NASA: يېقىنقى «تاشقىي پلانېت ئادىمى» ھەققىدىكى خەۋەرمۇ يالغان

bilimxumar

	يېقىنقى «تاشقىي پلانېت ئادىمى» ھەققىدىكى خەۋەرمۇ يالغان بىلىمخۇمار 2014-يىلى 11-ئاينىڭ 6-كۈنى يېقىنقى بىر ھەپتىدىن بۇيان كۆپلىگەن ئوقۇرمەنلەر ماڭا ئۇچۇر يېزىپ، مەندىن «بويد بۇشمەن» (Boyd Bushman) ئىسىملىك بىر ئامېرىكىلىق ئالىم تور ئارقىلىق تارقاتان، «تاشقىي پلانېت ئادەملىرى راستىنلا بار بولۇپ، ئۇلار يەر شارىنى زىيارەت قىلىپ باققان» دېگەن مەزمۇندىكى بىر پارچە سىن ھۆججىتىدە دېيىلگەن خەۋەرنىڭ راست-يالغانلىقىنى  سورىدى  (ئۇ سىن ھۆججىتىنى ھازىرمۇ يۇتيۇبتىن تاپقىلى بولىدۇ).  مەن ئۆزەمگە خەت يېزىپ، بۇ ئىشنى سورىغان تورداشلارغا ھازىرغىچە ئايرىم-ئايرىم جاۋاب بېرىپ كەلدىم.  بۈگۈن مۇشۇ قىسقا يازمىدىن پايدىلىنىپ بۇ ئىشنى ھەممەيلەنگە بىراقلا چۈشەندۈرۈپ قويۇشنى مۇۋاپىق كۆردۈم.   بۇ ئىش يالغان.  ئۇنىڭغا ھەرگىز ئىشەنمەڭ. ئامېرىكىدىكى «Lockheed Martin» شىركىتى ناسا ئۈچۈن بىر قىسىم ئالەم تېخنولوگىيىسىگە ئائىت نەرسىلەرنى ياساپ بېرىدىغان شىركەت بولۇپ، بويد بۇشمەن دېگەن كىشىنىڭ بۇرۇن ئاشۇ شىركەتتە بىر يۇقىرى دەرىجىلىك تېخنىكىلىق خادىم بولۇپ ئىشلىگىنى راست.  بۇ كىشى 2014-يىلى 7-ئاۋغۇست كۈنى 78 يېشىدا ۋاپات بولغان بولۇپ، ۋاپات بولۇشتىن بىر قانچە كۈن ئىلگىرى بىر سىن ھۆججىتى تەييارلاپ، ئۇنى تورلارغا چىقىرىپ قويغان.  ئۇ سىن ھۆججىتى ئۇ چاغدا كىشىلەرنىڭ دىققىتىنى تارتمىغان بولۇپ، پەقەت يېقىندىلا بۇ ئىش تورلاردا بىر قىزىق تېمىغا ئايلىنىپ قالغان.   بويد بۇشمەننىڭ دېيىشىچە تاشقىي پلانېت ئادەملىرى يەر شارىغا كېلىپ باققان ئىكەن.  ئۇ ھېلىقى سىن ھۆججىتىدە ئۆزىنىڭ بىر «تاشقىي پلانېت ئادىمى» بىلەن بىللە چۈشكەن رەسىمىنىمۇ كۆرسىتىدۇ.  ھەمدە ئۇنىڭغا ئائىت بىر قىسىم يالغان گەپلەرنىمۇ قىلىدۇ.  ئۇ گەپلەر يالغان بولغاچقا، مەن بۇ يازمىدا ئۇلارنى بايان قىلىپ ئولتۇرمايمەن. ناسا ۋە «Lockheed Martin» شىركىتى قاتارلىق رەسمىي ئورۇنلارنىڭ ھېچ قايسىسى بويد بۇشمەننىڭ ھېكايىسىغا بىرەر ئىنكاس قايتۇرمىدى.  ئۇنىڭ ئەكسىچە، ئۇچار تەخسە مۇتەخەسسىسلىرى ۋە تېلېۋىزور ئوبزورچىلىرى بولسا ئۇ كىشىنى زاڭلىق قىلىشىۋاتىدۇ.   مېنىڭ ئۆتكەندە بىر ماتېرىيالدا كۆرۈشۈمچە، ئامېرىكا ئۇچار تەخسىنى تەكشۈرۈپ تەتقىق قىلغان مەزگىلدە، «مەن ئۇچار تەخسىگە چىقىپ، تاشقىي پلانېتا ئادەملىرى بىلەن بىر ھەپتە بىللە بولۇپ چۈشتۈم» دەۋالغان، ھەمدە ئالىي دەرىجىلىك ئۇنۋانغا ئىگە كىشىلەردىن 176 نەپەر كىشىنى تىزىملاپتىكەن.  كېيىن يالغانچىلارنى تاپىدىغان ئەسۋاپقا سېلىپ دېگەندەك ئۇسۇللار بىلەن قاتتىق تەكشۈرۈش نەتىجىسىدە، ئۇلارنىڭ ھېكايىسى پۈتۈنلەي يالغان چىقىپتىكەن.  بەزى كىشىلەر راستلا شۇنداق ئىش بولغاندەك بىر خىل روھىي ھالەتكە كىرىپ قالىدىكەن.  مېنىڭچە بۇ ئادەممۇ ئاشۇنداق كىشىلەرنىڭ بىرسى بولىشى مۇمكىن.  ناسا دىكىلەر ۋە ئامېرىكا ھۆكۈمىتى بۇنداق گەپلەرگە قەتئىي ئىشەنمەيدۇ. ئامېرىكا ئۇچار تەخسە ھەققىدىكى تەتقىقات خىزمىتىنى 1978-يىلى پۈتۈنلەي توختىتىۋەتكەن.   شۇڭلاشقا مەن ھەممە قەرىنداشلاردىن بۇ خەۋەرگە ئىشەنمەسلىكنى ئۈمىد قىلىمەن. مەن بىر قانچە ھەپتىنىڭ ئىچىدە تاشقىي پلانېتا ئادەملىرى ھەققىدە بىر ئايرىم تېما يوللاپ، بۇ ھەقتە بىر قەدەر تەپسىلى ئۇچۇر بەرىمەن. تۆۋەندىكى 1-رەسىمدىكىسى بىر قانچە يىلنىڭ ئالدىدا ئامېرىكىدىكى دۇكانلاردا سېتىلغان بالىلارنىڭ پلاستىك ئويۇنچۇقلىرى بولۇپ، ئۇنىڭ ئىچىدىكى «تاشقىي پلانېتا ئادىمى» بويد بۇشمەن بىللە رەسىمگە چۈشكەن «تاشقىي پلانېتا ئادىمى» بىلەن ناھايىتىمۇ ئوخشىشىپ كېتىدىكەن.  قالغان رەسىملەر بولسا بويد بۇشمەن تارقاتقان سىن ھۆججىتىدىكى كۆرۈنۈشلەر. پايدىلىنىش ماتېرىياللىرى: [1] Video emerges of 'Lockheed Martin scientist' claiming aliens are REAL and that he worked at Area 51 on UFO technology <http://www.dailymail.co.uk/scien ... technology.html> [2] On Deathbed, Former ‘Lockheed Martin Engineer’ With ‘Top Secret Clearance’ Opens Up About…Aliens <http://www.theblaze.com/stories/ ... p-about-aliens/> 1-رەسىم 1-رەسىم: بىر قانچە يىلنىڭ ئالدىدا ئامېرىكىدىكى دۇكانلاردا سېتىلغان بالىلارنىڭ پلاستىك ئويۇنچۇقلىرى بولۇپ، ئۇنىڭ ئىچىدىكى «تاشقىي پلانېتا ئادىمى» بويد بۇشمەن بىللە رەسىمگە چۈشكەن «تاشقىي پلانېتا ئادىمى» بىلەن ناھايىتىمۇ ئوخشىشىپ كېتىدىكەن.  تۆۋەندىكى قالغان رەسىملەر بولسا بويد بۇشمەن تارقاتقان سىن ھۆججىتىدىكى كۆرۈنۈشلەر. 2-رەسىم 3-رەسىم 4-رەسىم 5-رەسىم

Rujak

	باشلانغۇچتا ئوقۇۋاتقان ۋاقتىمدا ئىشىنەتتىم بۇنداق خەۋەرلەرگە ،ھازىر قەتئىي ..... رەھمەت بىلىمخۇمار ئاكا ،قىممەتلىك ۋاقتىڭىزنى چىقىرىپ بىزنى مۇشۇنداق خەۋەرلەر بىلەن تەمىنلىگنىڭىزگە ،

قورغان

	رەھمەت سېزگە،بىزنى ھەر جەھەتتىن ئويغۇتۇپ كېلىۋاتىسىز

Acura

	ئۇنۇڭ تارقاتقان خەۋىرى يالغاندۇ ، لېكىن يەر شارىدىن باشقا چەكسىز كائىناتتا ھاياتلىق مەۋجۇت ، بۇنۇڭغا مەن قەتئىي ئىشىنىمەن ، شۇغۇنىسى ئۇ ھاياتلىقلار ئادەم شەكلىدە مەۋجۇتمۇ ياكى باشقا شەكىلدە بارمۇ ، بۇنى ياراتقۇچى ئىگەم بىلىدۇ . سىزگە كۆپ رەھمەت !

bilimxumar

	مەن «51-رايون» ھەققىدە بۇرۇن بىر پارچە قىسقا ماقالە تەييارلىغان.  بۇ «51-رايون» بۇ قېتىمقى بويد بۇشمەننىڭ «مەن بۇرۇن 51-رايوندا ئىشلىگەن»  دېگەن سۆزىدىكى «51-رايون» نىڭ نەق ئۆزى شۇ.  قىزىقىدىغان قېرىنداشلار مېنىڭ ئۇ يازمامنىمۇ كۆرۈپ بېقىڭلار: ئامېرىكىدىكى «تاشقىي پلانېتلىقلار ئىگىلىۋالغان جاي» https://uyghur-archive.com/misranim/thread-109824-1-1.html = ==================================== = بەزى قېرىنداشلار مەندىن ئامېرىكىنىڭ ئايغا ئادەم چىقارغانلىقىنىڭ راست-يالغانلىقىنى سوراۋاتىدۇ.  ئاشۇ مەسىلىگە قىزىقىدىغان قېرىنداشلار مېنىڭ تۆۋەندىكى قىسقا يازمامنى كۆرۈپ بېقىڭلار:   ئامېرىكىنىڭ ئايغا ئادەم چىقارغىنى يالغانمۇ؟ https://uyghur-archive.com/misranim/thread-110012-1-1.html

sardor0908

	رەھمەت بىلىمخۇمار ئاكا .سىزنىڭ مۇشۇنداق ھەقىقىي ئەھۋاللار بىلەن بىزنى ئەپقاشتىلاردىن ساقىت قىلى] كەلگىنىڭىزگە رەھمەت .   ئۆزۈمنىڭ شەخسى ئويلغۇنۇم بولسا ،ناسا ،فىدارىتسيە خەپسىزلىكى ،دۆلەت زىمىن بىخەتەرلىكى دىگەندەك ئورۇنلار راست گەپ قىلىپ كىتىشىمۇ ناتايىن .ئىنسانلارنىڭ تاشقى دۇنيا ،تاشقى پىلانت ئادەملىرى ھەققىدە قالدۇرغان رىۋايەتلىرى ھىكايىللىرى ،خاتىرىلىرى 100يىل ئىچىدىلا قالدۇرۇلغان ئەمەس .قەدىمقى مەدىنىيەت ئىزلىرىدىنمۇ ئىنسانلار تاشقى پىلانىت ھەم تاشقى پىلانت ئادەملىرى ،ئىلاھچىلىق ،ئىتىقادچىلىقى خاتىرىلەنگەن خاتىرىلەرمۇ بار .نىمە ھەقىقەت نىمە يالغان بۇ پەقەت شۇ نەرسىنىڭ قىممىتى قالمىغان ئالدىن يىشىلىدۇ .ئىشىنىمەنكى ئىنسانلار كائىناتتا يالغۇر ئەمەس .

مېھرىما

	رەھمەت،تاشقى پىلانىت ئادىمىگە نىسبەتەن چۈشەنچىگە ئىگە بولدۇم.

alhumar137

	ئۇنداقتا ھەممىسى يالغان كەندە

UYGRAF

	ئۇنداقتا، ＵＦＯ　(نامەلۇم ئۇچار جىسىم)  دىگەن نەرسىمۇ يالغانمۇ؟ ئەگەر UFO دىگىنى راس مەۋجۇد بولسا، ئۇنى ‹‹ تاشقى پىلانىتلىق ئادەم››لەر ھەيدەيدىغاندۇ؟ بىر جاۋاپ بېرىۋېتىڭە ئەركىنكا.

akbarjan2015

	Acura يوللىغان ۋاقتى  2014-11-6 01:56 PM ئۇنۇڭ تارقاتقان خەۋىرى يالغاندۇ ، لېكىن يەر شارىدىن با ... پىكىرىمىز ئوخشاش ئىكەن