يۇرت سۆيگۈسى (نەسىرىي شېئىر)

bulaksu2

	يۇرت سۆيگۈسى                                                     ئابدۇرېھىم زۇنۇن                                          ئانا يۇرت، مەن سېنى قىزغىن ئىشتىياق، ئوتلۇق ئىخلاس-ئەقىدەم بىلەن چىن كۆڭلۈمدىن سۆيىمەن. كېچە - كۈندۈز سەن ئۈچۈنلا كۆيىمەن. سەن ئۈچۈن يۈرىكىمدە ماگما قاينايدۇ، ئېڭىم سېنى بارچە يۇرتلارغا رەئىس سايلايدۇ؛ سەن مېنىڭ سۆيۈملۈك ئانام، سەن مېنىڭ كۆيۈملۈك دادام؛ سەن مېنىڭ يايلايدىغان يايلىقىم، سەن مېنىڭ تۈگىمەيدىغان بايلىقىم؛ سەن مېنىڭ خەجلەيدىغان ئايلىقىم؛ سەن مېنىڭ ھاياتىم، جېنىم، سەن مېنىڭ بارلىقىم...       كىندىك قېنىم ساڭا تۆكۈلگەن، بارلىق ئارزۇ-ئۈمىدىم، ئىستەك-غايىلىرىم سېنىڭ باغرىڭغا كۆمۈلگەن؛ سەندە ئانامنىڭ ئوغۇز سۈتىنى قانغۇچە ئەمگەن، يۇمشاق توپىلىق يوللىرىڭغا باغرىمنى سۇۋاپ ئۆمىلىگەن؛ ساڭا ئىز سالغان، ھەممە نەرسەمنى سەندىن ئالغان؛ سېنىڭ ياپيېشىل قۇملىرىڭدا ئېغىناپ تەرلەنگەن، تىك قىيالىرىڭدا قىقاسلاپ قانات قېقىپ پەرلەنگەن؛ سەندە تەن دەرىخىم ئۇچ تارتقان، كۈچ تاپقان؛ سەندە ئەقلىم چاقلانغان، ئۈمىدىم ئاقلانغان؛ سەندە ئىلىم- پەنگە كۆڭۈل رىشتىم باغلانغان، ئوت-ئىشقىڭدا يۈرەك-باغرىم داغلانغان؛ سېنىڭ ھاۋايىڭنى سۈمۈرۈپ، سۈپسۈزۈك سۇلىرىڭنى قانغىچە ئىچىپ، مېۋە-چېۋە، ئاش-نانلىرىڭنى تويغىچە يەپ چوڭ بولغان، ئەقىل تېپىپ ئوڭ بولغان؛ شۇڭا سېنى سۆيىمەن، ساڭا كۆيىمەن، سەندىن ئايرىلالمايمەن.         ئانا يۇرت، مەن سېنى سۆيىمەن، خۇددى پاقا كۆلنى سۆيگەندەك، كەسلەنچۈك چۆلنى سۆيگەندەك؛ بۇلبۇل باغنى سۆيگەندەك، كەكلىك تاغنى سۆيگەندەك؛ قۇياش يەرنى سۆيگەندەك، دېھقان ئەجىر-تەرنى سۆيگەندەك؛ ئۇچار قۇشلار كۆكنى سۆيگەندەك، باش بۆكنى سۆيگەندەك؛ كاككۇك زەينەپنى سۆيگەندەك؛ بۈركۈت ئېگىز قىيانى سۆيگەندەك، سۇ جىرانى سۆيگەندەك؛ دېھقان ئېتىزنى سۆيگەندەك، شۇڭقار ئېگىزنى سۆيگەندەك، بۇلبۇل گۈلنى سۆيگەندەك؛ باغۋەن كۆچەتنى سۆيگەندەك، قۇرت-قوڭغۇزلار ئۆچەكنى سۆيگەندەك؛ قىرغىز ماناسنى، موڭغۇل جاڭغىرنى سۆيگەندەك، ئۇيغۇر 12 مۇقام قاتارلىق مەدەنىي مىراسلىرىنى سۆيگەندەك؛ غېرىب سەنەمنى، پەرھاد شېرىننى، تاھىر زۆھرەنى... سۆيگەندەك. مەن ساڭا كۆيىمەن، خۇددى ئاتا-ئانا بالىسىغا كۆيگەندەك، ئاشىق مەشۇقىغا كۆيگەندەك؛ يەنە نېمە-نېمىلەر نېمە-نېمىلەرگە كۆيگەندەك.        سەندىن ئايرىلالمايمەن، خۇددى قوي قوزىسىدىن، چىغرىق پوزىسىدىن، لەڭمەن سوزىسىدىن ئايرىلالمىغاندەك؛ ئوقۇغۇچى دەپتەر-قەلەم، ئۈستەل-ئورۇندۇقىدىن، توخۇ-كەپتەر قوندىقىدىن ئايرىلالمىغاندەك؛ ئوت ئوچاقتىن، بوۋاق قۇچاقتىن ئايرىلالمىغاندەك؛ ئىنسان ئوت، سۇ، تۇپراق، ئاش-نان، ساپ ھاۋا ۋە بىلىمدىن ئايرىلالمىغاندەك...          ئانا يۇرتۇم، سەن ئالتۇن دىيار،        كېچە-كۈندۈز ئىشقىڭ ماڭا يار.

篮球美女

	تېما ناھايتى ياخشى تاللىنىپتۇ .... ئەزەلدىن يۇرتتا تۇغۇلۇپ ، يەنە شۇ ئانا يۇرتتا خېزمەت قىلىپ يۇرىت سۆيگۈسىنىڭ بۇنچە چوڭقۇر ۋە ئاجايىب چىن رېشتە بىلەن باغلىنىدىغانلىقىنى ھېس قىلىپ  باقماپتىكەنمەن . مانا بۈگۈن ھېس قىلىپ باقتىم . ئەمما مىنىڭ جىددى ياردەم سوراپ يازغان تېمام تەستىقتىن ئۆتمەپتۇ ، قارىغاندا ئارقا ئىشىك قىلسام بولغۇدەك.

qaxmazulal

	ھايات دەپتەرىدە كۆپتۇر، مۇھەببەت ھەققىدە داشتان، ۋەتەن ئىشقى جىمى سۆيگۈ، مۇھەببەتكە شىكەر سالغان... سەنۇبەر تۇرسۇننىڭ مۇشۇنداق بىر ئانا يۇرت ھەققىدە ناخشىسى بولىدىغان....

bulaksu2

	قىلمىغاي ئەسلا يامانلىق بائىسى يوق ھەركىشى،         تىك تۇرار چۈشسە بويۇنغا تىغ-قىلىچ مەرد ئەركىشى.

kepanogrisi

	نەسىرى شېئىر دەپسىزغا؟

bulaksu2

	kepanogrisi يوللىغان ۋاقتى  2014-10-9 11:31 PM نەسىرى شېئىر دەپسىزغا؟         سىزگە ئۇنداق ئەمەستەك تۇيۇلدىمۇ؟         ھەم نەسرلىك، ھەم شېئىرلىق خۇسۇسىيەتكە ئىگە بولغان ـــ نەسرىي يول بىلەن يېزىلىدىغان ئەسەرلەر نەسرىي شېئىردۇر. مەسىلەن: ئۆتكۈر ئەپەندىمنىڭ «قاشتېشىغا مەدىھىييە» دېگەن ئەسىرىدەك. رەھمەت!

kepanogrisi

	bulaksu2 يوللىغان ۋاقتى  2014-10-10 11:26 AM سىزگە ئۇنداق ئەمەستەك تۇيۇلدىمۇ؟         ھەم نەسر ... بىلىۋالغىنىم ياخشى بولدى، رەھمەت سىزگە.

TAXNAI2

	نۇ نەسىرىڭىزمۇ ياخشى چىقىپتۇ...ئېلھاملىرىڭىز  چېچەك ئاچقاي..

bulaksu2

	篮球美女 يوللىغان ۋاقتى  2014-10-9 06:39 PM تېما ناھايتى ياخشى تاللىنىپتۇ .... ئەزەلدىن يۇرتتا تۇغۇ ...           مەن قەشقەردە تۇغۇلۇپ، خوتەندە خىزمەت قىلىۋاتقان كىشى. ئەسەرنىڭ سىزگە ياققىنىدىن خۇش بولدۇم. رەھمەت!

musilina

	ۋەتەن-بەرگىلى بولمايدىغان جان. ۋەتەن-يېگىلى بولمايدىغان نان. ۋەتەننىڭ قەدرىنى ۋەتەنسىزلەر بىلەر. نەسرىي شېئىرىڭىز ھېسياتلىق،ياخشى چىقىپتۇ.....