ئانام كەتكەن كۈن

qahqak

	ئانام كەتكەن كەتكەن كۈن تۇرادىن ئابدۇرېھىم ئون يەتتىنچى نويابىر، قۇياش چىقتى قاپ-قارا پارقىراپ. زېمىنغا قار چۈشمىدى لېكىن، قەلبىمدە لىق سوغۇق ياغار شارقىراپ. كېتىۋاتىمەن..... تاۋۇتقا ئېسىلغان قولۇم ئەمەس، يۈرىكىممىكىن دەيمەن. كېتىۋاتىمەن...... يۈرىكىم بىلەن تەڭ ماڭاي دەيمەنۇ،ماڭالمايمەن، خۇددى كىچىك ۋاقتىمدا ئانامنىڭ ئارقىسىدىن ئەگىشىپ يۈگۈرگەندەك. ئەتراپىمدىكى پەتىچىلەر، كۆرۈنەر كۆزۈمگە پەشتاختىدىكى ساختا مالدەك. بىلىنەر گويا، بىر-بىرىنى ئالداپ بولالماي يۈرگەن بوران بىلەن شامالدەك. يۇلتۇزلار،دەرەخلەر،قۇشلار، ھەتتا قۇرۇت-قوڭغۇزلار، ھەممە،ھەممىسى ئانىغا باي.......... پەقەت مەنلا، بولدۇم، ھېچنىمىسى يوق-ئانىسىز گاداي. يوق بولدى،ھېچنىمەم يوق، بايلىقىم،يايلىقىم،جەننىتىم كەتتى. مېنىڭ قىپ-قىزىل يۈرىكىمنى ئەپكەتتى...... ئاخشام تېخى بار ئىدى، ئەزرائىلغا ئالداندىم. گويا بىر كېچىدىلا ھېچنىمىسى قالمىغان قىمارۋازدەك، گادايغا ئايلاندىم، قانمىغانتىم ئانامغا تېخى، قاردەك ئاپپاق چاچلىرىغىمۇ ھەم، قاردەك ئاپپاق كۆڭلىگىمۇ ھەم. بار ئىدى ئانامغا تېخى بېرىدىغانلىرىم، بار ئىدى تېخى قىلمىغان چالا ئىشلىرىم. ئەمدى، نە ئامال،نە چارە؟ بولدۇم غېرىپ-بىچارە. ئاڭلىنار كۈندە قۇلاق تۈۋىمدە، ‹يىتىم ئوغلاق› دىگەن يېقىمسىز ئىبارە. ‹ئاتاسى بارنى باي دەيمەن›، ‹ئاناسى بارنى ئاي دەيمەن›. بۇ ناخشا-مەڭگۈ،مەڭگۈ يۈرىكىمدە كۆيەر لاۋۇلداپ. مەنمۇ بىللە كۆيسەم دەيمەن، ئانامنىڭ ئورۇق قوللىرىغا،قورۇق يۈزلىرىگە، قېنىپ-قېنىپ سۆيسەم دەيمەن. ئانام ماڭدى بەلكىم ،دادامنى يوقلاپ. بالىلىرىنىڭ، نەۋرىلىرىنىڭ، قورسىقىنى توقلاپ. ھېلى كېلىپ قالامىكىن دەيمەن، مېنى دەپ ساقلاپ قويغان- بىر تال شاپتۇل،بىر تىلىم تاۋۇز،بىر پارچە گۆشنى، يەمسىز؟دەپ سوراپمۇ قويماي ، ئىشتىھا بىلەن يەيمەن،يەيمەن...... .................. ................... مەن يوقلايدىغان قەبرە، بىر ئىدى،ئەمدى ئىككى بولدى. شۇ قارا كۈندىن باشلاپ، چېچىمدىن تاپىنىمغىچە لىققىدە چوغقا تولدى. ئۆزەم ئۆيدە، يۈرىمەن بالام بىلەن،كالام بىلەن. لېكىن يۈرىكىم قالدى ئانامغا ھەمرا بولۇپ. مەڭگۈ قايتىپ كەلمەيدۇ بەلكىم، قول تۇتۇشۇپ ئوينايدۇ، ئانام بىلەن، دادام بىلەن......... ........................... .................................. 2013-يىل  نويابىر.ئۈرۈمچى

tuntaxvixi

	ئاللا ھەمىمىزنىڭ گۇناھلىرىنى مەغپىرەت قىلغاي…

sadakat7224

	قېرىندىشىم .ئاللاھ سىزگە چەكسىز سەبىرلەرنى ئاتا قىلغاي !!!

باشتۇغ

	مېنى دەپ ساقلاپ قويغان - بىر تال شاپتول ، بىر تىلىم تاۋۇز ، بىر پارچە گۆشنى ، يەمسىز ؟ دەپ سوراپمۇ قويماي ، ئىشتىھا بىلەن يەيمەن ،يەيمەن...... بۇ مىسرالىنى ئوقۇۋېتىپ ئۈنۈم ئىچىمگە چۈشۈپلا كەتتى ئاللاھ ھەممىمىزگە ئىنساپ ئاتا قىلسۇن،ئانىمىزنىڭ جىنازىسىنى كۆتەرگەندە سەبرى ئاتاقىلسۇن

musilina

	يۈرىكىم ئەجەب ئېزىلدا شېئىرىڭىزنى ئوقۇپ.... اللاھتىن مېھرىبان ئاتا -ئانامغا ئۇزۇن ئۆمۈر ۋە سالامەتلىك تىلەيمەن...

1arman

	ئاھ ! يۈركۈم ئىزىلدى، يەنە بىر قانىدى.

xatuti

	ئەتىگەندىلا كۆزلىرىم ياشلاندىغۇ ھەممەيلەننىڭ ئىچكى ھىسسىياتىنى ئېنىق ئىپادىلەپ بېرىپسىز....

qahqak

	رەھمەت،مۇنبەردىكى  بارلىق دوستلارغا

شىرئەلى3

	ئاللا ھەمىمىزنىڭ گۇناھلىرىنى مەغپىرەت قىلغاي.....................