(ساتىرا) ئۆرگىلەي

fahri97

	ئۆرگىلەي                                                  (ساتىرا)                                         ئەھمەد يۈسۈپ سەرداھى                            كۈندە ئۈچ ۋاق ئېچىلغان مەجلىسىڭدىن ئۆرگىلەي،                            پىكىر قۇمدەك چېچىلغان مەجلىسىڭدىن ئۆرگىلەي.                            سۆزلەشكە تىل قىسىلغان مەجلىسىڭدىن ئۆرگىلەي،                            چىن سۆز دارغا ئېسىلغان مەجلىسىڭدىن ئۆرگىلەي،                            بەدبۇي لەشتەڭ سېسىغان مەجلىسىڭدىن ئۆرگىلەي.                            ئۈنۈم دېگەن نېمە ئۇ؟ ئويلايدىغان كىشى يوق،                            يىپ بازىرى باشلىنار ئاخىرى يا بېشى يوق.                            مۇدىر قېتىپ ئولتۇرار چېچى بارۇ قېشى يوق،                            سېكىرتار بەك قاينايدۇ ئېغىزىدا چىشى يوق،                            ئەۋرەز كەبى ئېچىغان مەجلىسىڭدىن ئۆرگىلەي.                            سەر خىل ئىمىش تۈزۈملەر كىممۇ ئويلاپ تاپقان بار،                            يولنى پەملەپ ماڭمىساڭ ھەر قەدەمدە قاپقان بار.                            ئىش ھەققىگە ئالدىرما مەكتەپتە كەم ياتقان بار،                            بۇزۇپ شىرىن چۈشۈمنى گاھى خورەك تارتقان بار                            دەپ نەپىسى سىقىلغان مەجلىسىڭدىن ئۆرگىلەي.                            مۇئەللىمسىز سىنىپتا چۇقرىشىدۇ بالىلار،                            باردۇر تېخى ئۇلاردىن ساۋادى ھەم چالىلار.                            نە تارتقۇلۇق ئاۋامغا؟ يەر شارىغۇ ئايلىنار،                            بوينى قاتتىق پۇل بىلەن ياۋاش قويدەك باغلىنار،                            جانغا مىختەك قېقىلغان مەجلىسىڭدىن ئۆرگىلەي.                            نىنچىسىنى تاپالماي مۇدىر قۇرۇق سۆزىنىڭ،                            چاپىقىنى سۈرتۈيدۇ يېرىم سائەت كۆزىنىڭ.                            ئەستىن چىقار گاھىدا نەدىلىكى ئۆزىنىڭ،                             سۆزلىگۈسى كېپ كېتەر يەنە ئاۋۇ تۆتىنىڭ،                             ۋاقىت ئەرزان سېتىلغان مەجلىسىڭدىن ئۆرگىلەي.                            ئوقۇتۇشنىڭ گېپى يوق، ۋەز-نەسىھەت قاينايدۇ،                            تەسىراتنىڭ ۋارىقى ئۆلچەمدىن كۆپ كاملايدۇ.                            كىم تاپسا كۆپ كەمچىلىك شۇ قۇيرۇق ماي چاينايدۇ،                            نورمىدىن كۆپ خىزمەتكە قانداقمۇ جان پايلايدۇ،                            داۋامىغا قېتىلغان مەجلىسىڭدىن ئۆرگىلەي.                            تەكلىپ بەرگەن چاتاقچى، باردۇر يەنە ماراقچى،                            سۆزلىمىسە›مەسىلە‹ڭ ئېغىر دەيدۇ سوراقچى.                            تۇيدۇرماستىن كۆتۈرۈپ يەرگە قاتتىق ئۇرماقچى،                            شۇڭا كۆپلەر ئامالسىز بولۇپ كەتتى چوماقچى،                             يۈرەككە دەل ئېتىلغان مەجلىسىڭدىن ئۆرگىلەي.                            توختات پۇچەك سۆزۈڭنى يېتەر ئەمدى بولدى بەس!                            سىلكىۋەتكىن بېشىڭنى يۈرمە دائىم مەست-ئەلەس.                            شەكىلۋازلىق ۋەجىدىن قىسمىتىمىز ئېگىز-پەس،                            تاپمىساڭ گەر ھوشۇڭنى، ھەي، بولدىلا...! ئىشىڭ تەس،                            كونا تامدەك يىقىلغان مەجلىسىڭدىن ئۆرگىلەي!!!

musilina

	بىزنىڭ مەكتەپنىلا يېزىپسىزغۇ... بۇ قۇرۇق مەجلىسۋازلىقنىڭ كۆپلىكى،بىرسى توختىسا بىرسى،ئاغزىدىن كۆپۈك چىقىرىپ،ھاياجانلىنىپ سۆزلىشىپ كېتىشسە.......... بولدىلا،مەنمۇ ھاياجانلانماي.... تىلى ئۆتكۈر چىقىپتۇ ساتېرانىڭ....

hujayin1

	پاھ نەق جايىنى تېپىپسىز مانا،تىلى ئۆتكۈر،ھوزۇرلۇق چىقىپتۇ، ھارمىغايسىز.

kokzat

	راسىت شۇنداق ئىشلار كۆپىيىپ كەتتى. مەكتەپ رەھپەرلىرى ئوقۇتۇشنى چىڭ تۇتۇشنى قۇرۇق شۇئارغا ئايلاندۇرۇپ قويدى.جازاسى با مۇكاپىتى يوق.رەغبەتتىن.تەھتىت ئىغىر.ھەممىسى بىرلا غەم،مەنپەت ھوقوق.

sutbulak

	قەلىمىڭز تېخىمۇ قۇۋۋەت تاپقاي