مەريەم ئەھەتنىڭ ‹‹ئاھ،قىزىم ››رومانى نەشىردىن چىقتى

مارشال

	پىشقەدەم مائارىپچى،ئىجتىھاتلىق ئەدىبە مەريەم ئەھەت ئاپپاينىڭ <<ئاھ ،قىزىم>>رومانى نەشىردىن چىقتى    نېمەتلىك،دىيارىمىز كورلىدا تۇغۇلۇپ ئۆسكەن،ئۆمرىنى مۇشۇ گۈزەل نەشپۈت يۇرتىنىڭ مائارىپ ئىشلىرىغا سەرپ قىلغان پىشقەدەم مائارىپچى،ئەقىدىلىك ئەدىبە مەريەم ئەھەت خانىم يازغان،ئۇيغۇر خەلقىنىڭ ئازادلىقتىن بۇيانقى،بولۇپمۇ پارتىيىنىڭ ئىسلاھات ئېلىپ بېرىش،ئېچىۋىتىش سىياسىتى يولغا قويۇلغاندىن بۇيانقى بېشىدىن كەچۈرگەن ئەگرى-توقاي تۇرمۇش مۇساپىسى چىن ۋە يارقىن ئەكس ئەتتۈرۈلگەن نادىر رومان-<<ئاھ ،قىزىم>>شىنجاڭ خەلق باش نەشرىياتى ۋە شىنجاڭ خەلق نەشرىياتى تەرىپىدىن 12300تىراژدا نەشىر قىلىنىپ بازارغا سېلىندى. رەسىم ھەققىدە چۈشەنچە:ئەدىبە مەريەم ئەھەت ئاپپاي ئىجادىيەت ئۈستىدە. رەسىم ھەققىدە چۈشەنچە:ئەدىبە مەريەم ئەھەت ئاپپاينىڭ نەشىردىن چىققان روماننىڭ مۇقاۋىسى.   ئاپتۇر مەريەم ئەھەت ئاپپاي 1945-يىلى 9-ئايدا كورلىنىڭ قوشئېرىق يېزىسىدا مائارىپچى ئائىلىسىدە دۇنياغا كەلگەن بولۇپ،باشلانغۇچ مەكتەپ ۋە تۇلۇقسىز ئوتتۇرا مەكتەپلەرنى كورلىدا تاماملىغاندىن كېيىن،1958-يىلى سابىق شىنجاڭ 2-دارىلمۇئەللىمىن مەكتىپىگە ئوقۇشقا قۇبۇل قىلىنغان.1961-يىلى ئوقۇش پۈتتۈرۈپ بۈگۈر،كورلا رايۇنلىرىدا ئوتتۇرا مەكتەپ مائارىپى بىلەن ئىزچىل شۇغۇللىنىپ،تۈمەنلىگەن ئۆسمۈرلەرنىڭ سەبى،يۇمران قەلبىگە ئىلىم-مەرىپەت ئۇرۇقىنى چاچقان.1995-يىلى پىنسىيەگە چىققان.    مەريەم ئەھەد ئاپپاي ئەسلىدىلا بىر ياخشى ئەدەبىي مۇھىتقا ۋە ئەۋزەل تەربىيلىنىش ئىمكانىيىتىگە ئىگە تىرىشچان ئەدىبە بولۇپ،ئۇ ئىلگىرى ئۇيغۇر ئاپتۇنۇم رايۇنىمىز تەۋەسىدىكى ھەر قايسى مەتبۇئاتلاردا كۆپلىگەن شېئىر،نەسىر ۋە ئەدەبىي ئوبزۇرلارنى ئېلان قىلغان.2000-يىللارنىڭ دەسلەپكى كۈنلىرىدە،ئۇ پەۋقۇلئاددە بىر پۇرسەتتە دوستلىردىن كىشىنىڭ يۈرەك تارىنى چېكىدىغان بىر ھايات پاجىئەسىنى ئاڭلاپ ھاياجانىنى باسالماي قالىدۇ.دوستلىرىنىڭ دەۋەت قىلىشى بىلەن دەسلەپتە ئاڭلىغان ھايات قىسمەتلىرىنى ھېكايە قىلىپ يېزىپ چىقىدۇ.بىراق،بۇ ھېكايىسى ئۆزىگە بەكلا ئاددىي،تەمى سۇس،مۇقامى تۆۋەن تۇيۇلۇپ قالغاندىن كېيىن قايتا-قايتا پىشىقلاپ ئىشلەش ۋە يېڭى دېتاللار بىلەن بېيىتىش ئاساسىدا ئۇنى ھەجىمى خېلىلا چوڭ پوۋىستقا ئايلاندۇرىدۇ.كېيىن،ئۇ يەنە يازغۇچىلار ۋە مۇتەخەسىسلەردىن پىكىر ئېلىپ،ئۇلارنىڭ پىكىر -تەۋسىيىلىرى بىلەن تەكرار-تەكرار پىشىقلاپ ئىشلەپ ئەسەرگە بىر قانچە تارىخىي دەۋرنى ئۆز ئىچىگە ئالغان،يېزا ۋە شەھەر تۇرمۇشى ئورگانىك گىرەلەشتۈرگەن،ۋەقەلىكلىرى بىر قەدەر مول،ئىدىيىۋىلىكى چوڭقۇر،ھەجمى خېلىلا زور رومان قىلىپ قايتا يېزىپ چىقىدۇ.بۇ جەرياندا ئۇنىڭ بېشىغا كەلگەن چىدىغۇسىز ئازاپلىق كەچمىشلەر ۋە نى-نى سەۋدالارمۇ ئۇنى بۇ ئېغىر مەنىۋى ئەمگەكتىن رايى يېنىپ قالمايدۇ.   مەريەم ئەھەت ئاپپاي بۇ روماننى 2007-يىلى 9-ئايدىن باشلاپ رەسمىي يېزىشقا باشلايدۇ.دەسلەپكى ئورگىنالى2010-يىلى قولىدىن چىقىدۇ.ئۇ نەشرىيات تەھرىرلىرىنىڭ تەكلىپ-تەۋسىيىلىرىگە ئاساسەن،يەنە 2012-يىلغىچە بۇ روماننى قايتا-قايتا ئۆزگەرتىپ ۋە پىشىقلاپ ئىشلەپ،شۇ يىلى 12-ئايدا <<شىنجاڭ يازغۇچىلىرىنىڭ ئىجادى ئەسەرلىرى ۋە ئاز سانلىق مىللەت خەنسۇ يېزىقلىرىدىكى ئەسەرلەرنى ئۆز-ئارا تەرجىمە -نەشىر قىلىش قۇرۇلۇشى>>تاپشۇرىدۇ.نىھايەت،ھالال ئەقىدە ۋە ئەجىر-مېھنەت قەدىر -قىممىتىنى تېپىپ،بۇ رومان 2014-يىلى 1-ئايدا نەشىردىن چىقتى ۋە كورلا دىيارىدىكى شىنجاڭ شىنخۇا 2-باسما زاۋۇتىدا 12300تىراژدا بېسىلىپ بازارغا سېلىندى. رەسىم ھەققىدە چۈشەنچە:ئوڭدىن سولغان قاراپ:1.مارشال2.مەريەم ئەھەت3.ئابلىمىت مۇھەممىدى ئاقيولى   پىشقەدەم مائارىپچى،ئىزدىنىش روھى كۈچلۈك ئەدىبە،جاپاكەش ئانىنىڭ يۈرەك قېنى بىلەن يېزىلغان <<ئاھ،قىزىم>>ناملىق بۇ رومان ئوقۇرمەنلەر بىلەن يۈز كۆرۈشتى.مەريەم ئەھەت ئاپپاينىڭمۇ ھاردۇقى چىققاندەك بولدى.شۇ مۇناسىۋەت بىلەن بىز بۇ ئەقىدىلىك باغۋەنننى چىن كۆڭلىمىزدىن سەمىمىي قۇتلۇقلايمىز.ئۇنىڭغا سالامەتلىك،خاتىرجەملىك ۋە ئۇزۇن ئۆمۈر تىلەيمىز.شۇنىڭ بىلەن بىرگە ئۇنىڭ نەچچە يىل يۈرەك قېنىنى سەرپ قىلىپ يېزىپ چىققان<<ئاھ،قىزىم>>ناملىق روماننىڭ بارلىق ئوقۇرمەنلەر سۆيۈپ ئوقۇيدىغان ئىسىل كىتابلارنىڭ بىرى بولۇپ قېلىشىغا ئىشىنىمىز. قەلەم تەۋرەتكۈچى:مارشال 2014-يىلى 6-ئاينىڭ 29-كۈنى كەچ.

musilina

	پىشقەدەم مائارىپچى،ئىزدىنىش روھى كۈچلۈك ئەدىبە مەريەم ئەھەد ئاپپاينىڭ بۇ رومانىنىڭ نەشىردىن چىققانلىقىنى قىزغىن تەبرىكلەيمەن ۋە تېنىگە سالامەتلىك،ئىشلىرىغا ئۇتۇق تىلەيمەن...... مەريەم ئەھەد ئاپپاينى بىزگە تونۇشتۇرغان سىزگىمۇ ئالاھىدە رەھمىتىمنى بىلدۈرىمەن..... بۇ ھەدىمىزنىڭ يېشى چوڭىيىپ قالسىمۇ ،قىلچە بوشاشماستىن ئىجادىيەت بىلەن شۇغۇللانغانلىقىغا ئاپىرىن ئوقۇماي تۇرالمىدىم..... بۇ تېمىىڭزغا ‹‹نادىر››دېگەن باھانى بەردىم.... بۇ روماندىن  چوقۇم بىرنى سېتىۋالىمەن..

sumayya3

	بەك ياخشى ئىش بوپتۇ مىنىڭ ھازىرلا ئۇقۇغۇم كىلىۋاتىدۇ بۇ كىتابنى   مەريەم ئاپپاينىڭ تىنىنىڭ سالامەت ئومرىنىڭ ئۇزۇن بۇلىشىنى تىلەيمەن

karawul3

	مەرىيەم ئاپپاينىڭ ھاردۇقى چىقىپتۇ، بۇبارەك بولسۇن!

باشتۇغ

	مەن تۇغۇلمىغان ۋاقىتلاردىكى ۋەقەلىكلەر ئىكەن ،قېنى بىر كۆرۈپ چىقاي .

zulpukar

	ۋاقىت چىقىرىپ كىتاپخانىغا بېرىپ كەلسەم بولغۇدەك.........

tohuwaz

	ياخشى يىزىلغان بولسا چوقۇم ياقتۇرۇپ ئوقۇشقا ئىرىشىدۇ ،ئەكىسچە بولسا ئەكسىچە بولىدۇ شۇ.

babur99

	مەريەم ئاپپايغا ئاللادىن سالامەتلىك ۋە خاتىرجەملىك تىلەيمەن .

zebran

	بۇ ئەدىبە دىگەن گەپنى تۇنجى ئاڭلاۋاتىمەن.

Uyghurbufet

	كىتابخۇمارلارنىڭ بارغانسېرى كۆپىيىشىگە تۈرتكە بولىدىغان ، نادىر ئەسەر بولۇشىنى ئۈمىد قىلىمەن……