مايۈننىڭ ئىگىلىك تىكلەش دەرىسخانىسى

WWW.UYHQT.COM

	مايۈننىڭ ئىگىلىك تىكلەش دەرىسخانىسى كىرىش سۆز    «بانكا ئۆزگەرمىسە، ئۇنداقتا بىز بانكىنى ئۆزگەرتىشىمىز كېرەك.» شۇنداق دىيىشكە بولىدۇكى، جۇڭگو «ئەلى بابا» تور بېكىتىنىڭ باش ئىجرائىيە ئەمەلدارى مايۈننىڭ بۇ بىر جۈملە سۆزى پۈتۈن جۇڭگونىڭ پۇل – مۇئامىلە ساھەسىگە تەسىر قىلغان. ئۇ بۇنى ئېيتىپلا قالماستىن، يەنە بۇنى قىلالىغان. مايۈننىڭ «ھەمىيان» نى پۇل ئامانەت قويغۇچىلار ئۈچۈن ھەر يىلى 20 مىليارىد پۇلنى كۆپ تېپىپ بەرگەن. شۇنداق دىيىشكە بولىدۇكى، مايۈن جۇڭگونىڭ ئېنتىرنىت پۇل – مۇئامىلە ساھەسىنى بارلىققا كەلتۈردى، ھەمدە بۇ دەۋرنى يىتەكلىدى ۋە ئىسلاھ قىلدى.    كۆپچىلىك قوللىرىدىكى تېلفۇندا «ئۈندىدار» غا مەھلىيا بولغاندا، مايۈنمۇ ئالدىغا چىقىپ «ئەلى بابا» نىڭ تىز ئالاقىلىشىش قورالى بولغان «كەلدىدار» نى ئوتتۇرىغا چىقاردى. گەرچە «تېڭشۈن» شىركىتىنىڭ «ئۈندىدارى» بۇنىڭغا نىسبەتەن ئاجىز ئورۇندا بولمىسىمۇ، ھەتتا بەزىلەر بىلجىرلاپ: «ئۈندىدار ھازىر ھەممىلا جاينى قاپلىدى، ئۇنىڭ تەرەققىيات سۈرئىتى (خەتدىدار)، (كەلدىدار) قاتارلىقلارنى بېسىپ چۈشىدۇ.» دېيىشسىمۇ، بىراق «كەلدىدار» نىڭ رىقابەت كۈچى بۇ سەۋەبلىك ئاجىزلىشىپ كەتمەيدۇ.    ئەمەلىيەتتە، مايۈن ئىزچىل سودا دېڭىزىدا «غۇلاچ تاشلاپ ئۈزۈۋاتىدۇ.» 2013 – يىلى، ئۇ پىنسىيەگە چىققانلىقىنى جاكارلاپ بىر ئايغا يەتمىگەن ۋاقىتتا، ئۇ كۆك رەڭلىك تەيجى كىيىمى كىيىپ شىنجىندا ئۆتكۈزۈلگەن «جۇڭگو ئەقلىي ئىقتىدار ساھەسىدىكى بايراقدار تور» ئاخبارات ئېلان قىلىش يىغىنىغا قاتناشتى، بۇ يىغىنغا جۇڭگو تىز يەتكۈزۈش كەسپىنى پۈتۈنلەي دىگۈدەك مونوپول قىلىۋالغان «سەنتوڭ يىدا» شىركىتىنىڭ باش لېدىرى ۋە يۇقىرى دەرىجىلىك ئەمەلدارلىرىمۇ مايۈن بىلەن بىرلىكتە قاتناشقان.    مايۈن: «ھازىر جۇڭگودا ھەر كۈنى 25 مىليون ئەتراپىدا توشۇلىدىغان يوللانمىلار بار، ئون يىلدىن كىيىن بۇ سان 200 مىليونغا يىتىشى مۇمكىن. جۇڭگونىڭ ھازىرقى ئوبوروت سىستېمىسى كەلگۈسىدىكى «200 مىليون يوللانما» غا چىقىشالمايدۇ. شۇڭا ھازىر بىز قاپ يۈرەكلىك بىلەن شۇنداق پەرەز قىلايلى، يەنى «جۇڭگو ئەقلىي ئىقتىدار ساھەسىدىكى بايراقدار تور» ئارقىلىق، پۈتۈن مەملىكەتتىكى 2000 دىن ئارتۇق شەھەردىكى ھەر قانداق بىر جايدا، پەقەت سىز توردىن مال سېتىۋالسىڭىزلا، مال چوقۇم 24 سائەتنىڭ ئىچىدە سىزنىڭ ئۆيىڭىزگە يەتكۈزۈلۈپ بولىدۇ.» شۇنداق ئېيتىشقا بولىدۇكى، مايۈندە ئاللىقاچان يېڭى نىشان ۋە يۆلىنىش بارلىققا كەلگەن.    ....    مايۈن – سانسىزلىغان ياشلارنىڭ ئىگىلىك يارىتىشتىكى مەبۇدىسى. مەيلى «ئەلى بابا»، «تاۋباۋ» بولسۇن، ياكى «پۇل تاپشۇرۇش ھەمىيانى» ۋە «قالدۇق پۇل ھەميانى» بولسۇن، ئۇ بىزگە ئويلاپ يەتكىلى بولمايدىغان خۇشاللىقلارنى ئېلىپ كېلىدۇ. ئېنتېرنىت ساھەسىدىكى بۇ گىگانت شەخىس، ئۆزىنىڭ پۈتكۈل ھاياتى ئارقىلىق ياشلارنى ئىگىلىك تىكلەشكە ئىلھاملاندۇرۇپ كەلگەن.    مايۈننىڭ مۇۋەپپەقىيەت قازىنىشىدىكى سەۋەبمۇ سانسىزلىغان كىشىلەرنىڭ مۇھاكىمە تېمىسى بولۇپ قالغان. بەزىلەر ئۇنىڭ تىجارەت شەكلى ئۆزگىچە، باشقىلار مېڭىپ باقمىغان يولدا ماڭغان دەپ قارىغان؛ يەنە بەزىلەر مايۈننىڭ تۇغما رەھبەرلىك قىلىش قابىليىتى باشقىلارنى ئۆزىگە ماگنىتتەك جەلپ قىلىدۇ دەپ قارىغان... ئەلۋەتتە، مايۈننىڭ غەلبىسى ھەرگىزمۇ يەككە ئامىللار سەۋەبلىك بولغان ئەمەس.    مايۈن مەركىزىي تېلېۋېزىيە ئىستانىسسى ئۆتكۈزگەن «جۇڭگودىكى غەلبە» پروگراممىسىدا مۇنداق دىگەن: «ئىگىلىك تىكلىگۈچى بولۇش ئۈچۈن، ئاۋۋال چوقۇم بىر غايە بولۇشى كېرەك.» ھەقىقەتەن، چوقۇم بىر غايە بولۇشى، ئاندىن «تۇنجى سۆيگىنىڭىزدە چىڭ تۇرغاندەك غايىڭىزدە چىڭ تۇرۇشىڭىز كېرەك» - بۇ مايۈننىڭ بىزگە بەرگەن ئىلھامى.    بىر سودىگەر بولۇش سۈپىتى بىلەن، مايۈن يەنە بازار تەكشۈرۈش ۋە بازار ئېچىش ماھىرى. ئۇنىڭ بازارغا بولغان سەزگۈرلۈكى ناھايىتى كۈچلۈك بولۇپ، «كۆزنى يۇمۇپ – ئاچقۇچە ئۆتۈپ» كېتىدىغان پۇرسەتلەرنى تۇتۇشقا، يېڭى بازارلارنى ئېچىشقا ماھىر.    مايۈن بىزگە شۇنداق ئېيتىدۇكى، ئىگىلىك تىكلىگۈچىلەرنىڭ غەلبە – قىلىش قىلالماسلىقى ھەمىشە ئۇنىڭ ئۇچۇر يىغىش ۋە ئۇچۇرلاردىن پايدىلىنىش ئىقتىدارىغا باغلىق. ئۇچۇر دەۋرىدە، ئۇچۇر بىزنىڭ تىجارىتىمىزدىكى ئاساس، شۇنىڭ ئۈچۈن، ئۇچۇرنى «تۇتۇۋېلىش» مۇۋەپپەقىيەت پۇرسىتىنى تۇتۇۋالغانغا باراۋەر.    ئۇنىڭدىن باشقا، ئەمدىلا ئىگىلىك تىكلەشكە باشلىغانلار ئىگىلىك تىكلەش جەريانىدا ئۇچراش ئېھتىماللىقى بولغان قىيىنچىلىقلارنى، ئۇلارغا قانداق ئۇسۇللار بىلەن تاقابىل تۇرۇش توغرىسىدا ئويلانمايدۇ، ئەكسىچە دائىم ئۆزىنىڭ مۇۋەپپەقىيەت قازانغان كۈنىدە قانداق بولىدىغانلىقى ياكى كارخانىنى چوڭايىتقان ۋە كۈچلەنگەندىن كىيىنكى ھالىتىنى خىيال قىلىشقا ئادەتلەنگەن. بۇ خىل پىسخىكىلىق ھالەتكە نىسبەتەن، مايۈن بارلىق ئىگىلىك تىكلىگۈچىلەرگە قارىتا شۇنداق سەمىمىي ئاگاھلاندۇرۇش بېرىدۇ: «ئىگىلىك تىكلىگۈچى مەڭگۈ ئۆزىگە شۇنداق دىيىشى كېرەك – ئىگىلىك تىكلەشنى باشلىغان تۇنجى كۈنىدىن تارتىپ سىزنىڭ ھەر كۈنى يولۇقىدىغىنىڭىز قىيىنچىلىق ۋە مەغلۇبىيەت، ھەرگىزمۇ مۇۋەپپەقىيەت ئەمەس.»    مايۈن شۇنداق دىگەن: «ئەگەر سىز ئىگىلىك تىكلەش جەريانىدىكى 100 قېتىملىق يىقىلىش تەييارلىقىنى ياخشى قىلالمىسىڭىز، ئۇنداقتا ئىگىلىك تىكلىمەيلا قويۇشىڭىز كېرەك؛ ئەگەر سىز سانسىزلىغان رەت قىلىنىش، ھەتتا مەسخىرىلەرگە ئۇچراشقا تەييارلىقنى ياخشى قىلمىسىڭىز، ئۇنداقتا ئىگىلىك تىكلىمەيلا قويۇڭ؛ ئەگەر سىز (پۈتۈن دۇنيادىكى كىشىلەرنىڭ سىزنى تاشلىۋېتىشى) گە ياخشى تەييارلىق قىلالمىسىڭىز، ئۇنداقتا ئىگىلىك تىكلىمەيلا قويۇڭ.» مايۈن دەل مۇشۇ خىلدىكى پىسخىكىلىق تەييارلىقنى ياخشى قىلالىغاچقا، ئىگىلىك تىكلەش جەريانىدىكى ئۇچرىغان قىيىنچىلىقلارغا سوغۇققانلىق بىلەن يۈزلىنىپ، ئوڭۇشسىزلىققا ئۇچرىسىمۇ قەتئىي داۋاملاشتۇرغان...    ئەلۋەتتە، بۇلاردىن باشقا، ھەر قانداق كارخانىچىنىڭ مۇۋەپپەقىيەت قازىنىشى بىر خىل يەككە – يىگانە روھقا مۇھتاج. مايۈننىڭ ئىگىلىك تىكلەش روھى دەل چوڭ ئىش تەۋرىتىشكە، ماركا يارىتىشقا، ئالەمنى زىلزىلىگە سېلىشقا ۋە ئوخشىمايدىغان يولدا مېڭىشقا تەۋەككۈل قىلالايدىغان روھدىن ئىبارەت. ئىگىلىك تىكلەۋاتقان ۋە ئىگىلىك تىكلەش يولىدا قاتمۇ – قات قىيىنچىلىققا ئۇچراۋاتقان ئاشۇ كىشىلەردىمۇ دەل بۇنداق روھ بولۇشى كېرەك. چۈنكى، شۇنداق روھ بولغاندىلا، بىز قەدەمدە بىر ئۇچراپ تۇرىدىغان قاتمۇ – قات قىيىنچىلىق ئىچىدىمۇ قىزغىنلىقىمىزنى ساقلاپ قالالايمىز.    خۇددى مايۈن ئېيىتقاندەك: «ئىگىلىك تىكلىگۈچىلەردىكى قىزغىنلىق ناھايىتى مۇھىم، ئەممە بىر ئادەمنىڭ قىزغىنلىقى يىتەرلىك ئەمەس، نۇرغۇنلىغان كىشىلەرنىڭ قىزغىنلىقىلا كارغا كېلىدۇ.» بۇنىڭدىن كۆرۈۋالغىلى بولىدۇكى، مايۈن كوللىكتىپنىڭ قىزغىنلىقىغىمۇ ناھايىتى ئەھمىيەت بېرىدۇ. ئەمەلىيەتتە بىر ئىگىلىك تىكلىگۈچىگە نىسبەتەن ئېيىتقاندا، ئەگەر سىزدە بىر مۇنەۋۋەر كوللىكتىپ بولسا، ئۇنداقتا سىز كەسىپتىكى يادرولۇق رىقابەت كۈچىگە ئىگە بولغان بولىسىز – دە، مۇۋەپپەقىيەتكە تېخىمۇ يېقىنلىشىسىز.    ئەلۋەتتە، ئىگىلىك تىكلەشتە پەقەتلا قىزغىنلىق، تىرىشچانلىق ۋە جاپادىن قورقمايدىغان روھنىڭ بولۇشى يىتەرلىك ئەمەس. پۈتكۈل كوللىكتىپنىڭ مەسئۇلىيەت ئېڭى ۋە قىممەت قارىشى ھەمىشە شىركەتنىڭ ئۇيۇشۇش كۈچىنى تېخىمۇ يۇقىرى كۆتۈرەلەيدۇ، ھەمدە كوللىكتىپنى بەلگىلەنگەن نىشانغا قاراپ ئىلگىرلىتەلەيدۇ.    «ئالەمدە قىلغىلى بولمايدىغان ئىش يوق» دىگەن مەسئۇلىيەت ئېڭىنىڭ يىتەكچىلىكىدە، «ئەلى بابا» ئۆزىدىكى يىتۈك قىممەت قارىشىنى بارلىققا كەلتۈرگەن؛ يەنە دەل «ئالەمدە قىلغىلى بولمايدىغان ئىش يوق» دىگەن مەسئۇلىيەت ئېڭى بولغاچقا، «ئەلى بابا» نۇرغۇنلىغان خېرىدارلارنىڭ ياختۇرۇشىغا ئېرىشكەن. «ئەلى بابا» دىن ئىبارەت بۇ سەھنىنىڭ بولۇشى نۇرغۇنلىغان ئوتتۇرا – كىچىك تىپتىكى كارخانىلارنىڭ مەسىلىسىنى ھەل قىلىپلا قالماستىن، جەمئىيەت ئۈچۈن نۇرغۇنلىغان ئىشقا ئورۇنلىشىش پۇرسىتى يارىتىپ بەرگەن.    خۇددى مايۈننىڭ پەرەز قىلغىنىدەك: «21 – ئەسىرگە كىرگەندىن كىيىن، پەقەت ئىجتىمائىي مەسىلىلەرنى ھەل قىلالايدىغان كارخانىلارلا داۋاملىق تەرەققىي قىلالايدۇ.» مايۈن يەنە كەڭ ئىگىلىك تىكلىگۈچىلەرگە شۇنداق دەيدۇ، كەلگۈسىدە، ئىجتىمائىي مەسئۇلىيەت بارا – بارا كارخانىچىلارنىڭ ئورتاق مەسئۇليىتىگە ئايلىنىدۇ.    ئەمەلىيەتتە، مايۈننىڭ بىزگە بەرگەن تەكلىپلىرى يالغۇز بۇلارلا ئەمەس. «مايۈننىڭ ئىگىلىك تىكلەش دەرىسخانىسى» ناملىق بۇ كىتاب مايۈننىڭ كەچۈرمىشلىرى، ئۇنىڭ ئىگىلىك تىكلەش توغرىسىدىكى خاتىرىسى، ھەمدە مايۈننىڭ «جۇڭگودىكى غەلبە» پروگراممىسىدىكى ماھىرلارغا تەھلىل قىلىپ بەرگەن ئەمەلىي مىساللىرى قاتارلىقلارنى بىرلەشتۈرۈپ، يەنىمۇ ئىلگىرىلىگەن ھالدا ئىگىلىك تىكلىگۈچىلەر ئۈچۈن ئومۇميۈزلۈك خۇلاسىلەش ئېلىپ بارىدۇ، ھەمدە ئىگىلىك تىكلىگۈچىلەرنى تېخىمۇ راۋان بولغان ئىگىلىك تىكلەش يولىغا باشلايدۇ. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام 2014-يىلى 11-ئاينىڭ 6-كۈنى جىياڭسۇ ئۆلكىسى ۋۇشى شەھىرى

WWW.UYHQT.COM

	بىرىنچى دەرس ئىگىلىك تىكلىگۈچىدە 20 يىللىق جاپا – مۇشەققەتكە چىدايدىغان پىسخىكىلىق تەييارلىق بولۇشى كېرەك بىرىنچى دەرس بىرىنچى پارگىراف 1. ئالىي مەكتەپ ئوقۇغۇچىلىرىنىڭ ئىگىلىك تىكلىشىنى قوللىماسلىق    ھازىر ئالىي مەكتەپ ئوقۇغۇچىلىرىنىڭ ئىگىلىك تىكلىشىگە قارىتا، دۆلەت ۋە يەرلىك نۇرغۇنلىغان ئېتىبار ۋە ئىلھاملاندۇرۇش سىياسەتلىرىنى يولغا قويدى. بىراق ئەپسۇسلىنارلىقى،شۇنداق بولغان تەغدىردىمۇ، كۆپلىگەن ئالىي مەكتەپ ئوقۇغۇچىلىرى قۇرغان كارخانىلار مەغلۇبىيەت بىلەن تۈگەللەندى، قالغانلىرىمۇ ئەپلەپ – سەپلەپ جان بېقىۋاتماقتا.    بۇنداق ئەھۋالغا نىسبەتەن، مايۈن ئىلگىرى بىر سۆھبەت پروگراممىسىدا مۇنداق ئىپادە بىلدۈرگەن: ئالىي مەكتەپ ئوقۇغۇچىلىرىنىڭ ئىگىلىك يارىتىشى قىيىن بولۇپلا قالماستىن، يەنە باشقىلارنىڭ ئىگىلىك يارىتىشىمۇ قىيىن. ئىگىلىك تىكلەش دىگەن نېمە؟ ئىگىلىك تىكلەش دىگىنىمىز -100 ئىگىلىك تىكلىگۈچىنىڭ ئىچىدە 95 نەپىرىنىڭ قانداق ۋەيران بولغانلىقىنى سىز بىلەلمەيلا قالىسىز، سىز ھەتتا بۇ 95 نەپىرىنىڭ ئىگىلىك تىكلەپ باققانلىقىنىمۇ بىلەلمەيسىز، ئېشىپ قالغان تۆت نەپىرىنىڭ ۋەيران بولغانلىقىغا سىز شاھىت بولىسىز، ئەڭ ئاخىرقى بىرىنىڭ ئۇنىڭ ئىقتىدارلىق، تىرىشچان بولغانلىقىدىن ئەمەس بەلكى باشقا سەۋەبلەر تۈپەيلىدىن پۇت تىرەپ تۇرالايدىغانلىقىنى كۆرىسىز، دىگەنلىكتۇر.    شۇنىڭ ئۈچۈن، جۇڭگونىڭ ئىگىلىك تىكلەش سەركەردىسى بولۇش سۈپىتى بىلەن، مايۈن ئالىي مەكتەپ ئوقۇغۇچىلىرىنى ئىگىلىك تىكلەشكە ئىلھاملاندۇرمايدۇ. ئۇ مۇنداق دىگەن: «مەن ئالىي مەكتەپ ئوقۇغۇچىلىرىنىڭ ئىگىلىك تىكلىشىنى ئۈمىد قىلمايمەن. نۇرغۇنلىغان كىشىلەر بېل. گەيتىس، مارك. جېكباك قاتارلىقلارنىڭ ئىگىلىك تىكلەپ مۇۋەپپەقىيەت قازانغانلىقىنى تىلغا ئېلىشىدۇ، بىراق پۈتۈن دۇنيادا شۇنداق مۇۋەپپەقىيەت قازانغانلاردىن پەقەت شۇ ئىككىلا ئادەم بولۇپ، ئىگىلىك يارىتىپ يىقىلغان سانسىزلىغان كىشىلەرنى سىلەر كۆرۈپمۇ باقمىغان.»    ھەقىقەتەن شۇنداق، ئالىي مەكتەپ ئوقۇغۇچىلىرىدا پەقەت ئىگىلىك يارىتىش قىزغىنلىقىلا بولۇپ،تەجرىبىسى كەمچىل، ئىقتىدارى يىتەرسىز ۋە تونۇشى قاتمال بولۇش سەۋەبلىك ئىگىلىكيارىتىپ مۇۋەپپەقىيەت قازىنىش نىسبىتى تۆۋەن بولىدۇ. شۇنىڭ ئۈچۈن، ئالىي مەكتەپ ئوقۇغۇچىلىرى ئىگىلىك يارىتىشتا ئەگرى – توقاي يولنى ئاز مېڭىشى ئۈچۈن، چوقۇم تۆۋەندىكى زۆرۈر شەرتلەرنى ھازىرلىشى كېرەك:    بىرىنچى،ئىگىلىك يارىتىشتىكى بىلىم زاپىسى. نۇرغۇنلىغان ئالىي مەكتەپ ئوقۇغۇچىلىرى ئاسانلا«ئارمانغا چۇشلۇق دەرمانى بولماسلىق، ئېغىزىدا شەھەر ئېلىش» تەك خاتالىقلارغا پېتىپ قالىدۇ، ئۇلار مەكتەپتە ئوزۇن مەزگىل تۇرغاچقا، جەمئىيەتكە بولغان تونۇشى كەمچىل. بولۇپمۇ بازارنى كېڭەيتىش، كارخانا تىجارىتىنى يۈرگۈزۈش قاتارلىق جەھەتلەردە تەجرىبىسى يوق دىيەرلىك. شۇنىڭ ئۈچۈن، ئالىي مەكتەپ ئوقۇغۇچىلىرى ئىگىلىك يارىتىشتا چوقۇم يىتەرلىك تەييارلىقى بولۇشى كېرەك، بىر تەرەپتىن، ئۇلار كارخانىدا خىزمەت قىلىش ياكى پراكتىكا قىلىش ئارقىلىق مۇناسىۋەتلىك باشقۇرۇش ۋە سېتىقچىلىق تەجرىبىسىنى توپلىشى كېرەك؛ يەنە بىر تەرەپتىن، ئىگىلىك تىكلەش دەرسىگە قاتنىشىپ كارخانا بىلىملىرىنى ئاشۇرىشى، كەسپىي يىتەكلىنىشكە ئېرىشىشى، ئۆزىنىڭ ئاساسىنى پۇختىلىشى كېرەك، بۇ ئارقىلىق ئىگىلىك تىكلەشتىكى مۇۋەپپەقىيەت قازىنىش نىسبىتىنى يۇقىرى كۆتۈرگىلى بولىدۇ.    ئىككىنچى، مەبلەغ تەييارلىقى. بىزدە:«قۇشناچىمنىڭ ئېشىنى ئوخشاتقان موللامنىڭ ئوت يېشى.» دەيدىغان تەمسىل بار. ئىگىلىك تىكلەشتىكى تۈر تاللىنىپ بولغان، ئىگىلىك تىكلەشكە بولغان قىزغىنلىقمۇ بولغان،ھەتتا ئىگىلىك تىكلەشنىڭ دەسلەپكى پىلانى تۈزۈلۈپ بولغان تەغدىردىمۇ، مەبلەغ بولمىسا، ئەڭ ياخشى بولغان ئىگىلىك تىكلەش قارىشىمۇ رېئاللىقتىكى ئىشلەپ چىقىرىشكۈچىگە ئايلىنالمايدۇ.    ئالىي مەكتەپ ئوقۇغۇچىلىرىنىڭ يېرىمى دىگۈدەك «مەبلەغ – ئىگىلىك تىكلەشتىكى توسالغۇ.»دەپ قارايدۇ. شۇنىڭ ئۈچۈن، مەبلەغ مەسىلىسىنى ھەل قىلىش ئالىي مەكتەپ ئوقۇغۇچىلىرىنىڭ ئىگىلىك تىكلىشىدىكى ئالدىنقى مەسىلە. ئەلۋەتتە، مەبلەغقە ئېرىشىشتىن بۇرۇن چوقۇم ئۆزىنىڭ قانچىلىك مەبلەغقە مۇھتاج ئىكەنلىكىنى، مەبلەغقە قانداق ئېرىشىدىغانلىقى ۋە مەبلەغنىڭ كېلىش مەنبەسىنىڭ قايسىلار ئىكەنلىكىنى ئېنىق چۈشىنىش كېرەك.    ئىگىلىك تىكلىگۈچىلەردە چوقۇم بەلگىلىك سودا قارىشى بولۇشى كېرەك، قەرز ھوقۇقىنى مەبلەغنىڭ كېلىش مەنبەسى قىلىش كېرەكمۇ، ياكى پاي ھوقۇقىنى مەبلەغنىڭ كېلىش مەنبەسى قىلىش كېرەكمۇ، يەنى سىزگە مەبلەغ تەمىنلىگەن ئادەمگە نېمە ئارقىلىق كاپالەت بېرىسىز قاتارلىقلار، بۇ ئاساسى مەسىلىلەر ئىگىلىك يارىتىشنىڭ دەسلەپكى مەزگىلىدە مۇۋەپپەقىيەت قازىنىش – قازىنالماسلىقنى بەلگىلەيدۇ.    ئۈچىنچى،تېخنىكا ۋە قىزىقىش. ئەقلىي كۈچ ئارقىلىق مەبلەغكە ئېرىشىش – بۇ ئالىي مەكتەپ ئوقۇغۇچىلىرىنىڭ ئىگىلىك يارىتىشىدىكى ئۆزگىچىلىك. بىر قىسىم خەتەرگە تەۋەك كۈلقىلىشنى خالايدىغان مەبلەغ سالغۇچىلار دەل ئالىي مەكتەپ ئوقۇغۇچىلىرى ئىگىلىگەن ئىلغار تېخنىكىنى كۆرگەندىن كىيىن، ئاندىن ئۇنىڭ ئىگىلىك يارىتىش پىلانىغا مەبلەغ جەھەتتىن ياردەم قىلىدۇ. شۇنىڭ ئۈچۈن، يۇقىرى تېخنىكىلىق ساھەلەردە ئىگىلىك تىكلەش مەخسىدىدىكى ئالىي مەكتەپ ئوقۇغۇچىلىرى چوقۇم تېخنىكىدا يېڭىلىق يارىتىشقا ئەھمىيەت بېرىشى، ئۆزگىچە بىلىم مۈلۈك ھوقۇقىغا ئىگە مەھسۇلاتلارنى يارىتىشى كېرەك،شۇندىلا ئاندىن مەبلەغ سالغۇچىلارنى جەلپ قىلالايدۇ.    تۆتىنچى،شەخسنىڭ ئىقتىدارى. ئىگىلىك يارىتىش ئاددىيلىقتىن مۇرەككەپلىككە ئۆتىدىغان جەريان،مەسىلەن: ئىگىلىك يارىتىشنىڭ دەسلىپىدە بازارغا بولغان ھۆكۈم قىلىش ئىقتىدارى كەمچىل بولغاندا، چوقۇم ئاددى بولغان بازارلاردىن قول سېلىپ تەجرىبە توپلىشى كېرەك. ئالىي مەكتەپ ئوقۇغۇچىلىرى تېخنىكا جەھەتتە ئەۋزەللىككە ئىگە بولسىمۇ،بىراق مالىيە، سېتىقچىلىق، ئالاقە ۋە باشقۇرۇش جەھەتلەردىكى ئىقتىدارى ئومۇمىيۈزلۈك تۆۋەن، تىجارەتتىكى «ئويۇن قائىدىسى» بىلەن تونۇشلۇق ئەمەس. ئىگىلىك تىكلەپ مۇۋەپپەقىيەت قازىنىشتا، ئىگىلىك تىكلىگۈچىلەردە ناھايىتى كۈچلۈك بولغان پىلاننى يۈرگۈزۈش ئىقتىدارى بولۇشتىن سىرت، يەنە ئاساسى تىجارەت ئىقتىدارى بولۇشى كېرەك.    بەشىنچى،كىشىلىك مۇناسىۋەتنىڭ كېڭىيىشى. ئىگىلىك تىكلەپ مۇۋەپپەقىيەت قازىنىشتا، سىزدە ئىقتىدار ۋە تەجرىبە بولسىلا كۇپايە قىلمايدۇ. ئىقتىدار ۋە تەجرىبە سىزنىڭ ئىگىلىكتىكلەپ مۇۋەپپەقىيەت قازىنىشىڭىزدىكى زۆرۈر شەرت، بىراق تېخىمۇ مۇھىمى سىزدە مۇناسىۋەت تورى بولۇشى كېرەك! ئومۇمەن ئېيىتقاندا، مەكتەپ پەقەت بىر ئۆگىنىش سەھنىسى، ناھايىتى ئاز ساندىكى ئوقۇغۇچىلارلا ئۆگىنىش مەزگىلىدە ئۆزىنىڭ مۇناسىۋەت تورىنى كېڭەيتىشكە كۈچەيدۇ. بىراق سىز مەكتەپتىن ئايرىلىپ جەمئىيەتكە چىققاندا بولسا، كىشىلىك مۇناسىۋەت تورىنى كېڭەيتىش بىر مۇھىم مەسىلىگە ئايلىنىدۇ.    ئالتىنچى،مەغلۇبىيەتنى قوبۇل قىلالايدىغان پىسخىكىلىق ساپاغا ئىگە بولۇش كېرەك. شۇنداق بىر سۆزلەر بار: «ئەڭ كۈچلۈك ئۈمىد بىلەن ئەڭ يۇقىرى چەكتە تىرىشىش ھەمدە ئەڭ خەتەرلىك ئىشنى قىلىش كېرەك.» تىجارەت قىلىش بىر خىل خەتەرگە تەۋەككۈل قىلدىغان مەبلەغسېلىش ھەركىتى، بىز ئاللىقاچان «ئەڭ كۈچلۈك ئۈمىد بىلەن ئەڭ يۇقىرى چەكتە تىرىشىش»تىن ئىبارەت پوزىتسىيەگە ئىگە بولغاندا، ھەرگىزمۇ «ئەڭ خەتەرلىك ئىشنى قىلىش» نى ئۇنتۇپ قالماسلىقىمىز كېرەك. مەسىلەن: بىز ھەرقانداق ئىشنى قىلىشتىن بۇرۇن چوقۇم ئەگەر بۇ ئىشنى پۈتۈنلەي ياخشى قىلالمىسام، ئۇنداقتا ماڭا قانداق تەسىرى بولىدۇ؟بىز ئەڭ خەتەرلىك نەتىجىگە بەرداشلىق بېرەلەمدۇق – يوق؟ دىگەن مەسىلىلەرنى ياخشىراق ئويلىشىش كېرەك.    گەرچە بۈگۈنكى ئىگىلىك تىكلەش بازىرىدا سودا پۇرسىتى چەكسىز بولسىمۇ، بىراق مەبلەغ،ئىقتىدارى ۋە تەجرىبىسى چەكلىك بولغان ئالىي مەكتەپ ئوقۇغۇچىلىرىغا نىسبەتەن ئېيىتقاندا، بۇ ھەرگىز «ئېڭىشسىلا مول – ھوسۇل ئالالايدىغانلىقىدىن دېرەك بەرمەيدۇ.» شۇنىڭ ئۈچۈن، بىز ئاۋال مەغلۇبىيەت ۋە زەربىگە بەرداشلىق بېرەلەيدىغان پىسخىكىلىق ساپانى ھازىرلىشىمىز، ھەرگىزمۇ باشلىنىشتىلا ئىگىلىك تىكلەپ مۇۋەپپەقىيەت قازانغاندىن كىيىنكى شېرىن چۈشلەرنى كۆرمەسلىكىمىز لازىم.    مايۈن ئۆزىنىڭ كەچۈرمىشلىرىنى ئەسلەپ مۇنداق دەيدۇ: «مەن خىزمەت تېپىشتىن بۇرۇن 30 نەچچە قېتىم رەت قىلىنغان، ئەسكەر بولۇشۇم، ساقچى بولۇشۇم رەت قىلىنغان، كېندېجىغا بارساممۇ رەت قىلىنغان، مېھمانخانىلاردا كۈتكۈچى بولۇشۇممۇ رەت قىلىنغان، بۇ سانسىزلىغان رەت قىلىنىشلار ئاخىرىدا ماڭا نۇرغۇنلىغان قائىدىلەرنى ئۆگەتتى. ئالىي مەكتەپ ئوقۇغۇچىلىرى ھەرگىزمۇ ئىگىلىك تىكلەپ مۇۋەپپەقىيەت قازىنىشنى ئەمەس، بەلكى ئىگىلىك تىكلەشتىكى روھنى قوغلىشىشى، ئىگىلىك تىكلەش جەريانىدىكى مۇشەققەتلەرنى چۈشىنىشى، ھەرخىل مۇناسىۋەتلەرنى جۇغلىشى كېرەك.» شۇنىڭ ئۈچۈن، ئىگىلىك تىكلەپ مۇۋەپپەقىيەت قازىنىشنى ئويلايدىغان ئاشۇ ئالىي مەكتەپ ئوقۇغۇچىلىرى يۇقىرىدىكى تەييارلىقلارنى تولۇقلاپ بولۇپ ئاندىن ئىگىلىك تىكلەشنى باشلىسا، مۇۋەپپەقىيەت قازىنىش نىسبىتىمۇ كۆرۈنەرلىك يۇقىرى بولىدۇ. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	بىرىنچى دەرس ئىككىنچى پارگىراف 2. ئىگىلىك يارىتىشتا ھەر كۈنى غەلبىگە ئەمەس ، بەلكى قىيىنچىلىق ۋە مەغلۇبىيەتكە يولۇقىمىز    ئىگىلىك يارىتىشنى يېڭىدىن باشلىغانلار ھەمىشە ئۆزىنىڭ مۇۋەپپەقىيەت قازانغان ۋاقىتتىكى ھالىتىنى تەسەۋۋۇر قىلىپ، ئىگىلىك يارىتىش جەريانىدا ئۇچراش ئېھتىماللىقى بولغان ھەرخىل مەسىلىلەرگە سەل قارايدۇ - دە، ئاخىرىدا مەغلۇبىيەتكە قاراپ يول ئالىدۇ. بۇنداق ئەھۋالغا نىسبەتەن، مايۈن ئىلگىرى بارلىق ئىگىلىك ياراتقۇچىلارنى سەمىمىي ئاگاھلاندۇرغان: «ئىگىلىك ياراتقۇچى مەڭگۈ ئۆزىگە شۇنداق دىيىشى كېرەك – ئىگىلىك ياراتقان بىرىنچى كۈنىدىن باشلاپ مېنىڭ ھەر كۈنى ئۇچرايدىغىنىم قىيىنچىلىق ۋە مەغلۇبىيەت، ھەرگىزمۇ مۇۋەپپەقىيەت ئەمەس.»    بىر پارچە تەكشۈرۈش نەتىجىسىدىكى سانلىق مەلۇماتنىڭ كۆرسىتىشىچە، جۇڭگودا ئىگىلىك تىكلەپ مەغلۇب بولغانلار بارلىق ئىگىلىك تىكلىگۈچىلەرنىڭ 85% نى ئىگەللەيدىكەن، بۇنىڭدىن كۆرۈۋالغىلى بولىدۇكى، ئىگىلىك يارىتىشنىڭ جەريانى قىيىنچىلىق ۋە مەغلۇبىيەتكەيۈزلىنىش جەريان ھەمدە بۇ قىيىنچىىقلارنى يېڭىپ ئىزچىل داۋاملاشتۇردىغان جەريان.بىر ئادەم ئىگىلىك يارىتىشنى تاللىغان ئىكەن، بۇ ھەرگىزمۇ ئۇنىڭ قىيىنچىلىق ئىچىدە ئۆلۈپ – تىرىلىپ ئاندىن گۈللىنىشىدىن دېرەك بەرمەيدۇ، بىراق چوقۇم بۇ خىلدىكى ئىدىيۋى تەييارلىق بولۇشى كېرەك.    مايۈن مۇنداق دىگەن: «ئەگەر سىز ئىگىلىك يارىتىش جەريانىدىكى 100 قېتىملىق يىقىلىشنىڭ تەييارلىقىنى قىلىپ بولالمىغان بولسىڭىز، ئۇنداقتا ئىگىلىك تىكلەشكە ئاتلانسىڭىز بولمايدۇ؛ ئەگەر سىز سانسىزلىغان رەت قىلىنىش ھەتتا مەسخىرە قىلىنىشلارغا نىسبەتەن تەييارلىق قىلىپ بولالمىسىڭىز، ئۇنداقتا ئىگىلىك تىكلەشكە ئاتلانسىڭىز بولمايدۇ؛ئەگەر سىز (پۈتۈن دۇنيادىكى كىشىلەر تەرىپىدىن تاشلىۋىتىلىش) تەييارلىقىنى ياخشى قىلالمىسىڭىز، ئۇنداقتا ئىگىلىك تىكلەشكە ئاتلانسىڭىز بولمايدۇ.»    1995 –يىلى، يەنى مايۈن «جۇڭگو ئۇچۇر بېتى» نى قۇرۇپ چىققان مەزگىلدە، جۇڭگودا تېخى ئېنتېرنىت تورى ئېچىلمىغان بولۇپ، كىشىلەر بۇ جەھەتتە ھېچنىمىنى بىلمەيىتتى، جۇڭگو ھۆكۈمىتىمۇ بۇ تىز سۈرئەتلىك «ئۇچۇر يۇقىرى سۈرئەتلىك تاشيولى» غا قاتنىشىشنى قارار قىلمىغان ئىدى.    ئەمما ئەينىۋاقىتتىكى مايۈن ۋە ئۇنىڭ ھەمراھلىرى ئامېرىكىدىن ئەۋەتىلگەن بىر نەچچە پارچە نۇسخىلاش قەغىزى ۋە ئامېرىكىنىڭ بىر دانە تېلفۇنىغا تايىنىپ، كىشىلەرگە دۆلەت ئىچىدە ئۇچراتقىلى بولمايدىغان بىر خىل تاۋارنى سېتىۋاتاتتى. بۇنداق ئەھۋالدا  خېرىدارلارنى قايىل قىلىش ناھايىتى تەس بولۇپ،بەزىلەر بۇ نۇسخىلاش قەغەزلىرىنى مايۈن ئۆزلىرى ياسىۋالغان، ھەرگىزمۇ ئېنتېرنىت تورى ئارقىلىق كەلتۈرۈلمىگەن دەپ گۇمان قىلاتتى. شۇنداق قىلىپ، كىشىلەر مايۈننى ئالدامچى دەپ گۇمان قىلىشقا باشلىغان.    گەرچە مايۈن ناھايىتى سەمىمىي بولغان بولسىمۇ، سودىسىنى ئىنتايىن ئەستايىدىللىق بىلەن قىلغان بولسىمۇ، ھەتتا قىيىنچىلىقلارغا قارىماي ئېنتېرنىت تورىنى تەشۋىق قىلغان بولسىمۇ ئۇ كىشىلەرنىڭ چۈشىنىشىگە ئېرىشەلمىگەن، قايتا – قايتا باشقىلار تەرىپىدىن ئالدامچى دەپ قارالغان. ئېھتىمال بۇ ئۇنىڭ تور ساھەسىدە باشقىلاردىن ھەسسىلەپ ئالدىغا ئۆتۈپ كەتكەنلىكى سەۋەبىدىن بولۇپ، بىر ئېنتېرنىت تورىنىڭ كېڭەيىتكۈچىسى چوقۇم تۆلەشكە تىگىشلىك بەدەل بولسا كېرەك.    ئۇنىڭدىن سىرت، ئۇلارنىڭ مەبلىغى ناھايىتى كەمچىل بولۇپ، شىركەتنىڭ ئالغا باسمىقى ئىنتايىن تەس ئىدى، مايۈن پۈتۈن كۈچىنى مەبلەغكە ئېرىشىشكە سەرپ قىلغان. 1995 – يىلىنىڭ كىيىنكى يېرىمىدا، شىنجىنلىق بەش نەپەر خوجايىن ئاكتىپلىق بىلەن مايۈننى ئىزدەپ خاڭجۇغا كەلگەن، ھەمدە ئۆزلىرىنىڭ 200 مىڭ يۈەن چىقىرىپ «جۇڭگو ئۇچۇر بېتى» نىڭ ۋەكالەتچىسى بولۇشنى خالايدىغانلىقىنى بىلدۈرگەن. مايۈن بۇنى ئاڭلاپلا ئۇلارغا شىركەت شەكلى، تېخنىكا ۋە تىجارەت قۇرۇلمىسىنى چۈشەندۈرگەن. خوجايىنلار بۇنى ئاڭلاپمۇ ھېچنىمىنى چۈشەنمىگەن، شۇنىڭ ئۈچۈن مايۈن تېخنىك خادىمنى شىنجىنغا ئەۋەتىپ كېچىلەپ ئىشلەپ ئۇلار ئۈچۈن تور سىستېمىسى قۇرۇپ بەرگەن. خوجايىنلار ئاخىرى بۇنىڭدىن ناھايىتى مەمنۇن بولۇپ، مايۈنگە ئۈچ كۈندىن كىيىن خاڭجۇغا بېرىپ توختام تۈزەيدىغانلىقىنى ئۇقتۇرغان. مايۈن ئۈچ كۈن زارىقىپ كۈتكەن بولسىمۇ، ھىچقانداق خەۋەرگە ئېرىشەلمىگەن، ئۇ قايتا سۈيلەش ئارقىلىق شۇنى بىلگەنكى، ئۇ خوجايىنلار تېخى يېقىندىلا ئاخبارات ئېلان قىلىش يىغىنى ئېچىپ مايۈننىڭ «جۇڭگو ئۇچۇر بېتى» گە ئوخشايدىغان تورنى بازارغا سالغان، شۇ ۋاقىتتا مايۈن ئاندىن ئۆزىنىڭ ئالدانغانلىقىنى بىلگەن. مايۈن ئىشتىن كىيىن شۇنداق دىگەن: «ئەينى ۋاقىتتا مەن بۇنى ناھايىتى ئېغىر ئالدىم، بىراق يەنىلا دەردىمنى ئىچىمدە بىلدىم.»    ئىگىلىك تىكلەش يولىدا، مايۈن سانسىز قېتىم يىقىلغان، بىراق يەنىلا ئىزچىل ئورنىدىن تۇرغان. مەيلى قانچىلىك زىيان، قانچىلىك بوزەك قىلىنىش، يەنە قانچىلىك چوڭ زەربە ۋە بېسىملار بولسۇن، مايۈن ھەممىگە بەرداشلىق بەرگەن. ئۇ ۋە ئۇنىڭ ئىگىلىك تىكلەشتىكى ھەمراھلىرى نۇرغۇنلىغان قىيىنچىلىق ۋە سىناقلارنى باشتىن كەچۈرۈپ،توختىماستىن ئۆسكەن ۋە پىشىپ يىتىلگەن.    مايۈن ئۆزىنىڭ ئىگىلىك تىكلەش كەچۈرمىشلىرىنى ئەسلىگەندە شۇنداق دەيدۇ: «ئىگىلىك تىكلەشنىڭ بىرىنچى كۈنىدىن باشلاپ شۇنداق بىر پىسخىكىلىق تەييارلىق بولۇشى كېرەك:ھەر كۈنى ئۆزىنىڭ كەلگۈسىدىكى ئون يىل، يىگىرمە يىلدا نېمىگە دۇچار بلىدىغانلىقىنى ئويلىنىش. شۇنى بىلىش كېرەككى، سىز ئۇچرىغان پالاكەت نەچچە ئون يىلدا ئۇچرايدىغان قىيىنچىلىقلار ئىچىدىكى ناھايىتى كىچىككىنە بىر قىسىمى خالاس. گەرچە ئىگىلىك تىكلەش يولىغا نۇرغۇنلىغان قىيىنچىلىقلار يوشۇرۇنغان بولسىمۇ، پەقەت مۇشۇ قىيىنچىلىقلارنى يەڭگەندىلا، سىز ئاندىن ئاخىرقى غەلبىگە ئېرىشەلەيسىز. شۇ ۋاقىتقا كەلگەندە سىز مۇنداق دىيەلەيسىز: مەن كۈرەشلىرىمدىن كەلگەن خۇشاللىققا ئېرىشتىم.»    ھازىر،كۆپچىلىك پەقەت «ئەلى بابا» نىڭ ناھايىتى گۈللەنگەن ھالىتىنى كۆرەلەيدۇ، ئەمما مايۈن ۋە ئۇنىڭ ھەمراھلىرىنىڭ ئىگىلىك تىكلەش جەريانىدىكى تۆلىگەن بەدەللىرىنى بىلمەيدۇ. مايۈن: «(ئەلى بابا) نىڭ ئۆسۈپ – يىتىلىشىدىكى كۆپچىلىك كۆرەلەيدىغان گۈللىنىش مەنزىرىسى پەقەت %20 نى ئىگەللەيدۇ، قىيىنچىلىق بولسا %80 نى ئىگەللەيدۇ.بۇ بەش – ئالتە يىلدىن بۇيان بىز پەقەت ئەگرى – توقاي يوللاردا لىۋىمىزنى چىشىلەپ مېڭىپ كەلدۇق، پەخىرلەنگۈدەك نەتىجىدىن ئېغىز ئاچقىلى بولمايدۇ.» دىگەن.    مەسىلەن:2002 – يىلى پۈتۈن دۇنيادىكى ئېنتېرنىت ساھەسىنىڭ «سوغۇق پەسلى» بولغان، ئامېرىكىنىڭ ناسداك بازىرىدا ئىزچىل تۆۋەنلەش كۆرۈلگەن، پۈتۈن يەر شارىدىكى ئېنتېرنىت تورى كۆپۈكلىشىش ھالىتىگە ئۆتكەن، دۆلەت ئىچىدىكى كۆپ قىسىم تور تېخنىكىسى كارخانىلىرى ئارقا – ئارقىدىن تاقىلىپ قالغان، «ئەلى بابا» دىن ئىبارەت ئەسلىدىنلا «تېگى بوش»كىچىك شىركەت تېخىمۇ چوڭ زەربىگە ئۇچرىغان. بىراق مايۈن قىيىنچىلىقلارغا باشتىن –ئاخىرى كۈلۈمسىرەپ تۇرۇپ يۈزلەنگەن، ئۇنىڭ قارىشىچە، ئىگىلىك تىكلەش كىشىلىك ھاياتقا ئوخشاش بولۇپ، ھەممىدىن مۇھىمى سىزنىڭ نېمىلەرنى باشتىن كەچۈرگەنلىكىڭىز ،ھەرگىزمۇ نېمىگە ئېرىشكەنلىكىڭىز ئەمەس ئىدى، پەقەت مەڭگۈ ۋاز كەچمەسلىكلا ئۈمىدتىن دىرەك بېرەتتى. شۇنداق قىلىپ، «ئەلى بابا» «بىر سوم تېپىش» نى نىشان قىلىپ بۇ قېتىمقى خەتەردىن ئۆتۈپ كەتتى.    مايۈن قىيىنچىلىقلارغا قارىتا ئاكتىپ پوزىتسىيىدە بولۇپ مۇنداق دىگەن: «كىشىلىك ھايات بىر جەريان، مۇۋەپپەقىيەتنىڭ مەنىسى سىزنىڭ قانچىلىك قىيىنچىلىقلارغا خاتىمە بەرگەنلىكىڭىزدە، قانچىلىك خىيىم – خەتەرلەرنى باشتىن كەچۈرگەنلىكىڭىزدە، ھەرگىزمۇ قانداق نەتىجىگە ئېرىشكەنلىكىڭىزدە ئەمەس. مەن ئۆزۈمنىڭ 80 – 70 ياشقا كىرگەن ۋاقتىمدا، مەن نەۋرەمگە بوۋىسىنىڭ بۇ ئۆمىرىدە قانچىلىك نەرسىلەرگە ئېرىشكەنلىكىنى ئەمەس، بەلكى قانچىلىك كەچۈرمىشلەرنى باشتىن كەچۈرگەنلىكىنى سۆزلەپ بېرەلىشىمنى ئۈمىد قىلىمەن.» بارلىق ئىگىلىك تىكلىگۈچىلەر مۇشۇنداق پىسخىكىلىق ھالەتكە ئىگە بولۇشى كېرەك.    ئىگىلىك تىكلەشتىن بۇرۇن، سىزنىڭ كۆزىڭىز پەقەتلا شانلىق كەلگۈسىنى كۆرسە، ئەمما سىزدە يىتەرلىك زەربىگە، مەغلۇبىيەتكە بەرداشلىق بېرىش ئىقتىدارى، ھەمدە ھەرخىل ئوڭۇشسىزلىق ۋە بوزەك قىلىنىشقا تاقابىل تۇرالايدىغان ئىقتىدار بولمىسا، ئۇنداقتا ئەڭ ياخشىسى ئىگىلىك تىكلەشنى باشلىماڭ. شۇنى بىلىش كېرەككى، كىشىلىك ھايات يولى شوڭ شىياشىڭجىجۇ ئېيىتقان بىر كەلىمە سۆزگە ئوخشايدۇ:< ئادەمنىڭ ھاياتى ھەمىشە ئىگىز – پەس بولىدۇ، ھەرگىزمۇ مەڭگۈ كۈلۈپلا ئۆتىدىغان ياكى مەڭگۈ يىغلاپلا ئۆتىدىغان ئىش مەۋجۇت ئەمەس>. بىر ئىگىلىك تىكلىگۈچى بولۇش سۈپىتىڭىز بىلەن،سىز چوقۇم دۇرۇس، كەمتەر پوزىتسىيە بىلەن ئالغا ئىلگىرلىشىڭىز، ئىزچىل مەغلۇبىيەتنى قوبۇل قىلىش، قىيىنچىلىقلارغا تاقابىل تۇرۇشنى غەلبىگە ئېرىشىشنىڭ ئەڭ مۇقەددەس ئۇل تېشى قىلالىشىڭىز كېرەك! مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	بىرىنچى دەرس ئۈچۈنچى پارگىراف 3. قايتا – قايتا يىقىلسىمۇ يەنە ئورنىدىن تۇرۇش كېرەك    كۆپ قىسىم ئىگىلىك تىكلىگۈچىلەرنىڭ يولى ھەرگىزمۇ راۋان بولمايدۇ، ئىگىلىك تىكلەش يولىدا ئوڭۇشسىزلىق ۋە مەغلۇبىيەتتىن ساقلىنىش تەس. بىر قىسىم كىشىلەر ئوڭۇشسىزلىققائۇچراپ مەغلۇب بولسىلا ئۆزىگە شۇنداق دەيدۇ: «مەن ئاللىقاچان سىناپ باقتىم، ئەمما بەختكە قارىشى مەغلۇب بولدۇم.» شۇنىڭدىن باشلاپ ھەركەت قىلىشقا پېتىنالمايدۇ ياكى قايتا سىناپ باقمايدۇ؛ ئەكسىچە سىناپ بېقىشقا جۈرئەت قىلالايدىغان قىيىنچىلىققا ئۇچرىسىمۇ ئىزچىل داۋاملاشتۇرالايدىغان كىشىلەر قايتا – قايتا ئوڭۇشسىزلىققا ئۇچرىسىمۇ، ھەمىشە ئۆزىگە شۇنداق دەيدۇ: «مەن مەغلۇب بولمىدىم، پەقەت تېخى غەلبە قىلمىدىم.»    مايۈن مۇنداق دىگەن: «مەن شۇنىڭغا ئىشىنىمەنكى، پەقەت مەڭگۈ ۋاز كەچمىسەكلا، بىز يەنىلا پۇرسەتكە ئېرىشەلەيمىز.» خۇددى مايۈننىڭ ئېيىتقىنىدەك، ئۇنىڭ ئىگىلىك تىكلەش يولىمۇ ئەگرى – توقايلىقلارغا، خىيىم – خەتەرلەرگە تولغان، بىراق ئۇ ئاخىرىغىچە بەرداشلىق بەرگەن.    ھەقىقەتەن،بىر ئادەم بەزى زەربىلەرگە ئۇچرىغان ۋاقىتتا ناھايىتى پاسسىپلىشىپ كېتىدۇ. زەربىگە ئۇچرىغان شۇ ۋاقىتتا، سىز ئۆزىڭىزنى خۇددى ئېغىر زەربىدىن يەرگە يىقىتىۋىتىلگەن،باشلىرىڭىز غوڭۇلداۋاتقان، قۇلاق تۈۋىڭىزدە تاماشىبىنلارنىڭ مەسخىرىسى ياڭراۋاتقان بوكىس ماھىرىدەك ھېس قىلىسىز – دە، مەغلۇبىيەت تۇيغۇسى پۈتۈن بەدىنىڭىزگە تارايدۇ.بۇنداق ۋاقىتتا، سىز ئۆزىڭىزنى قايتا ئورنۇمدىن تۇرالمايمەن دەپ ئويلايسىز، ھەتتا سىزنىڭ ئورنىڭىزدىن تۇرغىدەك ماجالىڭىزمۇ قالمايدۇ!    ئەمما، سىزچوقۇم ئورنىڭىزدىن تۇرۇشىڭىز كېرەك. بىر بوكىس تەنھەركەتچىسى مۇنداق دىگەن: «سول كۆزۈڭ يارلانغان ۋاقىتتا، ئوڭ كۆزۈڭنى يەنىلا چوڭراق ئېچىشىڭ كېرەك، شۇندىلا ئاندىن رەقىبىڭنى كۆرەلەيسەن – دە، قايتۇرما ھۇجۇم قىلىشقا پۇرسەت چىقىدۇ. ئەگەرئۇنداق قىلماي، ئوڭ كۆزۈڭنىمۇ ئېتىۋالساڭ، كۆزۈڭ يارلىنىپلا قالماستىن، ھاياتىڭنى ساقلاپ قېلىشىڭمۇ تەسكە توختايدۇ!»    ئۇنىڭدىن باشقا، سىز مەغلۇب بولغان ۋاقىتتا چوقۇم نۇرغۇنلىغان تاماشىبىنلارنىڭ گۈلقەقەلىرى ئېچىلىپ كېتىدۇ. بۇ چاغدا تاماشىبىنلارنىڭ مەسخىرىسى ۋە مەغلۇب بولغاندىكى نومۇس تۇيغۇسىدىن قۇتۇلۇش ئۈچۈن، سىز چوقۇم كۆزلىرىڭىزنى يەنە ئېچىشىڭىز، قۇۋۋىتىڭىزنى ئاستا – ئاستا ئەسلىگە كەلتۈرىشىڭىز ھەمدە ئاغرىق ئازابىنى بېسىقتۇرۇپ، مۇسابىقىنى داۋاملاشتۇرۇشىڭىز كېرەك.    ئامېرىكا تۈرلۈك ماللار پادىشاھى مېس 1882 – يىلى بوستوندا تۇغۇلغان. ئۇ ياش ۋاقىتلىرىدا دېڭىز سەپىرىگە چىقىپ باققان، كىيىن بىر يايما ئاچقان، ھالبۇكى يايما ناھايىتى تىزلا تاقىلىپ قالغان. بىر يىلدىن كىيىن، ئۇ يەنە بىر يايما ئاچقان، بىراق بۇ قېتىممۇ مەغلۇبىيەت بىلەن تۈگەللەنگەن.    ئالتۇن كولاش قىزغىنلىقى پۈتۈن ئامېرىكىنى قاپلىغان ۋاقىتتا، مېس كالفورنىيەدە بىر كىچىك ئاشپۇزۇل ئاشقان، ئۇ ئەسلىدە ئالتۇن كولىغۇچىلار بىلەن دەسمىسىز ھالدا راۋان سودا قىلىمەن دەپ ئويلىغان، بىراق نۇرغۇنلىغان ئالتۇن كولىغۇچىلار ھېچنىمىگە ئېرىشەلمىگەچكە، ئۇنىڭ كىچىك ئاشپۇزۇلىمۇ تىجارىتىنى ئاختۇرالماي تاقىلىپ قالغان.   ماسساچۇستىسقا قايىتقاندىن كىيىن، مېس ئىشەنچكە تولغان ھالدا كىيىم – كىچەك تىجارىتىنى باشلىغان، ئەمما بۇ قېتىم ئۇنىڭ تىجارىتى توختاپلا قالماستىن، يەنە پۈتۈنلەي ۋەيران بولۇپ ھېچنىمىسى قالمىغان.    تەۋەككۈلچى مېس يەنە يېڭى زىلاندىيەگە بېرىپ كىيىم – كىچەك تىجارىتىنى باشلىغان. بۇ قېتىم ئۇنىڭ تىجارىتى يۈرۈشكەن. تۇنجى كۈنى تىجارەت باشلىغاندا ئۇنىڭ ھېساۋاتىدا پەقەت 11.08 ئامېرىكا دوللىرىلا قالغان بولسىمۇ، ئەمما ھازىر ئۇنىڭ مانخاتتون مەركىزى رايونىغا جايلاشقان<مېس تۈرلۈك ماللار شىركىتى> ئاللىقاچان دۇنيادىكى ئەڭ چوڭ تۈرلۈك ماللار سودا شىركەتلىرىنىڭ بىرىگە ئايلانغان.    ئادەم مەغلۇب بولغاندىمۇ چوقۇم ئورنىدىن قايتاتۇرۇش كېرەك! مۇۋەپپەقىيەت قازانغۇچى بىلەن مەغلۇبىيەتچىنىڭ ناھايىتى مۇھىم بولغان بىر پەرقى بار: مەغلۇبىيەتچى ھەمىشە ئوڭۇشسىزلىقنى مەغلۇبىيەت قاتارىدا كۆرىدۇ،شۇنىڭ ئۈچۈن ھەر قېتىملىق ئوڭۇشسىزلىق ئۇنىڭ غەلبىگە بولغان ئىشەنچىسىنى يەرگە ئۇرىدۇ؛ مۇۋەپپەقىيەت قازانغۇچى ئەزەلدىن مەغلۇبىيەتكە ئىشەنمەيدۇ، ئۇ مەغلۇبىيەتنى قايتا كۆرەش قىلىدىغان ھەركەتلەندۈرگۈچ كۈچ قىلىدۇ.    2006 –يىلى، لىنياڭ ئۆزىنىڭ مۇقىم خىزمىتىدىن ئىستىپا بېرىپ، «شىدىيەن ھەربىي لازىمەتلىكلەر دۇكىنى» نى ئاچىدۇ، كىچىكىدىن باشلاپ ھەربىي ئىشلار بىلىملىرىگە قىزىقىدىغان لىنياڭ ئۆزىنىڭ قىزىقىش نۇقتىسىنى ئىگىلىك تىكلەش نىشانى قىلىدۇ، بۇ ھەقىقەتەن خۇشاللىنارلىق ئىش ئىدى.    ھالبۇكى،تىجارەت باشلاپ ئوزۇن ئۆتمەستىنلا لىنياڭ ئۈمىدسىزلىنىشكە باشلايدۇ، ئۇنىڭ تىجارىتى ئۇ ئويلىغاندەك ياخشى بولمىغان ئىدى. نۇرغۇنلىغان كىشىلەر يېڭىلىققا ئىنتىلگەچكە،دەسلەپتە نۇرغۇنلىغان كىشىلەر ئۇنىڭ دۇكىنىغا قەدەم تەشىرىپ قىلىدۇ. بىراق ۋاقىت ئۇزارغانسىرى كەلگەن كىشىلەر پەقەتلا كۆرۈپ سېتىۋالمايدۇ، ئۇنىڭ سودىسىمۇ كاساتلىشىشقا باشلايدۇ. بۇ كىچىك دۇكاننىڭ يېرىم يىللىق ئىجارە ۋاقتى توشقاندىن كىيىن، ھېچقانداق پايدا كۆرەلمىگەن لىنياڭ ھەربىي لازىمەتلىكلەر دۇكىنىنى تاقايدۇ– دە، ھېسابلاپ كۆرۈپ ئۆزىنىڭ بىر تۈمەندىن ئارتۇق زىيان تارتقانلىقىنى بايقايدۇ.    تۇنجى قېتىملىق مەغلۇبىيەتنى باشتىن كەچۈرگەندىن كىيىن، لىنياڭ ئازراق پاسسىپلىشىدۇ.ئاتا – ئانىسىنىڭ ئاگاھلاندۇرۇشى ئارقىسىدا، لىنياڭ ئۇلارنىڭ ئارزۇسى بۇيىچە مۇقىم خىزمەتتىن بىرنى تاپماقچى بولىدۇ.    ھالبۇكى،خىزمەت قىلىپ مەلۇم ۋاقىتتىن كىيىن، لىنياڭ ئۆزىنىڭ تېخى ياش ئىكەنلىكىنى، چوقۇم جاھان كۆرۈشى لازىملىقىنى ھېس قىلىدۇ. بىر قېتىملىق تاسادىپىي پۇرسەتتە، ئۇ بېيجىڭدىكى بىر تاتلىقياڭيۇ دۇكىنىدا پۇشۇرۇلغان تاتلىقياڭيۇنىڭ ناھايىتى ئۆزگىچە ئىكەنلىكىنى بايقايدۇ، شۇنداق قىلىپ 2008 – يىلى 10 – ئاي ئەتراپىدا ئۇ يەنە ئىش ھەققى خېلىلا يۇقىرى بولغان سېتىقچىلىق خىزمىتىدىن ئىستىپا بېرىپ، ئۇ تاتلىق ياڭيۇ دۇكىنىنىڭ ۋاكالەتچىسى بولىدۇ. ئۇ ئۆزىنىڭ يۇرتىدىكى بىر كىچىك ناھىيە بازىرىدىن 8 كۋادىرات مېتىر كۆلەمدىكى دۇكاننى ئىجارىگە ئالىدۇ، ھەمدە 8000 يۈەندىن كۆپرەك مەبلەغ سېلىپ باش شىركەتتىن تاتلىقياڭيۇ قاقلاشتا ئىشلىتىلدىغان ئەسلىھەلەرنى كىرگۈزۈپ ئىككىنچى قېتىملىق ئىگىلىك يارىتىش سەپىرىنى باشلايدۇ.    بۈگۈنكى كۈندە، لىنياڭنىڭ تاتلىقياڭيۇ دۇكىنىنىڭ سودىسى خېلىلا ياخشى بولۇپ، سودا بېسىقۋاقىتلاردا كۈنلۈك كىرىمى 1000 يۈەنگە يېتىدۇ، سودا كاساتلاشقان ۋاقىتلاردىمۇ ھەرخىل تاتلىقياڭيۇ ياپراقچىلىرىنى سېتىپ دۇكان ئىجارىسىنى قامدىيالايدۇ. بىراق لىنياڭ ئۆزىنىڭ ھازىرقى ھالىتىدىن قانائەتلەنگەن ئەمەس، ئۇ شۇنداق دەيدۇ: «نۆۋەتتە بۇ پەقەتلا بىر كىچىك تۈر، يەنى ئۆتكۈنچى تۈر، مەن ئىزچىل بازار يۈزلىنىشىگە دىققەت قىلىپ، بىر قەدەم – بىر قەدەمدىن ئۆزۈمگە كۈچ توپلايمەن.»    ئەگەر سىز مۇۋەپپەقىيەت قازىنىشنى ئويلىسىڭىز، چوقۇم تىرىشىشىڭىز كېرەك؛ ئەگەر سىز مۇۋەپپەقىيەت قازىنىشنى ئويلىسىڭىز، چوقۇم كۈرەش قىلىشىڭىز كېرەك؛ ئەگەر سىز مۇۋەپپەقىيەت قازىنىشنى ئويلىسىڭىز، يىقىلىپ كەتسىڭىزمۇ ئورنىڭىزدىن تۇرۇشىڭىز كېرەك! بىزدە «قەتئىي داۋاملاشتۇرغاندا، ئادەم تاۋلىنىدۇ.»دەيدىغان ھېكمەت بار. ئوڭۇشسىزلىققا ئۇچرىغان ۋاقىتتا، ئۇنى ئۆزىڭىزگە بولغان سىناق دەپ چۈشىنىشىڭىز، كۈلۈمسىرەپ تۇرۇپ ئۇنىڭغا يۈزلىنىپ ئىشەنچ تۇرغۇزىشىڭىز، داۋاملىق كۈرەش قىلىپ، يىقىلسىڭىزمۇ قايتا ئورنىڭىزدىن تۇرۇشىڭىز لازىم! يەنە يىقىلىپ كەتسىڭىز يەنە ئورنىڭىزدىن تۇرشىڭىز زۆرۈر! پەقەت شۇنداق بولغاندىلا سىز ئاندىن ھەقىقىي مۇۋەپپەقىيەتكە ئېرىشەلەيسىز! مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

xahanime

	ئىچكىرى ئۆلكىلەردە 24 سائەتتە كەلگەن بىلەن بىزنىڭ شىنجاڭغا 4.5كۇندەا ئاران كىلىدۇ دۆلەت پوچتىسىنى ھىساپ ئالمىغاندا. 旺信غا قويۇلغان كەلدىدار تازا قاملىشىپتىغۇ. نۇرغۇنلىغان سودا تور بىكەتلىرى قۇرۇلدى لىكىن ئالىبابادەك پۇت تىرەپ گۇللەنگەنلىرى كۆپ ئەمەس راستىنلا ھەربىر ئادەمنى قايىل قىلىدۇ . بولۇپمۇ تۇرمۇشقا كۆپلىگەن قۇلايلىق ئىلىپ كەلدى.

1andir

	ھەقىقى تىما . تەھرىر   ،تەرجىمانغا  كۆپ رەخمەت   مۇشۇنداق تىما      ئادەمنى تەربىيلەيدۇ .ياشاپ كىتڭ  .

Davan_Axkuqi

	qilche qiziqmaymen

hakan617

	جاپا چىكىپسىز قېرىندىشىم !

Ay.sadap

	ئىگىلىك تىكلەشنى ئويلىغۇچى ئالدى بىلەن مەغلۇبىيەتنى غەلبىنىڭ ئاساسى دەپ بىلىشى، ۋە مەغلۇبىيەتتىن ئورنىدىن تۇرالايدىغان روھ بولۇشى كېرەك ئىكەندە..... كۆپ رەھمەت.. ئۇيغۇر قاشتېشى تورىنىڭ ئادرىسىنى قالدۇرۇپ قويسىڭىز. رەھمەت.

WWW.UYHQT.COM

	Ay.sadap يوللىغان ۋاقتى  2014-11-7 01:33 AM ئىگىلىك تىكلەشنى ئويلىغۇچى ئالدى بىلەن مەغلۇبىيەتنى غ ... ئۇيغۇر قاشتېشى تورى تور ئادرېسى:WWW.UYHQT.COM سالون :UYHQT