پەرھات ‹جوڭگو ياخشى ئاۋاز›ىنى بويسۇندۇردى

Abdul

	‹جۇڭگو ياخشى ئاۋاز›پروگراممىسى نۆۋەتتە جۇڭگودىكى ئەڭ قارشى ئېلىنىۋاتقان ، كۆرۈلۈش نىسبىتى ئەڭ يۇقىرى بولۇۋاتقان كۆڭۈل ئېچىش خاراكتېرىدىكى تېلېۋىزىيە پروگراممىسى . بۇ پروگممىغا قاتناشقان ماھىرلار ئالدى بىلەن قاتمۇ قات سىناقتىن ئۆتۈپ تاللانغاندىن كىيىن ئاندىن سەھنىگە چىقىش پۇرسىتىگە ئېگە بولىدۇ ، سەھنىدە ماھىرلار ناخشا ئېيتىش ئۇسۇلى بىلەن ئۆزىنىڭ ئاۋاز جەھەتتىكى تالانتىنى ئىپادىلەيدۇ . تۆت نەپەر ئۇستاز بۇ ماھىرنىڭ تالانتى بار دەپ قارىسا ئۆزىنىڭ گۇرۇپپىسىغا تاللاپ ئاخىرىدا چىمپىيونلۇق تالىشىشقا قاتناشتۇرىدۇ . بۇ پروگراممىنىڭ ئۇستازلىرى بولسا نۆۋەتتە جۇڭگودىكى ئەڭ داڭلىق ، ئەڭ شۆھرەت قازانغان تۆت نەپەر ناخشىچىدىن تەركىب تاپقان . بۈگۈن 2014-يىللىق 3-سان پروگراممىسى تاماشىبىنلار بىلەن يۈز كۆرۈشتى ، بۇ ساندىكى كىشىنىڭ ئەڭ دىققىتىنى تارتقان ماھىر بولسا شىنجاڭ ئۈرۈمچىدىن كەلگەن پەرھات (پەرھات خالىق ) . بۇ ئادرىستىن ئۇنىڭ سەھنىدىكى ئەمەلىي ئىپادىسىنى كۆرۈڭ http://v.qq.com/cover/f/fql2a8u30ashzo5.html?vid=q0014prbu2t پەرھات ‹سەن مېنىڭ ئازابلىنىشىمغا قانداق چىدايسەن›دېگەن ناخشىنى ئورۇنلىغان بولۇپ، ئۇ بۇ ناخشىنى ئېيتىشتا ھىچقانداق ماھارەت ئىشلەتمىگەندەك قىلاتتى ، ئەمما ئۇنىڭ ئۆزگىچە ئاۋازى ۋە  پۈتۈن ۋۇجۇدى بىلەن ئېيتىشى كىشىنى تېخىمۇ تەسىرلەندۈرۈپ ، قەلبلەرنى لەرزىگە سالدى . ئۇنىڭ ناخشىسى تېخى يېرىمىغا بارمايلا 4 ئۇستازنىڭ 3 نەپىرى بىراقلا ئۆرۈلۈپ ئۇنىڭغا بولغان مايىللقىنى بىلدۈردى . ناخشا تۈگىگەندە بارلىق ئۇستازلار ئۇنى ئاغزى -ئاغزىغا تەگمەي ماختىشىپ كەتتى ، ۋە ئۇنى ئۆزىنىڭ ئىجادى ناخشىسىدىن بىرنى ئېيتىپ بېرىشكە تەكلىپ قىلدى (ئادەتتە بۇنداق ئەھۋال ئاز كۆرۈلىدۇ) ، بۇ چاغدا پەرھات ئانىنى كۈيلەيدىغان ئۇيغۇرچە ئىجادى ناخشىسىدىن بىرنى ئېيتتى ، سەھنىدىكى ئۇستازلار ۋە تاماشىبىنلار گەرچە ئۇيغۇرچىنى چۈشىنىپ كەتمىسىمۇ ئەمما قاتتىق تەسىرلەنگەنلىكىنى ئىپادىلىدى ، ناخشا تۈگىگەندە ئۇستازلار ئۇنى تالىشىپ دېمىگەن گەپلىرى ماختىمىغان سۆزلىرى قالمىدى ، پەرھات ئاخىرىدا ۋاڭ فېڭ ئۇستازنى تاللىدى ، بۇ چاغدا داڭلىق ناخشىچى ئۇستاز نا يىڭ ۋە ياڭ كۈن پىسخىكا كونتىروللىقىنى يوقىتىپ ، كۆزلىرىدىن ياشلار ئىختىيارسىز تارام تاملاپ ئېقىپ كەتتى ، بۇرۇن بۇنداق ئەھۋال يۈز بەرمىگەن بولغاچقا بۇ خەۋەر پۈتۈن جۇڭگودىكى سەرلەۋىلىك خەۋەرگە ئايلاندى . رەسىمدە نا يىڭ ئۇستاز يىغلىغان ھالدا پەرھاتنىڭ پىشانىسىگە سۆيمەكتە . پەرھات جوڭگودىكى چوڭ سەھنىگە ئەمدى چىققان بولسىمۇ ، ئۇ شىنجاڭ خەلقىگە ئاللىچاچان تونۇشلۇق ، ئۇ ئورۇنلىغان ‹تارىم› ، ‹ئىزلىدىم› قاتارلىق ناخشىلار خەلقىمىز قەلبىدىن ئورۇن ئالغان . ئۇنىڭ بۇندىن كىيىنكى سەنئەت ھاياتىغا ئۇتۇق تىلەيمىز .

326ayixa

	ئۇيغۇرلارنىڭ يۈزىنى يۇرۇق قىلدى ، لېكىن ئۇ ئەمدى خەنزۇچە ناخشا ئېيتارمۇ ؟

دىلدوس

	بارىكاللا پەرھاتقا، بۇنىڭدىن كېيىنمۇ مۇشۇنداق نەتىجىلەرنى قازنىپ تۇرغاي

arzu0602

	326ayixa يوللىغان ۋاقتى  2014-8-2 09:55 AM ئۇيغۇرلارنىڭ يۈزىنى يۇرۇق قىلدى ، لېكىن ئۇ ئەمدى خەنزۇ ... ئارتۇقچە ئەنسىرىمەڭ

نازۇك-0996

	مىنىڭچە خەنزۇچە ناخشا ئىيتسىمۇ ئۆزىنىڭ ئۇيغۇر ئىكەنلىكىنى دەپ تۇرۇپ ئىيتسىلا مىنىڭچە بۇنىڭ بىز ئۇيغۇرلارغا زىينى يوق دەپ قارايمەن، قايسى تىلدا ئىيتسۇن ، قايسى تىلدا  سۆزلىسۇن ئۇ مەڭگۈ ئۇيغۇر.

بەرگى

	تۈنۈگۈن ئۈندىداردىلا كۆپلىگەن كىشى  قايىللىقىنى بۈلدۈرۈپ چىقىرىپ قويۇپتىكەن . مىسرانىمدىنلا كۆرۈپ باقاي ، ئىلگىرى بىر ناخشىسىنى بەكلا ياقتۇرۇپ ئاڭلايتىم ئىسمىنى ئۇنتۇپ قاپتىمەن ،

sedef

	پەرھات خالىق گېرمانىيەدە فېستىۋالغا قاتناشقان،ئۇ يەردىكى سەنئەت مۇتەخەسسىسلىرىنىڭمۇ دىققىتىگە ئېرىشكەندىن كېيىن ئۆزىنى قايتىدىن تونىدى،تېخىمۇ ئىلھاملاندى. ئۇنىڭ ئاۋازى ھەقىقەتەن ئۆزگىچە.

uygurjan09

	كۆرەي دىسەم تور دىگەن دەششەت ئاستا

UyGuR-CF

	مۇشۇ پىروگىراممىنى خېلى تولۇق كۆرەپ كېلىۋاتقانتىم، مەن كۆرۈپ تېخى بىرەرسى بۇ داڭلىق ئۇستازلارنى يېغلىتىپ، تەسىرلەندۈرۈپ باقمىغان، قالتىس ! چىمپىيون بولۇشىڭىزغا تىلەكداشمەن! ئۇيغۇرچە ناخشىڭىزنى ئىچكىرىدىكى چوڭ سەھنىدە ئېيتىپ تېخىمۇ بىر قېتىم قايىللىقىمنى قوزغىدىڭىز، يارايسىز!

اقرا

	پەرھاتنىڭ  ئاۋۇلار بىلەن قىلغان پارىڭىنى تەرچىمە قىلىپ قويمامسىلەر