راست -يالغان مونولوگ

qaraxani

	راست -يالغان مونولوگ قاراخان سەپتىن ،رەتتىن قالغانلىرىم راست ، گەپتىن،نەپتىن  قالغىنىم يالغان، ئەلدىن بىر رەڭ  تالاشقىنىم راست، بارچە رەڭگە كۆيگىنىم يالغان. رەڭلىك سورۇن  ئولتۇرغىنىم راست، بۇرۇت تولغاپ يۈرگىنىم يالغان. ساڭىلا رام بولغىنىم ھەم  راست، كۆڭۈل ئوۋلاپ يۈرگىنىم يالغان. ياغلىق قاپاق بولغىنىممۇ راست، ياغلىما گەپ قىلغىنىم يالغان. يەرنى سىجاپ ئولتۇرغىنىم راست، سېنى يەردەك قىلغىنىم يالغان. يولدا سېنى قويغىنىم  ھەي!راست، ئەمما يولدىن چىققىنىم يالغان. يۇقۇرى تامان قارىغىنىم راست، ياماشماق بوپ يۈرگىنىم يالغان. يۈرىكىمگە  تۇتاشقان ئوت راست، يۈرىكىڭنى سۇ قىلغىنىم يالغان. ئاي يۈزۈڭنى ئاچقان ئىدىم راست، يۈز ئۆرۈدى دىگەنلەر يالغان. يېغىرىڭنى ئاچقانلىرىم راست، يېغىرىڭدىن قاچقىنىم يالغان. يىپسىز ساڭا باغلانغىنم راست، يىپنى ئاتلاپ كەتكىنىم يالغان. يىلىكىڭنى شورىغىنىم راست، قۇرۇتقىنىم يالغاندۇريالغان. ئېرىقىڭنى ياقىلىغىنىم راست، يات ياقىلىدى دىگىنى يالغان. كۆز قۇلاق بوپ يۈرگەنلىرىم راست، ئەستىن چىقىپ كەتكىنىڭ يالغان. بوسۇغاڭدا ئىت بولغىنىم راست، بوسۇغاڭدىن تانغىنىم يالغان. خام سۈت ئەمگەن بەندىلىكىم راست، سۈت ئۇيقۇدا ياتقىنىم يالغان. قەسەم پۇراپ تۇرغانلىرىم راست، قەسەمخور بوپ قالغىنىم يالغان. ئوماچ باردۇر قورسىقىمدا  راست، جىن بارلىقى ئەسلىدىن يالغان. قۇيرۇقۇمنى قۇم باسقىنى راست، ئامما ئۇنى قىسقىنىم يالغان. قىيىن كېچىك كەچكەنلىرىم راست، كەش بازاردا قالغىنىم يالغان. ئاتاق ئېلىپ يۈرگەنلىرىم  راست،، ساناقتا بەس بارلىقىم يالغان. تەتۈر چاپان كىيگەنلىرىم راست، تەقسىراتقا كەتكىنىم يالغان. بەڭگە خىيال سۈرگەنلىرىم راست، بەيگە ئالدى بولغىنىم يالغان. پۇۋلەپ قويسا ئۇچقانلىرىم راست ، ‹‹پىلسىرات››تىن ئۆتكۈنۈم يالغان. تاللىق باغقا كىرگەنلىرىم راست، جىگدە شېخى ئەگكىنىم يالغان. ئەللىك ياشقا كىرگەنلىرىم راست، سايەم ئىككى بولغىنى يالغان. نېسىۋىگە قول سوزغىنىم راست، شۈكۈر قىلىپ ياتقىنىم يالغان. 2014يىلى 4-ماي

qiqakkiz

	ياخشى يېزىپسىز ، ياندىشاي دىسەممۇ ئىلھام يوق .

چاقنار

	بەك ئېسىل مىسرالاركەن   ،بەك ياقتۇردۇم

vukux

	ياخشى يىزىپسىز

musilina

	ئېسىل مىسرالاردىن تۈزۈلگەن راست-يالغانلار...... قەلىمىڭىز ھارمىغاي...

AZAL0996AA

	پېچەت يېزىپسىز

r.uyghur

	كۆرۈپ زوق ئالغىنىم راس، تەسىرلەنمەي تۇرغىنىم يالغان.

arka1

	ياخشىكەن

太阳

	بەك قاملىشىپتۇ

nurjahan0997

	بىر يالغاندا 41 يالغان.....راستىنلا ئېىل يېزىپسىز