ئالدامچىدىن تېلېفۇن كەلدىمۇ؟

Yarmohammed

	ئالدىنقى ھەپتە ئالدامچىلىقتىن ھەزەر ئەيلەش توغرىسىدا ئىككى تېما يېزىپ يوللىغان ئىدىم، شۇ تېمىلىرىم خېلى كۆپ قېرىنداشلارنىڭ قوللىشىغا ئېرىشكەن. بۈگۈن شۇ تېمىلارنىڭ ئاخىرىغا يەنە بىر تېما ئۇلاپ يوللىدىم. مېغىزىنى قوبۇل قىلارسىزلەر. بەزىدە شۇنداق تېلفۇنلارنى قوبۇل قىلىسىز، قارشى تەرەپ سىز ئىسمىنى كۆرۈپ ئەمەس ئاڭلاپمۇ باقمىغان، ئەتراپىڭىزدىكىلەرمۇ بىلمەيدىغان ئەيتاۋۇر بىر شېركەت. قارشى تەرەپ سىزنىڭ ئىسمىڭىز، تېلفۇن نۇمۇرىڭىز ھەتتا ئۆيىڭىزنىڭ ئادرىسى قاتارلىق نۇرغۇن شەخسىي ئۇچۇرلىرىڭىزنى بىلىدۇ. سىز قاچان قايسى ۋاقىتتا شۇلارغا دەپ بەرگەنلىكىڭىزنىمۇ يادىڭىزغا ئالالمايسىز. ئەگەر شۇنداق تېلفۇن تاپشۇرۇپ ئالغان بولسىڭىز، مۇبارەك بولسۇن، سىزنىڭ شەخسىي ئۇچۇرلىرىڭىز بەلكىم باشقا ئالدامچىلار ياكى مال ساتقۇچىلارنىڭمۇ قولىدا بار بولۇشى مۈمكىن. ئەمدى مۇشۇنداق ئەھۋالنىڭ كېلىپ چىقىش سەۋەبى ئۈستىدە توختىلاي. 1. سىز ئىشىنىپ شەخسىي ئۇچۇرلىرىڭىزنى قالدۇرغان شېركەتلەر سىزگە ئاسىيلىق قىلغان. شىنلاڭ تورى خەۋىرىگە ئاساسلانغاندا، نۇرغۇنلىغان ماشىنا سېتىش نۇقتىلىرى ۋە بەزى بانكىلار خېرىدارلارنىڭ شەخسىي ئۇچۇرىنى مۇناسىۋەتلىك شېركەتلەرگە سېتىش ئارقىلىق ئارىدىن پايدا ئالغانلىق قىلمىشلىرى مەۋجۇت. بۇ شېركەتلەر ئۆز خىزمىتى سەۋەبلىك سىزنىڭ ئىسىم فامىلىڭىز، كىملىك نۇمۇرىڭىز، تېلفۇن نۇمۇرىڭىز، ئادرىسىڭىز، ماشىنىڭىزنىڭ تىپ نۇمۇرى قاتارلىق نۇرغۇنلىغان مەخپىي ئۇچۇرلىرىڭىزغا ئېرىشىدۇ. لېكىن بۇ شېركەتلەردىكى مەلۇم كىشىلەر خىزمەت قولايلىقىدىن پايدىلىنىپ، سىزنىڭ شەخسىي ئۇچۇرلىرىڭىزنى باشقا شېركەتلەرگە سېتىپ بېرىدۇ. 2. ئۆزىڭىزنىڭ بىخەستىلىكىدىن بولغان. بەزى شېركەتلەر سىزنى ھەقسىز مۇلازىمەت بىلەن تەمىنلەش باھانىسىدا سىزنىڭ شەخسىي ئارخىپلىرىڭىزنى ئىگەللەيدۇ. ئاندىن باشقا شېركەتلەرگە سېتىپ بېرىدۇ ياكى ئۆز مەھسۇلاتىنى توختىماي سىزگە تەشۋىق قىلىدۇ. ئۈچ يىلنىڭ ئالدىدا مەلۇم سۇغۇرتا شېركىتى ماڭا تېلفۇن قىلدى. ئۇلار ماڭا 60 كۈنلۈك ھەقسىز سۇغۇرتا سوۋغا قىلماقچى ئىكەنلىكىنى ئېيتقاندا مەنمۇ كۆپ ئويلاشمايلا ماقۇل دەپتىمەن. ئاندىن ئۇ خىزمەتچى خادىم تېلفۇندا مەندىن كىملىك نۇمۇرۇم، ئىسمىم، تۇرۇشلۇق ئادرىسىم قاتارلىق مەزمۇنلارنى سورىدى. مەن ئۇلارنى دۆلەت ئېگىلىكىدىكى سۇغۇرتا شېركىتى ئىشەنچلىك دەپ ئويلاپ ھەممىنى دەپ بېرىپتىمەن. ئارىدىن 3 ئاي ئۆتۈپ، ئاندىن ئۆزۈمنىڭ ئالدانغانلىقىنى ھېس قىلدىم. ئالدى بىلەن ھەر ئايدا دېگۈدەك تېلفۇن قىلدى. تېلفۇننى ئالسام ماڭا توختىماي ئۆزىنىڭ ئەڭ يېڭى سۇغۇرتا تۈرلىرىنى تونۇشتۇردى. مەن سېتىۋالمايمەن دېسەم يەنە بولدى قىلماي سۆزلەۋەردى. شۇنىڭدىن كىيىن تېلفۇننى ئالمايدىغان بولدۇم. لېكىن ئۇلار بۇنىڭلىق بىلەن بولدى قىلمىدى. ھەر قېتىم تېلفۇن قىلسا دەرھال بېسىۋەتسەم، ئەتىسى يەنە تېلفۇن قىلدى. يەنە بېسىۋەتسەم بىر كۈن ئۆتۈپ يەنە تېلفۇن قىلىدۇ. ئاخىرى چىداپ تۇرالماي، بىر شەنبە كۈنلۈكى ئەتتىگەندە تېلفۇن قىلغاندا تازا تىللاپتىمەن. ھەم قايتا تېلفۇن قىلساڭ ئۈستۈڭدىن ئەرز قىلىمەن دېدىم. شۇنىڭ بىلەن تېلفۇن قىلىش قېتىم سانى بىراقلا ئازلىدى. لېكىن يەنە ئىككى ئۈچ ئايدا بىر قېتىم ماڭا تېلفۇن قىلىپ ئەھۋال سوراپ تۇرىدۇ. مەندىن نەسىھەت، ئەگەر سىز ئىھتىياج بولمىغان نەرسىلەرنى سوۋغا قىلىدىغان شېركەتلەرگە ئالدىراپ شەخسىي ئۇچۇرلىرىڭىزنى قالدۇرماڭ. 3. سىزنىڭ تېلفۇنىڭىز سىزگە ئاسىيلىق قىلغان. تېلفۇنىڭىزغا بەزى دېتاللارنى قاچىلىغاندا، شۇ دېتالغا تىزىملىتىش ئۈچۈن چوقۇم تېلفۇن نۇمۇرىڭىز بىلەن تىزىملىتىشنى تەلەپ قىلىدۇ. بۇ بىر جەھەتتىن ئۇچۇر بىخەتەرلىكىگە كاپالەتلىك قىلىش ئۈچۈن بولسا، يەنە بىر جەھەتتىن سىزنىڭ شەخسىي ئۇچۇرلىرىڭىزغا ئېرىشىش ئۈچۈن بولۇپ، ھامان بىر كۈنى سىزنى ئاۋارە قىلىدۇ. بولۇپمۇ ماۋۇ تېمىدا تونۇشتۇرۇلغان پۇل تاپقىلى بولىدىغان دېتاللار. شۇ دېتاللارنى قاچىلىسىڭىز سىزگە بەلكىم ھېچقانداق ئىشقا ئەسقاتماسلىقى مۈمكىن. لېكىن قارشى تەرەپ سىزنىڭ تېلفۇن نۇمۇرىڭىز ۋە شۇ ۋاقىتتىكى ئورنىڭىز قاتارلىق ئۇچۇرلارغا ئېرىشەلەيدۇ. ھەم باشقا ئۇچۇرلار بىلەن بىرلەشتۈرۈپ ئاخىرىدا سىزنىڭ خېلى كۆپ شەخسىي ئۇچۇرلىرىڭىزغا ئېرىشىدۇ. ئاندىن بۇ ئۇچۇرلىرىڭىزنى نېمە ئىشلارغا ئىشلىتىدىغانلىقىنى سىزمۇ بىلىپ بولالمايسىز. شۇڭا، ھەر ۋاقىت ئېسىڭىزدە بولسۇن. سىزنىڭ تۇرۇشلۇق ئادرىسىڭىز، خىزمەت ئورنىڭىز، ئائىلىڭىزدىكىلەرنىڭ خىزمەت ئورنى ۋە ئىسمى، تۇغۇلغان كۈنى، كىملىك نۇمۇرى، بانكا كارتا نۇمۇرى قاتارلىقلار سىزنىڭ شەخسىي ئارخىۋىڭىز ئارىسىدىكى مەخپىي تۇتۇشقا تىگىشلىك مەزمۇنلار بولۇپ، قارشى تەرەپنىڭ نېمىگە ئىشلىتىدىغانلىقىنى بىلمەي تۇرۇپ ئاشكارىلاش ئۆزىڭىزنىڭ بىخەتەرلىكىگە خەۋپ ئېلىپ كېلىدۇ. شۇڭا كەڭ قېرىنداشلار ھۇشيارلىقنى ئۆستۈرۈپ، شەخسىي ئارخىپلىرىڭىزنى ئاشكارىلاپ قويۇشتىن ساقلىنىڭ. مەنبە: ئۆزۈم. ئاپتور ۋە مەنبەنى ئەسكەرتكەندىن كىيىن ھەرقايسى مۇنبەر ۋە ئۈندىدار سۇپىلىرىدا تارقاتسىڭىز بولىدۇ.

azrat705

	ئۈندىدار ئىشلەتكۈچىلەرگە ： يېقىندىن بېرى ئۈندىدار دوستلار چەمبىرىكىدە مەلۇم مەھسۇلاتنى ياكى بىرەر يازمىنى دوستكىرىڭىزنىڭ قوللاش 〈 赞〉سانى 40 ياكى 50 كە يەتسە چەتئەلگە ھەقسىز ساياھەتكە چىقىرىمىز ياكى قىممەت باھالىق سوۋغات بۇيۇمى بىلەن مۇكاپاتلايمىز دەيدىغان بىر ئىش پەيدا بولدى ، ئەمىلىيەتتە بۇ يېڭىدىن بارلىققا كەلگەن ئالدامچىلىق قىلىش ۋاستىسى   يەنى سىز 50 دانە قوللاش قا ئېرىشىپ رەسىمگە تارتىپ ئۇلارغا يوللاپ بەرگەندىن كېيىن ئۇلار دەرھاللا سىزگە تېلفۇن قىلىپ كىملىك نۇمۇرىڭىز ۋە ئىسىم فامىلىڭىزنى بانكا كارتا نۇمۇرىڭىزنى تۇرۇشلۇق ئورنىڭىزنى سۇرايدۇ ئاندىن سىزنىڭ مۇكاپاتا ئېرىشكەنلىكىڭىزنى ، ساياھەت قىلىشقا بىر تۇتاش كارتا ئىشلىتىدىغانلىقىنى ، ساياھەت قوللانمىسى ۋە بىر تۇتاش كارتىنىڭ سىزگە تىز يوللانما ئارقىلىق ئەۋەتىلىدىغانلىقىنى شۇڭا سىزنىڭ 30～40 يۈەنگىچە پوچتا ھەققىنى ئالدىن تاپشۇرىشىڭىز كېرەكلىكىنى ئېيتىپ سىزدىن كەم بولغاندا 30 يۈەن پۇل ئالىدۇ （بۇ پۇلنى سىز ئۇلارنىڭ كارتىسىغا سېلىپ بىرسىز（ ، ئۇلار تىز يەتكۈزۈش شىركىتى بىلەن توپ باھانى سۆزلەشسە ھەر بىر يۈرۈش يوللانمىنى بەش ～ئالتە يۈەنگە ئەۋەتىدۇ ، ئارىدا كەم بولغاندا 20 يۈەن پايدا قالغاندىن سىرت ئۇكارنىڭ قۇلىدا يەنە بىر گۈھەر بار ، ئۇ بولسىمۇ سىزنىڭ شەخسىي ئۇچۇرىڭىز ، ئۇلار سىزنىڭ كىملىك نۇمۇرىڭىز ئىسمىڭىز تۇرۇشلۇق ئورنىڭىز تېلفۇن نۇمۇرىڭىز خىزمىتىڭىز قاتارلىق شەخسىي ئۇچۇرلىرىڭىزنى باشقا شىركەتلەرگە سېتىپ بىرىدۇ ، شۇڭا سىز توختىماستىن مال تۇنۇشتۇرىدىغان ياكى باشقا ئۇسۇلدىكى ئۇرۇلغان تېلفۇننى قۇبۇل قىلىسىز شۇڭا كەڭ ئۈندىدار ئىشلەتكۈچىلەر ئىھتىياتچان بۇلۇڭلار

izqel

	مەن مۇشۇ كەمگىچە ئۆز تىلدا ئەمەسلەرنىڭ تىلپۇنىنى ئالمايمەن.خەنسو تونۇشلارنىڭ نۇمۇرى بىلىشلىك.ئۇلارنىڭكىنى ئالىمەن.ئەمما نۇمۇرى كۆرۈنمەيدىغان تىلپۇن ۋە باشقا تىرىڭشىپ قايتۇرشىمىزنى كۈتكەنلەرنىڭ نۇمۇرىنى ئۆچۈرۋىتىپ ياكى بىسىۋىتىپ قۇتۇلىمەن.

tagtuxlar

	مەنمۇ شۇنداق بىر تىلفۇننى تاپشۇرۇپ ئالغان .ئۇلارنىڭ ئاغزىدىكى مىنىڭ شەخسى ئۇچۇرلۇرۇمنى ئاڭلاپ ھەيران قالغان ئىدىم .

basut

	رەھمەت،بىلىۋېلىشقا تېگىشلىك ئىشلاركەن.

savut

	رەخمەت  بىلىۋالدىم

katran

	ۋۇججۇن، نېمىدىگەن خەتەرلىك ئىشلار ئەمدى بۇ، دىققەت قىلمىساق بولمايدىغان ئىشكەن جۇمۇ بۇ. ئالدىنقى يىللىرى ئىچكىرى ئۆلكىدىن توختىماي دۇكان تېلىفۇنۇمغا تېلفۇن كېلىدىغان بولىۋالدى، تېلفۇننى ئالسام خەنچە سەن بىزنىڭ بۇ يەردە سۇغۇرتىغا قاتنىشىپ 20 نەچچە مىڭ يۈەن داۋالىنىش سۇغۇرتا ھەققى ئاپتىكەنسەن، بۇ يىللىق سۇغۇرتا ھەققى تۆلەيدىغان ۋاقتىڭ بوپتۇ، ۋاقتىدا تۆلىۋەت دىدى، مەن خوتەندە تۇرسام، بۇ تېلفۇنمۇ خوتەندە تۇرسا نېمە بوپ ئۇ يەردە سۇغۇرتىغا قاتنىشىپ قالغۇدەكمەن دىسەم، ئۇنى مەن بىلمەيمەن ئىشقىلىپ 1200 نەچچە يۈەننى ۋاقتىدا تۆلىمىسەڭ قانۇنىي تەرتىپ بويىچە بىر تەرەپ قىلىمىز دەپ تولا كاسىلداپ ئاشۇ، ئاخىرى تىللاپ تېلفۇننى قويىۋېتىپ كېيىن تېلفۇن كەلسە ئالماسلا بولغانتىم، ھازىر كەلمەس بولدى ئۇ تېلفۇن، ئويلىنىپ باقسام دۇكان رەسمىيىتىنى بېجىرگەندە سودا- سانائەت مەمۇرىي باشقۇرۇش ئىدارىسىغا مۇقىم تېلفۇنۇمنى دەپ ئەنگە ئالدۇرغان ئىدىم، ئۇنىڭدىن باشقا ئورۇنغا مۇقىم تېلفۇن نومۇرۇمنى يېزىپ باققىنىم ئېسىمدە يوق، شۇنىڭغا قاراپ تۈگۈشۈپتۇق دەپ قالغان ئىدىم مەنمۇ. ئىشقىلىپ سەللا بىخەستەلىك قىلسا شەكلى ئۆزگەرگەن ھەر خىل ئالدىنىشلارغا ئۇچراپ قالىمىزكەن، ئۆزىمىزگە پۇختا بولۇشىمىز زۆرۈر بولۇپ قاپتۇ.

arka1

	رەھمەت ،ياخشى تىمىكەن ،

ئالمىچى

	ھەقىقەتەن دىققەت قىلمىساق بولمايدىكەن. ھە راس دوسلار، چ چ، ئۈندىدارلار قاچان نۇرماللىشا؟

ablimitt

	مەنغۇ 100مىڭ يۈەن مۇكاپاتقا كۆپ ئېرىشىپ كەتتىم، 2000-يىللاردىن باشلاپ كەم بولسا ھەر يېرىم يىلدا بىر مۇكاپات ئۇختۇرىشى تاپشۇرۋالىمەن، بەزىدە 300مىڭ يۈەنلىك ماشنا مۇكاپات چىقتى دەپ رەسىملېرىنى ئەۋەتىدۇ، كىيىن تىلفونلا قىلىدىغان بولدى...   ئۇ پۇلنى ساڭا بەردىم دىسەم ئۇنىمىسا قىيىنچىلىقى بارلارغا ياردەم قىلىۋىتىڭلار دەيمەن يەنە ئۇنىمايدۇ، بوش ۋاقتىم بولسا كۆپرەك كولدۇرلىتىپ قۇيىمەن...