ماختاش ۋە ماختىنىش كېسىلى

.tuz.

	ئابدۇرېھىم ئۆتكۈر ئاكا ، مۇساجان ئەزىزى ئاكا ، قادىر ئەكبەر ئاكىلار بىلەن بىر قېتىملىق سۆھبەتتە بولغان چېغىمىزدا ئۆتكۈر ئاكا مەرھۇم ئەھمەد زىيائى ئاكىنىڭ بىر كەچۈرمىشىنى سۆزلەپ بەردى . كۈنلەرنىڭ بىرىدە ئۆتكۈر ئاكا ئەھمەد زىيائىي ئاكىدىن سوراپتىكەن : ____ ئەپەندىم ، سىلى ئۆمۈرلىرىدە بىر كىمنى ماختاپ باققانمۇ ؟ مېنىڭ بىلىشىمچە ، بۇ پوقنى يېمىگەن بولغىيتتىلە . ئەھمەد زىيائىي ئاكا كۈلۈپ كېتىپ : ____ بىزدە ئۇنداقلارنى تاپماق دېڭىزدىن يىڭنە ئىزدىگەندەك بىر ئىش ئوخشايدۇ . ئون ئالتە يېشىمدا بىر رەسۋا بولمىغان بولسام ، كېيىن ماختانچاق ھەم يالغانچى بولۇپ قالاركەنمەن . شۇ چاغلاردا ئاكام مۇھەممەد فەيزى قەشقەرى رەھمىتى مەھمۇد مۇھىتىنىڭ ھوزۇرىدا كاتىپ ئىكەنتۇق . ئاكامنىڭ ۋاستىسى بىلەن مەنمۇ كاتىپ كاتىپ بولۇپ كىردىم . تۇرۇپ كۆڭلۈمگە شەيتان كىرىپ ، مەن ئاكامدىن يۇقۇرى ئورۇنغا ئېرشىۋالمايمۇ ، دېگەن تەمە بىلەن ، مەھمۇد مۇھىتىنىڭ مېنى كاتىپلىققا ئالغىنىغا رەھمەد ئېيتىشنى باھانا قىلىپ ئۇ ئادەمنى مەدھىيلەپ ماختاپ 30 نەچچە كۈبلېت قەسىدە يازدىم . ئۇنى سۈت بىلەن پەتلىگەن ئالاھىدە قەغەزگە راسا چىرايلىق خۈشخەتچىلەپ كۆچۈرۈپ ، چىرايلىق قاتلاپ تۇتۇپ تۇرسام ، مەھمۇد مۇھىتى تورۇسقا تېگەي ، دەپ قالغان ئېگىز بويىنى سەل ئىگىپ گۆرسۈلدەپ دەسسەپ كىرىپ كەلدى . ئۇ ھەر قېتىم ئىشىكتىن كىرسە تۇرپان پەدىسىدە : __ ھوي باللا ، ئىشلەۋاتامسىلە ؟ ____ دەپلا ئىچكىرى ئىشخانىسىغا كىرىپ كېتىدىغان . بۇ قېتىم مېنىڭ ئىشىك ئالدىدا قول باغلاپ تۇرغىنىمنى كۆرۈپ : ____ ھە ، ئەھمەد بالام ، گېپىڭ بارما ؟ _____ دېدى بوم ئاۋازى بىلەن . _____ خوش تەقسىر ، ______ دېدىم بېشىمنى ئېگىپ . __ خوش تەقسىرىڭنى قويۇپ ، گىپىڭ بولسا ئۇدۇللا دەۋەر ، ئوغۇل بالا دېگەن مەزلۇم سۈپەت بولۋالسا قاملاشمايدۇ . تىترەپ ، تەرلەپ تۇرۇپ ئۇنىڭغا قاتلاقلىق قەسىدەمنى بەردىم . ئۇ گۇرسۇلدەپ دەسسەپ كىرىپ كەتتى . پەم بىلەن جايىمغا كەلدىم-دە ، باش كۆتۈرمەي مۈكچىيىپ ئىشلەۋاتقان ئاكامغا يەر تېگىدىن قاراپ ، ئىچىمدە : « بىچچارە ، مېنى مەھمۇد سىجاڭغا سەن تونۇشتۇرغانتىڭ . ئەمدى سىجاڭ مېنى سەندىن ياخشى كۆرۈپ ، ئەتىۋارلاپ ئۆستۈردىغان بولدى . مەن زادى سەندىن ئۈستۈن تۇرمىسام بولمايدۇ » دەپ خۇشاللىقىمدىن ئىچىمگە سىغماي ئولتۇردۇم . بىر كەمدە ئىچكىرىكى ئىشخاندىن جوزىغا «گۇم » قىلىپ ئۇرۇلغان مۇشتنىڭ ، ئاندىن سىجاڭنىڭ قاتتىق ھۆركىرىگەن ئاۋازى ئاڭلاندى . كاتىپلار ، مۇھاپىزەتچىلەر تىك تۇرۇپ كېتىشتۇق . مۇھاپىزەتچىلەر ئىچكىرگە ئوقتەك كىرىپ كەتتى . مەھمۇد سىجاڭ : ____ قىنى ھېلىقى يېڭى كەلگەن ھارامزادە مىرزا ، _ دەپ قاتتىق ۋاقىردى . قوققنىمدىن ھۇشۇمنى يوقاتقىلى تاس قالدىم . مۇھاپىزەتچى يىگىتمۇ تاتىرىپ ، مېنى ئىچكىرگە كىرىشكە ئىشارەت قىلىپ ، ئۆزىنى دالدىغا ئالدى . پۇت قولۇمدا جان يوق ، تەستە ئىچكىرى ئىشخانىغا كىردىم . سىجاڭنىڭ قويۇق قاشلىرى ئارىسىدىكى قاپىقىدىن مۇز يېغىپ تۇرىدۇ . بۇنى كۆرۈپ بېشىم قېيىپ ، تىزىم پۈكلىشىپ يىقىلىپ چۈشكىلى تاس قالدىم . ___ بۇنى سەن يازدىڭمۇ ؟ __ خوش ..... تەقسىر . _______ ھۇ ، تەقسىرىڭنىڭ يەتمىش پۇشتىنى ...... مۇشتەك تۇرۇپ ھارامزادىلىكنى نەدىن  ئۆگەندىڭ ؟ بىر تال تۈكۈمدىن مىڭ تامچە تەر قۇيۇلۇپ ، قورققىنىمدىن يىقىلىپ چۈشكىلى تاس قالدىم . بۇ ئەھۋالنى كۆرۈپ سىجاڭ سەل يۇمشاپ ، يىلپىز تېرىسى سىلىنغان ياڭاق ياغاچى ئۈستىلىدە ئولتۇردى . _____ دەپ باقە ، نېمە مەقسەتتە مېنى مۇنچە ماختاپ قەسىدە يېزىڭ ئۇچۇرۋەتتىڭ ؟ سەن دىندا ئوقۇپسەن ، ھازىرغىچە ياراتقان رەببىمىز ئاللاھنى مەھدىلەپ شۇنچىلىك قەسىدە يېزىپ باقتىڭمۇ ؟ زۇۋانىم تۇتۇلۇپ قالغانلىقتىن ئۈندىمەي تۇردۇ . ____ ئىلمى بار ، دەپ سېنى ئاكاڭ تونۇشتۇردى . بالا بولساڭمۇ ئىشلىسۇن ، دېدىم . يەنى مەندىن نېمىنى تەمە قىلىپ مېنى بەك ماختاپ مەھدىيلىدىڭ ؟ نېمە تەمە قىلغان بولساڭ ئوچۇق دە ، مۇرادىڭغا يەتكۈزەي . ئىت ياڭقىدەك ئاچچىق تىكەنلىك نەرسە بوغۇزۇمغا قاپلىشىپ گەپ قىلالمىدىم . گۆشۈيۈپ تۇرغىنىمنى كۆرۈپ سىجاڭ قاتتىق ھۆركۈردى : ____ پۇل تەمە قىلدىڭمۇ ؟ ئالتۇنمۇ ، تىللامۇ ؟ ياكى ئەسكەر باشلىقى بولغۇڭ بارمۇ ؟ مېنىڭ مەنسىپىمنى تەمە قىلغان بولساڭمۇ مانا ھازىرلا بېرەي ...... ___ ياق .... تەقسىر .... _______دېگىنىمچە يىقىلىپ چۈشتۈم . مۇھاپىزەتچى يۆلىۋالدى . ھۆڭرەپ ، ئېسەدەپ يىغلاپ ، زادىلا ئۆزۈمنى تۇتالمىدىم . سىجاڭ بىردەم تۇرغاندىن كېيىن : ____ پەيغەمبىرمىز مۇھەممەد ئەلەيھىسالام ، سېنى يۈزۈڭدىن يۈزۈڭگە ماختىغان ئادەمنى قانداق قىل دېگەن ؟! ___ دەپ سورىدى . ____ يۈ .... يۈزىگەتوپا چاچ ، ئۇنداق كىشىلەردىن قاتتىق ھېزى بول . نېرى قاچ دېگەن . ____ بالام ، سەن تېخى گۈدەك ئىكەنسەن ، يۈزۈڭگە توپا چاچسام بولماس . ئەمما بالا تۇرۇپ مۇنداق مەرەز كېسەلنى يۇقتۇرۋالساڭ ، سەن ئادەم بولماي ،تاپان يالايدىغان لالما ئىت قاتارىدىن قوپىسەن . بىر ئادەمنى يۈز تۇرانە ماختىغان ئادەمدە چوقۇم ئىنتايىن رەزىل قار نىيەت ، پەس غەرەز بولىدۇ . ئۆزىنى ماختىغان ئىنسانمۇ يۈزىگە پەرداز قىلىپ سەتەڭ سۈرتىگە كىرۋالغان پەسەندى خوتۇنلاردەك داپشاق داپ يۈز كىلىدۇ . ئۇياتلىق ئەدەپلىك ، بىلىملىك ، ئىلىملىك ، ئىنسان تەبئەتلىك ئادەم ماختىمايدۇ ، ماختانمايدۇ . ماختىساڭ ، ماختاشقا تېگىشلىك ئەڭ كاتتا ئۇلۇغ زات رەببىمىز ئاللاھنى ماختا . بۇ گەپنى ئىسىڭدە چىڭ تۇت ، ئىشتىن بوشتىۋىتەي ، دېگەن ، بالا بولغىنىڭ ئۈچۈن ئاتىدارچىلىق قىلاي ، ماڭ چىقىپ ئىشىڭنى قىل ! ..... شۇ چىققانچە ئۈچ كۈن دۈم يىتىپ يىغلىدىم . ئىشخانىغىمۇ ھەرگىز يولىمىدىم . شۇ ئىزا - ئاھانەتلىك ، نۇمۇسلۇق كۆرنىش يۈرۈكىمگە ئورناپ كېتىپ ، شۇندىن ئىتىبارەن  ماختىنىش ۋە ماختاشتىن خالى بولۇپ ياشاپ ئۆتتۈم . ئۆتكۈر ئاكىنىڭ بۇ ئىبرەتلىك ھېكايىسى ھازىرغىچە قۇلاق تۈۋىمدە جاراڭلاپ تۇرۇپتۇ . خوش ، بۇگۇنكى كۈندىچۇ ؟ خوشامەتچىلىك ئازىييىشنىڭ ئورنىغا شاخلاپ ، زورىيىپ شۇ دەرجىگە يەتتىكى ، مەلۇم مەنپەتنى كۆزلەپ ، مەنسەپ _ ئىمتىياز ئىگىلىرىنى ماختاش ، ئۇلارغا ئولتۇرسا- قوپسا خوشامەت قىلىش ،جەمئىيەت خاراكتېرلىك رەزىل ئىللەتكە ئايلىنىش بىلەن بىر ۋاقىتتا ، ئەلنىڭ ھكرمەت تەختىدىكى مۆتىرەملىرمىزدىن تارتىپ ئاۋام پۇجراغىچە ئۆزىنى ماختاش خاراكتېرىنى ئېلىپ يامراشقا باشلىدى . ماختاش _ ماختىنىشلارنىڭ تېتىقسىزلىقدىن ئادەمنىڭ قۇسقىسى كىلىدۇ . بەزەن كىشىلىرمىز بارغانچە نۇمۇس سەزگۈسىدىن مەھرۇم بولۇپ ، ماختانغانسىرى ئۆلىگىدىن سېسىپ ، بىر پۇلغا قىممەتلىشىپ ، ، باشقىلار كۆزگە ئىلمۇغانچە چۈشكىنلىشىپ ، تىرىككەك ، سەپرا ، چىدىماس ، جىلىخور ، جېدەلخور ، تەمەخور ، دادخور ، ھەسەتخور بولۇپ ئادىمىلىكتىن يىراقلىشىپ كىتىۋاتىدۇ . قېنى ، پىشانىمىزنى سىلىۋىتىپ ئوبدانراق ئويلاپ باقايلى . قايسىمىز قايسى تاغنى يۆتكەپ بەرگەنگە ، قايسىمىز ۋەتەن خەلىق ئۈچۈن قانداق ئۇلۇغ ئىشلارنى قىلۋەتكەنگە شۇنچە ماختىنىمىز ؟ ئەگەر بىز «نۇمۇس » دېگەن ئالى ئىنسان ئىڭىنى ئۇنتۇپ كەتمىەەن بولساق ، ئۆزىمىزنى تولا ماختىمايلى . ئاگاھ ۋە دانا بولايلىكى ، ماختاش ماختىنىش كېسىلى دۇنيانى ۋەھىمىگە سىلىپ ، ئىنسانىيەتتكى ئىنسانلارنى يەپ كەتمەكچى بولغان ئەيدىزدەك ، مىللىتىمىزگە تەرقىلىۋاتىدۇ . «خوشامەتچى - ماختانچاق كۆپەيسە تۈگەشكەننىڭ بەلگىسى ھەم سىگنالى » دېگەندەك ، بۇ رەزىل ئىللەت ئەمىلىيەتتە بىزنى تۇيدۇرماي غەپلەتكە ۋە زاۋاللىققا باشلاۋاتىدۇ . خۇلاسە كالام ، ھېچقايسىمىز تېخى ئۆزىمىزنى داڭلۇغۇدەك ماختانغۇدەك ئىش قىلمۇدۇق ، شۇڭلاشقا ماختىنىشتىن سەل خىجىل بولايلى . شۇنى يەنى ئۇنۇتمايلىكى ، ئىلىم ئىگىسى ، پەزىلەت ئىگىسى ماختىمايدۇ ، ماختانمايدۇ . لېكىن ، ئەتراپىدىكى ئادەملەرنى ئۈنسىز ياخشى خۇي پەيلى ھەركىتى  بىلەن قايىل قىلىپ ، ئۇلارنىڭ ھۆرمىتىگە ، دۇئاسىغا ، ھەقىقى چىن يۈركىدىن ياخشى كۆرشىگە ئېرشىدۇ . « ئوڭ قولنىڭ ياخشى ئىشىنى سول قول كۆرۈپ قالمىسۇن » دىگەن روھ بىلەن ياشايدۇ . مەنبە : ئۆزىمىزنى ئىتىراپ قىلايلى ئەزىز  قېرىندىشىم ، ھەرگىزمۇ بىراۋنىڭ گەجگىسىگە دەسسەپ ھاقارەت قىلىپ باسماڭ. بىر كىملەرنىڭ تاپىننى يالاپ ،كۆتۈرۈپ  خوشامەت قىلىپ ماختايدىغان نامەرتلەردىن بولماڭ .

saprayi

	ئىسىل تىما يوللاپسىز،رەھمەت سزگە!

قورغان

	پايدىلىنىش قىممىتى يۇقىرى،ئېسىل تېمىدىن يوللاپسىز،رەھمەت. بىزگە ھازىر مۇشۇنداق تېمىلار كىرەك

riqat

	ۋاھ ئاۋۇ يازمىنىڭ ئىچىدىكى بۇرۇن ئۆتكەن تۆرەم ئەجەپ بىلىملىك ئىتىقادى ياخشى بىر كىشىكەن، قاراپلا بەك قايىل قويدۇم، ئاساسى ماختاشنى جەمىيەتتىكى ناكەس تايىنى يوق ۋىجدانى ئۆلگەن كىشىلەر قىلىدىكەن ئەمەسمۇ ئاللاھ قوللىرىغا دەرت بەرمىسۇن بەكلا مەمنۇنمەن بۈگۈن كىرىپلا مۇشۇنداق ئېسىل ساۋاتلارنى بىزگە سۇنغانلىقلىرىغا ساقلاپ قويسام بولغۇدەك

uzum-tal

	ھەقىقەتەن  يا ،،، ماختىماي بىي يازاتتۇق راسىت ئىنكاسنى . مۇشۇمۇ تېما بولدىما ئەمدى . نەدىكى تۇرمۇشىمىزدىكى كىىشلەر ئەڭ ئۆچ كۆرۈدىغان بىراق قىلغۇسى كەپ قالدىغان مەسىللەر ئۈستىدە قەلەم تەۋىرتىپ سىللىمۇ تۈز ئەپەندىم . شۇنداقتىمۇ ئاللاھ ئائىللىرىگە رەھمەت قىلسۇن ئەمدى .

yollar

	ماختاشقا ۋە ماختىلىشقا خۇمار بولۇپ قالغانلارغا قامچا بولغۇدەك ئېسىل يازما!

بەرگى

	____ دەپ باقە ، نېمە مەقسەتتە مېنى مۇنچە ماختاپ قەسىدە يېزىڭ ئۇچۇرۋەتتىڭ ؟ سەن دىندا ئوقۇپسەن ، ھازىرغىچە ياراتقان رەببىمىز ئاللاھنى مەھدىلەپ شۇنچىلىك قەسىدە يېزىپ باقتىڭمۇ ؟ بۇ قۇرلارنى ئوقۇپ مۇنبەردىكى ئاشۇ تۈگىمەس مۇھەببەت قوشاق ۋە شئېر يازدىغانلاردا دىگۈم كەلدى . ھازىرمۇ شۇنداق باشلىقلار بولغان بولسا ياخشى بولاتتى .

ehrami

	ئەكبەر قادىرمۇ ياكى قادىر ئەكبەرمۇ؟ خاتالىق باركەن

axek13999649893

	بەرگى يوللىغان ۋاقتى  2014-7-10 04:50 PM ____ دەپ باقە ، نېمە مەقسەتتە مېنى مۇنچە ماختاپ قەسىدە يې ... ئەگەشتم

ablimitt

	مەدھىيلەپ ماختاپ 30 نەچچە كۈبلېت قەسىدە。。。 ھازىر شۇنچىلىك يازالايدىغانلار بولسا خې ئەمىردەك ھاجەتكە ئولتۇرۇپ تۇرۇپلا يېزىلارغا ئەمەلدار تەيىنلىيەلىگۈدەك ئورۇنغا چىقارمىكىن...