ئاخىرەتتىن خەت

باشتۇغ

	ئاخىرەتتىن خەت (ساتىرىك مۇخەممەس) مۇھەممەتجان راشىدىن ئۆلۈمنىڭ ھۆكمىكەن كەتتىم ، يېنىپ كەلمەس قىيامەتكە ، گۇناھىم كۆپ چىكىپ ئەندىش ، چىداپ ياتتىم مۇشاقەتكە ، ئېچىلدى گۆر تامان بىر يول ، پەرىشتە كەلدى سۆھبەتكە ، ھايالسىز سۆرىدى ماڭدى ، كىپەنسىز تۇرغۇزۇپ سەپكە ، تالاي قىسمەتلىنى كۆردۈم ، كىلەيلى ئەمدى سۆھبەتكە . پەرىشتە بىزنى كەلتۈرگەن ئۇرۇن مەھشەر ئىكەن بىلسەك ، كىشىگە ئېتىبار ئەتمەس ۋە ياكى يىغلىساق كۈلسەك ، بېشى كۆكتە باقاۋۇللار ، قۇلىدا گۈرزىكەن كۆرسەك ، بۇلاتتۇق بەكمۇ خاتىرجەم ، شۇئانلا گۈرزە يەپ ئۆلسەك ، لىكىن ئۆلمەكلىگىڭ يوقكەن ، جازالانساڭ جىنايەتكە . ئاجايىپ كۆرمىگەن سىرلىق ، بۇيەردە بار ئىكەن سوراق ، تىلىڭ يالغانغا ئۆرۈلسە ، تاپاندا نەق ئىكەن دوزاق ، چىقاركەن بىر تاياق تەگسە تېرەڭدىن ئۆرۈلۈپ قوۋزاق ، كۆرەركەنمىز تالاي ئىشنى تارازا ئالدىدا تۇرساق ، ئېرىشمەك گەپ ئىكەن دوستلار ، ئاشۇ جەننەتتە شەپقەتكە . تالاي دوزاققا تىك چۈشتى ، ئېغىز ئاچقاندا مەزھەپتىن ، بىشىغا چۈشتى نەق گۈرزە ، يېنىپ چىققاندا ئۇ سەپتىن ، تالايلار دوزىخى بولدى ، يەنە يۇرتۋاز دىگەن گەپتىن ، چىداپ بولماي تۈگۈلدى مۇش ، غەزەپتىن موللىغا خەپتىن ، بالانى تېرىغان موللا كۆرۈڭلار قالدى نەپرەتكە . سوراقسىز دوزىخى بولدى نۇمۇس-ۋىجداننى ساتقانلار ، تالاينىڭ ھەققىگە توپلاپ ھارام دۇنيانى تاپقانلار ، ئۆزىنىڭ جېنىنى ئاسراپ بىراۋنى ئوتقا تىققانلار ، خالايىق بېشىغا ئوتنى يېقىپ ئارامدا ياتقانلار ، دوزاققا ئەبەدىي مەھكۇم بۇلۇپ تاشلاندى كۈلپەتكە . قېچىڭلار پانى ئالەمدە ئەمەل ئىلكىدە پارىخوردىن ، گۇناھى بەك ئېغىر بۇندا ، تالاي يۈزمىڭ تاماخوردىن ، تۇقۇلغان ئوت بىلەن زەنجىر ، ئۇلارغا ئۆي قىلىپ توردىن ، قۇتۇلمايدۇ يەنە شۇندا ، تىكەن گۈرزىدە ئۇر-ئۇردىن ، ئۇلار باقمايدىكەن باشلىق دىگەن زور شۇ سالاپەتكە . گۇمانى بار ئەمەلدارلار بۇ يەرگە كەلمىسۇن دەڭلار ، (سەرەڭگە چاغلىق نەرسىنى )بىراۋدىن ئالمىسۇن دەڭلار ، ھۇقۇقتا كېرىلىپ ياكى خەلقتىن چانمىسۇن دەڭلار ، ئەمەلگە بېرىلىپ ۋىجدان دىگەندىن تانمىسۇن دەڭلار ، قالاركەن بەكمۇ كۈلپەتكە ئۆلۈپ بارغاندا دەھشەتكە . قوقاسقا ئايلىنىپ قاپتۇ دوزاق ئاستىدا كۆيدۈرگە ، قىلاركەن ئەسكىگە تۇترۇق يىغىپتۇ نەچچە ئون دۈگە ، سۇخەنچى ، جادىگەرلەرنى يىغىپ بىر يىلدا بىر گۆرگە ، ئاران تەسلىكتە كىرگۈزدى ئاشۇ دوزاق دىگەن ئۆيگە ، ئۇلار كۆيگەندە بىز ئاخىر ئىشەندۇق بۇ قىيامەتكە . قاراپ تۇرساق پەرىشتەلەر ئازاپ دەستۇرىنى ئاچتى ، غەزەپ بىلەن دىدى شۇنداق: دوزاقتىن پاشىۋاز قاچتى ، ئۇنى ئىزدەپ باقاۋۇللار بېھىشتام شۇرىدىن تاپتى ، شۇئان پەرمان بىلەن ئۇنى دوزاقنىڭ تەكتىگە ئاتتى ، بېرىلمەڭلار خالايىقلار ھارامدىن كەلسە ئىشرەتكە . يىغىلدى ئەھلى ئىنسانلار ياماندىن تاللىنىپ ئاخىر ، گۈزەل جەننەتكە يول ئالدى دىلىدىن شاتلىنىپ ئاخىر ، يۈرەركەن ياخشىلار جەننەت بېغىنى ئايلىنىپ ئاخىر ، ئەبەد باقماس ئىكەن دوزاق دىگەنگە قايرىلىپ ئاخىر ، ئارام ئالدى كىرىپ ياخشى دىگەنلەر شۇندا جەننەتكە . 1994-يىل بۇ شېئىر مۇنبەردىكى ئۇستاز بۇلاقسۇ ( ئابدىرېھىم زۇنۇن ) نىڭ ھەم بەزى دوستلارنىڭ تەلىۋى بۇيىچە  يوللاندى . تىرناق ئىچىگە ئېلىنغان يىرى خاتىرەمدىن ئۈچۈپ كەتكەنلىگى ئۈچۈن تۇلۇقلاندى . شېئىرنىڭ ئوتتۇرسىدىكى پەشلەر خاتىرەمدە قۇيۇلمىغان بولغاچقا ئۆزەمنىڭ چۈشەنچىسى بۇيىچە قۇيۇلدى . ئاپتۇرنىڭ ۋە تورداشلارنىڭ توغرا چۈشنىشىنى ئۈمىد قىلىمەن .

musilina

	تىلى ئۆتكۈر،مەزمۇنلۇق،مەنىسى چوڭقۇر،ئادەمنى ئويغا سالغۇدەك،تەربىيىۋى ئەھنمىيەتكە ئىگە شېئىركەن... ئۇستازنىڭ ئېسىل شېئىرى بىلەن ئۇچراشتۇرغان ئەجرىڭىزگە تەشەككۈر...

bulaksu2

	راست كۆرمىگەن ئىكەنمە، ئېسىل شېئىركەن. رەھمەت!

سائەت

	ۋاھب ۋاھ.  بەك ياخشى يېزىلىپتۇ...... ئۇزاق بوپتىكەن مۇشۇنداق ياخشى شېئىر ئوقۇپ باقمىغىلى.

adiljan0123

	قولىڭىزغا دەرت كەلمىسۇن   بەك ياخشى يېزىپسىز

yadikarbay

	ئاۋۇ تىرناققا ئېلىپ قويغان مىسرا: ‹‹سەرەڭگە سۇڭگۈتۈپ قالسا بىراۋدىن ئالمىسۇن دەڭلا›› دېگەن مىسرا ئىدى. يەنە ماۋۇ مىسرامۇ ئازراق غەلەت كېتىپتۇ‹‹بۇلاتتۇق بەكمۇ خاتىرجەم ، شۇئانلا گۈرزە يەپ ئۆلسەك››. توغرىسى:‹‹بۇلاتتۇق بەكمۇ خاتىرجەم ، شۇئانلا گۈرزىدە ئۆلسەك››. ‹‹قىلاركەن ئەسكىگە تۇترۇق يىغىپتۇ نەچچە ئون بۈرگە››. ئەجرىڭىزگە رەھمەت.

WOLKANII

	ياخشى مۇخەممەسلەر ئۈزۈلۈپ قالمىسۇن ،باشتۇغ نىڭ ئەمگىكىگە رەخمەت ،ھارمىغايسىز !

باشتۇغ

	adiljan0123 يوللىغان ۋاقتى  2014-10-31 08:44 PM قولىڭىزغا دەرت كەلمىسۇن   بەك ياخشى يېزىپسىز خاتا چۈشىنىپ قالماڭ ، بۇ داڭلىق شائىرىمىز مۇھەممەتجان راشىدىننىڭ شېئىرى .

adiljan0123

	باشتۇغ يوللىغان ۋاقتى  2014-11-1 09:30 PM خاتا چۈشىنىپ قالماڭ ، بۇ داڭلىق شائىرىمىز مۇھەممەتجا ... ھە مۇنداق دەڭ مەن تېخى سىزنى يازغان ئوخشايدۇ دەپ ئويلاپ قاپتىمەن. چۈشەنچە بەرگىنىڭىزگە رەھمەت . لېكىن بەكلا ياخشى يېزىلغان شېئىركەن بۇ.

ayguzal1

	مۇھاممەتجان راشىدىننىڭ مەزمۇنى چوڭقۇر،تەربىيىۋى ئەھمىيەتكە ئىگە شېئىرى بىلەن ئۇچراشتۇرغىنىڭىزغا تەشەككۈر...