ئابدۇرېھىم زۇنۇن: يارىدار كېيىك

bulaksu2

	يارىدار كېيىك مۆلدۈرلەپ قارايسەن ئەتراپقا ئەنسىز، يۈرىكى شېكەستە، يارىدار كېيىك. تىكىلگەن تۈمەنلەپ يامان كۆز ساڭا، مەنزىلىڭ نا ئېنىق، يوللىرىڭ كېسىك. ئەتراپىڭ تاپخورلار بىلەن لىق تولغان، كۈز كەلمەي ئوت- چۆپلەر پەرسۇدە بولغان، ئىزتىراپ دەستىدىن چىرايىڭ سولغان، ئەلەملىك قارايسەن، يارىدار كېيىك. ياندىكى ئوغلىقىڭ دېمەس: «قورساق توق،» جاھاندا جاندىنمۇ تاتلىق نەرسە يوق؛ بىر پاي ئوق ئۈزۈلسە، سەنمۇ، ئۇمۇ يوق، نالىلىك ئىڭرايسەن، يارىدار كېيىك. يوق بۇدەم ھەر ياققا خۇشال تاقلىماق، ساڭا بەك تەس بولدى جاننى ساقلىماق، چىل بۆرە كارى تىغ-  پىچاق چاقلىماق، دىلخەستە مارايسەن، يارىدار كېيىك. يۈرىكىم پۇچۇلدى ھالىڭنى كۆرۈپ، كۆك قىزى ياش تۆكتى ئاھىڭنى كۆرۈپ، تاغ- تاشمۇ يېرىلدى زارىڭنى كۆرۈپ، ياراڭنى يالايسەن، يارىدار كېيىك. ئۈستۈڭگە ئۆرۈلدى گۆردەك قارا تۈن، قالمىدى ئالدىڭدا ئەمدى ياخشى كۈن، «ئىقبالىڭ مەجھۇل» دەپ جاراڭلىدى ئۈن، توختىماي ئاھلايسەن، يارىدار كېيىك. يۈرىكى ئۆرتەنگەن يارىدار كېيىك، بۇلاقتەك كۆزۈڭدىن دومۇلايدۇ ياش... ئايرىلىپ قالغاندەك بولۇپ جېنىمدىن، «لەنەت»لەپ ھەسرەتتە ئاتتىم ياۋغا تاش.

asrari

	ئىككىنچى كۇپلىتنىڭ بېشىغا كەلگەندە ئۇدار ئالمىشىپ كىتىپ قالدى دىسە. «ئېپىچۆرەڭ» نى ئەتراپىڭ  دىسەكمۇ بۇلىدىغاندەك تۇرامدۇ؟! تاغدەك زۇلۇملار ئاستىدا يارىدار بولسىمۇ ياشاپتۇ ، بىچارە .    ياشىماق بىر ھۈنەر ، ياشناتماقمۇ ھەم ، كۆڭلۈڭدە سۇ بولسا كۆڭۈلگە تىگەر. ئوۋچىغا ئوقيا بار ، كىيىككە خۇدا، بۇ تارىخ بىر كۈنى ھەممىگە يىتەر.

musilina

	مەنىسى چوڭقۇر شېئىر بوپتۇ....

bulaksu2

	asrari يوللىغان ۋاقتى  2014-10-20 08:15 PM ئىككىنچى كۇپلىتنىڭ بېشىغا كەلگەندە ئۇدار ئالمىشىپ كىت ...         قېيىپ كەتمىدى. مۇرەببەنىڭ مۇشۇنداق بىر شەكلى بار. «ئەتراپى» بىلەن «ئىپىچۆرىسى»نىڭ مەنە ئىپادىلەش جەھەتتە پەرقى بار. شۇڭا، مۇشۇنداق ئالغىنىمىز تۈزۈك.          سىزنى يانداشمىڭىزمۇ ياخشى چىقىپتۇ. مۇبارەك بولسۇن!

illikbahar

	مۇئەللىمنىڭ ئېسىل يازمىلىرىنى بۇ مۇنبەردە كۆرۈپ شۇنداق خۇش بولدۇم. قەلىمىڭىز بەركەتكە تولغاي!

sebirqadir

	ھەقىقەت تەبەسسۇم قىلدى مەن تامان ، ياۋۇزلار چىشلىشىپ تۈگىشەر ھامان . قوغدايدۇ ‹‹ئادەملەر›› ، قوغدايدۇ زامان ، ئوغلىقىڭ ياشايدۇ ، يارىدار كېيىك.

bulaksu2

	musilina يوللىغان ۋاقتى  2014-10-20 10:11 PM مەنىسى چوڭقۇر شېئىر بوپتۇ....         بۇ شېئىرنىڭ قىممىتىنى سىز بىلىپسىز. «ئېشىكىم نەدىن بىلۇر كۇنجۇر، ناۋاتنىڭ قەدرىنى» دېگەندەك ئىش بولدى، قاراڭ.

qaxmazulal

	يارىدار بۆرە دىمەي.....

bulaksu2

	illikbahar يوللىغان ۋاقتى  2014-10-21 11:08 AM مۇئەللىمنىڭ ئېسىل يازمىلىرىنى بۇ مۇنبەردە كۆرۈپ شۇندا ...       مەنمۇ خۇش بولدۇم. ئالاقىلىشىپ ئۆتەيلى.

b1a2g

	ئېسىل شېئىر بوپتۇ،  بۇنىڭدىن بۇرۇن  كېيىكنى بەخىتسىزلىك ۋە  بىگانىلكنىڭ سىمىۋولى قىلىپ يېزىلغان ئابلېكىم ھەسەننىڭ «تەنھا كىيىك » مۇھەممەد يۈسۈپنىڭ «ئەركە كېيىك » دېگەن لېرىكىللىرىنى ئۇقغان ئىدىم، بۇ شېرىڭىزدىنمۇ خېلى ئوبدان ھۇزۇر ئالدىم. قەلىمىڭىز ھارمىغاي مۇئەللىم .