ھىجراننامە

Gvlmisal

	ھىجراننامە (1) يۈكسەك بىر تەگسىزلىك ئىچىدە چايقىلىۋاتىقان تىنىمنى سۆرەپ يېنىڭدىن يىراقلىشىۋاتىمەن.جىمجىتلىق بىلەن.لىكىن سەن سىزەلمەيسەن.سەن ئارىمىزنىڭ يېقىنلىقىنىمۇ سېزەلمىگەن ئىدىڭ.شۇڭا سەن يىراقلىشىۋاتقىنىمنىمۇ سىزەلمەيسەن.بۇ يىراقلىشىشىم بىلەن ئۆزۈمنى شۇنداق بىر ھالەتكە دۇچار قىلماقچىمەنكى قەلىب كۆزۈم كور بولغان نەكۈن ئازابنى چىللىغان يۈرىكىم ماڭا ھىجىراننىڭ يېڭى ھېكايىسىنى سۆزلەيدۇ.بەلكىم مىنىڭ سۆزلىرىم،قىلغانلىرىم ساڭا يېقىنلىشىۋاتقاندەك تۇيۇلار ...ئەمما قەلبىمدىكى چوڭقۇرلىشىۋاتقان ھاڭنى ھېچكىم بىلمەس،ئاشۇ ھاڭغا ئۆزۈمنى ئاتماقچىمەن بىلىپ تۇرۇپ. بىلمىدىم كۈتۈشتىن تاپتى كىم مەنا، قان رەڭدە چايقىلار زىمىنمۇ شۇتاپ. نەكۈن بۇ يۈرەككە سانچىلدى پىچاق، لىققىدە ھەسرەتكە چىلاشتى ئەتىراپ. يوقلۇقنىڭ بارلىقىنى ئىتىراپ قىلىشقا مەجبۇرمىز خالمىساقمۇ.ئۆزۈمدەك ياشاشنى نەقەدەر خالايتتىم ھە؟ شۇنىڭ ئۈچۈنمۇ كۆپ تىرىشقان ئىدىم.لىكىن قىلغانلىرىم ئەللەرنىڭ نەزىرىدە بىر ئەخمەقلىق......بەرىبىرغۇ ھەممىسى.بىر چىمدىم توپا تۇپراققا قۇشۇلۇپ ئۆزلىكىنى يوقاتقىنىدەك "يوق بۇلۇش"مۇ شۇنچە سۈيۈملۈك......ھەر ھالدا قەدىر- قىممەت بىلەن.....غورۇر بىلەن.... ئۇيقۇسىرىغان كۆزلىرىمنى چاراقلاپ تۇرغان يۇلتۇزلارغا تىككىنىمدە يۇلتۇزلارنىڭ غەمكىن كۆزلىرى ماڭا يىغلامسىرىغاندەك كۈرۈندى.بۇ كېچەمەن ئالتۇن تاۋاقتەك تۇلۇنئاينى كۆرەلمىدىم. دائىم سېنىڭ ئۈچۈن قۇرلارنى پۈتكىنىمدە سېنىڭمۇ يۈرىكىڭنى يېزىۋاتقىنىڭنى ئەسكە ئالىدىكەنمەن - يۇ، ئۇ قۇرلارنىڭ باشقىلار ئۈچۈن يېزىلىۋاتقانلىقىنى ئۇنتۇيدىكەنمەن......ئۆزىنى قۇرلار ئارىسىدىن ئىزدەيدىغان 2-ھاماقەتنى كۆرگەنمۇ سەن؟ ھىجىراننىڭ سازلىرى نە ئۈچۈن مۇڭلۇق؟ كۆزياشلار تۈكۈلۈپ  تۇرغان بولسىمۇ. مەن نىچۈن كۈلىمەن  يالغاندىن يەنە؟ يۈرىكىم ئازابتا مىڭ بىر ئۆلسىمۇ. بۇرۇنقىدەكلا بىپەرۋا يۈرسەم مىنىڭ بەرداشلىق بىرەلەيدىغىنىمغا ئىشىنەمسەن؟كېچە بىلەن تاڭنىڭ ئارىلىقى مەيلى قانچە ئۇزۇن بولسۇن.....كۆز ياشلارنىڭ تەمى مەيلى قانچىلىك شورلۇق بولسۇن ،مەن يەنىلا ياشلىرىمنى سۈيۈپ قالىمەن....... يۇلتۇزلار مىنى سوراپ قالسا بېشىڭنى يىنىكلا چايقاپ قويساڭ كۇپايە.ئاۋازىمنى سېغىنساڭ گۈلنىڭ شېخىنى قايرىغىن.بەلكىم ئۇ ساڭا مىنىڭ ھېكايەمنى سۆزلەپ بىرىشى مۇمكىن . ئەتىراپنىڭ شۇ قەدەر تىنىچ ۋە رەزىللىكى مىنى دەھشەتكە باشلىدى .قانداق قىلىمەن؟ ئېيتقىنە؟ مەن قانداق قىلاي؟ چۈشتىكى پىچىرلاشلىرىمدەك تاڭسۇق ھېسلىرىمنى ھېچكىمگە دىگۈم يوق. سەندە بارى مەندە يوق، مەندە بارى سەندە يوق تەندە بارى روھتا يوق، روھتا بارى تەندە يوق(1) تىمتاس كېچىدىكى غېرىپلىق مىنى يەنە ئەسلىمىلەرنىڭ بۆشۈكلىرىدە ئەللەيلەۋاتىدۇجېنىم."جېنىم"دىگەن بۇ سۆزنى يىزىش مەن ئۈچۈن نەقەدەر قىيىن...خۇددى بىراۋلار يۈزۈمگە كاچاتلاۋاتقاندەك نۇمۇسلۇق تۇيغۇدا يازدىم. ئاي نۇرى سايە تاشلىغان بۇلاق بۇيىغا كەلدىم.سۇ يۈزىدە لەيلەپ تۇرغان نەچچە تال يۇپۇرماققا قاراپ بوغۇزۇمغا كەپلىشىپ قالغان ئاچچىق يىغىنى يۈتىۋېتىشكە قۇربىم يەتمىدى .دەرەختىن چۈشكەن بىچارە يۇپۇرماق ئۆز ئەركىنلىكىنى ئىزدەيدىكەنيۇ دەرەختىن ئايرىلىش بىلەن بىللە ئۆز قىممىتىنىڭ يوقاپ كىتىۋاتقىنىنى بىلمەيدىكەن.ھاياتىنىڭ دوقاللىرىدا تەمتىرەپ يۈرۈپ نىمىنىدۇر ئىزدەۋاتقىنىمدا ئۆزۈمنى يۈتتۈرۈپ قويدۇم.بەلكىم مەڭگۈ تاپالماسمەن.قىلمىش-ئەتمىشلىرىم ئۈچۈن ئۆزۈمنى جازالىماقچىمەن.روھى ئۆلگەن تەننىڭ نە قىممىتى بولسۇن؟ كۆزلىرىم گۈزەللىكنى كۆرەلمەس،قەلبىم كۈلكىنى ھېس قىلالماس...قاراڭغۇلۇقنى سۆيىمەن چىڭ باغاشلاپ...... شۇ قەدەر تىپتىنىچ رەزىلدۇر ئەتراپ، ئازابلىق ئۈنلىرىڭ پەلەككە يەتتى. ئايىغىڭ ئاستىدا مەن تېرىغان گۈل. خۇشبۇيى مەڭگۈگە كەلمەسكە كەتتى. ئۆزلۈكنىڭ قىممىتى نەدە؟ جاۋاپ تاپالمىدىم.ئۆزۈمنى ئىزدەۋاتقان بۇ كۈنلەردە نىمىلەرنى ئويلاپ كەتتىم؟ قانچىلىك خىيال قىلدىم؟ ....ھەتتاكى ئۆزۈمنىڭ شۇنداق بىر ئادەملەر توپىدا ياشاۋاتقىنىمنىمۇ ئۇنۇتتۇم.ئۆزۈمدىكى يالغۇزلۇق خاھىشى شۇنچىلىك كۈچەيدىكى دائىم ئۆزۈمنى بۇ  تۇرمۇشقا تەۋە ئەمەستەك ھېس قىلدىم.   ئايىغىم ئاستىدا مۇڭسىرايدۇ يول، كۆزلىرىم نۇرلىرى چىللايدۇ ھىجىران. يۈرىكىم سوقىدۇ بىر خىل رېتىمدا، ماڭىمەن ئالدىمغا شۇنچە خىرامان. مەن سەندىن كۈتكەنتىم پەقەت"ھېچنىمە"، كۈتۈشنىڭ قانىتى سۇندىغۇ رەت -رەت. سۈبھىدە تۇزۇغان گۈل كەبى سۇلدۇم. قالغىنى مىنىڭدىن بىر سىقىم ھەسىرەت. ئىلاجىسىزلىق ئىچىدە قەدەملىرىمنى يۆتكەشكە مەجبۇر بولدۇم.سىنىڭ يۈتۈشكە باشلىغان ئىزىڭنى بويلاپ.بىرقەدەم ،ئىككى قەدەم،ئۈچ قەدەم...... ئالدىمدىكى تۇنۇش،ناتۇنۇش گەۋدىلەرگە يېقىنلىشىشىنى خالىمايمەن.شۇ تاپتا ئۈنلۈك قىلىپ "ماڭا يېقىنلاشماڭلار!..."دەپ توۋلىغۇم كىلىۋاتىدۇ.ئۆزدۇنيارىمنى قايتۇرۋالسام دەيمەن.تەنھالىقىمغا قانمىدىم. مەقسەتسىز،تەماسىز ئۆزىنى بېغىشلاش باشقىلارنىڭ نەزىرىدە ھاماقەتلىك،ئەخمەقلىق دەپ قارىلىدىغان ماكاندا ياشاۋاتقىنىمنى ئۇنتۇپتىمەن.ئەتىراپىمدىكى مەسخىرىلىك قاراشلار ماڭا تەسىر قىلماس ئىدى.ئەمما........."يىراقنىڭ ياندىن ئۆتەر،يېقىننىڭ جاندىن "دىگەندەك ئىش بولدى.پىنھانلاردا تۇزۇغان گۈللەر بەرگىلىرىنى ياتلارغا كۆرسىتىشنى خالىماس ئىدى.نەچارە؟ بەرگىلىرى جۇدۇندا قارار تاپتى. بىلمەيمەن،يەنە قانچىلىك قاچسام ماڭا تەۋە بولمىغان دۇنيادىن يۈتىمەن؟ بىلمەيمەن،تېخى يىتەرلىك بولمىدىمۇ؟ گۈللەرنىڭ ئاداقى شىۋىرلىشىدەك، شۇقەدەر يېقىملىق ھىجىراننىڭ ئۈنى. نىھايەت سۆيىمەن يۈرەك يارامنى، ياشايمەن يەنىلا سېغىنىپ سېنى. مىنىڭ يېنىڭدىن كەتكىنىم ھەرگىزمۇ قەلبىمدىن سىنىڭ سىيمايىڭنىڭ ئۆچكىنى ئۈچۈن ئەمەس.زەيتۇن چىشلەپ كەلگەن كۆك كەپتەر بۇقۇلداپ ئۈنلىگەندە زىمىندىكى ھاياتلىقتىن دىرەك بەرگەن بولسا، مىنىڭ ئۈنسىز كىتىپ قېلىشىم سەن ئۈچۈن  يەنىمۇ بىر گۈزەل باشلىنىش بولغۇسى.. (1) بۇ بىر كۇبلىت شائىرە چىمەنگۈل ئاۋۇتنىڭ "بارسا كەلمەس يول "دىن ئېلىندى. مەنبە:ئۆزۈم

Gvlmisal

	ھىجراننامە(2) ئاسمىنى سۈزۈلگەن ،بەخىت قۇشلىرى كۆك ساما قەھرىدە پەرۋاز قىلغان خاسىيەتلىك دەملەرنى تاما قىلمىدىم.ئەلەم بىلەن زەرداپ يۇتۇپ چىرايىم تامدەك تاتارغاندىمۇ كۆزلىرىمدە كۈلكە......يالغان كۈلۈشكە شۇنچىلىك ئۆگىنىپ كەتتىم. دىرىزەمنىڭ سىرىتىدا قان رەڭلىك قۇياشنىڭ ئاستىغىنا ئۇپۇققا باش قويغىنىنى كۆرۈپ تۇيۇقسىز كېچە بىلەن كۈندۈز ئاخىرىقى قېتىم بېقىشقان شۇ جايدىن سىنىڭ نۇرانە چېھرىڭنى ئىزدىمەك بولدۇم. شۇنچىلىك ئىرادىسىزمەنكىن خۇددى ئۈستى ئوچۇق موزىيدەك.....سەندىن ھېچنەرسىنى يۇشۇرۇپ قالالمىدىم. گۇگۇمغا قاراپ جان ھەلقۇمدىكى قۇياشنىڭ جامالىغا يەنە قاراشقا تاقىتىم قالمىدى.سەكىراتتىكى قۇياشنى تاماشا قىلىش ....نەقەدەر ئىپلاسلىق.....مىنىڭ قۇياشىم ئاللىقاچان غايىپ بولغان.ئىللىق نۇرىنى مەندىن ئايىغان قۇياشىمغا سارغايغان چېھرىمنى ئەمدى كۆرسەتكۈم يوق. قولۇمدا ئاسما ئۇكۇل يىڭنىسى،بىر تېمىم ،بىر تېمىمدىن چۈشىۋاتقان سۈپسۈزۈك ئۇكۇل سۇيۇقلۇقىغا قاراپ شۇ سۈزۈك قەترىلەرگە سىڭىشىپ كىتىۋاتقان جانسىز ھالىتىمنى كۆردۈم.ئۆزۈممۇ شۇ تامچىلارغا ئايلىنىپ كىتىۋاتىمەن،ھالسىز كۈندىن -كۈنگە بوشاپ كىتىۋاتقان مەن.......خۇددى گۇگۇمدا غايىپ بولغان ئاداقى نۇردەك....... ھىجىراننامە(3) پاختىنىڭ ئىچىدە بىر تال چوغنى ساقلىغاندەك ،بۇ كۈنلەرنى ئۆتكۈزۈش نەقەدەر قىيىن،قۇرۇغان گۈلنىڭ دەردىنى سامادا پەرۋاز قىلىۋاتقان ئەركىن قۇش بىلگەيمۇ جېنىم؟ھەيرانمەن ھېسلىرىمغا،ھەيرانمەن بەرداشلىقىمغا............ بىلمىدىم سىنى قەيەردىن ئىزدەيمەن،ئەگەر يېنىمدىن يۈتكەن بولساڭ تاپمىقىم ئاسان بۇلار ئىدى.بىلىسەن ساڭا بىر ئىش بولسا چىدىمايدىغىنىمنى،كۆڭلۈڭ يېرىم بولسا سەندىن ئۆتە ئازابلىنىپ يېنىڭدا ئۈنۈپ بۇلاتتىم ھە؟ لىكىن بۇ قېتىم قەلبىمدىن يۈتتۈڭ جېنىم.قەلبىمدىن يۈتتۈڭ ئەمەس...قەلبىمدىن سۇغۇرۇلۇپ چىقىپ كەتمەكچى بۇلىۋاتىسەن.... ساڭا سۇنغان قوللىرىم بوشلۇقتا لەيلەپ قالدى.تالاي كېچىلەر يولۇڭغا قارىدىم ،تالاي كېچىلەر ئاھ ئۇرۇپ سەن ئۈچۈن ئۈنسىز ياش تۆكتۈم.لىكىن بىلمىدىم ۋىسالنىڭ قارارى قاچان؟ بىلمىدىم مىنىڭ سەۋرىمنىڭ چېكى قانچىلىك؟ باغلىرىڭدا ئۆرۈكلەر مەي بۇلۇپ،ئېتىزلاردا بۇغداينىڭ ئالتۇن باشاقلىرى ئېگىلىپ كەتكەندۇ؟ ھەممە جاي مول-ھوسۇل شادلىقىغا چۆمگەندە بىزنىڭ بۇ مەنىسىزلىكلەر دۇنياسىدا تەمتىرەپ يۈرگىنىمىزگە كۈلىمەن........ ئازابنىڭ بۇ قەدەر سۈيۈملۈك بۇلىدىغانلىقىنى بۈگۈن ھېس قىلدىم،ئازابلارنىڭ رۇجەكلىرىدىن ئۆزۈمنى ئىزدەيمەن.يوقىتىپ قويغان ئۆزۈمنى..... سەن تامان كەتكەن خىياللىرىمنى ئىزدەيمەن. مەنزىلسىز ئېلىنغان قەدەملىرىمنى ئىزدەيمەن. بۇ ئىزدەشلەرنىڭ چېكى بارمۇ؟ بۇ كۈتۈشلەرنىڭ چېكى بارمۇ؟ بۇ تېلىقشلاردا تۇنجۇقارمەن بەلكىم......... شۇڭا دەيمەن: بېشىغا ئاق رومال سالغانلارنى كۆرسەڭ مىنى ئويلا،قارا تۇپراق قەبرىستاننى كۆرسەڭ مىنى ئويلا!

Gvlmisal

	ھىجراننامە (4) چاراقلاپ تۇرغان يۇلتۇزلارنىڭ قاياشى  تۇلۇنئاي كېچە قوينىنى يۇرۇتۇپ ،ماڭا ھەمراھ بولغان مۇشۇ دەقىقىلەر سىنى سېغىنىغىنمنىڭ گۇۋاھچىسىدۇر ئەزىزىم.سەن مىنى سېغىنغاندا مەنمۇ بۇ يەردە ھىجراننىڭ مۇڭلۇق كۈيىنى چېلىۋاتقان بۇلىمەن. تەقدىر شۇنداق ئۇستا رىژىسسوردۇركى بىز ئەنە شۇ رىژىسسورنىڭ قولىدا ئۆز سىنارىيىمىزنى داۋاملاشتۇرىمىز جېنىم. تومۇز ئىسسىقتىمۇ ۋۇجۇدۇم زىمىستان دەھشىتىگە چۆكۈپ مۇزلاۋاتىمەن.ئوت ئۆچتى....مۇزلاپ كەتكەن قەلبىم تېنىمگە قوشۇلۇپ قاراڭغۇلۇق دۇنياسىغا قاراپ سىلجىماقتا..... كەچ كىردى.مەزگىلسىز ئازاب ئىللىق تەبەسسۇمنىڭ ئاراچلىرىدا ئىڭىراۋاتىدۇ جېنىم. ئېيىت جېنىم....سەنسىزلىكنىڭ دەردىدە مىھىر بۇلاقلىرىمنىڭ ھالى نە بولغاي؟ ئېقىنى بار دەريالار قۇرۇپ كەتسۇنمۇ؟ تالى مەجنۇنلىرىڭ سارغىيىپ،لەيلىگۈللىرىڭ جۇتتا قالسۇنمۇ؟ بىزنىڭ يولىمىز ئاياغ ئاستىمدا نالىلىك غىچىرلايدۇ.ۋىسال پۇرىقىنى تارقىتىۋاتقان گۈلزارلىقنى ئىزدەۋاتىمەن جېنىم. بەلكىم سەن تاڭلا قولۇڭدا گۈللەردىن دەستە تۈزۈپ مەن تامان كىلەرسەن.شۇ چاغدا كۆزلىرىم يەنىلا يەر باقار....يۈزۈم قىزىلگۈلدىن رەڭ تالىشار......... ئوتلۇق ئاھىم ،ئاچتۇرما مىنىڭ ئاغزىمنى  زىنھار، زالىم مىنى سۆزلەتمە قەلبىمدە نىمە بار. بىلمەسمەنمۇ قىلمىشڭىنى ئەيلىمە ئىنكار، زالىم مىنى سۆزلەتمە قەلبىمدە نىمە بار.(1) ئەلەملىك ياز ئاخشىمىنىڭ كۆرۈنمەس تۇمانلىرى مىنى بوغماقتا. بىلمىدىم،قاچان شۇنداق بىر مىنۇتلار كىلىپ  قايغۇدىن ،چارچاشتىن ھالسىزلانغان گەۋدەمنى سىنىڭ قوينۇڭغا ئېتىش نىسىپ بۇلىدۇ؟چارچىدىم،....مۈرەڭنى بىرىپ تۇرساڭ ...ساڭا يۆلىنىپ كۆلىرىمنى ئاستىغىنا يۇمۇپ نەچچە مىنۇت ئارام ئېلىۋالسام.... ئۆزۈمگە شىرىن ئۇيقۇ تىلەۋاتقان مۇشۇ مىنۇتلاردا ، ماڭاخائىنلىق قىلىپ تۇيۇقسىز قىسقىراپ يۇمۇلماس بۇلۇپ قالغان كىرپىكلىرىمگە شۇنچىلىك ئۆچ بولدۇم. تاڭ ئاتماس كېچە.....تەنھالىق ھېسلىرى مىنى ئۆز قوينىغا ئېلىپ ،ياش پەردىلىرى كۆزلىرىمنى توسۇۋالغان كېچە. بىچارە قەلەم....يەر بىغىرلاپ ماڭماقتا.گوياكى : قولۇمدا قەلەم ، نالە قىلارئۈنسىز مۇزلىدى قەلەم ۋۇجۇدۇم مۇزلىغان كەبى قەلەملىرىم مەندەكلا روھسىز. بىچارە قەلەم كىتىرلايدۇ قەغەز يۈزىدە: "يالغاندۇر يالغان... بۇ ئالەمنىڭ بارىدۇر يالغان" مۇقەددەس خىياللىرىمغاسېغىنىشىمنى قوشۇپ چۈشلىرىمگە ئامانەت قويدۇم.قارامتۇل كېچىگە مەھلىيا بولۇپ ،شۇ كېچىدەك قاراكۆزلىرىڭنىڭ ماڭا قاراپ كۈلگىننى ئەسلەپ قالدىم.كۈلكىنىڭ ئارىسىدىكى سۈكۈت نەقەدەر شىرىن ھە؟ سۈكۈتلىرىمدىن بىزگىلا تەۋە بوشلۇقنى ئىزدەۋاتىمەن ئەزىزىم.... (1)بۇ بىر كۇبىلىت شىئېر "چالىقۇشى "رومانىدىن ئېلىنغان. ھىجراننامە(5) "گۇمان ئىماننى قاچۇرار"                        ئۇيغۇر خەلق ماقال -تەمسىلى ئىشەنچ بېغىمنىڭ گۈللىرى سۇلدى.بۇ كۈنلەرنى قانداق ئۆتكۈزۋاتىمەن؟ئۆزۈمگە ھەيرانمەن.سەندىن قاچىمەنۇ كۆزلىرىم سىنى ئىزدەيدۇ.تىلفۇننى ئىتىپ ،مۇڭداشقۇنىمۇ ئاچماي يۈرۈپ باققان كۈنلىرىم بولدى. بىر گېپىڭنى ئويلاپ قالدىم: ۋاقىت ئۇنتۇلدۇرمايدۇ ،كۆندۈردۇ....دەۋاتقانتىڭ.بەلكىم دىگىنىڭ راست بولسا سىنىڭ مەۋجۇتلۇقىڭغا كۆنگەن يۈرىكىم سەنسىزلىككىمۇ كۈنۈپ كىتەر... كىتەلمەيسەن دىگەن ئىدىڭ.مەن كىتەلمىدىم.لىكىن مىنىڭ ئۈمىدۋارلىقىم،مىنىڭ خۇشاللىقىم ،مىنىڭ كۈلكىلىرىم مىنى تاشلاپ كەتتى. بۇ كۈنلەردە كۈلۈشنى ئۇنتۇپ قالغاندەكلا ،كۆزلىرىمدىن ياش ئەگىپلا يۈرىيدۇ.ھەتتا شۇنچىكى بىر گەپكىمۇ ياش  تۆكۈپ بىرسىنى بەك ئوڭايسىزلاندۇرۋەتتىم.ئەسلى گۇناھ ئۇنىڭدا ئەمەس ئىدى.ئۆزۈمنىڭ يىغلىغۇم كىلىپ قالغان ،لىكىن باھانە يوق يۈرۈپتىكەنمەنمۇ دەيمەن.ئۇنىڭ ئويلىمايلا دەپ قويغان بىر ئېغىز گېپىگە تازا يىغلىۋالدىم.ئىچىم بوشاش ئۇياقتا تۇرسۇن.....كۆڭلۈم تېخىمۇ يېرىم بولدى.ئۆزۈمنىڭ كۆز ياشلىرىم دېڭىزىدا تۇنجۇقىۋاتقىنىمنى ھېس قىلماقتىمەن. تۇلۇنئاي بۇلۇتقا بۆلەنگەن كېچە، ئىزىڭنى يوللاردىن ئىزلىدىم ئەركەم. نە ئىزىڭ تاپمىدىم سىنىڭ ھىدىڭنى، يىغىغا ئوخشىشىپ قالدىغۇ كۈلكەم. مەسخىرە ئىچىدە كۆز قىسار ئەختەر، يۈزۈمنى يۇيغىنى يامغۇرمۇ كۆز ياش. كىملەرنىڭ ئەزىزى بولدى كىمگە خار، بىلمىدىم كىملەرگە مەنسۇپ خۇش ياشاش. مەنبە:ئۆزۈم

riqat

	ۋاھ بىرىنجى باپنى ئوقۇپ بولدۇم قالغىنىنى ئورۇن ئېلىپ ئوقۇي ياخشى يېزىپسىز ئەمما زە ئاۋۇ ناخشىمۇ بەك يارىشىپتۇ مۇڭلۇق ئاشىقنىڭ ناخشىسىغا ھىجراننىڭ دەرتلىرى تۆكۈلگەن مىسرالار ھارمىغايسىز قەلەم قۇۋىتىڭىز تالمىغاي

riqat

	ھەممىدە مۇشۇنداق ھىجران دەردى بار ئوخشايدۇ ھازىر بەزى يەرلىرىگە ئۆزۈم چۈشۈپ قالغاندەك ھىس قىلىپ قالدىم

riqat

	"يالغاندۇر يالغان... بۇ ئالەمنىڭ بارىدۇر يالغان"

Gvlmisal

	riqat يوللىغان ۋاقتى  2014-7-10 01:56 AM "يالغاندۇر يالغان... بۇ ئالەمنىڭ بارىدۇر يالغان" ياقتۇرۇپ ئوقۇغىنىڭىزغا تەشەككۈر،تەكلىپ پىكىرلىرىڭىزنى ئايىمىغايسىز

باشتۇغ

	شىئېرلارنىمۇ دەل جايىغا چۈشۈرۈپسىز . شۇنىڭ بىلەن ئەسىرىڭىزنىڭ بەدىئى قىممىتى تېخىمۇ ئېشىپتۇ . كىچىدە بىر ئۇقۇپ چىققانتىم ،ھازىر يەنە بىر ئۇقۇپ چىقتىم . ياخشى يېزىلىپتۇ . ئىلھاملىرىڭىز زىيادە بولغاي .

b1a2g

	ھەي نىمە دەيلۇق... تىل ئىشلىتىش ماھرىتىڭىز ...ئايال قەلەمكەشلەرنىڭ تىل ئىشلىتىش ئۇسلۇبى، ھھېسىيات ئىپادىلەشتىكى ئارتۇقچىلىقى سىزنىڭ ئەسىرىڭىزدە ئىپادە تېپىپتۇ .. بەكلا قايىل بولدۇم...يالغانچى باھار ناملىق ئەسىرىڭىزمۇ بەك ياخشى چىقىپتىكەن ئۇقۇپ كۆڭلۈم بىر خىللا بولۇپ قالغان ئىدى...ئۈنسىز مۇڭ ...تېگى يوق ھەسرەت..ئارمانسىزلىق.... مەنمۇ بىر قىزنىڭ كەچۈرمىشى ئىپادىلەنگەن بىر ھېكايە يېزىۋاتقان، لېكىن ئۆزۈم ئەر كىشى بولغاچقا ئىشلەتكەن تىلىم ھېسىسىي كەچۈرمىشنى ئىشلىتىشكە ماس كەلتۈرەلمەي قىينىلىپ كېتىۋاتىمەن....

Gvlmisal

	b1a2g يوللىغان ۋاقتى  2014-7-10 01:25 PM ھەي نىمە دەيلۇق... تىل ئىشلىتىش ماھرىتىڭىز ...ئايال قەلە ... يۇقىرى باھا بەرگىنىڭىزگە كۆپ تەشەككۈر. مىنىڭ بىر مۇنبەرداش دوستۇممۇ ئۆتكەندە ئائىلە تۇرمۇشى تەسۋىرلەنگەن ھېكايە يىزىپتىكەن.ماڭا كۆرۈپ بېقىشقا سۇنغانتى.مەن ئۇنىڭدىكى ئايالنىڭ ھېسسىيات تەسۋىرى  ۋە مۇناسىۋەتلىك مۇھىت تەسۋىرلىرى ئىپادىلەنگەن سۆز جۈملىلەرنى ئۆزگەرتىپ چىققانتىم.كىيىن ئۇ كۆرۈپ  «ئاياللارنى يەنىلا ئاياللار چۈشىنىدىكەن....»دەپ كەتكەن.سىزنىڭ سۆزىڭىزنى ئاڭلاپ تۇيۇقسىز شۇ مۇنبەردېشىمنىڭ دىگەنلىرى ئېسىمگە كىلىپ قالدى.