قۇلاققا پىچىرلاپ دەيدىغان گەپلەر ‹ ئاشكار ›

axkar

	ئەسسالامۇ ئەلەيكوم : قوللىرىم ھورۇنلىشىپ كىتىپ بارامدۇ ياكى  ھىسلىرىم باغلىنىپ قىلىۋاتامدۇ  بۇنىسى ماڭا نائېنىق ، بەزى چاغدا ئىچىمدىكىنى شۇنداق بىر تۆككۈم كىلىدۇ ، رومان يېزىۋىتىدىغاندەك نىيەتتە كۇنۇپكا تاختىسىغا قولۇمنى ئاپىرىمەنيۇ يەنە يېنىپ قالىمەن ،  ئاستا ئۆزۈمگە : < بولدى قىل ئاشكار ، پايدىسى يوق > دەپ شۈك بولىمەن . ئەمدى بۇ يەردىكى پايدا قايسى پايدىنى كۆزدە تۇتار ؟  باشقىلارنى  ئوڭشايمەن دىمەي ئاۋال ئۆزەڭنى ئوڭشىغىن دىگەندەك ........   لىكىن ، يېزىپ كۆنۈپ قالغان ئادەمنىڭ يەنىلا بىرنىمىلەرنى يېزىپ باققىسى  كىلىدىكەن . خىلى يىللار ئىلگىردىكى  بىر يازمامغا  مۇشۇ مۇنبەردىكى دوستىمىز : شائىر-يازغۇچىلار يۈرىكىگە ئوت كەتكەن كىشلەردۇر ، دەپ ئىنكاس قالدۇرۇپتىكەن ،  مەن شائىر ئەمەس ، يازغۇچىمۇ ئەمەس ، ئەمما يۈرۈكىمگە ئوت كەتكەن كىشىدۇرمەن..... *    ئىنساننى   مۇھىت ئۆزگەرتەلمەيدىكەن . قوشنىڭىز ياكى ئاداشلىرىڭىزمۇ ھەم شۇ ، ئىنساننىڭ ئىچىدىن بىر ئوت كۆيمىسە ھەرگىزمۇ باشقىلارنىڭ ۋەز نەسىھەتلىرىگە قۇلاق سالمايدىكەن ، قەلبىمىز تۇيۇقسىز  ئېرىپ قالىدىكەن ، ئۆزىمىزمۇ بىلمەيلا قالىمىزكەن  . باشقىلار : ھوي ! پالانچى ئوڭشىلىپ كىتىپتۇ ھە ، دەپلا قالىدىكەن  . مانا بۇنى كۆڭلىگە ئىنساب بىرىپتۇ دەمدۇق ؟  جاھان تەتۇر پىرقىراۋاتقان بۇ كۈنلەردە ياشاش ئۈچۈن نۇرغۇنلىرىمىز  ئەگىشىپ پىرقىراۋاتىمز  ، ھەممىمىزنىڭ كۆڭلىگە ئىنساب بىرەر . *    قىش كەلسە ئۆزۈمنى قايرىپ قويۇپ  مىسكېنلەرگە كۆڭۈل بۈلۈپ كىتەتتىم ، باھاردا دىھقانلارغا ئاسانلىق تىلەتتىم ، يازدا غۇرىگۈل تۇرمۇش كەچۈرۋاتقانلار ئۈچۈن خوش بولاتتىم ، چۈنكى ئۇلار ھىچ بولمىسا مۇزلاپ كەتتىم  دىمەيتتى ، كۈزدە يەنە شۇ جاپاكەشلەرنىڭ ھوسول ئېلىشىنى ئۈمىد قىلاتتىم ،  نىمانچە ئارتوقچە كۆڭۈل بۆلۈش بۇ ، ئاللاھ رىزقىنى بىرىدۇ  ، بەلكىم شۇ جاپاكەشلەرمۇ ئۆزىدىن بەكەرەك جاپا تارتىۋاتقانلارنىڭ غېمىنى يەۋەتقاندۇ ھە !؟ نىمىدىگەن ئاقكۆڭۈل مىللەت بىز . *    ئاتا- ئانا توغىرسىدا نۇرغۇن يازمىلار يېزىلدى ، ھەم داۋاملىق يېزىلغۇسى  ، ئاتا-ئانا بولماي تۇرۇپ يازغان شۇ يازمىلارنىڭ ھەممىسى يالغان . ئوتقا كىرمەي تۇرۇپ ئوت بەك قىززىق ، سۇغا چۈشمەي تۇرۇپ سۇ بەك سوغۇق دىگۈچىلەر پەقەت كۆرگۈچى خالاس . بالا ئوتىنىڭ قانداقلىقىنى  بىز ئاتا-ئانا بولماي تۇرۇپ ھېس قىلالىغان بولساقكەن كاشكى  شۇ ئەزىزلەرنى ئەللەي ئېتىپ كۈتكەن بولاتتۇق . ئۆتكەندە بىر يازمامدىمۇ دىگەنغۇ دەيمەن  ، ھەرقانداق ئىشنى ئەتىدىن باشلاي دىسىڭىز دەڭكى ئاتا-ئانىغا بولغان بۇرچىڭىزنى ، ۋاپادارلىقىڭىزنى ئەتىگە قويماڭ ،  بەلكىم ئەتە ۋاي ئاتام ،ۋاي ئانام دەپ يىغلاپ قىلىشىڭىز مۈنكىن . جاھاندا ئاتا-ئانىدىنمۇ ئارتۇق راستچىل ، مىھرىبان ئىنسان بارمىدۇ ؟ *      غۇلجىغا كىلىپ باققانلار بىلىدۇ  ، خەنزۇ بازىرى دەپ ئسمى جىسمىغا ماسلاشمىغان بىر بازار بار ، مەن ئۇ يەرنىڭ دائىملىق بىكارچىسى ، باشقىلار ئۇ بازاردا ئىش-ئوقەت قىلىدۇ ، مەن ئايلىنىمەن ، بىردە سۈت سېتىۋاتقان ئانىلىرىمىزغا يىراقتىن نەزەر سالىمەن  ، بەزىدە  نەچچە تىيىنلىك ئوقەت قىلىۋاتقان بوۋىلىمىزغا قاراپ كۆزلىرىمنى نەمدەيمەن ،  ھەم مۇشۇ يەردىكى  بىر توپ قوغلاپ تۇتۇپ ، بۇلاپ تالايدىغان قانۇنلۇق بۇلاڭچىلارغا نەپرەتلىنىمەن ، يىقىندىن ياقى ئۆزۈم كارتا بىجىرىپ ئىدارىدىكىلەرنى سەپەرۋەر قىلىپ مائاش چىققاندا پارچە -پۇرات پۇللارنى مۇشۇ كارتىغا ئۇرۇشىنى  مەلۇم سانغا  يەتكەندە يىغىلغان پۇل بىلەن باشقىلارغا ياردەم قىلىشنى ئوتتۇرغا قويدۇم ھەم شۇنداق ياخشى داۋاملىشىۋاتىدۇ . ئەمما  مەن يىغىلغان پۇللارنى نامىراتلارغا  بەرمىدىم ، خىزمەتداشلارنىڭ بەزىلىرى رەنجىگەنمۇ بولدى ، مەن دىدىم : < نامىراتلارنى يۆلەپ بولغىلى بولمايدۇ  ، ئىچىدىن قاينىمىسا بىكار ، شۇڭا  مەن  بۇ پۇللارنى  ئوقۇشى ياخشى بالىلارغا ئاتىدىم ، مائارىپ يۈكسەلمىسە مىللەت ئالغا باسمايدۇ > ،  ئادەم دىگەندە توغرا نىيەت ، ئېنىق نىشان بولمىسا ھىچ نەرسە ھوجۇتقا چىقمايدۇ . ئۇزۇن بولۇپتىكەن شېئىر يېزىپ باقمىغىلى ، خەتنى جىقايىتقۇچە   مىسرا -مىسرا بىلەنلا دەۋالاي . سەھەر، قوياش كائىناتنى ئىللىتى ئەمما ، جانناماز يىگانە قالدى ، سورۇن ئۇزاق، تۈگىمەي نەغمە. چىڭقى چۈش، ئاپتاپ كۆيدۈرىدۇ دىھقاننىڭ گەجگىسىنى ، كىم سورايدۇ؟ كىم ئاڭلايدۇ؟ بىچارىنىڭ غەلۋىسىنى . كىچە، ئىھ! ھاياتنىڭ گۈل-چىچەك پەسلى ، ئۆچلۈك قىلىمەن ، تۈگىدى سەندە ئاغىنەمنىڭ ئەسلى-ۋەسلى. بۇ ھاياتنىڭ بەرگەنلىرى ھەقىقەتەن كۆپ ، تامچە ئىزدەپ ئېقىندىن سۇ ئىچكەنلىرىم راسىت . ئەسلىدىنلا ماڭا تەۋە دۇنيالىرىمنى ، ئاقكۆڭۈلمەن ، بىراۋلارغا تىققانلىرىم راسىت . ئەكەل دىسە ، ئالغىنا دەپ ئالدىغا تاشلاپ ، ئالغىن دىسە ، خىجىل بولۇپ مۆككەنلىرىم راسىت . خۇددى ، مەن دۇنياغا قەرزىدار مەڭگۈ، ياق! بۇ خاتا سەزگۈ ، خاتا سەزگۈ. قاراڭ ، قوشنامنىڭ گۆش ئارلاشمىغان تائاملىرىغا ، مىسكىنلىك چىقىپ تۇرىدىغان ھويلا-ئايۋانلىرىغا . ئۈچ ۋاقلىقىغا قۇرۇق نان يەر ئۇيغۇر بالىسى، ھەي!  ئۇيغۇر نالىسى ، ئۇيغۇر نالىسى.......... ئاشكار

kizzik99

	بىر تالاي دادلاشلاركەنغۇ؟

88asra

	تېمىڭىزنى ئوقۇپ شۇنداق سۆيۈندۈم،شۇنداق تېتىملىق كۆڭۈلگە ياقىدۇ. خەنزۇ بازىرىنى تىلغا ئاپسىز ،راست سىز دىگەندەك پايپاق سىتىۋاتقان چوڭ ياشلىق ئانىلارنى،پارچە-پۇرات نەرسىلەرنى كۆتۈرۈپ سىتىۋاتقان ساقاللىرى ئاقارغان بوۋايلارنى كۆرۈپ مېنىڭمۇ ئىچىم سېرىلىدۇ.ئۇنداق كىچىك سودا قىلىۋاتقانلار خەنزۇ بازىرىدا كۆپ.ئۇلار ھالال ياشايدۇ،شۇنچىلىك ساپ.لىكىن ئاشۇ كىچىككىنە سودىنىمۇ قىلغۇزماي قوغلاۋاتقانلارنى مەنمۇ نەچچە ئۇچراتتىم،يايمىسىنى چاققان يىغىشتۇرمىغانلارغا قوللىرىنى چىنەپ تىللاۋاتقانلارنى كۆرۈپ ئىچىم ئاچچىق بولدى،مەنمۇ نەپرەتلەندىم،لىكىن ئامال يوق..............................

ئەزىزىم

	بۇنداق تەڭسىزلىكلەر ھەممە يەردە بار ئوخشايدۇ

gvlnigar

	خەنزۇ بازىرى دېگەن يەرگە كەلگەندە يۈرۈگۈم جىغغىدە قىلىپ قالدى ،   يۇرت قەدرىنى ئايرىلغاندا بىلىدىكەن ، بۇنداق تۇيغۇنى يۇرتىدىن ئايرىلىپ باقمىغان ، ياقا يۇرتلاردا سەرگەردان بولمىغان ئادەم پەقەتلام ھېس قىلالمايدۇ مېنىڭچە .

sahiba33

	ناھايىتى چوڭقۇر مەزمۇنلۇق ئەسەركەن،ئوقۇغانسېرى شۇنچە چوڭقۇر ھېس قىلىۋاتىمەن مەنىسىنى.

xatuti

	سىزنىڭ ئادەمنى ئويلاندۇرىدىغان يازمىلىرىڭىزنى يەنە كۆرگىنىمدىن خوشالمەن... مەرھابا باسقان قەدىمىڭىزگە!!!!!!!!!!!!!!!!!!!!!!!!!!!!!!!!!

.tuz.

	ئەسسىلامۇ ئەلەيكۇم ئاشكار ئەپەندىم ، ياخشى تۇرۋاتامسىز ؟ شۇنچە ئۇزاق بوپتىكەن سىزنى مۇنبەردە كۆرمىگىلى ، بۈگۈن ئاشكارا بولۇپ مۇنبەرنى نادىر يازمىلىرىڭىز بىلەن نۇر چاچقۇزىۋىتىپسىز . تېمىڭىزدىن بەكمۇ سۆيۈندۈم . ھايات دېگەن بىز كۈتكەننى ئەمەس ، بىز كۈتمىگەننى ئىلىپ كىلدىكەن . ھاياتلىق يولىمىزنىڭ ھەر بىر ئىزناسى قانداق ئادەملىكىمىزنى ، نىمىنىڭ مۇھىم ، نىمىنىڭ مۇھىم ئەمەسسلىكىنى بىلدۈرۈپ ،قانداق ياشىغانلىقىمىزنىڭ ئىسپاتى بولدىكەن ......

musilina

	كۆڭۈلدە ئويلىغان،ئېغىزدا ئىپادىلىپ بېرەلمىگەن تۇيغۇلار.... ئادەمنى ئويغا سالغۇدەك،تېتىتمىلىق يازمىڭىزنى كۆرگىنىمدىن خۇرسەنمەن....

نالەن

	ئاشكار ئەپەندىمنىڭ ‹ مەن بىر يۈرىكىگە ئوت كەتكەن ئادەم › دېگەن سۆزى راست بولسا، بۇنى ئەمەلىيەتتە ئىسپاتلاپ تۇرىشىنى ئۈمىد قىلىمەن. يەنى جىق- جىق يېزىپ تۇرىشىنى تىلەيمەن !