خۇشاللىق قوغلاشمايدىغان كىم بار ؟

huxhal

	ئالدىمدا تۇرغان بۇ ئايالنى  تۇنجى قېتىم قەيەردە كۆرگەنلىكىم ئېسىمدە يوق ، ھە راست ، ئۇنى تۇنجى  قېتىم نەۋرە ھەدەم ئىككى قىزىنىڭ گۈل چېيىنى قىلغان ۋاقىتتتا نەۋرە ھەدەمنىڭ ئۆيىدە كۆرۈپتىمەن . شۇ كۈنى بۇ ئايال كۈننىڭ ئانچە سوغۇق بولمىغانلىقىغا قارىماي ، مويلىرى پارقىراپ تۇرىدىغان نوركا پەلتۇنى كىيىپ ھويلىغا كىرىپ كەلگىنىدە ، ھويلىدا خىزمەت قىلىپ يۈگۈرۈشۈپ يۈرگەن ئاياللار كۆزلىرىنى پارقىرىتىپ قاراپ قېلىشقان ئىدى .    - ۋاھ ! ئەجەپ ئېسىل نوركىكىنا ، چوقۇم بەكلا قىممەت جۇمۇ ؟! - ھەممە نەرسىگە قىزىقىپ قارايدىغان نەۋرە سىڭلىم ئەڭ ئالدى بىلەن گەپ باشلىدى .    - شۇ ، شۇ ، بەكلا ئېسىلكەن 10 مىڭ سوملارغا ئالغانمىدۇ ؟    - نىمە دەيدىغانسەن ؟! كۈلگۈمنى كەلتۈرۈپ - دىدى  نەۋرە ھەدەمنىڭ داستىخاننى قاقققىلى چىققان دوستى - ئېرىچۇ تۈركىيەدىن 80 مىڭ سومغا ئەكىلىپ بېرىپتۇۇۇۇۇ .   - ۋاييەيييي ! - بىزنىڭ سەھرالاردا 80 مىڭ سوم دېگەنگە بىر قورا - جاي كېلىدۇ ، بىر قورا جاينى ئۈستىگە ئارتىۋاپتىغۇ بۇ خوتۇن ، توۋۋا !   - بىر ماشىنىنى دېگىنە !   -  ۋاي- ۋۇييي ، سېنىڭ نىمە كارىڭ - دىدى نەۋرە سىڭلىم گەپكە يەنە ئارىلىشىپ - ئۇنىڭ ئېرىچۇ پۇلدار ، پۇلى دېگەنچۇ ساماندەك ،  پۇتىغا كىيگەن پايپىقىمۇ  نەچچە يۈز سوملۇق بۇ خوتۇننىڭ ، ھەييي ، تەلىيى بولغاچقا پۇلدار ئەرنى تېپىپ تەككەن - دە ! بىزدەكلەر ......   - بەختى باركەن .   - بۇ شەلىكلەر بەك شۆھرەتپەرەس جۇمۇ ، مۇشۇ يازدا شەھەردىكى بىر بايۋەچچە قىزىنىڭ تويىنى قىلىپ ، قىزىغا بىر پەتنۇس ئالتۇن جابدۇق قويۇپ بېرىپتۇ ، ھەتتا قىزىغا سالغان جاينامازنىڭ ئۆزىنىلا يەتتە مىڭ سومغا ئاپتۇدەك ، تويغا كەلگەن ھەر بىر ئايالنىڭ ئالدىغا 80  سوملۇق ياغلىق قويۇپتىمىش . قىلغان ھەر تۈرلۈك تاماقلىرى يەيدىغان ئېغىز يوق ، ئېشىڭ - تېشىڭ بوپكېتىپتۇدەك .   - ئاللا - ئاللا ، شۇنداقمۇ يوغانچىلىق قىلغان بارمۇ ؟!   - ئىسراپچىلىق !   - يەنە بر بايچۇ تېخى قىزىغا 200 مىڭ سوملۇق ماشىنا قويۇپ بېرىپتۇدەك . - تەڭشەلمىگەن جاھاندە ، بىرلىرى يىگىلى تاماق ، تۇرغىلى ئۆيى يوق ، يوقسۇزلۇقنىڭ دەردىنى تارتىۋاتقان ، يەنە بىرلىرى پۇلنىڭ كۆپلىكىدە خەجلەيدىغان يەر تاپالمايۋاتقان ، ھەييييي !    - سىلەر تېخى ماۋۇ چوكاننىڭ ماشىنىسىنى كۆرمىدىڭلار نەچچە يۈزمىڭ سوملۇق  ئېسىل ماشىنىمىششش .    - ئەجەپ تەلىيى كەپتىكەن ، بۇ ئايالنىڭ ، ئانىسى قانداق تۇغقان بولغىيدى - ھە ؟! - شۇ ، شۇ ھەي ، قاراڭلار - دىدى سېمىزرەك كەلگەن بىرى ئەتراپىدىكىلەرنى  يىغىپ ، ئاغزى بىلەن قولىنى توسۇپ تۇرۇپ ، ئاستاغىنە - ئانىسىچۇ ،  ھېلىقى يېرىنى ناۋات ياكى ھەسەل بىلەن يۇيغان ئوخشايدۇۇۇۇ ، شۇنداق قىلسا قىز بالىنىڭ ئەردىن مۇشۇنداق تەلىيى كېلىپ ئېسىل ئەرلەرگە ئۇچرارمىششش . ئاياللار پاراققىدە كۈلۈشۈپ كەتتى .        -سىزنى ئاۋارە قىلىپ قويمىغاندىمەن ؟        - ياقەي - ئۇنىڭ سۆزى مېنى خىيالدىن ئويغاتتى ،- بىرەر ئىش بىلەن ئىزدىگەنمىدىڭىز ؟       - شۇنداق قىزىم خەنزۇ تىلىدىكى مەكتەپتە ئوقۇيتتى ، شۇڭا سىزنى قىزىمغا ئانا تىلدىن دەرس بېرىپ ، ساۋادىنى چىقىرىپ قويارمىكىن دەپ ئىزدەپ كېلىۋىدىم . ئۆز مىللىتىنىڭ يېزىقىنى بىلمىسىمۇ بولمايدىكەن .      - توغرا دەيسىز ، چوقۇم ياردەم قىلىمەن - دىدىم مەن ئۇنىڭ تەلىپىگە قوشۇلۇپ .    - پۇلىنى ئۆيگە بارغاندا سۆزلىشەرمىز ، سىڭلىم . ھېلىقى نەۋرە ھەدەمنىڭ ئۆيىدىكى گۈلچايدىن بىرەر ئايدەك كېيىن نوركا پەلتۇ كىيگەن ئۇ ئايال مېنى مەكتەپكە ئىزدەپ بارغان ئىكەن ، ئۇنىڭ تەلىپىگە قوشۇلۇپ ، قىزىغا ئائىلە ئوقۇتقۇچىسى بولماقچى بولدۇم . ھەر شەنبە ، يەكشەنبە كۈنلىرى  كەچتە ئۇلارنىڭ ئۆيىگە بارىدىغان بولدۇم . بىز ئوقۇتقۇچىلار باشقىلارغا كۆپرەك بىلىم بېرىۋالساقلا شۇنىڭ ئۆزى بىز ئۈچۈن تېپىلماس خۇشاللىق ، يەنە كېلىپ مەندەك بىر تىل - ئەدىبىيات ئوقۇتقۇچىسىنىڭ بىر بالىغا ئانا تىلدىن دەرس بېرىپ ، ئۇنىڭدا ئانا تىل ۋە ئۇنىڭ قائىيدە - قانۇنىيەتلىرى ھەققىدە بەلگىلىك بىلىم ھاسىل قىلىشتىن ئارتۇق بەخت بولماس .      شەنبە كۈنى كەچ ، ئۇلارنىڭ ئۆيىگە بارماقچى بولۇپ ئىشىكتىن چىقىشىمغا ، ئۇ ئايالنىڭ ماشىنا بىلەن مېنى ئالغىلى كېلىپ ئىشىك ئالدىدا ساقلاپ تۇرغانلىقىنى كۆردۈم . قىسقىلا سالام - سائەتتىن كېيىن ئۇلارنىڭ ئۆيى تامان يۈرۈپ كەتتۇق . ماشىنىنىڭ ئىچى تولىمۇ ئېسىل بېزەلگەن ئىكەن ، بىراز قورۇنۇپراق ئولتۇردۇم .   - قورۇنماڭ - دىدى ئۇ - بىز چوقۇم يېقىن دوسلاردىن بولۇپ قالىمىز . دوست دېگەننىڭ چوڭ كىچىكى بولمايدۇ .بەلكىم يېشىمىزمۇ بەك كۆپ پەرقلەنمىسە كېرەك ؟ ياش سۈرۈشتۈرۈپ كۆرسەك ئىككىمىز ئۈچ ياشلا پەرقلىنىدىكەنمىز ، كۆپ پەرقمۇ يوقكەن . ئۇنى دەسلەپتە كۆرگىنىمدە ئۇ تولىمۇ ھاكاۋۇر كۆرۈنگەنىدى ، لېكىن شۇ تاپ ئۇنىڭ ئوچۇق - يورۇقلىقى ، كىچىك پېىللىقى مېنىڭ پەرىزىمنىڭ خاتالىقىنى ئىسپاتلاپ تۇرۇپتۇ .   - مانا ئۆيگىمۇ كەلدۇق ، جانىم - ئۇ شۇنداق دېگەچ ماشىنىنى بەھەيۋەت بىر دەرۋازىنىڭ ئالدىدا توختاتتى . ماشىنىدىن چۈشۈپ ئاجايىپ چىرايلىق نەقىشلەنگەن دەرۋازىغا قاراپ ھۆنەرۋەنلىرىمىزنىڭ ئاجايىپ يۇقۇرى ماھارەتلىرىگە ئىچىمدە ئاپىرىن ئوقۇدۇم . 3-4 مو كېلىدىغان كەڭرى ھويلىنىڭ ئوتتۇرسىغا كەلتۈرۈپ  ياۋروپاچە ئۇسلۇپتا سېلىنغان ئۈچ قەۋەتلىك داچىنىڭ سىرتقى كۆرۈنىشىمۇ بەكلا ھەشەمەتلىك ئىدى . ھويلىنىڭ ئالدى - كەينى مېۋىلىك دەرەخلەرگە تولغان ، بەلكىم ياز ۋە كۈز پەسىللىرىدە ھويلا جەننەتتەك گۈزەل بولۇپ كەتسە كېرەك ؟ دەپ پەرەز قىلدىم . ئۇنىڭ يول باشلىشى بىلەن ئىككىنچى قەۋەتتىكى بىر ھوجرىغا كىردىم ، ئالاھىدە بېزەلگەن ئىسسىق ھوجرىدا قىزچاق ، مەن ئانا تىلدىن دەرس بەرمەكچى بولغان قىز مەلىكىلەردەك سوزۇلۇپ يېتىپتۇ .   - ئوقۇتقۇچىڭىزغا سالام قىلىڭ ، قىزىم ، مەن سىزگە گېپىنى قىلىپ بەرگەن ئوقۇتقۇچى ئاپاش مۇشۇ ، بۇنىڭدىن كېيىن ، مۇئەللىم دەپ چاقىرىڭ .   قىزچاق خۇشياقمىغاندەك تۇمشۇقلىرىنى ئۇچلاپ تۇرۇپ : - سالام - دىدى .   - ۋەئەلەيكۇم ئەسسالام ، نىمانداق ئوماق ، چىرايلىق قىز بۇ ئامراقلىقىمنى كەلتۈرۈپ - دىدىم مەن ۋە بېرىپ قىزنىڭ پىشانىسىگە سۆيۈپ قويدۇم ، ئەقىللىقلىقى چىقىپلا تۇرىدۇ جۇمۇ .   قىزچاقنىڭ ئىپادىسىز چىرايىغا قاراپ بىر قىسمىلا بولۇپ قالغان بولساممۇ لېكىن چاندۇرمىدىم ، بالا ئەمەسمۇ ، مەن ئۇستاز بولغانكەنمەن ،ئۇنىڭ ساۋادىنى چىقىرىپلا قالماي ، ئۇنىڭغا ھەر جەھەتتىن تەربىيە بېرىشىم كېرەك ، شۇلارنى ئويلاپ كۆڭلۈم يورۇپ قالدى . ئۆي ئىگىسى ئايالنىڭ بىرەر پىيالىدىن چاي ئىچەيلى دىگىنىگە ئۇنىماي دەرسنى باشلىۋەتتىم . بۇ ئەركە مەلىكىنى تەلەپكە يەتكۈزمەك تولىمۇ تەسكە توختىدى . دەرس تازا ھالقىلىق يېرىگە كەلگەندە بىردە شاكولات ئەكىرۋالاي ، بىردە ھاجەتكە چىقىۋالاي دەپ جىدەل قىلاتتى . لېكىن ئون نەچچە يىللىق ئوقۇتقۇچىلىق ھاياتىم ، بولۇپمۇ سىنىپ تەربىيىچىلىك خىزمىتى ئىشلەش جەريانىدا توپلىغان تەجرىبە - ساۋاقلىرىم بۇ قېتىم ئوبدانلا ئەسقاتتى ، ئۇزۇنغا قالمايلا ئۇنى رايىش ‹‹ ئوقۇغۇچى››غا ئايلاندۇرۇۋالدىم ، قىزچاق بەزىدە ھەتتا كەينىمدىن ئەگىشىپ ‹ ساجىدە ئاپامنىڭ ئۆيىگە بېرىپ قونۇپ كېلىمەن › دەپ ئاپىسىغا جىدەل قىلىدىغان دەرىجىگە يەتتى ، بۇ  ئەتىۋارلىق ‹‹ مەلىكە ›› بىلەن ئىككىمىزنىڭ ئوتتۇرسىدىكى ئارىلىقنىڭ بارغانسېرى يېقىنلاۋاتقانلىقىنىڭ ئىپادىسى ئىدى .   مەنبە : ئۆزۈم داۋامى بار (  بۇ ئەسەردە تەسۋىرلىگەنلىرىمنىڭ كۆپى ئۆزۈم  بىۋاستە كۆرگەن ۋە ئاڭلىغان ۋەقەلەر ، توردا بىۋاستە يېزىۋاتقانلىقىم ئۈچۈن ئىملا ۋە تىنىش بەلگىلەردە بەزى خاتالىقلارغا يول قويغان بولۇشۇم مۈمكىن ، مۇنبەرداشلارنىڭ تەنىدىي پىكىر بېرىشى سورايمەن ، رەھمەت )

TAXNAI2

	مۇشۇنداق  سۆلەتۋاز ،ئابرۇيپەرەس ،پوچى ئاياللارنى كۆرسەم  چىشلىرىم غۇچۇرلاپ كېتىدۇ ،،،تېخى بۇنداقلار ئازايماقتا يوق  ئاۋۇپ كېتىۋاتىدۇ دىسە،،،   ياخشى يېزىلغان ئەسەر بوپتۇ،،،تۇرمۇشقا بەك يېقىن ھەم جەلىپ قىلىشى كۈچلۈك ئىكەن،،، داۋامىنى بەك ساقلاتماي  يازارسىز ھە

mehriya

	داۋامىغا قىزىقىپ قالدىم . تېزراق يوللارسىز

milla

	مانا  يەنە ساقلايدىغان ئەسەر چىقتى.   داۋامىنى تىز يازارسىز

milla

	تىمىسى  سەل غەلىتىمۇ  قانداق

(شەيدا)

	ياخشى چىقىپتۇ، داۋامىنى كۈتەي.  تېزراق يوللاڭ جۇمۇ، كۆزلەر تىشىلىپ، ساقال باسمىسۇن ئەدەمنى.  ھى ھى

huxhal

	مېنى قوللىغان مۇنبەرداشلارغا كۆپتىن كۆپ تەشەككۈر .

huxhal

	بىر كۈنى ئۇنىڭغا كىتاپ ئوقۇپ بېرىۋاتتىم ، ئۇ توساتتىنلا _ مەن نىمىشقا سىزىڭ قىزىڭىز بولۇپ قالمىغاندىمەن ، ساجىدە ئاپا ،_ دىدى . _ قاراڭ ، سىزنىڭ شۇنداق چىرايلىق ، ياخشى ئاپىڭىز بار ئەمەسمۇ ، قوزام _ دىدىم . _ لېكىن ئاپامنىڭ مەن بىلەن ئانچە كارى يوق ، ماڭا كىتاب ئوقۇپمۇ بەرمەيدۇ . سىز  نۇرشات  ئاكاملاغا كۈندە كىتاب ئوقۇپ بېرەمسىز ؟   _  شۇنداق ھەر كۈنى دېگۈدەك كىتاب ئوقۇپ بېرىمەن . قىزچاقنىڭ بۇ گېپى مېنى ئويلاندۇرۇپ قويدى ، راست نۇرغۇن ئاتا - ئانىلار بالا تەربىيىسىدە بەزى تەرەپلەرگە سەل قارايدۇ . بالىلار مىللەتنىڭ كەلگۈسى ، كىتاپ ئوقۇمايدىغان ، مائارىپقا سەل قارايدىغان مىللەتتە ئۈمىد بولامدۇ ؟ شۇڭا ھەر بىر ئاتا - ئانا بالىلىرىدا كىچىكىدىن تارتىپلا كىتاپ ئوقۇش ئادىتىنى يېتىلدۈرۈشى كېرەك . بالىلاردا ئېسىل  ئەخلاق - پەزىلەت يېتىلدۈرۈشى كېرەك . لېكىن ھازىر بەزى ئائىلەردە بۇ خىل تەربىيىگە سەل قارىلىۋاتىدۇ . بىر قېتىملىق دەرستە ئوقۇغۇچىلاردىن ‹‹ ئائىلەڭلاردا ياخشى ئوقۇ دېگەن سۆز كۆپ دېيىلەمدۇ ياكى ياخشى ئادەم بول دېگەن سۆز كۆپ دېيىلەمدۇ ؟ دەپ سورىۋىدىم كۆپلىگەن ئوقۇغۇچىلار ‹‹ ياخشى ئوقۇ دېگەن سۆز ئەڭ كۆپ دېيىلىدۇ ، مۇئەللىم ›› دەپ جاۋاپ بېرىشتى . بۇ جاۋاپ خېلىغىچە يۈرىكىمنى ئېچىشتۇردى . چۈنكى بىلىملىك ئادەم بولۇشقا قارىغاندا پەزىلەتلىك ئادەم بولۇش تېخىمۇ مۇھىم . بىر ئادەمنىڭ كىشىلىك پەزىلىتى ئۇ ئادەمنىڭ پۈتۈن ئۆمرىگە تەسىر يەتكۈزۈپلا قالماي ، ئەتراپىدىكىلەرگە جۈملىدىن جەمىئىيەتكە تەسىر كۆرسىتىدۇ ، ئەگەر جەمئىيەتنى پەزىلەتسىز بىر توپتىن تەركىپ تاپتى دېسەك ، بۇ خىل جەمئىيەتنىڭ ئاقىۋىتىنى تەسەۋۋۇر قىلىش تولىمۇ قورقۇنۇچلۇق ئەمەسمۇ !؟    _ ساجىدە ئاپا ، نىمە ئويلاۋاتىسىز ؟ - قىزچاقنىڭ يېقىملىق ئاۋازى خىيالىمنى بۆلدى .    _ جىق نەرسىلەرنى خىيال قىلىپ كېتىپتىمەنغۇ ، قىزىم _ دىدىم ئۇنىڭغا _ قاراڭ ، سىز ئوقۇش ، يېزىشنى خېلى ئوبدانلا ئۆگىنىپ قالدىڭىز . ‹‹ مېنىڭ دادام ›› دېگەن ماۋزۇدا بىر پارچە ماقالە يېزىپ باقامسىز ؟ _ ياق ! يازمايمەن ، يازمايمەن !   _ ۋۇي ، نىمىشقا يازمايسىز ؟ _ مەن دادامغا ئۆچ ! - قىزچاقنىڭ قاپ قارا كۆزلىرىدە ياش تامچىلىرى يالتىرىدى . _ نىمىشقا ئۇنداق دەيسىز ؟  ئۇ دېگەن سىزنىڭ دادىڭىز ، ئۇنى ياخشى كۆرۈشىڭىز ، ئۇنى ھۆرمەتلىشىڭىز كېرەك ، قىزىم . _ ئۇ دېگەن مېنى ياخشى كۆرمەيدۇ ، مېنى پات - پات كۆرگىلى كەلمەيدۇ ، ئۇ مېنى ياخشى كۆرمەي ، فىراتنى ياخشى كۆرۈدۇ . _ فىرات دېگەن كىم ئەمدى ؟ _  دادام  ماڭا فىرات سىزنىڭ ئۇكىڭىز دەيدۇ ، بىراق ئۇ مېنىڭ ئۇكام ئەمەس ، ئۇكام ئەمەس ، مەن ئۇنىڭغا ئۆچ ! ئۆچ ! _ بۇ نىمە دېگىنىڭىز ؟ سىز بىر تاللا قىز ئەمەسمىدىڭىز ، قانداق قىلىپ سىزنىڭ ئۇكىڭىز بار بولۇپ قالدى ئەمدى ؟! _ ئۇچۇ ، ھېلىقى  رەنا دېگەن خوتۇن تۇغقان ئەسكى بالا ، ئۇنىڭ ئاپىسىمۇ ئەسكى ، ئۆزىمۇ ئەسكى ! ھەممىسى ئەسكى نەرسىلەر ..... ئويلىمىغان يەردىن ئۇنىڭ كۆڭلىنى يېرىم قىلىپ قويغىنىمغا بەكمۇ ئۆكۈندۈم ،شۇ مەھەل  ئۇنىڭغا نىمە دىيىشىمنى ، نىمە دەپ تەسەللى بېرىشىمنى بىلەلمەي قالدىم .

dilgiya

	داۋامىنى بەك ئۇزۇن سوزىۋەتمەي يازاسىز ،،،دىلىغۇللۇق بىلەن سۇمبۇل چاچنىڭ داۋامى  چىقماي  ھازىرغىچە ئا .ئىڭەك يۆلەگلىك ئوتتادۇق ..مانىكا ..

xatuti

	داۋامىغا قىزىقىپ قالدىم.....