تېلىفۇنغا ياتلىق بولدى ئادەملەر

bahwanbiz

	تېلىفۇنغا ياتلىق بولدى ئادەملەر يىراقلاشتى ساپ ھاۋانىڭ لەۋلىرى ، تېرىكمەكتە زوكام تېگىپ پەسىللەر . پارچىلاندى بىر ئائىلە گەۋدىسى ، قىيسايماقتا تۆت تامدىكى غەزەللەر . بوران كىرەر پۈرۈشتۈرۈپ لېۋىنى ، غېرىپ كۆڭۈل يازار مۇڭلۇق ۋەسىيەت . ئېڭىشىدۇ ئالقىنىغا ئادەملەر ، قولتىقىدىن يىرتىلماقتا مۇھەببەت . غېرىپسىنار ئىككى ياندا پەرشتە ، يىقىنلىشار زامان ئاخىر قىرغىقى . ساپىقىدا يىگىلەيدۇ تەببەسسۇم ، ئاجىزلايدۇ مۇھەببەتنىڭ تىنىقى  . ئادەملەرنىڭ خىسلىتىدىن ئۆرگۆلۈپ ، قوروق چۈشتى جەمىيەتنىڭ يۈزىگە . ئېتىقادنىڭ مىۋىسىدە كېسەل بار ، ئاق چۈشمەكتە سەبىي روھنىڭ كۆزىگە . تېلىفۇنغا ياتلىق بولدى ئادەملەر . توڭلاتقۇغا كىرمەكتىمىز بىر بىرلەپ . تۇيۇقسىزلا ئۈششىمەكتە ئىشەنچ ، چىن سۆيگۈنى قويماقتىمىز قەبىرلەپ . تېلىفۇنغا ياتلىق بولدى ئادەملەر ، ئەتىمىزنى  بىر ئېكرانغا تىگەشتۇق . كۆز يېشىدا زېدە بولدى دەقىقە ، بۇرۇنقىدەك نە ئامانلىق سوراشتۇق ؟ تېلىفۇنغا ياتلىق بولدى ئادەملەر ، جۆمىكىدە قاغجىرايدۇ خۇشاللىق . ساختا رەڭدە ئالدانماقتا  تېنىمىز  ، نۆۋىتىدە سەل قارالدى ساغلاملىق . ئاپتۇرى : ئابلەت مۇھەممەت باغۋەن

1miskal

	بەك ياخشى چىقىپتۇ . مۇنبىرىمگە يۆتكىسەم بولامدۇ ؟

Gvlbargi0999

	ئاپىرىن ئۇستاز!ئىسىل شېئىر، چوڭقۇر تەربىيەتلەرگە تويۇنغان ،يۈرەكنىڭ ساداسىنى ياڭراتقان بۇ كۈيىڭىز مىنى بەكلا تەسىرلەندۈردى،رەھمەت،ئەتتىگەندە مۇشۇنداق تېتىملىق شېئىردىن بىرنى ئوقۇۋالدىم!

bagdowlat

	مەن تۈنۈگۈنلا ئىدارىدە مۇشۇنىڭغا ئوخشاش گەپتىن بىرنى قىلغانتىم، تېخى. مىنىڭ خىزمەت جوزامنىڭ ئۇدۇلىدا تامدا ئېسىقلىق يوغان تىلۋىزور بار. ئىشتىن بىكار بولۇپ  قالسام كۆزۈم تىلۋىزوردا بولىدۇ. تىلۋىزورنىڭ تايىنى قالمىسا، ئالدىمدىكى تاشقى تور كونتۇرۇل قىلىنغان كومپىيۇتۇرغا چىتىقلىق تېلپونغا ئىڭىشىپ خەۋەر پەۋەر، ۋىيشىندىكى 20يىل ئىزدەشمەي ئەمدىكى كۈندە «ۋاي ياخشىمۇ »دەپ سالام- سائىتى ئۆكسىمەيدىغان كۆيۈمچان ساۋاقداشلىرىمنىڭ كوتكوتلىرىنى ئوقۇمايلا قىزىل پىتىم تاشلاپ قويۇپ، بانكىنىڭ قەرز سۈيلەش ئۇچۇرلىرىنى كۆرۈپ ئولتۇرىمەن. ئۇنىڭمۇ تايىنى قالمىسا ئۇدۇلۇمدىكى پوچتىخانىنىڭ خادىمىغا سەپلەپ بەرگەن بىردىن -بىر تاشقى تورغا ئۇلاغلىق كومپىيوتۇرغا ئۇ قىز شۇنداق قوپىشىغىلا ئولتۇرىدىغان گەپ. 11-ئاينىڭ 11-كۈنىدىكى بويتاقلار بايرىمىدا كىيىملەرنى يېرىم باھادا چۈشۈرۈپ ساتىدىكەن دەپ ئالمىساقمۇ كۆرەپ، كۆزىمىزنىڭ پىشتىنى ئۆلتۈرۈپ ئولتۇرغىنىمىز ئولتۇرغان. ئۆيگە قايتىش يولىدا دوستلاردىن كەلگەن تىلپونغا ئۇنى بۇنى دەپ قويىمىز شۇ. ئاندىن شىياۋچۇنىڭ ئىچىگە كىرىپ، شۇنداق بىزنىڭ بىنانىڭ ئالدىغا كەلگەنسىرى يۈرەك جىدىدى سالغىلى تۇرىدۇ. نىمە دىسە ئۆيدە باشقا ئادەم بولمىسا ئۆيدىكى كومپىيۇتۇرنى مەن باشتا ئىگەللەپ، بىرنەچچە سائەت بەزدەك ئولتۇرۇپلا ئالسام، مەندىن كېيىن كەلگىنى مىنى قاچان قوپار دەپ ئۇيان بۇيان مىڭىپ كەتسە، ئاشخانە ئۆيدىكى تۇز قاچىسىنى ئۇيان بۇيان يۆتكەپ كەتسە ھې ھې. بىر كۈنلۈك ئىش پائالىيىتىمىز مانا مۇشۇنداق ئۆتىدىكەن. مۇشۇ نەرسىلەرنى ئىجات قىلغان قاقۋاش ھەجەپ بىزنى ئاسان بويسۇندۇرۋالدى دەيمەن.

bagdowlat

	پالانچى دوستىمىزنىڭ قىيىنئانىسى تۈگەپ قاپتۇ دەپ قىسقا ئۇچۇر كەلسە «ھە قىيىن ئاتىسىنىڭ ئۆمرىنى ئۇزۇن قىلسۇن. قىيىن ئاتىسى ئاش تاماقتىن قىينىلىپ ياشراق خوتۇندىن بىرنى ئالسا بىراقلا پەتە ھەم ئەتىسىنى تۈگىتىپ كىلەرمىز » دىيىشىپ جاۋاپ يىزىشىۋاتقان.

KOKNURA

	ئە   ياخشى  چىقىپتۇ   تولىمۇ   تەربىۋىي  ئەھمىيتى  زوركەن

TAXNAI2

	مانا ماۋۇ شىئىردەكلا  شىئىر بوپتۇ،،، قالتىس يېزىپ قويۇپسىز ،،

xxxYxxx

	بىزنىڭ بۇيەردە تىلفۇندا ۋېيشىن چ چ  .......... ۋە باشقا نەرسىلەر ئېچىلماي تىلفۇندىن بىرمەزگىل ( ئاجراشقان ) بولدۇق ، ئەمما بەزى تىلفۇندىن ئىبارەت مەشۇقىغا ئالاھىدە (سۆيگۈسى ) بارلار باشقا دىتاللار ئارقىلىق تامدىن ئارتىلىپ ئويناۋاتىدۇ .

zapar

	باغۋەنكا ، مېنىڭ بىلىشمچە ياتلىق بولۇش قىزلارغىلا خاس ئاتالغۇ، دېمەكچى، شېئر ىڭىزدا ئوغۇللار، ئەرلەر كۆزدە تۇتۇلمىغان شۇنداقمۇ

komisar

	شۇڭا مەن ھازىرغىچە شولىڭتۇڭ ئىشلىتۋاتمەن