمانچە پاتماي قالۇر ئىشتانغا، بىلىمسىزلىك-قالاقلىق، بىلسەك ئاپەت ئىنسانغا، كىمكى نادان قۇل بولۇپ ئىبرەت بولدى جاھانغا، نەمدە قالغان تۆمۈردەك داتلىشادۇر نادانلىق. ** ئاڭسىزلىقتۇر ناكالىق،كۈتەر ئۇنى گادايلىق، مۇنداقلارنىڭ ئەپتىدىن تەپچىرەيدۇ قاشاڭلىق، بوشاڭلارغا مەنسۇپتۇر ئۆنجىسى يوق خامانلىق، قاچان چۈشەر نېنىم دەپ دايىم كۆككە قاراقلىق، دۇلىسىنى ئاپتاپقا قاقلىشادۇر نادانلىق. ** قايسى يالغان،قايسى ھەق يېتەلمەيدۇ تەكتىگە، ياندا تۇرسا ياخشىسى،باش ئۇرىدۇ ئەسكىگە، قىلچە يوقتۇر تەپەككۇر قۇل بولىدۇ نەپسىگە، ھەمدەم شوڭا بىلەلمەي يامانلارنىڭ قەستىگە، ھىلىگەرلىك-قۇۋلۇقنى ياقلىشادۇر نادانلىق. ** زامان نەدە،بىز نەدە ھېچنىمنى بىلەلمەي، باراۋەردۇر ئۆلگەنگە يۈرسە لەيلەپ ئۈگەنمەي، نە پايدىسى ياشاشنىڭ بۇ ھاياتنى چۈشەنمەي، كور ياشايدۇ مۇشۇنداق ئەتراپىنى كۆرەلمەي، نوقۇمىساڭ غەپلەتتە ئۇخلىشادۇر نادانلىق. ***

sardor0908

	ياخشى شىئىر ئىكەن .

xahanime

	شىئىر ياخشىكەن بولۇپمۇ بىرىنجى كۇپلىتى .

مېھرىما

	ياخشى شېىركەن،قوللۇرۇڭىزغا دەرت كەلمىسۇن.

مېھرىما

	ياخشى شېىركەن،قوللۇرۇڭىزغا دەرت كەلمىسۇن.

99sahrayi99

	بارىكاللا!.. نادانلىق ھەققىدىكى بۇ مۇخەممەس بەك ياخشى چىقىپتۇ. مەزمۇنى مول، ئاھاڭدارلىقى كۈچلۈك چىقىپتۇ. ماقتىشادۇر-- ماختىشادۇر دەپ يېزىلسا، ئۆنجىسى-- ئەنجىسى دەپ ئېلىنسا توغرا بولامدۇ قانداق؟!.. تۆرۈز تاپقىنىم ئەمەس، خاتا چۈشەنمىگەيسىز!..

bulaksu2

	مۇبارەك بولسۇن، ئاكا! ساتىرىك شائىرغا خاس ماھارەت بىلەن يېزىپسىز.

aqma

	تېمىسى  بەكمۇ ياخشى ئىكەن. قۇلىڭىزغا دەرد كەلمىگەي، ئىلھامىڭىز نېرى كەتمىگەي.