ئەزرائىلغا قىلىنغان چاقچاقلار

kirimjanyasin

	ئەزرائىلغا قىلىنغان چاقچاقلار (ھېكايە) كىرىمجان ياسىن(زەپەر) يېزىنىڭ چىتىگىرەك جايلاشقان بۇمەھەلىدە،ئادەم سانى ئانچە كۆپ بولمىسىمۇ، دىھقانچىلىقنىڭ ئالدىراش  ۋاقىتلىرىدىمۇ، كۈن چۈشتىن قايرىلغان ھامان بۇمەھەلىنىڭ دوقمۇشى ئادەملار بىلەن تولۇپ كىتىدۇ.بولۇپمۇ مەھەلىدىكى ياشلار،پاراڭخۇمار قېرىلارمۇ خۇددى بالدۇرراق چىقمىسا، ئاشۇ دوقمۇشتىكى بىرنەچچە تال ۋادەكتىن ياسالغان  پاكار،ئەبجىقى چىقىپ كەتكەن ئۇرۇندۇقلار قالمايدىغاندەكلا بىر-بىرىدىن قىزغىنىپ چىقىپ،ئوبدان جايلىشىۋالغاندىن كىين،بىر-بىرىگەگەپ بەرمەي،ئۆزىنىڭ ئاڭلىغان يېڭى گەپلىرىنى باشلىۋىتىدۇ. -ھوي،پالانى، ناھىيەگە باشلىق بولۇپ ئۆسۈپتۇ -جۇما!، -ۋاي،ئۇقانچىلىك ئىشتى،ھېلىقى توختى ئەبگا ھازىر ئىچكىرىدە ئىمىش،كاتتا لوبەن بولۇپ كىتىپتۇ. -ھەي،قاراڭلار!ھېلىقى قېرى موزدوزنىڭ قىزى،يانتام مەھەلىسىدىكى بارى بىلەن قېچىپ  كىتىپتۇ،ھەي كىچىكلاتۇرۇپ،ھە.... مۇشۇنداق بىرسىنى ماختاپ،بىرسىنى سۆكۈپ دىگەندەك،ئەيتاۋۇر ،ئايىغى چىقماس پاراڭلار،تېتىقسىزكۈلكىلەربىلەن،پۈتۈن كائىنات ئۇيقۇغا غەرق بولغاندا كىشىلەر بىر-بىرلەپ ئۆيلىرىگە قايتىشىدۇ. مانا بۈگۈنمۇ بۇدوقمۇش  قاش قارايماستىنلا باشقىچە جانلىنىپ،قىزىق پاراڭلارئەۋجىگە چىقتىپ كەتكەن ئىدى. بويى  ئىگىز كەلگەن توختى ئىسىملىك بىرەيلەن ھېچكىمگە گەپ بەرمەي،مەيدىسگە مۇشتلاپ سۆزلەۋاتاتتى. -قاراڭلار،كۆپچىلىك!يۇقارقى مەھەلىدە بىرئاغىينەم بارئىدى،بىرئولتۇرشىدا بىرچويلا لەڭمەننى يەپ قۇپۇپ كىتىدۇ،ئۇغۇل بالىدە ئۇ. -ۋاي،ئۇقانچىلىك ئىشتى-ئۇ،دىدى  ياسىن ئىسىملىك  ئاۋاق كەلگەن بىرى،-بىلسەڭ ئۇنى مەنمۇ يەيمەن،شۇ شارائىت يوق. بولمىسا،ياسىن تامىقىنى تامشىتىپ تۇرۇپ،ھىجيىپ قويدى.ياسىننىڭ تۇرمۇش شارائىتى تۆۋەن بولۇپ،غۇربەتچىلىكتە ئۆتەتتى.شۇنىڭ ئۈچۈنمىكىن گېلىغابەكلا ئامراق ئىدى.ئامال بار يەيدىغان نەرسە بولسىلا ھام ئىتەتتى.شۇنداق بولغىنىغا قارىماي بەكلا ئۇرۇق بولغاچقا مەھەلىدىكەرئۇنى «ياسىن ئاۋاق»دەپ ئاتىشاتتى. -پو ئاتما، ھاشىم ئىسىملىك بىربوۋاي،ئولتۇرغان جايىدىن ئاستا قىمىرلاپ قويدى،-ئاسان ئىش ئەمەس ئۇ،بىرچويلا لەغمەن جۇمۇ. -پو ئەمەس،ئىشەنمىسەڭ يەپ بىرەي،ئالە لەغمەنىڭى! دىدى ياسىن ئاۋاق،-سەن قارىغۇ نىمىنى بىلەتتىڭ. ھەممەيلەن پاراققىدە كۈلۈشۈپ كەتتى.ھاشىم بۇۋاينىڭ كۆزى ئەزەلدىن ئاجىزراق ئىدى.بۇگەپ ھاشىم بۇۋايغا ئېغىر كەلدى. -ئەگەر،دىدى ھاشىم بۇۋاي،سەن بىرچويلا لەغمەننى يەپ بولالىساڭ،مەن  مان مۇشۇ دوقمۇشتىن كۆزۈمنى تېڭىپ ئۆيۈمنى تېپىپ بىرىمەن،قانداق؟ -ھە،ھە.قېنى يانماڭلار.ئەتراپتىكىلەر بىردىنلا ئۇلارنى دەيدەيگە سېلىشقا باشلىدى. -مەنمۇ دىدى توختى، -سەن كۆزۆڭنى تېڭىپ ئۆيۈڭنى تاپالىسىاڭ،مەن  ئېغىلىمدىكى بۇقامنى تىكتىم.  ئېغىلىڭغا ئېلىپ چىقىپ بىرىمەن، گىپىم –گەپ... -ئالە،شەرىڭنى!.. پاراڭ ئەۋجىگە چىقتى. -ھېساپ،گىپىڭدە تۇر،-دىدى ھاشىم بۇۋاي ئورنىدىن يېشىغا ماس كەلمىگەن چاققانلىق بىلەن تۇرۇپ. -گېپىم،گەپ.توختىمۇ مەيدىسگە  مۇشتلاپ قويدى. باشقىلار ئادىتى بويىچە قىززىق بىرتاماشىنى كۆرۈشكە ئالدىراپ ھە دەپ دەيدەيگە سېلىشقا باشلىدى. -ئەمسە كىلىشتۇق،-دىدى ھاشىم بۇۋاي،-ئاۋال ماۋۇ ياسىن ئاۋاق،بىرچويلا لەغمەننى يەپ بولسا ئاندىن مەن كۆزۈمنى تېڭىپ ئۆينى تاپىمەندە،سىنىڭ بۇقاڭنى ئېغىلىمغا قامايمەن. شۇنداق قىلىپ ئارىدا كىلىشىم تۈزۈلدى.يەنى ياسىن ئاۋاق ئالدىن بىرچويلا لەغمەننى يەپ بولىدىغان،لەغمەننىڭ پۇلىنى كۆپچىلىك چىقىرىدىغان بولدى.ياسىن ئاۋاق  بىرچويلا لەغمەننى يەپ بۇلالىسا،ھاشىم بۇۋاي  دوقمۇشتىن كۆزىنى تېڭىپ ،ئۆينى تېپىپ بىرىدۇ.توختى بولسا بۇقىسىنى كۆتۈرۈپ ھاشىم بۇۋاينىڭ ئۆيىگە ئېلىپ چىقىپ بىرىدىغانغا كىلىشتى.توختى،ياسىن  ئاۋاق،ھاشىم بۇۋاي ئۈچەيلەن كۆپچىلىكنىڭ گۇۋاھچىلىقىدا بىردانە قەغەزگە ھۆججەت پۈتۈشۈپ،بارماقلىرىنى بېسىشتى،باشقىلارمۇ گۇۋاھچى سۈپىتىدە بارماقلىرىنى باستى.كىلىشىم تۈزۈلۈپ بولغاندىن كىين كۆپچىلىك،ھاشىم بۇۋاي،ياسىن ئاۋاق ۋە توختىلارنى ئالدىغا سېلىپ بازارغا مېڭىشتى. بازارنىڭ ئارلىقى خېلى بارئىدى.بۇلارنىڭ ھاللىقراقلىرىدىن بىرنەچچىسى ئۇيۇننىڭ قىزىقچىلىقىدا، ماينى تىجەپ، بىرسى سورسىمۇ ئاسانلىقچە بىرىپ تۇرمايدىغان موتسىكلىتلىرىنى ئېلىپ چىقىپ،ئارقىسىغا ئككى-ئۈچتىن ئادەمنى مىندۈرۈپ،ھەيۋە بىلەن بازارغا ماڭدى.ئالاھىزەل بىرەرسائەتلەردىن كىين يېزىنىڭ كالتە بازىرىغا يىتىپ كىلىشتى.كۆپچىلىك ئاۋال بىرئاشخانىغا كىرىشتى.ھەممەيلەن بىرئۈستەلنى چەمبەرسىمان ھالەتتە ئوراپ ئولتۇرۇشتى.ياسىن ئاۋاقتىن باشقىسىغا يېرىمدىن ئاش بۇيرۇتۇلۇپ،ياسىن ئاۋاققا بىرچويلا ھېساۋىدا بىرداسقا سەككىزدەك پۈتۈن ئاشنى بىرقلا راسلاپ بىرشنى بۇيرۇدى.ئاشپەز ئۇستام دەماللىققا تەمتىرەپ قالدىيۇ-بىراق،بىر قىززىقچىلىقنىڭ بارلىقىنى پەملەپ،خوش،-دىگىنىچە ئاشخاننىڭ تاماق بۆلۈمچىسىگە كىرىپ كەتتى.ھايال قالمايلا تاماق تەيياربولدى.ئاۋال كۆپچىلىك يېرىمدىن لەغمەننى ھاپلا-شاپلا يەپ بولدى.ئاندىن،-قېنى ،ساڭا كەلدى،دىگەندەك قىلىپ ياسىن ئاۋاققا تەڭلا قاراشتى.ياسىن ئاۋاقمۇ باشقىلار تاماق يەپ بولىغىچە يىمەي ئولتۇرغان ئىدى. -بىسىمىللا،ياسىن ئاۋاق تاماققا تۇتۇش قىلدى.دەسلەپتە قۇرساقنىڭ ئاچلىقىدا ئىككى پۈتۈن ئاش  ھېساۋىدىكى لەغمەننى يەپ بولدى.بارا-بارا قۇرسىقى تويغانسىرى بۇشاپ  كەتتى.ئويلاشمايلا پو ئاتقىنىغا سەل خىجىل بولغان ياسىن ئاۋاق يەنە چاندۇرماسلىققا تىرشىپ ئۆزىنى تاماققا زورلىدى.ياسىن ئاۋاق ،جۇغى كىچىك بولغان بىلەن خېلى ئىشتەيلىك ئىدى. بىكارلىق تاماق يىيىش باھانىسىدە شۇنداقلا دەپ قويغان ئىدى.بىراق ئەمدى ئىش چىڭغا چىققاندا بولالمايلا قالدى.داستىكى ئاش يېرىملىشاي دىگەندە ياسىن ئاۋاق بولالماي،ھارماي چاي ئىچىپ،ئۇياق-بۇياققا قاراپ قىمىرلاشقا باشلىدى.ئاشخانىدىكىلەرمۇ ئىشنىڭ تېگىگە يىتىپ،بەزىلەر توۋا دىسە،بەزىلەر،ھە قېنى،قېنى- دىگىنىچە ئۈستەلنىڭ ئەتراپىغا يىغىلىشتى.ياسىن ئاۋاق قاتتىق قىينىلىشقا باشلىدى.يىمەي دىسە يۈزى چۈشۈپ كىتىشتىن قورقىۋاتاتتى.يەي دىسە ماۋۇ قۇرساق دىگەن تۇلۇپلا كەتتى.ياسىن ئاۋاق يەنە بىردەم تاماققا ئۆزىنى زورلىۋىدى بىردىنلا ،«ۋايجان!» دىگىنچە ئۈستەلگە بېشىنى قويغىنىچە قۇرسىقىنى قاماللاپ،ئاچچىق تولغىنىشقا باشلىدى.كۆپچىلىك ئالاقىزادە بولۇپ،ياسىن ئاۋاققا قاراشتى.ياسىن ئاۋاقنىڭ چىرايى بۆلەكچىلا تاتىرىپ كەتكەن ئىدى.توختىماي ھۆ، قىلاتتى.ياسىن بولالماي قالغان ئىدى،كۆپچىلىك قۇرقۇشۇپ،تىزلا كۆتە-كۆتە قىلىشىپ،ياسىن ئاۋاقنى ئاشخانىدىن دوختۇرخانىغا كۆتۈرگىنىچە ئېلىپ چىقىشتى.ھېلىمۇ بازار بولۇپ قاپتۇ.دوختۇرخانىمۇ يېقىنلايەردە ئىدى.ياسىن جىددى بۆلۈمگە ئېلىپ كىرىلدى.ياسىن تاماقنى ھەددىدىن زىيادە كۆپ يىۋالغاچقا ئاشقازىنى يېرىلىپ كەتكەن بولۇپ ،ھاياتى خەۋىپ ئىچىدە قالغان ئىدى.يېزىلىق دوختۇرخانىدىكى دوختۇرلار دىئاگىنۇزقويۇپ بولغاندىن كىين،ياسىن ئاۋاقنى تىزدىن يۇقۇرى دەرىجىلىك بۆلۈمگە يۆتكىمىسە بولمايدىغانلىقىنى ئۇقتۇرى.كۆپچىلىك،ئاپلا! دىيىشكىنىچە ياسىن ئاۋاقنىڭ ئائىلىسىگە خەۋەر بىرىۋىتىپ،ناھىيلىك دوختۇرخانىغا جابدۇندى.ئاردىن ئىككى كۈن ئۆتتى،ياسىن ئاۋاق ناھىيلىك دوختۇرخانىدا جىددى داۋالىنىش ئارقىلىق خەتەرلىك باسقۇچتىن ئۆتۈپ كەتكەن بولسىمۇ،بىراق،يەنىلا دوختۇرخانىدا ئۇزۇن مۇددەت داۋالانمىسا بولمايتى.ئىككى كۈندىن بىرى ياسىن ئاۋاققا قاراش ھەلەكچىلىكىدە يۈرگەن كۆپچىلىك ياسىن ئاۋاقنى ئايالىغا قالدۇرۇپ ،خوشلىشىپ دوختۇرخانىدىن چىقىشتى.ھەممەيلەننىڭ دىمى ئىچىگە چۈشۈپ كەتكەن ئىدى.بىرھېساپتا دوختۇرخاندىكى ئاۋارچىلىقتىن قۇتۇلغىنىغا گەجگىسىدىن تاغنى ئېلىپ تاشلىۋەتكەندەك يىنىكلەپ قېلىشقان ئىدى.كۆپچىلىك  ئۆيلىرىگە قايتماقچى بولۇشۇپ  يېزا بازىرىغا كەلدى.ھەممىسى ئاتايىن بازارغا بىركەلگەندە دىگەندەك قىلىشىپ،بىر-بىرىنى دورىغاندەك ئۆيلىرىگە ئۇنى،بۇنى زورلاپ ئېلىشىپ،موتسىكلىتلىرىنى قويۇپ قويغان جايىدىن سالامەت تېپىپ،يەنە ئىككى-ئۈچتىن بولۇپ موتسىكلىتقا مىنىشىپ ئۆيلىرىگە قايتىشتى.كەچ بولا-بولمايلا بۇدوقمۇش يەنە قاينام-تاشقىنلىققا چۈمدى. ھاشىم بۇۋاي تۇرۇپلا قايناپ كەتتى. -ھوي، كۆپچىلىك،تۈزۈك ئىش قىلايلى-يا،ئىش بولدىمۇ،بۇ.بىكاردىن بىرمۇنچە ئاۋارىچىلىق تاپتۇق ئەنە. - ھە،كۆزۈڭنىڭ تېڭىلىشىدىن قورقىۋېتىپسەن-دە. كۆپچىلىك ھاشىم بۇۋانى مازاق ئوبىكتى قىلىۋالدى.بۇمەسخرىدىن ھاشىم بۇۋاينىڭ جېنى چىقىپلا قالدى. -ئىشنىڭ ئايغىنى چىقارمايمىزمۇ؟توختىنىڭ توپىقىنى  ئۆيۈڭگە ئېلىپ كەتمىسەڭ ھېساپ ئەمەس جۇمۇ. -ھەراست،ياسىن ئاۋاقنى دوختۇرغا ئېلپ بارىمىز دەپ تاسلا قاپتۇق ئۇنتۇپ قالغىلى..بۇ ئىش بارئىدى، ئەمەسمۇ؟ -بولدى قۇيۇڭلار،بالىلار،-دىدى بىرەيلەن چىراينى پۈرۈشتۇرۇپ،بۇرنۇڭلارغا سۇكىرمەپتۇ دىسە.ئاز ھەرەج تارتتۇقمۇ بىز،ئەمدى غىت قىسىپ  ئولتۇرايلى. -ھەي،ئاخىرىنى چىقارايلى ئەمدى،ياسىن ئاۋاقنىڭ ئىشى ئۆزى بىلەن،گەپ دىگەن گەپتە يەنە بۇئۇيۇننى كۆرمىسەك بولماس.كۆپچىلىك بىردىنلا يەنە قىزىشتى. -شۇنداق قىلساقمۇ قىلىلى،يىگىتلىكتە لەۋزە قىلىشىپتۇق ئەمدى،بۇنىمۇ كۆرۈپ باقايلى،قېنى سەنۇي،ھاشىم قارىغۇ!ئارىدىن بىرەيلەن ئەتراپقا بويۇنداپ قارىغاچ سۆزلىدى-ھە،قېنى كۆزۈڭنى تاڭدە ئۆيۈڭنى تېپىپ توختىنىڭ توپىقىنى ئېلىپ چىق. -شۇنداق،شۇنداق..كۆپچىلىك بىرئېغىزدىن تەستىقلاشتى. ھەي ئادەم دىگەننىزە،تۇرمۇشتىن ساۋاق ئالمايدۇ.شۇنداق قىلىپ كۆپچىلىك دوختۇرخانىدىكى بىسەرەمجانلىقنى بىردەمدىلا ئۇنتۇپ،يەنە ئۆز ئىشىغا  كىرىشتى.بىرسى تىزلا  ئۆيىدىن بىردانە قارا رەختنى تېىپىپ چىقىشتى.ھاشىم  بوۋاي باشقىلارنىڭ گەپتە چېقىشىدىن ئاچچىقى كىلىپ،بۇمەسىلھەتكە كۆندى.ھاشىم بوۋاينىڭ كۆزى تېڭىلدى. دوقمۇشتىن ھاشىم بۇۋاينىڭ  ئۆيگە بارىدىغان يول تۈپتۈز،قايرىلىدىغان  بۆلىكى يوق بولغاچقا ئۆينى تېپىشقا كۆزى يەتكەن ھاشىم بۇۋاي،-بىسمىللا، دىگىنىچە تەمتىلەپ مېڭىشقا باشلىدى. ھاشىم بۇۋاي  غولاچلىرىنى كىرىپ مېڭىشقا باشلىدى.ئون نەچچە مىتىر ماڭمايلا بېشى قايغاندەك ئۇياق-بۇياققا مېڭىشقا باشلىدى.تۇرۇپ-تۇرۇپ نىملەرگىدۇر پۇتلىشىپ يەرگە يىقىلىپ چۈشەتتى. تۇرۇپ-تۇرۇپ دەرەخكە  ئۈسسىۋالاتتى.بۇنداق قىزىق ئۇيۇندىن كۆپچىلىك قۇرساقلىرىنى تۇتۇشۇپ كۈلۈشەتتى.تاماشا قىززىپ كەتتى.ھاشىم بۇۋاي ماڭا-ماڭا بىردىنلا قايمۇقۇپ ھە-ھۇ بىلەن دوقمۇشتىن ئانچە يىراق بولمىغان  بىركۆلنىڭ لىۋىگە كىلىپ  قالدى.كۆپچىلىك بىردىنلا تىمتاس بولۇپ قالدى.ھاشىم بۇۋاينىڭ كۆلنىڭ لىۋىدىن قانداق  ئۆتىدىغانلقىنى بىركۆرۈپ باقماقچى بولۇشتى.ھاشىم بۇۋاي ئاستا  قەدەملەر بىلەن بىرقەدەم،بىرقەدەمدىن كىچىك چامداپ ،مۈدۈرگىنىچە مېڭىۋەردى. -ھاي ئاپلا،ئارىدىن بىرى ئەنسىز توۋلىۋەتتى.ھاشىمكام كۆلگە چۈشۈپ كەتمىسۇن، تۇتۇۋېلىڭلار! ئۇنىڭ گىپى تۈگە-تۈگىمەيلا ھاشىم بۇۋاي راسىتنلا، بىردىنلا كۆلگە غۇلاپ كەتتى.كۆپچىلىك ئەنسىز ۋارقىرغىنىچە كۆلگە يۈگۈرۈشتى.كۆل چۇڭقۇر،ئۈنىڭ ئۈستىگە دامبىسى يانتۇ ھالەتتە بولغاچقا دەماللىققا ھاشىم بۇۋاينى كۆلدىن سۈزۈپ ئالالمىدى.ھاشىم بوۋاي كۆزىگە تېڭىقلىق لاتىنى توختى قېرىشىپ  بەك چىڭ چىگىلگەنلىكتىن ھولۇققان ھاشىم بۇۋاي لاتىنى ئېلىۋىتىشكە تىرىشقان بولسىمۇ ئالالمىدى.،كۆلنىڭ ئىچىدە بىرچۈكۈپ،بىردە پىلتىڭشىپ، كۆلنىڭ دامبىسىغا چىقىۋىلشقا ئالدىراپ  يامىشىۋاتاتتى. ئورۇق قوللىرى كۆلنىڭ دامبىسىدىن قانداق تۇتۇۋالغىدەك بىر نەرسە ئىزدەيتى. بىراق ھاشىم بۇۋاي  ئۈستىگە ياماشقانسىرى تېيىلىپ، يەنە سۇغا چۆكۈپ كىتتەتتى.ھاشىم بۇۋاي ھېچقانچە ئۆتمەيلا ھالسىراپ چۆكۈپ كەتتى.كۆپچىلىك بىرنىمىلەرنى قىلىپ ھاشىم بۇۋاينى كۆلدىن  تىزلاچىقىرۋالدى.بۇۋاقىتتا ھاشىم بۇۋاي ئىنتايىن ھالسىراپ كەتكەن بولۇپ كۆزىدىكى قارالاتا تېخىچە تېڭىقلىق ئىدى.بىرەيلەن لاتىنى ئېلىۋەتتى.ھاشىم بۇۋاي سۇنى خېلىلا سۈمۈرۋالغان ئىدى.كۆپچىلىك ھاشىم بۇۋاينى ئوڭدىسىغا ياتقۇزۇپ،قۇرساقلىرىنى باستى.ھاشىم بۇۋاينىڭ ئاغزىدىن سۇ فونتاندەك ئېتىلىپ چىقتى.قاتتىق ھۆ قىلىشتىن ھاشىم بۇۋاينىڭ ئاجىز تىنى لاسسىدە بوشىشىپ،بىردىنلا جىمىقىپ كەتتى. تىنىقى ناھايىتى تەستە چىقىۋاتاتتى.كۆپچىلىك ساراسىمىگە چۈشتى.تېخى بايىلا ياسىن ئاۋاقنىڭ يېنىدىن كەلگەن كۆپچىلىك يەنە تىزلا ھاشىم بوۋاينى ياسىن ئاۋاق ياتقان دوختۇرخانىغا ئېلىپ ماڭدى.دوختۇرلار تەكشۈرۈپ كۆرۈپ،جىددى داۋالاش ئېلىپ باردى.بىراق ھاشىم بۇۋاي  ئېغىرھالسىزلىنپ كەتكەنلىكتىن ھەمدە قېرىپ قالغاچقا بەرداشلىق بىرەلمەي،ئارىدىن ئىككى سائەت ئۆتمەيلا جان ئۈزدى.مەھەللە قاتتىق ھازىدىن كىين بىرمەزگىل تىمتاسلىققا چۈمدى.دوقمۇشتىمۇ خېلى بىرمەزگىلگىچە ئادەم  كۆرۈنمىدى،ئاللىقانداق قىزىق پاراڭلارمو بولۇنمىدى.ھاشىم بۇۋاينىڭ ئۆلۈمىدىن كىين ئارىدىن بىرەر ئايچە ۋاقىت ئۆتكەندە ئەزەلدىن دوقمۇشتا پاراڭ سېلىپ كۆنۈپ قالغانلار ئۆزلىرىمۇ سەزمەي بارا-بارا بىرئىككىدىن بولۇپ يەنە دوقمۇشقا يىغىلىپ پاراڭ سالىدىغان بۇلۇۋېلىشتى.ئىش يەنە ئايلىنىپ ئىزىغا چۈشۈپ قېلىۋاتاتتى.بارا-بارا دوقمۇشتا يەنە بۇرۇنقىدەك تالاش-تارتىشلار،لاپ ئېتىشلار ئەۋجىگە چىقتى. -ھەي،ھاشىم بۇۋايمۇ زە،جىېنىغا چۈشلۇق گەپ قىلماي،دەيتى،توختى بېشىنى ساڭگىلاتقىنىچە،تاپالمىدى ئەنە. -تاپالىغان بولسا زە ئېغىلدىكى توپىقىڭدىن ئايرىلىىپ قالاتتىڭ جۇمۇ،ۋاي توختەك. -ھاشىم بوۋاينىڭ ئورنىدا مەن بولسامچۇ،كۆزۈمنى تاڭغاندىن تاشقىرى،خالتىغا سولاپ قويساڭمۇ،تاپالايتىم،-دىدى ئارىدىن بىرەيلەن. -چوڭ گەپ قىلما،-دىدى توختى،سەنمۇ تايىنلىق. -چوڭ گەپ ئەمەس ،سىزىمغا تاينىدىغان گەپ.ھاشىم بۇۋاي قېرىپ قالغاچقا سىزىملىرى قالمىغاچقا شۇڭا تاپالمغان نىمە ئۇ. قاتتىق كۈلگە كۆتۈرۈلدى. -ھەي-توختەك،سىنىڭ توپىقىڭنى بىرسى ئۇتمىغىچە بولمايدىغان ئوخشىمامدۇ؟بولمىسا يەنە بىرباغلىشىپ باقىلى. -ھە راسىت،شۇنداق قىلىڭلار-ئەتراپتىكىلەر يەنە ھە-ھۇ قىلىشتى. باغلاشساق باغلىسايلى!ناھايىتى كەلسە بىرتوپاققۇ،دۇنيانى ئۇتتۇرۋەتمىگەندىكىن.. -شۇ ئەمەسمۇ،بالىلار،ماندا قىززىق ئىشلارنى قىلىپ كۆڭۈل ئاچايلى.قېنى ھۆججەت پۈتۈشۈڭلار.. -ھېساپ... -يارايسەن ،ئۇغۇل بالا.ئەتراپتىن قىقاس-چوقان كۈتۈرۈلدى.شۇنىڭ بىلەن يەنە بىرپارچە ھۆججەت پۈتۈلدى.ھەممەيلەن  ھازىر كەچ كىرىپ قالغاچقا ئەتە ئەتىگەندە ئۇيۇننى باشلايدىغانلىقىنى پۈتۈشۈپ،تىزرەك تاڭ ئېتىشىنى تىلەپ،بىر-بىرلەپ ئۆيگە قايتىپ بولغۇسى قىززىق تاماشىنى تەقەززالىق بىلەن كۈتۈشتى.

bahram.cn

	شۇنداق قىلىپ بۇ قىمار بىرىنىڭ ئۆلۈشى ،بىرىنىڭ چالا ئۆلۈك بولىشى بىلەن تۈگەپتۇدە....

rohlan520

	ئاخىرى نىم بولا؟ مىنىڭ كۆزۈمنى باغلاپ مۇكاپات بىردىغان ئىش بولسا مەن تاپتىم جۇمۇ! (چاقچاق)

nurjahan0997

	مەن تېخى ئىدىيەدە راۋۇرۇس تەييارلىق قىلىپ باش ھەرىپى ئوخشاش  سۆزلەر بولسا ئوقۇپ بولغۇچە كېكەچلەپ قالماي دەپ تىللىرىمىنى بىلەپ كىرىپتىكەنمەن،ئەسلى ئىش ماندامىتى ھە قېېنى . بۇ ئەسەرنىمۇ باشلاپ كەتتۇق ئەمىسە....ھوررا... زەربىدارلار ئەتىرىتى ئورا كولايدۇ........ چاقچاق قىلىپ يازدىم قېرىندىشىم، ھەر قېتىمقى سۆز ئويۇنىڭىزنى ئوقۇغۇنىمدا ئانا تىلىمنىڭ نەقەدەر پاساھەتلىك تىل ئىكەنلىكىنى قەدەممۇ قەدەم ھېس قىلىمەن،ئىشلەتكەن شۇ سۆزلىرىڭىزگە ھەيران بولماي تۇرالمايمەن....... ھارمىغايسىز قېرىندىشىم يازمىڭىزغا تەشەككۈر

musilina

	ئۆزىنىڭ ھاياتىغا چاخچاق قىپتۇ ئۇلار..... ئىبرەتلىك يازمىكەن....

dilnaz911

	قاملاشمىغان ئادەملەركەن بۇلار،،،بىكاردىن بىر ئادەمنىڭ بېشىغا چىقتى دېسە،،،،

ئۇزچىم

	مۇشۇ ئاخىرىنى يازمايدىغان ئىشنىزە،ھەي......

barnakiz886

	قىمارنىڭ ئەسلى مەنىسى قىلما دىگەن سۆزدىن كەلگەنمىش... قېنى داۋامىنى كۆرۈپ باقايلى ،يەنە نىمە پاجىئەلەر يۈز بىرەركىن

barnakiz886

	قىمارنىڭ ئەسلى مەنىسى قىلما دىگەن سۆزدىن كەلگەنمىش... قېنى داۋامىنى كۆرۈپ باقايلى ،يەنە نىمە پاجىئەلەر يۈز بىرەركىن

only

	ناھايىتى ياخشى مەزمۇنلۇق ئەسەر ئىكەن، ھەقىقەتەنمۇ ئادەم دېگەن نەرسە ئويۇن دېسىلا ئاقىۋىتىنىڭ نىمە بولۇشى بىلەن كارى يوق دۈملا چۈشىدىكەن ، ھەتتا ئاچچىق ساۋاقلارنىمۇ بىر مەھەلدىلا ئۇنتۇپ يەنە قىلىدىغىنىنى قىلىدىكەن، ئەتراپىدىكى كىشىلەرنىڭ ھەتتا جانلىرىمۇ ھېچبىر ئەرزىمەس نەرسىدەكلا، قىمارنىڭ كۈچىمۇ بۇ ئەمدى، ۋە ياكى ئادەمدىكى شەيتاننىڭ كۈچىمۇ...