تورغا زىيادە تايىنىۋالمايلى

xopur

	تورغا زىيادە تايىنىۋالمايلى لى خۇڭ ھەممىلا يەرنى قاپلىغان تور بىزنى دۆلەت ئىچى - سىرتىدىكى تۈرلۈك ئۇچۇرلاردىن خەۋەردار قىلىش بىلەن بىللە، يىراقتىكى ئۇرۇق - تۇغقان، دوست - بۇرادەرلىرىمىز بىلەن بولغان ئارىلىقىمىزنىمۇ يېقىنلاشتۇردى. بولۇپمۇ، غېرىپسىنغان، ئىچىڭىز پۇشقان ۋاقىتتا، تور رەڭدار مەزمۇنلىرى ئارقىلىق سىزگە مەنىۋى زوق ئاتا قىلىدۇ... دەل شۇ سەۋەبتىن ھەممە كىشى توردىن ئايرىلالمايدىغان ھالغا يەتتى، تور شەخسنىڭ يان تېلېفون، كومپيۇتېرلىرى بىلەن بىرلىشىپ، تۇرمۇشىمىزغا مول مەزمۇنلارنى قوشتى. 　　ئەمما تور دۇنياسىغا مەپتۇن بولۇپ، پۈتۈن ۋۇجۇدىمىز بىلەن تورغا باغلىنىپ قالغان ۋاقتىمىزدا، تور سىرتىدىكى دۇنيانىڭمۇ ئوخشاشلا رەڭدار ئىكەنلىكىنى ئۇنتۇپ قېلىۋاتىمىز. 　　ئويلاپ باقساق، تور يوق چاغدا بوش ۋاقتىمىزنى كىتاب ئوقۇش بىلەن ئۆتكۈزەتتۇق؛ تور يوق چاغدا، دىققەت نەزەرىمىزنى جانلىق تەبىئەتكە ياكى دالىغا ئاغدۇرۇپ، سىرتلارغا چىقاتتۇق؛ تور يوق چاغدا، تىنچ ئولتۇرۇپ ئۆيدىكىلەر، دوستلار بىلەن سىردىشىپ، مۇڭدىشىپ، مېھىر - مۇھەببەتتىن بەھرىلىنەتتۇق. 　　تور بىزنى نېمىلەردىن يىراقلاشتۇردى؟ 　　− تور بالىلارنى تەڭتۇشلىرى بىلەن بىللە ئويناپ، بىللە خۇشال بولىدىغان ۋاقىتتىن، پۇرسەتتىن مەھرۇم قىلدى. تەتىللەردە بالىلار كۆپ قىسىم ۋاقتىنى بىلىپ - بىلمەي تورغا سەرپ قىلىۋاتىدۇ، ئۇلار دوستلىرى بىلەن ئۇدۇلمۇ ئۇدۇل ئولتۇرۇپ ئەمەس، بەلكى توردىكى مەۋھۇم دۇنيادا پاراڭلىشىدۇ، تور ئارقىلىق پىكىر ئالماشتۇرىدۇ. 　　− تور بىزنى مەنىۋى تۇرمۇشتىن بەھرىلىنىش پۇرسىتىدىن مەھرۇم قىلدى. ئەتراپقا نەزەر سالساق، ئىلگىرىكى كوچا دوقمۇشلىرى، ئاۋات رەستىلەر، ئاپتوبۇس بېكەتلىرىدىكى گېزىت - ژۇرنال بوتكىلىرىنى تاپقىلى بولمايدۇ. مەن مۇشۇ ئىش توغرىسىدا بىرەيلەننى زىيارەت قىلسام، ئۇ: گېزىت - ژۇرناللارنىڭ بازىرى بولمىغاچقا، گېزىت - ژۇرنال ساتمايدىغان بولدۇق، دېدى. 　　− تور بىزنى باشقىلار بىلەن ئالاقىلىشىش پۇرسىتىدىن مەھرۇم قىلدى. يان تېلېفونغا باشچىلاپ بېرىلىپ كەتكەنلەر ئەتراپىدىكى كىشىلەرگە گەپ قىلىشقا، ئەتراپىدا قانداق ئىشلارنىڭ يۈز بەرگەنلىكىگە ئېتىبار قىلمايدىغان بولۇپ قالدى. 　　تور بىزگە بەزى نەرسىلەرنى ئاتا قىلىش بىلەن بىللە، بىزنى كۆپ نەرسىلەردىن مەھرۇم قىلدى. بۇنداق دېگەنلىك تورنىڭ ئەۋزەللىكىنى ئىنكار قىلغانلىق ئەمەس. دەۋر ئىلگىرىلەۋاتىدۇ، توردىن پايدىلىنىپ بىلىم ئىگىلەش، نەزەر دائىرىمىزنى كېڭەيتىش، تېخىمۇ كۆپ دوستلار بىلەن تونۇشۇش ئەلۋەتتە مۇھىم. ئەمما تور بىلەنلا بولۇپ كېتىپ ئەتىراپىمىزدىكى مەنزىرىلەرگە سەل قارىمايلى، تور سەۋەبلىك قەدىرلەشكە تېگىشلىك تۇرمۇشىمىزنى يوقىتىپ قويمايلى. 　　تورغا زىيادە تايىنىۋېلىش ھالىتىدىن قانداق قۇتۇلۇش كېرەك؟ بۇ ھەر بىرىمىزنىڭ ئويلىنىشىمىزغا ئەرزىيدۇ.  2014.04.11      مەنبە: شىنجاڭ گېزىتى

rahiyma

	شۇنداق، مەنمۇ ئىلگىرى دوستلىرىم تەرىپىدىن تور مەستانىسى دەپ نام ئالغان. ھازىرمۇ تورغا چىقىدىغان ۋاقتىم خېلىلا كۆپ. بىراق پىكىرىڭىزنى تامامەن قوللايمەن، چۈنكى مەنمۇ ھېس قىلدىم، ئىلگىرى تور بىلەن ئۇچراشمىغان ۋاقتىمدا كۆڭۈل قويۇپ ئۆگىنىش قىلاتتىم، كىتاپ ئوقۇشقا كۆپ ۋاقىت سەرپ قىلاتتىم، سىرتلارغا چىقىپ ئايلىنىشنى ياخشى كۆرەتتىم. ئەمما ھازىر بەزىدە سىرتنىڭ مەنزىرىسىدىن كۆرە توردىكى مەزمۇنلاردىن، چىرايلىق مەنزىرە سۈرەتلىرىدىن بەھر ئالىدىغان، كىتاپ ئوقۇش ئورنىغا توردىكى ئەسەرلەرنىلا ئوقۇيدىغان، ئۆگىنىش قىلىدىغان ۋاقىتلىرىمدىمۇ تېلىفۇنۇمدا تورغا چىقىپ دىققىتىمنى مەركەزلەشتۈرەلمەيدىغان، دوستلىرىم بىلەن يۈز تۇرانە تۇرۇپ پىكىر ئالماشتۇرۇشتىن كۆرە تور ئارقىلىق مۇڭدىشىشنى ئەۋزەل بىلىدىغان بوپ قالدىم. ئەلۋەتتە، بۇ تورنىڭ خاتالىقى ئەمەس، بەلكى ئۆزۈمنىڭ تورغا زىيادە بېرىلىپ كەتكەنلىكىمدىن بولغان. بىراق مەلۇم مەنىدىن ئېيتقاندا، تورنىڭ ئومۇملىشىشى، ئەقلىي ئىقتىدارلىق تېلىفۇنلارنىڭ كۆپلەپ بازارغا سېلىنىشى، بىزنى تور دۇنياسىغا تېخىمۇ مەھكەم باغلىۋەتتى.

NURDEN

	بۇ تىمىڭىز دەل ۋاختىدا يوللىنىپتۇ،دىمەكچۈلۈك بەزىدە ئادەم بىكا قاسىلا تورغە چىققىسى كىلىدۇ.مەنچە كۈندە تورغا چىقىش ۋاقتىنى مۇۋاپىق تەڭشەش كىرەك.كىتاپ ئوقۇش ياخشى ئادەت ئۇنى ھەرگىز تاشلاپقويۇشقا بولمايدۇ.كىتاپ ئوقۇشنى ئەتراپىمىزدىكى ھەربىر كىشىگە تەشەببۇس قىلىشىمىز كىرەك.

ئالمىچى

	يەنىلا   دىدار غەنىمەت ئەلا،،،

musilina

	تورغا چىقىش كېرەك،لېكىن تورغا ھەددىدىن زىيادە بېرىلىپ كېتىشكە بولمايدۇ...

zulpukar

	پەن- تېخنىكا مەھسۇلاتى بولغان ئالاقە قوراللىرنى جايىغا ئىشلىتىش كېرەك........ ئۇ نەرسىلەرگە ھەددىدىن زىيادە بېرلىپ كېتىشكە ھەم تاشلاپ قويۇشقىمۇ بولمايدۇ.......

Uyghurbufet

	ھەر ئىشنىڭ ياخشى -يامان تەرىپى بار……خۇددى تەڭگىنىڭ 2 يۈزى بولغىنىدەك…… ماشىنىنىڭ خەتىرى چوڭ دەپ ھەممە يەرگە پىيادە ياكى ۋېلىسىپىت بىلەن بېرىپ بولغۇلى بولمىغىنىدەك، تورنىڭ يامان تەرىپىنى دەپ، ئۇنىڭدىن ۋاز كەچكىلىمۇ بولمايدۇ…… گەپ يەنىلا ئۆزىمىزدە……تور، تېلىۋىزور، تېلفۇنلارغا ھەددەدەن ئارتۇق بېرىلىپ كەتمەي، خىزمەت، ئائىلە، ئۈگۈنۈش، كىشىلىك مۇناسىۋەتلەرنى مۇۋاپىق بىر تەرەپ قىلىشقا ئەھمىيەت بەرسەك،يەنىلا ئىشلارنى ياخشى ئورۇنلاشتۇرغىلى بولىدۇ……

yigana521

	ھەقىقەتەن ياخشى تېما بوپتۇ    ،  رەخمەت سىزگە ....دىمىسىمۇ ھازىر ھەممىلا ئىشتا تورغا تايىنۋالدىغان ئەھۋاللار ناھايتى ئېغىر ، بۇنداق ئەھۋال بىزنىڭ تەپەككۇر قىلىش ئىقتىدارىمىزنى چەكلەپ قويىدۇ ئەمەسمۇ........

jelwa

	مىنىڭغۇ  تورلارغا بەك  چىققۇم  كەلمەس  بوپ  قالدى  ...ھەر  كۈنى   سائەت  9 دىن كىيىنلا  چىقىپ  قويىمەن شۇ

چاقنار

	ھەرقانداق  نەرسىنىڭ ياخشى يامان تەرىپى بولىدۇ  ،مۇھىمى ئۇنى قانداق ئىشلىتىشتا