قۇياش نىمىشقا يالغۇز

qahqak

	[قۇياش يالغۇز نىمىشقا؟ (مەسەل) تۇرادىن ئابدۇرېھىم قۇياش بىلەن ئاي  بۇرۇن، ياشايدىكەن بىر ئۆيدە. كېچە-كۈندۈز ئوخشاشلا، يورۇق ئىكەن ئەسلىدە. تۇغۇلمىغاچ يۇلتۇزلار، يالغۇز ئىكەن ئىككىسى. ئىناق بىر جۈپ ئەر-خوتۇن، كائىناتنىڭ ئەركىسى. ئويلاپ بىر كۈن ئاي،قۇياش: «باستى بىزنى يالغۇزلۇق. بىزلەر قېرىپ ئۆلسەكمۇ، زېمىن تۇرسا يوپ-يورۇق.» ئۆتۈپ شۇنداق نەچچە يىل، كاتتا دەۋران سۈرۈپتۇ. پەرزەنت كۆرۈش ئىشقىدا، گۈلخان بولۇپ كۆيۈپتۇ. يىغلاۋېرىپ ئاينىڭمۇ، ئازلاپ قاپتۇ يورۇقى. بوپتۇ ئاخىر ھامىلدار، يوغىناپتۇ قورسىقى. سېزىكلىكتە ئاي خېنىم، يۈزىگە داغ چۈشۈپتۇ. بۇنى كۆرۈپ قۇياشباي، كۆڭلىگە ئىش پۈكۈپتۇ. سەت كۆرۈنگەچ ئايالى، قۇياشباينىڭ كۆزىگە. قوغلار ئىكەن چولپاننى، جۆرە قىلماق ئۆزىگە. چىقىدىكەن چولپان قىز، سەھەردە ئاي پاتقاندا. بۇزۇلۇپتۇ قۇياشباي، ئاي تۇغۇتلۇق ياتقاندا. چولپان ئايغا ئۆچ ئىكەن، بۇزاي دەپتۇ ئۆيىنى. كائىناتتا بىر قىلىپ، كۆرسەتمەكچى ئۆزىنى. بۇلۇت بوپتۇ سايىۋەن، ئىككىسىگە ئاسماندا. ئالداپ ھۈكەر چولپاننى، قۇياش قاپتۇ ئارماندا. تۇغۇلۇپتۇ بىر كۈنى، بەكمۇ ئوماق يۇلتۇزچاق. ئاي خېنىممۇ ساقىيىپ، بوپتۇ تولۇن(يۇمىلاق). قۇياش كۆرۈپ بۇ ئىشنى، يىغلاپ كەپتۇ يالۋۇرۇپ. بىراق ئاينىڭ يۈرىكى، قاتقان ئىكەن مۇز بولۇپ. ئەگشتۈرۈپ يۇلتۇزنى، كېتىپتۇ تۈن ئۆيىگە. قۇياش قاپتۇ يالغۇزلا، كۈندۈز دېگەن ئۆيىدە. شۇندىن بېرى تاپالماي، تولۇن ئايدەك خىلىنى. كۆرۈنمەستىن ئۆزئارا، قوغلىشىپ بىر-بىرىنى. تاڭ ئالدىدا ئازراقلا، كۆرۈنەركەن چولپان قىز. خىجىل بولۇپ ئىشىدىن، مەڭگۈ يالغۇز قالغان قىز. شۇڭا ھازىر كېچىدە، ئانا-بالا ئاي-يۇلتۇز. يورۇتۇپ تۈن-كېچىنى، قىلىۋېتەر ئاق كۈندۈز. قۇياش يالغۇز كۈندۈزدە، يوق يېنىدا بالىسى. كەچۈرمەپتۇ تەڭرىمۇ، بولغاچ كۆڭۈل ئالىسى.

Gvlmisal

	ۋاي بۇ بەت يۈزى قانداق چىقىۋاتىدۇ؟

ئالمىچى

	قۇياش يالغۇز لىكىن ئۇنىڭ چوڭلىقى ئوننەچچە يەر شارىدىنمۇ چوڭ.

yasenm

	ياخشى چىقىپتۇ ، تەبئەت جىسىملىرنىڭ ئالاھدىلكى بىلەن قەدىمكى رىۋايەت تۇسىنى ئالغان ھىكايە بىلەن بىرلەشتۇرلۇپ ،بىرخىل تىتىملىق شئىرى ئىجادىيەت بوپتۇ . ئىش قىلىپ ئەدەبياتنىڭ گۇزەللىكى روشەن ئپادىلنىپتۇ

ئەزىزىم

	بەك   ياخشى چىقىپتۇ .

UYGRAF

	بۇ سۇئالغا قاسىم سىدىق (زىيا) ئەپەندى جاۋاپ بەرسە ئەڭ توغرا بولىدۇ.

شرئەلى118

	شىئېرغۇ ياخشى چىقىپتۇ ، لىكىن مەزمۇنىنى نەدىن تاپقانسىز ؟

ئۇتغۇر

	مەسەلنى ياخشى يېزىپسىز!

kudiratjan

	ئالمىچى يوللىغان ۋاقتى  2014-6-2 09:31 AM قۇياش يالغۇز لىكىن ئۇنىڭ چوڭلىقى ئوننەچچە يەر شارىدىن ... ئوننەچچە ھەسسە ئەمەس . قۇياشنىڭ ھەجىمى يەرشارىنىڭ بىرمىليۇن ئۈچيۈزمىڭ ھەسسىگە باراۋەر  . ئېغىرلىقى يەرشارىنىڭ تەخمىنەن ئۈچيۈز ئوتتۇز ئۈچمىڭ ھەسىگە باراۋەر    زىچلىقى يەرشارنىڭ تۆتدىن بىر ھەسىگە باراۋەر ..