سىرلىق ئۆيدىكى قاتىللىق دېلوسى (4)(5)

xamal1124

	تۈنۈگۈن كەچ فاسەي ياردەم قىلىپ گۇماندارلار سانىنى ئازايتىپ بېرىپ، مىياۋزىنى ئەپ كېتىپلا يوق بولدى. بىراق جى لىڭ گې بۇنىڭغا قانائەتلەنمىدى .چۈنكى جىنايەت گۇماندارى تېخى 6 ئادەم، لىيۇۋ ساقچى باشلىقىنىڭ ئۇنىڭغا تاپىلىغان ۋەزىپىسى بولسا جىنايەت گۇماندارى سانىنى 5 دىن ئازايتىش  .   شۇڭا ئۇ چىن چىمىڭ بىلەن كېچىچە ھەپىلىشىپ ئولتۇرۇپ، بۇ ئالتەيلەننىڭ ئىچىدىكى بەشىنى تەپسىلىي سوراق قىپ چىقتى. بۇ بەشەيلەن بولسا— بەي شىڭ چىيۇۋ مۇئەللىم، ئەر؛ ساۋاقداش جىن ياڭ، ئەر؛ ساۋاقداش دۇ نەنخەي، ئەر؛ ساۋاقداش گې لىلى ، قىز؛ ساۋاقداش جاڭ تىيەن، قىز.   قېپ قالغان بىرەيلەن بولسا ئۆلگۈچىنىڭ ئوغۇل دوستى چىڭ جوۋ. ئۇ ھېلھەم  يىغلاۋاتقاچقا ئۇلارنىڭ سوئالىغا جاۋاب قايتۇرۇشقا ئامالسىز بوپ قالدى. شۇ تاپتا ھەتتا ھازىرغىچە بىرەيلەن ئۇنىڭ كۆڭلىنى ياسىماقتا ئىدى.   ئەپسۇسلىنارلىقى شۇكى، سوراق جەريانىدا بۇ بەشەيلەننىڭ ھەممىسى توك توختىغاندا ئۆزىنىڭ نېمە قىلىۋاتقانلىقىنى ئېيتىپ بېرەلمىدى. ئۇلارنىڭ ھەممىسىنىڭ ئىپادىسى شۇ قەدەر نورمال بولۇپ، ھەممىسى خۇددى گۇناھسىزلارنىڭ ئىپادىسىدەكلا ئىپادە بىلدۈرۈپ، ئازراقمۇ چاندۇرماي ئولتۇرماقتا ئىدى.   جى لىڭ گې نىڭ نەزىرىدە، ئەمدى 20 ياشلار ئۆپچۆرىسىدىكى ئوقۇغۇچىلاردا، ئادەتتە بۇ خىل پىسخىكا ساپاسى، يەنى ئادەم ئۆلتۈرۈپ بولۇپ يەنە ھېچ ئىش بولمىغاندەك ياسىنىۋالالايدىغان بۇخىل ساپا بولمايتتى.   بار بولدى دېگەن تەقدىردىمۇ، ئۆزىنى قەستەن يوشۇرېلىپ، ۋاقىت ئۇزارغاندىن كېيىن ساقچىلارنىڭ يەنە كوچىلاپ سوراق قىلىۋېرىشى بېسىمى ئاستىدا، يەنىلا ئۆزىنىڭ ئەسلى ئەپتىنى ئاشكارىلاپ قوياتتى. لېكىن ھازىر ... بۇيەردىكى بىردىنبىر ئوقۇتقۇچى بەي شىڭ چىيۇۋ، ئۇنىڭمۇ قاتىل بولۇش ئېھتىمالى يۇقىرى ئەمەس.   چۈنكى، توك توختىغان ۋاقىتتا ئۇنىڭ تۇرىۋاتقان جايى بىلەن ئۆلگۈچىنىڭ ئارىلىقى ھەقىقەتەن يىراق. ئارىدىن يەنە بەزىلەر بەي مۇئەللىمنىڭ توك توختاشنىڭ ئالدى - كەينىدە مىدرىمىغانلىقىغىمۇ ئىسپات ببەرگەن. ھەتتاكى، توك توختىغاندا ئۇنىڭ بىلەن پاراڭلاشقانلارمۇ چىققان.   ئۇنىڭدىن سىرت، بەي مۇئەللىمنىڭ ھەربىر گەپلىرى ساپلا ھەققانىيلىق تۈسىدە ئېيتىلغان. ئۇ ئۆزىنىڭ لۈي يى شىننى تەربىيلەش ئۈچۈن ئاز كۈچ چىقارمىغانلىقىنى، بۇ قېتىممۇ ئۇنى ئاساسىي ئۇسۇل ئويناشقا سېلىشنىمۇ ئۇنىڭ پىلانلىغانلىقىنى ئېيتتى. ئۇنىڭ لۈي يىشىن بولمىسا ئۆزىنىڭ مەشىقىنى قانداق داۋاملاشتۇرىدىغانلىقىنى بىلمەيدىغانلىقىنى ئېيتقان چېغىدىكى ئۇ چىرايىدىكى مىسكىنلىك ھەرگىزمۇ يالغاندىن چىقىرىلغان مىسكىنلىك ئەمەس.   ئۇنداقتا بۇ بەشەيلەننىڭ گۇماندارلىقىنى ۋاقتىنچە چىقىرىپ تۇرۇشقا بولىدۇ دېسەك، ئەڭ ئاخىرىدا پەقەت بىرلا ئادەم قېپ قالغان بولىدۇ. يەنى، چىڭ جوۋ.   لېكىن ئۇ جىددىي قۇتقۇزۇش ماشىنىسى توۋلاپتۇ، يەنە تېخى شۇنچىلىك ئېچىنىپ يىغلاۋاتىدۇ ...   ئەگەر بىرەرسى بىرسىگە قەست قىلغان بولسا، قانداقسىگە يالغاندىن مۇنچە ئۇزاق يىغلىيالىسۇن؟ ئۇنىڭ كۆز يېشى بىر كېچە توختاپ باقمىغان تۇرسا. (يائاللاھ، يىغلاش مۇسابىقىسى ئۆتكۈزسە چىمپىيون بولغىدەك زادى ...) جى لىڭ گې سەل ئىككىلىنىپ قالدى. ئەجەبا فاسەينىڭ تۈنۈگۈن كولىغان ئورىسىدا مەسىلە بارمۇ؟ مۈمكىن ئەمەس، ئۇ چىرقىراپ باققان قىزلار ئايرىلغاندىن كېيىن ئۇ ئۇلارنىڭ كەينىگە ساقچى سېلىپ كۆزەتكۈزۈپ باققان. ئۇلاردا ھېچقانداق غەيرىلىك يوق. ئۇ چىڭ جوۋ نى  توۋلاپ ئەپ كەلدى. لېكىن  چىڭ جوۋ يەنىلا جاۋاپ قايتۇرۇشنى رەت قىلىپ تۇرۇۋالدى. ئۇنىڭ دېيىشچە ئۇنىڭ پۈتۈن ئەس - يادى لۈي يىشىن دىمىش ، ئۇنى كۆرگۈسى بارمىش. شۇڭا، جى لىڭ گې بۈگۈن چۈشتىن بۇرۇن ئۆزى يالغۇز دوختۇرخانىغا بېرىپ، كېچىلەپ شەھەر سىرتىدىن پايپاسلاپ كەلگەن لۈي يىشىننىڭ ئانىسى بىلەن كۆرۈشتى. بۇ بىچارە ئانىنىڭ ئېيتقانلىرىمۇ باشقا ساۋاقداشلارنىڭ ئېيتقىنى بىلەن ئاساسەن ئوخشاش بولۇپ، لۈي يى شىن نىڭ باشقىلار بىلەن بولغان مۇناسىۋىتى ئانچە ياخشى ئەمەس ئىكەن. ئۇنداق بولۇشنىڭ ئاساسلىق سەۋەبىمۇ ئۇنىڭ بەكلا ئۆز بېشىمچىلىقىدىن بولۇپ، دائىم قىلغان ئىشلىرىنى بەك چەكتىن ئاشۇرىۋېتىدىكەن. لېكىن ئۆزى ھېس قىلمايدىكەن. بەلكىم ئۇ شۇ سەۋەبدىن بىرەسىنىڭ چىشىغا تېگىپ قويغان بولسا، ئاندىن باشقىلارمۇ ئۆچ ئېلىش ئۈچۈن مۇشۇنداق قىلغان چېغى.   ئەگەر قاتىللىق قىلىش سەۋەبى دەل مۇشۇنداق  بولىدىغان بولسا، ئۇنداقتا چىڭ جوۋ نىڭ گۇماندارلىق سالاھىيىتىنى چىقىرىۋەتكىلى بولىدۇ. چۈنكى ئۇنداق ئاشىقلار  ئوتتۇرىسىدىكى جېدەل ئېشىپ كەتسە بىر بىرىدىن رازى بولۇشماي تاكاللىشىپ قېلىش (ما گەپ راسمىدۇ ...؟)، بىر - بىرىگە قەست قىلىش دەرىجىسىگە بارمايدۇ.   بەي شىڭ چىيۇۋ نىڭمۇ گۇمانلىق بولۇش ئېھتىمالى تۆۋەن چۈنكى ئۇلار ئوقۇغۇچى ۋە ئوقۇتقۇچى مۇناسىۋىتىدە. ئوقۇتقۇچىنىڭ ئوقۇغۇچىسىنى جازالايدىغان ئامالى كۆپ، لېكىن  ئۆلتۈرۈش ئۇنىڭ ئىچىدە ئەمەس.   پەقەتلا قېپ قالغان تۆت كىشى ئىچىدە، ئاندىن يۇقىرىقىدەك سەۋەب پەيدا بولۇشى مۈمكىن.   بىراق ئۇلارنىڭ گەپلىرىدىن، يەنىلا قاتىلنى بايقىغىلى بولماۋاتسا ... جى لىڭ گې ئۇزاق ئويلاپ ، ئاخىرى دېلو يۈز بەرگەن مىڭخەي ئالىي مەكتىپىگە قايتىپ، لۈي يىشىننىڭ بۇرۇن قىلغان ئىشلىرىنى تەكشۈرۈپ باقماقچى بولدى. نەدىن باشلاش كېرەك؟   لۈي يىشىننىڭ ئانىسى ئۇنىڭ يېقىندىن بۇيانقى ئىشلىرىدىن خەۋەرسىز. شۇڭا يېقىنقى ئىشلىرىنى تەكشۈرۈش ئۈچۈن يەنىلا چىڭ جوۋ دىن ياكى باشقا ساۋاقداشلىرىدىن تەلەي سىناپ  سوراش كېرەك. قايناق مەكتەپ ئىچىدە يېرىم كۈن پايپاسلاپ يۈرگەن جى لىڭ گې، قورسىقىنىڭ ئازراق ئاچقانلىقىنى ھېس قىلدى. سائىتىگە قاراپ ، ۋاقىتنىڭ چۈشلۈك دەم ئېلىش ۋاقتى بوپ قالغانلىقىنى بىلدى. بۇ چاغدا ئوقۇغۇچىلار ئاشخانىسى مىغ  - مىغ  ئادەملەرگە تولۇپ كەتكەنىدى. شۇڭا ئۇ ئەمدى بېرىپ بىر پارچە خىزمەت تامىقى تېپىپ يەي دەپ تۇرۇشىغا ، بىرىنىڭ ئاشخانىدىن ئۆزىنى توۋلاۋاتقىنىنى ئاڭلىدى. ئۇ قارىۋىدى، چىن چىمىڭ بىلەن مىياۋزى ئىكەن. ئۇ ئىككىسى بىللە ئولتۇرۇپ تاماق يەۋېتىپتۇ.   بېرش كېرەكمۇ؟   ياق، ياق. ئۇنداق قىلسا ئۇيەردە پوزا بوپ قالمامدۇ؟   كىرمىسۇنمۇ؟ بىراق چىن چىمىڭ شۇنچە قىزغىن چاقىرىۋاتسا ...   مەيلىلا، باراي بولدى. بولمىسا بەك يۈزىنى قىلمىغان بوپ قالدىكەنمەن.   «سىلەر نېمە قىلىۋاتىسىلەر؟ ئېيتىپ  بېرەلەمسىلەر؟ »دېدى جى لىڭ گې ئۇلار بىلەن بىريەردە ئولتۇرغاچ ئۆزىدىكى بىئەپسىزلىكنى يوشۇرۇپ.   «ئەلۋەتتە ئېيتىپ بېرەلەيمىز! مەن ئۇنىڭدىن قول ئىشارىسى ئۆگىنىۋاتىمەن—  دېدى چىن چىمىڭ ھاياجانلانغىنىچە—  جى مۇئەللىم، سىزنىڭ تاماق كارتىڭىز يوقتۇ ؟ مەن مېھمان قىلاي! »   «رەھمەت ئەمىسە.»    جى لىڭ گې ئارتۇق تەكەللۇپ قىلماي قوبۇل قىلدى. ئۇ يەنە مىياۋزىنىڭ ئالدىغا قويۇلغان خەت يېزىش تاختىسى بىلەن قەلەمنى بايقاپمۇ ئۈلگۈردى  .قارىماققا ئۇ ئادەتتە مۇشۇ ئارقىلىق باشقىلار بىلەن ئالاقە قىلسا كېرەك. مىياۋزىمۇ بۇ چاغدا جى لىڭ گې نىڭ كۆڭلىدىكىنى بىلىپ قالغان چېغى، تېز سۈرئەتتە خەت يېزىش تاختىسىغا خەت يېزىپ، كۈلۈمسىرەپ تۇرۇپ جى لىڭ گې غا كۆرسەتتى: «ساقچىلار گۈلى خانقىز، ياخشىمۇسىز.»   «ھەئە، مىياۋزى ، ياخشىمۇسىز »دېدى جى لىڭ گې چىن چىمىڭ ئۇزاتقان چوكىنى ئالغاچ. ئۇ ئەمدى تېخى مىياۋزىدىن فاسەينىڭ بۇرۇن ئۆزىگە ياردەم قىلىپ دېلو يېشىشىپ بەرگەنلىكىدىن خەۋىرىنىڭ بار - يوقلىقىنى سورىماقچى بولدىيۇ، چىن چىمىڭنىڭمۇ بۇ يەردە ئىكەنلىكىنى كۆزدە تۇتۇپ، ئىناۋىتىنى ساقلاش يۈزسىدىن گەپنى ئۆزگەرتىپ دېدى: «فاسەيچۇ ؟ يەنە مۇسابىقىگە كەتتىما؟ »   «ئۇ تۈنۈگۈن كەچتىلا مۇسابىقىلىشىپ بوپتۇ. يەنە تېخى مۇكاپاتقىمۇ ئېرىشىپتۇ. ھازىر ۋاقتىنچە مۇسابىقىسى يوقكەن، ھەقىچان ئۆيىدە ئۇخلاۋاتامدىكى —  دېدى چىن چىمىڭ مىياۋزىغا ۋاكالىتەن— جى مۇئەللىم، بۇ قېتىممۇ ئۇنى ياردەمگە چاقىرماقچىمۇ سىز؟ »   جى لىڭ گې ئوقۇغۇچىلار تامىقىدىن بىر ئېغىز يېگەندىن كېيىن جاۋاب قايتۇردى: «ئەگەر بۇ قېتىمقى  قاتىل مۇشۇ ئالتەيلەننىڭ ئىچىدە بولسا، ئۇنداقتا ئۇنى تۇتۇش راستلا تەسكە توختايدىكەن. قاتىل رول ئېلىشقا بەك ئۇستىكەن. بىكارغا سەنئەت كەسپىدىن ئەمەسكەن .»   مىياۋزى بېشىنى لىڭشىتىپ، جى لىڭ گې غا قاتىلنىڭ چوقۇم شۇلارنىڭ ئىچىدە ئىكەنلىكىنى ئىپادىلىدى.   «ئەگەر يەنە قانداق تەكشۈرۈپمۇ نەتىجە چىقىرالمىساق، يەنىلا فاسەيدىن ياردەم سوراپ باقايلى—  دېدى جى لىڭ گې چىن چىمىڭنىڭ پىكىرىنى ئېلىش نەزىرىدە—  سېنىڭچە بولغاندا بىز ئۆز ئۇسۇلىمىز  بويىچە تەكشۈرىۋەرسەك نەتىجە چىققۇدەكمۇ؟ »چىن چىمىڭمۇ تۈنۈگۈنكى تەكشۈرۈشكە قاتناشقان، شۇڭا قاتىلنىڭ شۇ قەدەر ھىيلىگەر ئىكەنلىكىنى ئوبدان بىلىدۇ. جى لىڭ گې داۋاملىق سۆزلىدى: «شۇڭلاشقا، گەرچە مېنىڭمۇ سىلەرنىڭ ئايرىم ئۇچراشقان  （约会）چېغىڭلاردا خىزمەت ئىشىنى قىلغۇم بولمىسىمۇ ...» مىياۋزى بىلەن چىن چىمىڭنىڭ يۈزى «ۋىل» لىدە  قىزاردى. مىياۋزى دەرھال بېشىنى چايقىدى. چىن چىمىڭمۇ ئىنكار قىلىپ مىياۋزى بىلەن پەقەتلا يېرىم يولدا ئۇچرىشىپ قالغانلىقىنى ئېيتتى.   «...بولدى قىلىڭلار بولدى. چىراي ئىپادەڭلاردىنمۇ مانا مەن دەپ چىقىپلا تۇرسا. سىلەرنىڭ رول ئېلىش تېخنىكاڭلار قاتىل بىلەن سېلىشتۇرغاندا خېلى بىر يەردىكەن—  دېدى جى لىڭ گې بىرنى ئۇھسىنىپ—  گېپىمنى تولۇق ئاڭلاڭلار. مىياۋزى، سىز لۈي يىشىننىڭ يېقىندا كىمنى رەنجىتىپ قويغىنىنى بىلەمسىز؟ »   مىياۋزى بىرئاز ئويلىنىپ، خەت يېزىش تاختىسغا مۇنۇلارنى يازدى: «بەك كۆپ، ئېسىمگە ئەپ بولالمىدىم. »   ما ئىشنى كۆرۈڭ.   بۇلارنىمۇ بىردىن بىر تەكشۈرۈش كېرەكمۇ؟ مۇنداق قىلسا تۈنۈگۈنكىدەك 21 ئادەمنى بىر بىرلەپ سوراق قىلغاندىنمۇ ئۆتە ئاۋارىچىلىق ئەمەسمۇ. جى لىڭ گې مىياۋزىدىن سەل ئېغىرراق كېتىدىغان ئەھۋاللارنى سورىغانىدى، مىياۋزى يەنىلا ئوخشاش جاۋاب بەردى.   بۇ لۈي يىشىن دېگىنى زادى قانداق دەرىجىدىكى ئەخلاقسىز ئادەم ئەمدى؟ ھېلىمۇ ئۇ ئاپەتكە ئۇچرىغاندىن كېيىن چىڭ جوۋ بىلەن ئانىسىدىن باشقا ھېچكىمنىڭ ئىچ ئاغرىتمىغىنى بىكار ئەمەسكەندە ... ئېنىقكى، مىياۋزىمۇ ئەھۋالنى ئۇقمىغاندىكىن، ئۇنداقتا ھازىرچە باشقا ئامال قالماپتۇ.   بۇ يەردە ئۇزاق مۇددەت پوزا بوپ ئولتۇرۇشنى خالىمىغان جى لىڭ گې تامىقىنى تېزلا يەپ تۈگىتىپ، چىن چىمىڭدىن چۈشتىن كېيىن دەرسى بار - يوقلىقىنى سورىدى. ئەگەر دەرسى بولمىسا، ئۇنداقتا ئۇنى يول باشلاتقۇزۇپ داۋاملىق تەكشۈرۈش قىلسۇن. ئەگەر مىياۋزىنىڭمۇ دەرسى يوق بوپ قالسا، ئۇنداقتا ئۇ ئىككىسى داۋاملىق ئۇچرىشىنى (يۆ خۈي) قىلىۋەرسۇن  .   ئۇ سوئالغا قارىتا، مىياۋزى تۈنۈگۈنكى ئىش تۈپەيلى دەرس توختىتىلغانلىقىنى ئېيتتى.   لېكىن چىن چىمىڭ دەل ئەكسىچە  .   بۇ ئىككى كۈن ئىچىدە ئۇنىڭ تولۇق دەرسى بار ئىكەن. ئۇنىڭ ئۈستىگە ئۇ ئەزەلدىن دەرستىن قاچمايدۇ ... قارىماققا ئۇ تەپتىش بولۇش ئۈچۈن ھەقىقەتەن تىرىشىۋېتىپتۇ جۇمۇ. شۇ سەۋەب، جى لىڭ گې تۇرۇپلا ئويلاپ قالدى، بۇ خەۋەرنى فاسەي ئاڭلىسا قانچىلىك خۇش بوپ كېتەر.   توغرا، بەرىبىر چىن چىمىڭ كېلەلمىگەندىكىن، نېمىشقا ئۇدۇللا فاسەينى ئىزدىمەيمەن؟ «شۇڭلاشقىچۇ فاسەي، سىز ماڭا ياردەم قىلىپ چىڭ جوۋ نى گەپكە كەلتۈرۈپ بەرسىڭىز  .ئۇ سولتەك تېخىچە مېنىڭ سوئالىمغا جاۋاب بەرمەي، ئىزچىل بىز ساقچىلارنى < يۈزسىز، قىز دوستىنىمۇ ئاخىرقى قېتىم بولسىمۇ  كۆرگىلى قويمىدى> دەپ تىللاۋاتىدۇ»   دېدى جى لىڭ گې كۆل بويىدا تېلفوندا سۆزلىشىپ. قارشى تەرەپتىن فاسەينىڭ غىژ - غىژ ئاۋازى ئاڭلاندى. قارىماققا ئۇخلاۋاتقان بولسا كېرەك: «نېمە گەپتى ...ئەمىسە ئۇنى قاتىل ئورنىدا كۆرمىسىڭىزلا بولدىغۇ، ئۇنى جايلاپ نېمە قىلىمەن...»   «بىراق ھازىر پەقەت ئۇلا قالدى - دە. ئۇ قاتىل بولمىغان تەقدىردىمۇ ئۆلگۈچىگە مۇناسىۋەتلىك كۆپ ئىشلارنى ئۇقىدۇ. چوقۇم ئۇنىڭ ئاغزىدىن گەپ ئالمىسام بولمايدۇ. » «ھە؟ »فاسەي تېخىچە چۈشەنمىدى ۋە ئۆزىنىڭ تۈنۈگۈن كەچ جىنايەت گۇماندارىنى 6 گە ئازايتىپ بەرگەن تۇرۇقلۇق، نېمىشقا ئۇلارنىڭ بىر كېچە ھەپىلىشىپمۇ قاتىلنى تېخىچە تاپالمىغانلىقىنى  سورىدى.   «ئامال يوق، بۇ قېتىمقى قاتىل رول ئېلىشقا بەك ئۇستىكەن. بولمايدىغان بولسا ئاللىبۇرۇن كوكۇلىسىدىن تۇتۇپ بولغان بولاتتىم—  دېدى جى لىڭ گې نەسىھەت قىلغان تەلەپپۇزدا— فاسەي، بۇيەرگە تېز كەلسىڭىزچۇ  .ئەجەبا سىز قاتىلنىڭ مۇشۇنداق يوشۇرۇنۇپ يۈرۈشىگە ، سىڭلىڭىزنى ۋەھىي ئىچىدە قاتىل بىلەن بىللە ئۇسۇل يۈرۈشىگە مەيلى دەپ يۈرەمسىز؟ »   فاسەي يەنە ئۇيقۇ ئارىلاش ئېيتتى: «ئو...ياسىنالايدىغان قاتىلكەندە. »   «تېزدىن بۇ يەرگە كېلىپ، ماڭا ياردەملىشىپ ئۇنى جايلىشىپ بېرىڭ، بەرىبىر ھازىر مۇسابىقىڭىز بولمىغاندىكىن. » تېلفوننىڭ ئۇ تەرىپىدىكى فاسەينىڭ ئىچى سىقىلدى. كۆڭلىدە بولسا ئۆزىنىڭ مۇسابىقىسىنىڭ تۈنۈگۈن ئاخىرلاشقانلىقىنى چوقۇم مىياۋزى نىڭ جى لىڭ گې غا ئاشكارىلاپ قويغانلىقىنى ئويلاپمۇ يەتتى.   بوپتۇلا، باراي، دەپ ئويلىدى ئۇ كۆڭلىدە. بەرىبىر تۈنۈگۈن قاتىلغا جەڭنامە سۇنۇپ قويغاندىكىن ... «بوپتۇ، سىز ھازىر نەدە؟ ساقچى ئىدارىسىدىمۇ ياكى مەكتەپتىمۇ؟ »

xamal1124

	نەق مەيداننىڭ پېچىتى ئاللىبۇرۇن چۇۋۇۋېتىلگەن بولۇپ،Aنومۇرلۇق ئاساسىي ئوقۇتۇش بىناسىدا ئاللىبۇرۇن ئوقۇش ئەسلىگە كېلىپ بولغان ئىدى. جى لىڭ گې ئامانلىق ئورنىغا بېرىپ، شۇيەردىكى ئامانلىق قوغدىغۇچىلار بىلەن ئالاقىلىشىپ بىر سىنىپنى ۋاقىتلىق ئىش بېجىرىش ئورنى قىلدى .ئۇنىڭغىچە فاسەيمۇ كەپ بولدى.   جى لىڭ گې تا ھازىرغىچە پەقەت چىڭ جوۋ نى سوراق قىلغاندىلا ئاندىن لۈي يىشىن نىڭ ئەھۋالىنى ئەڭ ئاسان تەكشۈرۈپ چىققىلى بولىدۇ، دەپ قارايتتى. بىراق ئۇ فاسەي بىلەن ئەمدى پاراڭلىشىپ تۇرۇشىغا، يېڭى بىر يىپ ئۇچى ئويلىمىغان يەردىن ئۆزلۈكىدىن چىقىپ قالدى.   سىرتتىن ئىككى ئوقۇغۇچىنىڭ ئاۋازى ئاڭلاندى. فاسەي بىر ئاڭلاپلا ئۇنىڭ ئىچىدىكى بىرسىنىڭ مىياۋزىنىڭ يېقىن دوستى ۋېن ۋېن ئىكەنلىكىنى تونۇپ يەتتى.   «مەن ساڭا دېدىم ۋاي قاقۋاش، ساقچى گۈلى خانقىز بۇ سىنىپتا يوق دەپ، سەن قاقۋاش يەنە بۇيەرگە كېلىمىز دەپ تۇرۇۋالغىنىڭنى قارا، مېنى بىكارغا ئەگەشكىلى سېلىپ قۇرۇق يول ماڭدۇرۇپ. »   «ۋاي قۇرۇق گېپىڭىڭ نېمانچە جىق! يولدا كەپ بولغىچە بۇ گەپنى ماڭا ھېلىمۇ سەككىز قېتىم دەپ بولدۇڭ.  توۋا دەيمەن، قانداق قىلىپ مىياۋزى بىلەن شۇنچە چىقىشىپ ئۆتەلەيدىغانسە . شۇنىڭدىن ئازراق بولسىمۇ ئۆگەنسەڭچۇ قارا، شۇنداق تىنچ. »   «جىن ياڭ، سېنىڭ قۇرۇق گېپىڭ مېنىڭكىدىن جىقكەن! » جىن ياڭ؟ جى لىڭ گې فاسەيگە جىن ياڭ نىڭ ئۇ ئۈچ نەپەر گۇمانلىق ئوغۇل ئىچىدىكى بىرسى ئىكەنلىكىنى ئېيتتى.   جى لىڭ گې ۋېن ۋېن ئۇ ئىككىسىنى سىنىپقا كىرگۈزگەندىن كېيىن، ئۇ ئىككىسى يەنە بىر ھازاغىچە قىززىرىشىپ بولۇپ ئاندىن بېسىقىشتى. بىراق ۋېن ۋېن فاسەينىڭمۇ بۇيەردە ئىكەنلىكىنى ئويلاپ باقمىغان بولسا كېرەك، ئۇنىڭغا  قول ئىشارىسى قىلىپ سورىدى: «سەن بۇيەردە نېمىش قىلىسەن؟ » «بۇ گەپنى سەندىن مەن سورىسام بولار؟ مىياۋزى بىلەن بىللە يۈرمەي بۇيەردە نېمە قىلىسەن؟ »دەپ ياندۇرۇپ سورىدى فاسەي. «سوراش بىھاجەت. ساۋاقداش جىن ياڭنىڭ  دەيدىغان گېپى بار ئوخشايدۇ» دېدى جى لىڭ گې ئۈستەلنىڭ ئۇئىككىسىنىڭ  ئۇدۇل تەرىپىدە ئولتۇرۇپ قەغەز - قەلەم تەييارلاپ. ۋېن ۋېن بىر چەتتە تۇرۇپ تېخىچە فاسەيگە قول ئىشارىسى قىپ، ئۇنىڭ بۇيەردە نېمىش قىلىدىغانلىقىنى زادى ئېيتىپ بەرمىسە بولمايدىغانلىقىنى، بولمىسا ئۆزلىرىنىڭ ھېچنىمە دېمەيدىغانلىقىنى قاتتىق تەكىتلىدى. ئەمما فاسەي بولسا ئۇنىڭغا پىسەنت قىپ قويمىدى. شۇڭا، ۋېن ۋېننىڭ شۇنداق بەك ئىچى سىقىلىدى.   «قورقماڭ، ئېيتىۋېرىڭ» دېدى جى لىڭ گې جىنياڭغا قاراپ.   «قاتىل ....»دېدى ئۇ.   «ئىم؟ »بۇ گەپتىن جى لىڭ گې بىلەن فاسەي دەررۇ قۇلىقىنى تىك تۇتتى.   «قاتىل بولسا دۇ نەنخەي» بۇ دەل جىن ياڭنىڭ دېمەكچى بولغان گېپى ئىكەن. ئۇ گەرچە بۇ گەپنى ئۇنچە راۋان ئېيتالمىغان بولسىمۇ، يەنىلا بىر تەرەپتىن سۆزلىگەچ بىر تەرەپتىن جى لىڭ گې غا قاراپ تۇردى. كۆزىنىڭ قىرىدا فاسەيگىمۇ قاراپ ئۈلگۈردى. دۇ نەنخەي، ئۈچ ئوغۇل ئىچىدىكى يەنە بىرسى  . «سىز بۇنى قانداق بىلدىڭىز؟ »دېدى جى لىڭ گې. «بۇ، مەن مۇشۇنداق قىياس قىلدىم!— ئۇ مۇشۇنداق دەۋېتىپ ئورنىدىن تۇرۇپ، قەددىنى رۇسلاپ قىياس يولىنى سۆزلەشكە باشلىدى—  مەن دۇنەنخەينىڭ قاتىللىق قورالى ئالغانلىقىنى كۆرگەن. ئۇنىڭ ئۈستىگە، مەن يەنە ئۇنىڭ ئادەم ئۆلتۈرۈش سەۋەبىنىمۇ بىلىمەن. پەقەت ئۇلا ....»   «توختاڭ، توختاڭ!  سىز بىر - بىرلەپ ئاستىراق سۆزلەڭ! »جى لىڭ گې دەررۇ قەلىمىنى ئوينىتىپ، تېز سۈرئەتتە خاتېرىلەشكە باشلىدى.   «...بىرىنجىسى، قاتىللىق قورالى ئالغانلىقى—  جىن ياڭ بېشىنى بۇراپ ۋېن ۋېنغا قاراپ قويدى .ۋېن ۋېنمۇ ئۇنىڭغا قاراپ بېشىنى لىڭشىتتى. ئۇ داۋاملىق سۆزلىدى—  ئالدىنقى دۈشەنبە چۈشتىن كېيىن دەرس يوق ئىدى. مەن ۋېن ۋېن بىلەن بىللە بازار چۆرگىلەۋاتقان. ئارىلىقتا بىز دۇنەنخەينىڭ مەكتەپ سىرتىدىكى جەنۇبىي رايوندىكى بىر پىچاق دۇكىنىغا كىرىپ كەتكىنىنى كۆردۇق. ئۇ بۇ ئەتراپتىكى بىردىنبىر پىچاق دۇكىنى. ئۇ خىل پىچاقنى پەقەت شۇيەردىلا ساتىدۇ! »   «كېيىنچۇ؟ »   «كېيىن؟ —  دېدى جىن ياڭ—  تۈگىدى. » «كېيىن ئۇ ئىككىسى داۋاملىق كوچا چىڭدىغىلى كەتمەمدۇ— دېدى فاسەي—  ئەگىشىپ كىرسە بولامتى؟ » جى لىڭ گې ۋېن ۋېن دىن بۇ ئىشنى سورىدى. ۋېن ۋېن بۇنىڭ راسلىقىنى، ئۇنىڭ جىن ياڭ بىلەن بىللە راسلا كۆرگەنلىكىنى، شۇڭا بۈگۈن ئالاھىدە بۇيەرگە ئىسپات بەرگىلى كەلگەنلىكىنى ئېيتتى. «ئۇنداقتا ئادەم ئۆلتۈرۈش سەۋەبىچۇ؟ » «سەۋەبىمۇ ...شۇ ئالدىنقى ئايدىكى قوش كىشىلىك ئۇسۇل مۇسابىقىسى! » جى لىڭ گې سەل تۇرۇپ قالدى. ئۇ بۇ ئىشنى ئەزەلدىن ئاڭلاپ باقمىغان. جىن ياڭ داۋاملىق سۆزلىدى: «ئالدىنقى ئاي مەكتەپنىڭ سىرتى غەرب تەرەپتىكى < لىيەنخەي قاۋاقخانىسى> كەچ تەرەپتە قوش كىشىلىك ئۇسۇل مۇسابىقىسى ئۆتكۈزگەن. چېمپىيون بولغان كىشىگە 1000 يۈەن مۇكاپات پۇلى ھەمدە تېلىۋىزورغا چىقىپ نومۇر كۆرسىتىش پۇرسىتى بېرىلىدىغان بولغان. بۇنىڭ مۇكاپاتى ئادەمنى جەلپ قىلغاچقا، بىزنىڭ مەكتەپتىن ئاز بولمىغان ساۋاقداشلار تىزىملاتقان .لۈي يىشىن بىلەن چىڭ جوۋ بىللە قاتناشقان، دۇنەنخەي ئۇ جاڭ تىيەن بىلەن قاتناشقان! » جاڭ تىيەن؟ ھېلىقى گۇماندار قىز؟ جى لىڭ گې ۋېن ۋېنغا قارىدى. ۋېن ۋېن بېشىنى چايقاپ مىياۋزى بىلەن ئۇنىڭ ئەزەلدىن ئۇنداق يەرگە بارمايدىغانلىقىنى ئېيتتى. جىن ياڭ يەنە سۆزلىدى: «مەنمۇ ئۇ مۇسابىقىنى كۆرگىلى بارغان. چىڭ جوۋ ئۇ ئىككىسى چېمپىيون بولغان. بىراق، ئۇلار پەقەتلا نامدا چېمپىيون بولغان ...» بۇ نېمە گەپ ئەمدى؟ «چۈنكى دۇنەنخەي بىلەن جاڭ تىيەن سەھنىگە چىقالمىغان. » «نېمىشقا ئەمدى؟ » «چۈنكى لۈي يىشىن بىلەن چىڭ جوۋ ئىككىسى نومۇر ئورۇنداپ بوپ ئون مىنۇتقا بارمايلا توك كەتكەن. » توك كەتكەن؟ «توغرا، لۈي يىشىن توك سىمىنى كېسىۋەتكەن! » مۇنداق بولغاندا مۇسابىقىدە  بىنورماللىق كۆرۈلۈپ توختىتىلىدۇ دە! «شۇنداق بولغان. دۇنەنخەي بۇ مۇسابىقىگە قاتنىشىش ئۈچۈن كۆپ كۈچىنى چىقىرىپ بىر ئېسىل ئۇسۇل تەييارلاپتىكەنتۇق. بىراق ئۇ تەييارلىغان ئۇسۇلنى لۈي يىشىن كۆرۈپ قاپتۇ. ئۇ كۆڭلىدە ئۇلارنى يېڭىپ بولالمايدىغانلىقىنى پەملەپ، توك توختاشنى كەلتۈرۈپ چىقىرىپ مۇسابىقىنى توختىتىۋەتكەن.  ئەينى چاغدا ھەتتا مەنمۇ ئۇنى بەك چېكىدىن ئاشۇرىۋەتتى،  دەپ ھېس قىلغانىدىم. شۇڭا دۇنەنخەي بىلەن جاڭ تىيەن ئىككىسىدە چوقۇم مۇنداق سەۋەب بار ..» توك توختاشتىن پايدىلىنىپ مۇسابىقىنى كونترول قىلىش؟ جى لىڭ گې يېنىدا تاماكا چىشلەپ ئولتۇرغان فاسەيگە قاراپ قويدى ۋە بۇ ئۆيدە شۇتاپتا ئۆزىدەك ئويلاۋاتقان يەنە بىر ئادەم باردەك ھېس قىلدى. «جىن ياڭ، سىزنىڭ ئېغىز ئىسپاتىڭىزنىڭ بىزگە بەك چوڭ پايدىسى بار !— دېدى جى لىڭ گې—  ئۇنداقتا سىز قاتىلنى نېمىشقا جاڭ تىيەن دەپ بېكىتمەي، دۇنەنخەي دەپ بېكىتىسىز؟ » جىن ياڭ جى لىڭ گې غا نەق مەيدان تەكشىلىك خەرىتىسىنى چىقارتىپ چۈشەندۈردى. توك توختىغان ۋاقىتتا، چىڭ جوۋ، جىن ياڭ، دۇنەنخەي ئۈچىنىڭ لۈي يىشىنگە بولغان ئارىلىقى پەقەت نەچچە قەدەملا كېلىدىكەن. ئاندىن جاڭ تىيەن بىلەن گې لى لى  نىڭ ئورنى ئۇ (جىن ياڭ) ۋە ئۆلگۈچى بىلەن بىر تۈز سىزىق ئۈستىگە چۈشىدىكەن. «جاڭ تىيەن بىلەن گې لى  لى  لۈي يىغىننى ئۆلتۈرمەكچى بولسا، يول ئەگىتمىگەن ئەھۋال ئاستىدا چوقۇم مەن تۇرغان جايدىن ئۆتۈشى كېرەك. بىراق مەن قېشىمدىن ھېچكىمنىڭ ئۆتكەنلىكىنى ھېس قىلمىدىم. باي مۇئەللىمنىڭ ئۇنىڭ بىلەن بولغان ئارىلىقى بەك يىراق. شۇڭا قاتىل پەقەتلا بىز ئۈچەيلەن ئىچىدىن، چۈنكى پەقەت بىزلا ئۇنىڭغا ئەڭ يېقىن! » جى لىڭ گې بۇرۇنمۇ مۇشۇنداق ئويلىغان. «بىراق، مەن قاتىل ئەمەس. چىڭ جوۋنىڭمۇ قاتىل بولۇشى مۈمكىن ئەمەس. ئۇنداقتا يەنە كىم قېپ قالىدۇ؟ پەقەتلا ئۇ! دۇنەنخەي! ئۇ چوقۇم قاتىل! » «چىقىرىۋېتىش ئۇسۇلىمۇ ...—  دېدى جى لىڭ گې—  ئۇنداقتا نېمىشقا چىڭ جوۋنىمۇ چىقىرىۋېتىسىز؟ ئۇنىڭ لۈي يىشىننىڭ  مۇھەببەتلەشكەن ئادىمى بولغىنى ئۈچۈنمۇ؟ » «ھەئە. ئۇ ئۇدەرىجىدە قايغۇرۇپ تۇرسا، قاتىل بولىشى مۈمكىنمۇ!  چىڭ جوۋنى يالغاندىن ياساندىمۇ دەيلى—  جىن ياڭ يەنە بىر مۇھىم ھالقىنى ئوتتۇرىغا قويدى—  ئۇ قېتىملىق قوش كىشىلىك  ئۇسۇل مۇسابىقىسىدە ئۇنىڭ ئوڭ قولىنىڭ نېمىسى بىر نېمە تۈپەيلى ئازراق ئۈزۈلۈپ كەتكەن. » نېمە؟! جى لىڭ گې چۆچۈپ كەتتى. بىر چەتتە ئولتۇرغان فاسەي بولسا ئۇنىڭغا مەنسىتمىگەن نەزىرىدە قاراپ تۇرۇپ دېدى: «مۇشۇنداق مۇھىم ئىشنى ھەجەپ ساقچىلارمۇ بىلمەيدىكىنا؟ » «چىڭ جوۋ ئۇ ئىزچىل سوراق قوبۇل قىلماۋاتسا! » ئۇلارنىڭ ئۇسۇل كىيىمىدە ، پەقەت  ئوڭ قولىغىلا پەلەي تاقىغان. قاتىللىق قورالىدا بارماق ئىزى بولمىغان شارائىت ئاستىدا، پەقەتلا پەلەي تاقاپ تۇرۇپ ئىشىنى پۈتتۈرگەن بولىدۇ. ئەمىسە بۇ چىڭ جوۋنىڭ ئوڭ قولى بۇ دەرىجىدە ئېغىر يارىلانغان بولسا ...    «ئۇ قانداق يارىلانغان؟ »دېدى فاسەي ئاغزىدىكى ئىسنى پۈركۈپ چىقىرىۋېتىپ. «ھەقىچان شۇ ئۇسۇلنىڭ ئەڭ ئاخىرىدا لۈي يىشىننى ئىككى قولى بىلەن كۆتۈرىدىغان ھېلىقى ھەرىكەتنى قىلغاندا  ..ئۇنىڭ چىرايى ئازراق تارتىشىپ قالغانتى ...» جىن ياڭ ئۆزىنىڭ ئويلىغانلىرىنى ئېيتىپ بولدى. جى لىڭ گې مۇ رازى بولغان ھالدا خاتىرىسىنى ياپتى. ئاخىرى يىپ ئۇچى بار بولدى! ئۇ ۋېن ۋېنغا لىيەنخەي قاۋاقخانىسى، پىچاق دۇكىنى ۋە چىڭ جوۋ داۋالانغان دوختۇرخانا ھەمدە داۋالىغان دوختۇرنىڭ ئىسمى ...دېگەندەكلەرنى خاتىرىلگۈزۈپ، ئۇلارنى كەتكۈزىۋەتتى. «جىن ياڭنىڭ بۈگۈن ئېيتقانلىرى ھەرگىزمۇ بىر قاتىلنىڭ ئېيتالايدىغان گەپلىرى ئەمەس .قاتىلنىڭ نەدىمۇ مۇنداق تەپەككۇر يولى بولسۇن؟ جىن ياڭنىڭ گۇماندارلىقىنى چىقىرىۋەتسەك بولار؟ » مانا بۇ جى لىڭ گې نىڭ تەپەككۇرى. بىراق فاسەي ئۇنىڭغا قوشۇلمىدى: «بۇ قېتىملىق قاتىل بىگۇناھ ياسىنىۋېلىشقا ئۇستا ئىدىغۇ؟ » «بۇ دەرىجىدە ياسىنالىغان بولسا بەك يامان بوپ كېتەر ..بىراق جىن ياڭغا ۋېن ۋېن گۇۋاھ بولالايدۇ، يەنىلا ئەڭ مۇھىمى، ئۇيەنە ئۆزىنىڭ پىكىرىنى دادىل ئوتتۇرىغا قويالىدى. » شۇڭا جىن ياڭنىڭ  ئېيتقانلىرىنىڭ راست بولۇش ئېھتىمالى بەك يۇقىرى. دېمەك، دۇنەنخەينىڭ ساقچىلارنىڭ نەزىرىدىكى گۇمانى يەنىمۇ ئېغىرلاشتى. «ماڭايلى! »دېدى جى لىڭ گې ئورنىدىن تۇرۇپ. ئەمما فاسەي ئورنىدا تاماكا چەككەن پېتى مىدراپمۇ قويمىدى. «مېڭىڭە» دېدى جى لىڭ گې  . «نېمە، تەكشۈرۈش سىزنىڭ ئىشىڭىزتىغۇ؟ » «ئەمىسە سىز بۇيەردە نېمە قىلىسىز؟ » «سىز مېنى بۇيەرگە چىڭ جوۋ نى جايلاپ بېرىشكە توۋلىغانغۇ؟ » ... جى لىڭ گې بىلەن فاسەي ۋېن ۋېن يېزىپ بەرگەن ئادرېس بويىچە ئۇ پىچاق دۇكىنىنى ئاسانلا تاپتى ۋە خېرىدار سۈپىتىدە يالغاندىن كىرىپ، پىچاق كۆرۈپ باققان كىشى بولىۋېلىشتى. دۇكاننىڭ سىرتقى كۆرۈنۈشى سەل ناچارراق بولسىمۇ، ئىچىدىكى مەھسۇلاتلار خېلىلا كۆپ ئىدى : شاخ كېسىش پىچىقى، سەي چاناش پىچىقى (قىڭراق، چادو) مېۋە ئاقلاش پىچىقى، ئىش قوشۇش پىچىقى (ھەيكەل ئويۇشتا ئىشلىتىدىغان )...دېگەندەكلەرنىڭ ھەممىسى تېپىلاتتى. دۇكاندار بۇيەردىكى پىچاقلارنىڭ ھەممىسىنى ئۆزىنىڭ ياسايدىغانلىقىنى، ئاتا مىراس كەسپى بولۇپ، قانداق پىچاق لازىم بولسا زاكاز قىپ بېرەلەيدىغىنىنى  ئېيتتى. «سىز كىچىكرەك پىچاق ياسىيالامسىز؟ »سورىدى جى لىڭ گې. «ئەلۋەتتە، ئەلۋەتتە. قانداق ئىشقا ئىشلەتكىلى لازىمكىن؟ » جى لىڭ گې بىر ئاز ئويلانغاندىن كېيىن جاۋابەن ئېيتتى: «ئېلىپ يۈرۈشكە ئەپلىكچۇ  .مەسىلەن دالا سەيلىسىگە چىققاندا، ئېكىسپىدىتسىيگە چىققاندا ياكى يولدا كېتىۋاتقاندا يېرىم يولدا ماشىنىنىڭ ئوتى ئۆچۈپ قالغاندا...پىچاق بولمىسا بەك ئاۋارىچىلىق. » دۇكان خوجايىنى ئالدىن سوقۇپ قويغان بىر قانچە پىچاقنى چىقىرىپ، ئۇنىڭدىن رازى بولىدىغانلىرىنىڭ بار يوقلىقىنى سورىدى. ئەگەر يەنە لازىم بولسا، ئۇنىڭغا يېڭىدىن بىرنى سوقۇپ بېرەلەيدىكەن. جى لىڭ گې بىر قاراپلا تونۇدى  . دەل مۇشۇ! ئۆزى كىچىك، ئۆتكۈر، لۈي يىشىنگە تىقىلغىنى بىلەن ئوپمۇ -ئوخشاش! ئۇ فاسەيگە كۆز ئىشارىسى قىلدى. فاسەي قولىدىكى تاماكىنى سىرتقا چۆرۈۋېتىپ ئېغىز ئاچتى: «بۇ سىزنىڭ ئاتا مىراس كەسپىڭىزكەن ، ئانداقتا بۇ خىل پىچاق سىزنىڭ مۇشۇ يەردىلا باركەندە؟ » خوجايىننىڭ ئېيتىشىچە شۇنداقكەن. ئۇنىڭ ئۈستىگە بۇ پىچاقنىڭ سودىسى بەكلا ياخشىكەن. ھەر ھەپتىدە نەچچىسى سېتىلىپ بولىدىكەن. ھەتتا تېخى تۈنۈگۈنلا ئىككىسى سېتىلىپتۇ. تۈنۈگۈن؟ قاتىللىق يۈز بەرگەن كۈنى؟ «كىم ....» كىم ئالغانىدى؟  جى لىڭ گې ئەمدى تېخى مۇشۇنداق سورىماقچى بولغانىدى، فاسەي دەرھال گەپنى بۇرىۋەتتى. چۈنكى ئۇنداق سورىسىلا ئۇنىڭ ساقچىلىقى چېنىپ قالىدۇ. ساقچىلىقى چېنىپلا قالسا دۇكان خوجايىنى جىددىيلىشىدۇ. جىددىيلەشتىمۇ، گەپ ئېسىگە كەلمەيدۇ، تولۇق سورالمايدۇ. «راست! تۈنۈگۈن جى لىڭ ئاكا ئالغان— دېدى فاسەي گەپ ئوخشىتىپ—  تۈنۈگۈن بىر ئوغۇل بالا ئالغان، شۇنداقمۇ؟ ئۇ ئىشلىتىپ بېقىپ ئالامەت ياخشىلىقىنى بايقاپ بىزگە مۇشۇيەرنى تەۋسىيە قىلغانىدى. » «ھە؟ توغرا توغرا توغرا— دېدى خوجايىن—  ئۇنىڭ ئىسمى جى لىڭ؟ سىز ئۇنى ئاكا دەمسىز؟ ئۇ قاراشقا سىزدىن ياش كۆرۈنەتتىغۇ؟ » «ھوي خوجايىن، خاتالاشتۇرۇپ قويمىغانسىز؟— دېدى فاسەي ئالايغىنىچە—  ئۇ ئېنىقلا مەندىن قېرى چىرايغۇ» خوجايىن بىرئاز ئويلانغاندىن كېيىن دېدى: «سىز دېگەن ئۇ جى لىڭ ھېلىقى كۆزلىرى يوغانلا ...بۇرنى سەل پاناق، پاكارراق كەلگەن ھېلىقى بالا شۇمۇ؟ » «ئىم ...توغرا ئەمەس—  فاسەي بويى پاكار دېگەن گەپتىنلا ئۇنىڭ ئۇسۇل ئىنىستىتۇتىدىن ئەمەسلىكىنى جەزىم قىلدى—  ئىككىسى كەلدى دەۋاتاتتىڭىزغۇ؟ يەنە بىرسىمىكىن .» خوجايىننىڭ ئېيتىشىچە چوقۇم ئەمەسمىش. چۈنكى ئۇ (ئىككىنچى پىچاق ئالغان كىشى) بىر قېرى موماي ئىكەن.   بۇ خىل سۈپەتلەشلەرنى ئاڭلىغان جى لىڭ گې بىر تەرەپتە ئىچىنى قىززىتىپ تۇرماقتىن باشقا ئامال تاپمىدى. «توغرا ئەمەسقۇ ...جى لىڭ چوقۇم كەلگەن...ئېنىقلا مۇشۇنداق پىچاقتى —   دېدى فاسەي جەزىملەشتۈرگەن ئاساستا—  ئەمىسە ئۇ تۈنۈگۈن ئالماپتۇ. .» «ئالدىنقى ھەپتە ئوخشايدۇ» دەپ قېتىپ قويدى جى لىڭ گې. «ئەمىسە ئالدىنقى ھەپتىكەن ...جى لىڭ دېگەن سولتەكنى قارا، بىزنى ئالدىغىنى نېمىسى!—  فاسەي كۆزىنىڭ قىرىدا جى لىڭ گې غا قارىدى ۋە ئۇنىڭ جىلە بوپ تۇرغان ھالىتىنى شۇنچىلىك كۈلكىلىك ھېس قىلدى— خوجايىن، ئالدىنقى ھەپتە بازار قانداقراق بولغان؟ ئۇ چاغدا بىرە ئوغۇلبالا كەلگەنمىدى؟ » خوجايىننىڭ ئېيتىشىچە، ئۇنىڭ ئېنىق ئېسىدە قالماپتۇ. ئېسىدە بارى ئالدىنقى ھەپتە بۇ پىچاقتىن ئۈچتال سېتىلغىنى ئىكەن. «ئالدىنقى دۈشەنبە، سىزنىڭ بۇيەردە سودا خاتېرىسى قالدۇرۇلغانمۇ؟ » «ئالدىنقى دۈشەنبە كۈنىنىڭ خاتېرىسىمۇ؟ بارغۇ، لېكىن سىلەر ...» «شۇنى چىقىرىڭ» جى لىڭ گې ساقچى ئىزنىكىنى چىقاردى. خوجايىن ئۇنىڭدىن قاتتىق چۆچۈپ كەتتى ۋە دەرھال تارتمىسىنى ئارىلاپ يۈرۈپ ئالدىنقى ھەپتىدىكى سودا خاتىرىسىنى ئىزدەپ تاپتى. دەرۋەقە بىرتال  سېتىلغانىكەن. جى لىڭ گې يېنىدىن دۇنەنخەينىڭ سۈرىتىنى چىقىرىپ سورىدى: «ئۇ ئالغانمۇ؟ » خوجايىن قاراپ بېشىنى چايقاپ جاۋاب بەردى: «ئېسىمدە يوق» . «ئۇنداقتا ئۇ، يەنە ئۇ چۇ ؟»دېدى جى لىڭ گې چىڭ جوۋ بىلەن جىن ياڭنىڭ  رەسىمىنى چىقىرىپ.ئەمما بېرىلگەن جاۋاب يەنىلا ئوخشاش بولدى. «ۋاي قاپاق، مەن دېگەنغۇ، ساقچىلىقىڭنى ئاشكارىلاپ قويساڭ خوجايىن ھېچنېمىنى ئېسىگە ئالالمايدۇ، دەپ» دېدى فاسەي ئۇ دۇكاندىن يېنىپ چىققاچ تاماكىدىن يەنە بىرنى تۇتاشتۇرۇپ. «ئەمىسە سىزنىڭ ساقچىلىقنى ئاشكارىلىماي تۇرۇپ ئۇلارنىڭ رەسىمىنى چىقىرىپ سوئال سوراشقا ئامالىڭىز بارمىتتى؟ »دېدى جى لىڭ گې مۇ بوش كەلمەي. «مەن سىزنىڭ يوشۇرۇنچە ئوغۇللارنىڭ رەسىمىنى ساقلاپ يۈرگىنىڭىزنى نېمە بىلەي؟ بىلگەن بولسام ئاللىبۇرۇن سوراپ بولغان بولاتتىم. » «بولدىلا، لىيەنخەي قاۋاقخانىسىغا بارايلى» «ئۇنداق يەرلەرنى ھازىر ئاچمايدۇ. » شۇنداق قىلىپ، ئۇئىككەيلەن مىڭخەي شەھەرلىك خەلق دوختۇرخانىسىغا قاراپ يۈرۈپ كەتتى.

axek13999649893

	كۆپ قىسىملىق رومان

etirgul

	تەرجىمە ئەسەرما بۇ ؟

xamal1124

	axek13999649893 يوللىغان ۋاقتى  2014-7-1 05:17 PM كۆپ قىسىملىق رومان ئىككى قىسىم.

xamal1124

	etirgul يوللىغان ۋاقتى  2014-7-1 05:48 PM تەرجىمە ئەسەرما بۇ ؟ ھەئە.

xamal1124

	etirgul يوللىغان ۋاقتى  2014-7-1 05:48 PM تەرجىمە ئەسەرما بۇ ؟ ھەئە.

arka1

	بەك ياخشىكەن ،

شرئەلى118

	شۇنداق قىزىقىپ ئۇقۇۋاتسام يەنە تۈگەپ كەتتى ، ئەسلى ئەسەرنىڭ ئادرىسىنى يوللاپ بىرەلەسىزمۇ ؟

چاقنار

	رەھمەت ،داۋامىنى كۆرۈپ ئىنتايىن خوش بولدۇم ،،،،تېنىڭىزگە سالامەتچىلىك ئىشلىرىڭىزغا ئۇتۇق تىلەيمەن  . داۋامىغا تەشنامىز