بىزدىكى بەزى ناباپ ماقال-تەمسىللەر

MiRul

	بىزدىكى بەزى ناباپ ماقال - تەمسىللەر 1. «گەپكە كەلگەندە ئاتاڭدىن يانما»- بۇ ئىسلام ئەنئەنىسىدىكى ئاتا-ئانىغا ھۆرمەت قىلىش پىرىنسىپىغا خىلاپ. 2. «ياخشى تاماق ئېشىپ قالغۇچە، يامان قوساق يېرىلىپ كەتسۇن»- بۇ پەيغەمبىرىمىزنىڭ «مۇسۇلمان بىر ئۈچەيگە يەيدۇ، كاپىر يەتتە ئۈچەيگە يەيدۇ»دىگەن ھەدىسىنىڭ روھىغا، شۇنداقلا مۇسۇلمانلارنىڭ تاماقنى ئاز يەپ، ئىبادەتنى كۆپ قىلىدىغان ئادىتىگە خىلاپتۇر. 3. «خۇدادىن قورقامسەن دىسە قۇداڭدىن قورق»- بۇ ئېغىر كۇفرىلىققا تولغان قەبىھ تەمسىل بولۇپ، يارالغۇچىنى ياراتقۇچىدىن ئۈستۈن قويۇۋالغان. 4. «خۇدايىم بەرسە پەيغەمبەر غىڭ قىلالماپتۇ»- بۇ ئاللاھ بىلەن ئاللاھنىڭ ئەلچىسىنى بىر-بىرىگە دۈشمەن قويۇپ ئىلاھىي مەسىلىنى ئىنسانىي تەپەككۈر بىلەن تەھلىل قىلغان خاتا پىكىردۇر. 5. «ئوغرى قېرىسا قارىم بوپتۇ، جالاپ قېرىسا بۈۋىم»- بۇ دىندار كىشىلەرگە سۈركەلگەن غايەت زور بوھتان بولۇپ، گەرچە شۇنداق ئەھۋاللار قىسمەن كۆرۈلگەن بولسىمۇ، ھەممىسى بىر تاياقتا ھەيدىلىپ، مۇسۇلمانلارنىڭ دىلىغا ئازار بېرىلگەن. 6. «قۇل ئات مىنسە چىقمىغان دۆڭى قالماس، دىدەك قىز مۇنچاق ئاسسا كىرمىگەن ئۆيى قالماس»- بۇ كۈچلۈك تەكەببۇرلۇق ھىدى پۇراپ تۇرغان تەمسىل بولۇپ، تۆۋەن تەبىقىدىكى ئاممىنى مەسخىرە قىلىش مەقسىدىدە ئىجات ئېتىلگەن بولسا كېرەك. 7. «خوتۇن ئالساڭ كوچىدىن ئال، تۈزىۋېلىش ئۆزۈڭدىن»- بۇ پەيغەمبىرىمىزنىڭ «خوتۇن ئالساڭلار-ئىپپەتلىك، تەقۋادار، قانائەتچان، تۇغۇمچان خوتۇن ئېلىڭلار»دىگەن كۆرسەتمىسىگە خىلاپ بولۇپ، كوچىدىن ئالغان خوتۇن تۈزەلگەن تەقدىردىمۇ ئۇنىڭدىن تۇغۇلغان بالا مۇكەممەل مۇسۇلمان بولۇپ كېتىشى ناتايىن. 8. «ئانامنىڭ ئۆلۈپ كېتىشىنى بىلگەن بولسام بىر تاۋاق كېپەككە تېگىشىۋېتەتتىم»- بۇ ئىنساننىڭ قەدىر-قىممىتىنى خۇنۇكلەشتۈرىدىغان پەسكەش سۆز بولىنىدىن سىرت، ئانىدىن ئىبارەت پەيغەمبىرىمىز «جەننەت ئايىغى ئاستىدا بولغان بۈيۈك ئىنسانغا قارىتىلغان زور ھاقارەتتۇر. 9. «ھايۋان بالىسىنى باقساڭ ئاغزى-بۇرنۇڭنى ياغ ئېتەر، ئادەم بالىسىنى باقساڭ ئاغزى-بۇرنۇڭنى قان ئېتەر»- بۇ قىسمەن ۋاپاسىز پەرزەنتلەرگە توغرا كەلسىمۇ، بىراق كۆپ سانلىق ۋاپادار پەرزەنتلەرگە ئۇۋال قىلىنغان بولىدۇ، ھەم بۇنداق زەھەرخەندە تەمسىل جەمئىيەتتە بىر خىل ئىشىنىشمەسلىك ۋەھىمىسى پەيدا قىلىدۇ. مۇھىمى پەيغەمبىرىمىزنىڭ يىتىم بالىلارنى بېقىۋېلىشنى تەۋسىيە قىلغان كۆپلىگەن ھەدىسلىرىنىڭ روھىغىمۇ زىت كېلىدۇ. 10. «ئىتنىڭ قارغىشىغا پىت ئۆلمەپتۇ»- بۇ تەمسىل بىراۋنىڭ ئىككىنچى بىر ئادەمنىڭ قارغىشىغا پىسەنت قىلمىغانلىقىنى كۆرسىتىدىغان بولسىمۇ، بىراق ئىنساننىڭ ھەر بىر ئېيتقان سۆزىگە-مەيلى ياخشى گەپ بولسۇن ياكى يامان سۆز بولسۇن پەرىشتىلەر «ئامين!» دەيدىغان بولۇپ، ئېغىزدىن چىققان قارغىش سۆزى گەرچە دەمال ئۈنۈمىنى كۆرسەتمىسىمۇ، ئەمما ھامان بىر كۈنى بەددۇئا بولۇپ قارغالغان كىشىنى پىشكەللىك باسىدۇ. مەنبە: توردۇنىياسى

oghuztekin

	مەنچە  بۇ پەقەت ھەر بىر كىشىنىڭ ئۆز چۈشەنچىسى بىلەن مۇناسىۋەتلىك . ماقال تەمسىللەرنىڭ ھەممە ئەھۋالغا ئۇيغۇن  كېلىشى ناتايىن .

guljanat

	ئويلىنىشقا تىگىشلىك

KOMUX

	ئويلىنىشقا تىگىشلىك ماقال تەمسىللەر  مەنمۇ شۇنداق پىكىردە رەھمەت

ئامانسا

	1-،ماقال تەمسىلنىڭ ئەسلىسى‹‹گەپكە گەپ توغرا كەلسە ئاتاڭدىن قالما›› 6-7-9-10- ماقال تەمسىللەرگە بەرگەن ئىزاھاتىڭىز توغرا بولماپتۇ. 7-ماقالدا سىز ئۇنداق خوتۇندىن تۇغۇلغان بالا مۇكەممەل مۇسۇلمان بولۇپ كىتىشى ناتايىن دەپسىز،بىر كىمنىڭ مۇكەممەل مۇسۇلمان ياكى مۇكەممەل مۇسۇلمان ئەمەسلىكىنى بىز ئايرىمايمىز رەببىم ئايرىيدۇ. 6-ماقالدا دىيىلگىنى ئىككى نان تاپسا بىرسىدە داپ چالىدىغان،كىچىككىنە ئىشنى قىلىپ قۇيۇپ ياكى كىچىككىنە مەنپەتكە ئىرشىپلا ھەممە يەردە داۋراڭ سالىدىغان ئادەملەرگە قارىتىلغان. 9-ماقال بولسا ۋاپاغا جاپا قىلدىغان،تۇزىنى يەپ تۇزلىقىنى چاقىدىغان نائەھلىلەرگە دىيىلگەن. 10-ماقال بولسا ئىچى تار ئادەملەر باشقىلارنىڭ نەتىجىسىنى كۈرەلمەي يامان تىللار بىلەن قارغىغاندا ياكى بولمىسا تىللىغاندا ئۇلارغا پىسەنت قىلماسلىق ئۈچۈن دىيىلگەن.خۇددى ‹‹ئىت قاۋاۋىرىدۇ،كارۋان يولىغا مېڭىۋىرىدۇ›› دىگەندەك.

babur99

	4-ماقالنىڭ ئەسلىسى :«رەھماننىڭ  بەرگۈسى كەلسە ،شەيتان قىزغىنىپتۇ ». مەن ئەزەلدىن خۇدا بەرسە پەيغەمبەر غىڭ قىلالماپتۇ دىگەن ماقالنى ئاڭلاپ باقماپتىكەنمەن . 8-ماقالمۇ قۇلاق ئاڭلىمىغانلا بىر گەپكەن . ئەمدى قالغان ماقاللارغا كەلسەك بۇ ئاتا-بوۋىلىرمىز مۇئەييەن تۇرمۇش تەجرىبىسى ئاساسىدا يەكۈنلىگەن ھىكمەتلەر بولۇپ ،ھەممسىنىڭ ئشلىتىلىدىغان پەيتى ۋە دائىرىسىگە قاراپ باھا بەرسەكمۇ كېچىكمەيمىز. مەسىلەن :«ئوغرى قېرىسا موللا بۇلار ،جالاپ قېرىسا بۈۋى »دىگەن گەپ پەقەت ياشلىقىدا  ناشايان ئىشلارنى قىلىپ  ،خۇدانى يادىغىمۇ ئېلىپ قويمىغان بىر قىسىم كىشلەرنىڭ قېرىغاندا ئەل- جامائەتنىڭ قاتارىدىن قالماسلىق ياكى شۆھرەت ئۈچۈن دىندار بولىۋالدىغان رىياكار لىقىنى كىنايە قلىش ئۈچۈن دىيلگەنلا گەپ خالاس . بۇنداق بۇ ماقاللار نىمىگە قارتىلغان ،قانداق شارائىتتا مەيدانغا كەلگەن دىگەننى تەھلىل قىلمايلا ، مىڭ يىلدىن بۇيان  ئىسلام ئەھكاملىرىغا ئىخلاسمەنلىك بىلەن بويسۇنۇپ كېلۋاتقان ئەجداتلىرمىزغا « ئىسلامغا ،ئاللاھ ۋە پەيغەمبەرلەرگە ،دىندارلارنى مەسخىرە قىلغان ، تۆھمەت قىلغان »دىگەندەك قالپاقلارنى كەيدۈرۈش زىيادە سەزگۈرلۈكتىن كېلىپ چىققان بىمەنلىك خالاس. بەزىڭلار مەدەنىيەت ئىنقلابىدا مەزگىلىدە ياشاپ قالغان بولساڭلار راسا ئاكتىپ ئىنقىلاپچى بولارسىلەركەن ئەسلى ....

ئامانسا

	babur99 يوللىغان ۋاقتى  2014-7-25 02:26 PM 4-ماقالنىڭ ئەسلىسى :«رەھماننىڭ  بەرگۈسى كەلسە ،شەيتان ق ... ھى ھى ھى ....   تازا كۈلدۈم ماگەپكە.....  كۆڭلۈمدىكىنى يېزىپسىز جۇمۇ ئەمما....

nazigul8

	يوۋ، بۇ نىمە گەپ؟! ئەمدى ئىسلاھ قىلمىغان ماقال-تەمسىل قالدىمۇ نىمە بىزدە ناباپ ماقال-تەمسىل يوق، ناباپ ئىنسان ۋە ناباپ ئىشلار بار، بۇ شۇ ناباپلارغا قارىتا ئىشلىتىلىدىغان ماقال-تەمسىللەركەن. ماقال-تەمسىلدە ھەرگىز ئايرىملىقنى ئومۇملىققا كۆتۈرىدىغان ئەھۋال يوق.ئايرىم ئەھۋالغا ئايرىم ئىشلىتىلىدىغان ئەجداتلىرىمىز قالدۇرغان تىل بايلىقىمىز بۇ.

nazigul8

	بۇنداق بۇ ماقاللار نىمىگە قارتىلغان ،قانداق شارائىتتا مەيدانغا كەلگەن دىگەننى تەھلىل قىلمايلا ، مىڭ يىلدىن بۇيان  ئىسلام ئەھكاملىرىغا ئىخلاسمەنلىك بىلەن بويسۇنۇپ كېلۋاتقان ئەجداتلىرمىزغا « ئىسلامغا ،ئاللاھ ۋە پەيغەمبەرلەرگە ،دىندارلارنى مەسخىرە قىلغان ، تۆھمەت قىلغان »دىگەندەك قالپاقلارنى كەيدۈرۈش زىيادە سەزگۈرلۈكتىن كېلىپ چىققان بىمەنلىك خالاس. بەزىڭلار مەدەنىيەت ئىنقلابىدا مەزگىلىدە ياشاپ قالغان بولساڭلار، راسا ئاكتىپ ئىنقىلاپچى بولارسىلەركەن ئەسلى .... babur99 نىڭ ما گېپى ھەجەپ نەق كەپتۇ.

musilina

	babur99 يوللىغان ۋاقتى  2014-7-25 02:26 PM 4-ماقالنىڭ ئەسلىسى :«رەھماننىڭ  بەرگۈسى كەلسە ،شەيتان ق ... ئەڭ كۆڭلۈمدىكىدەك ئىنكاس بوپتۇ ماۋۇ.....